1Sam 7 - Hdi

¹ Ka laha la Kiriyatʼyegharim ka kladaftá tsa akwata Yawe ya da həŋ. Ka klaghatá həŋ da həga Avinadav ta kuɗuŋur. Ka fatá həŋ ka ŋa Yawe ta zwaŋa ni Ilghazar ŋa nghapta ka tsa akwata Yawe ya.

Nzakwa Samuyel ka mnda klanatá kəma ta la Israʼila

² Daga baɗ fatá tsa akwata Yawe ya ma Kiriyatʼyegharim, lula fitik katakata mida ta maga vaku hisambsak. Mantsa tama, ka taw guyata ghəŋa la Israʼila demdem ta taw ka zba Yawe.

³ Ka Samuyel nda inda la Israʼila mantsa: « Ka ma hya hya ŋuɗufa ghuni ta vrakta kuni da Yawe katsi, hliŋwa hla mataba ghuni ta inda lazglaftaha mndəra sanlaha ma mnduha, nda fwatuha Ghasturet skwa wuyay. Ka vlata kuni ta ŋuɗufa ghuni ŋa Yawe, ka maganata kuni ta slna ta tsatsi turtukwa ni, dzaʼa plap pla ta kaghuni ma dzva la Filisti, » kaʼa.

⁴ Ka hliŋtá la Israʼila ta Baghal nda Ghasturet, skwa wuyay. Ka maganatá slna ta Yawe turtukwa ni.

⁵ Ka Samuyel mantsa: « Tskanawa tska ta la Israʼila demdem ma Mitspa, dzaʼa ndəɓay yu ta dzvu da Yawe ka ŋa ghuni, » kaʼa.

⁶ Ka tskavatá həŋ ma Mitspa. Ka zakaktá həŋ ta imi, ka paghata ta haɗik ta kəma Yawe, ka magatá suma baɗ tsa fitik ya, ka həŋ mantsa: « Gana ga ŋni ta dmaku ta Yawe! » ka həŋ. Ka tsanaghatá Samuyel ta guma ta la Israʼila ma Mitspa.

⁷ Ka snaŋtá la Filisti kazlay tskava tska la Israʼila ma Mitspa kəʼa, ka laf mghamha taŋ ŋa guyata nda vulu nda la Israʼila. Snaŋta la Israʼila, ka zləŋ həŋ ta zləŋ da la Filisti.

⁸ Ka la Israʼila nda Samuyel mantsa: « Ma nza ka tsəriɗa! Ma zlaŋnava ka! Waha ta wahu da Yawe, Lazglafta mu, ŋa katapta ni ta amu ma dzva la Filisti! » ka həŋ.

⁹ Ka klaftá Samuyel ta slaɓalakwa tuwak tata sa uʼa, ka mbəhata ka skwa pla ghəŋ ŋa dray tsuh tsuh ŋa Yawe. Ka wahu Samuyel ta wahu da Yawe ta ghəŋa la Israʼila. Ka tsuʼanaftá Yawe.

¹⁰ Ta vlə Samuyel ta tsa skwa pla ghəŋ ŋa dray tsuh tsuh ya, ta gavadaghatá la Filisti ŋa vulu nda la Israʼila, ama ka ghudzaganatá Yawe ta luwa katakata ta ghəŋa la Filisti baɗ tsaya. Ka zlaɓanaftá tsi ta həŋ ka mbəɗanatá həŋ, ka hwayaftá həŋ ta kəma la Israʼila.

¹¹ Ka sliʼagaptá la Israʼila ma Mitspa, ka hwayiŋtá la Filisti, ka rwadanatá həŋ dikw dista Betʼkar.

¹² Ka klaftá Samuyel ta pala ka dzugwata ma takataka Mitspa nda Seŋ, ka hgə tsi ka Iveŋghazer, kaʼa mantsa: « Ha da hadna katamata Yawe, » kaʼa.

¹³ Ka zlraftá la Filisti ta vraganatá ghəŋ, ŋləglam a həŋ ma kwakwara la Israʼila wa. Ka ksanaŋtá Yawe ta mbrakwa ni ta la Filisti ma nzakwa Samuyel ta ndiri.

¹⁴ Inda tsa luwaha si hlaghu la Filisti ya, ka varaganaghatá la Israʼila da dzva taŋ, daga ma Ghekruŋ dikw da Gat. Mantsa ya zluʼaghutá la Israʼila ta kwakwara taŋ da la Filisti. Ta ghəŋa tsa guli, ka nzatá zɗaku mataba i la Israʼila nda la Amuru.

¹⁵ Ka nzatá Samuyel ka mnda tsa guma la Israʼila ma nzakwa ni nda hafu.

¹⁶ Inda vaku ta dzaʼa da ranaftá Betel, nda Gilgal, nda Mitspa, ka tsanatá guma ta la Israʼila ma inda tsa vliha ya.

¹⁷ Ta vradagha vra dzagha ni ma Rama, vla tsay ni guli ta guma ŋa la Israʼila. Hada guli banafta tsi ta gwir ta Yawe.