1Sam 6 - Hdi

Vradanaghatá akwata dzratá wi da la Israʼila

¹ Ka zata akwata Yawe ta tili ndəfáŋ ma kwakwara la Filisti.

² Ka hagaftá la Filisti ta gwal dra skwi ŋa lazglaftaha taŋ, nda gwal ta ga ɗəgha, ka həŋ mantsa: « Nu dzaʼa mu magay nda na akwata Yawe na? Mnamawa mna ká mu dzaʼa vriŋta dzagha ni, » ka həŋ.

³ Ka həŋ mantsa: « Ka dzaʼa vriŋ vra kuni ta akwata Lazglafta la Israʼila, ma vriŋ kuni kul magatá lu ta sana skwi. Katək ná, maganawa maga ta skwa pla ghəŋ ŋa paya tvi. Tsaya ná, dzaʼa mbaku kuni, dzaʼa nda sna kuni kabgawu kwal mbrakwa ni tsaghuta nda kaghuni, » ka həŋ.

⁴ Ka la Filisti mantsa: « Mndəra wati pla ghəŋ ŋa paya tvi dzaʼa ŋni vlay? » ka həŋ. Ka həŋ mantsa: « Dzaʼa mbəha mbəha kuni nda fwata basər hutaf ka dasu, nda ŋa mbəga hutaf ka dasu taɓta mbsaka mghamha la Filisti, kabga nda kasa kuni demdem da tsa zləmnda turtuk ya, kaghuni nda mghamha ghuni tani.

⁵ Tsatsafwa tsatsa ta fwatuha basəra ghuni, nda ŋa mbəga ta ɓadza haɗika ghuni. Ka vlaŋta kuni ta glaku ta Lazglafta la Israʼila, kawayaka skwi dzaʼa htavaghu hta mbrakwa ni ta ghəŋa kaghuni, nda lazglaftaha ghuni, nda haɗika ghuni.

⁶ Kabgawu ta kəl kuni ka təŋa ghəŋ manda ŋa la Masar nda Firʼawna na? Ghuyanap ghuya Lazglafta ta ɗaŋwa ta həŋ, ka zliŋtá həŋ ta la Israʼila.

⁷ Ndanana, tsafwa tsa tama ta mwata sla turtuk ka lfiɗ, hlaf kuni ta vluʼuwa slaha his ta sa uʼa ŋa zwana taŋ, ta kul klaftá zuk. Ka hbafta kuni ta həŋ ta tsa mwata sla ya, ama ka vríŋta kuni ta zwana taŋ da gamaka taŋ.

⁸ Ka klafta kuni ta akwata Yawe, ka fafta ta tsa mwata sla ya. Tsa huzlaha ka dasu vla kuni ŋa pla ghəŋ ŋa paya tvi ya, ka pghamta kuni ma zlela ka fanavata ta vata tsa akwata Yawe ya. Tahula tsa, ka ghuníŋta kuni, ka laghwa tsi.

⁹ Ka fata kuni ta iri: Ka ksaf ksa tsi ta tvi ka ŋlu nda təv Betʼsemes ka dzaʼa ta haɗika ni katsi, Yawe ta magamatá tsa zləmnda dagala ya. Ka mantsa a tsi wu, dzaʼa nda sna amu kazlay na tsatsi a ta klamaktá tsa zləmnda ya wu, mantsa ya gi slamaghata tsaya kəʼa, » ka həŋ.

¹⁰ Ka magatá mnduha mantsa ya, ka hlaftá həŋ ta vluʼuwa slaha his tata sa uʼa ŋa zwana taŋ, ka hbaftá həŋ ta mwata sla, ta hlaghutá həŋ ta zwana taŋ ma gamaka taŋ.

¹¹ Ka faftá həŋ ta akwata Yawe ta tsa mwata sla ya, mantsa ya tsa zlela nda fwatuha mbəga ka dasu nda tsa ŋa basəra taŋ mida ya.

¹² Ka ksaftá tsa slaha ya ta tvi zur nda ma Betʼsemes. Ka laghu həŋ nda ta tsa tvi ya ka dzaʼa nda taw, mbəɗaŋ a həŋ ta vgha dər nda ga zeghwi, dər nda ga zlaɓa wa. Ka dzaʼa mghamha la Filisti ta hula taŋ ta hula taŋ, ha ta mukuma nda Betʼsemes.

¹³ Ta tska alkama ta vwah la Betʼsemes ma didiŋa. Kəʼa ka həŋ klaŋtá ghəŋ ná, ka nghaŋtá həŋ ta tsa akwati ya, ka rfu həŋ ta rfu nghaŋər həŋ.

¹⁴ Ɓhadaghata tsa mwata sla ya da vwaha Yəhusuwa, mnda la Betʼsemes, ka sladatá tsi hada ta vata sana pala dagala. Ka tatanaptá lu ta udza tsa mwata sla ya, ka vlatá lu ta tsa slaha ya ka skwa pla ghəŋ ŋa dray tsuh tsuh ŋa Yawe.

¹⁵ Ka kladatá la Levi ta akwata Yawe, nda tsa zlela ta vata ni nda huzlaha ka dasu mida ya, ka pghaftá həŋ demdem ta tsa pala dagala ya. Baɗ va tsa fitik ya, ka vlatá la Betʼsemes ta skwiha ŋa pla ghəŋ ŋa dray tsuh tsuh ŋa Yawe, nda sanlaha ma pla ghəŋ.

¹⁶ Na nghanata tsa mghamha la Filisti hutaf ya ta tsaya, ka vraghutá həŋ da Ghekruŋ baɗ va tsaya.

¹⁷ Wya tsa fwatuha basər ka dasu vla la Filisti ŋa Yawe ŋa pla ghəŋ ŋa paya tvi ya: Turtuk ŋa Asdut, turtuk ŋa Ghaza, turtuk ŋa Askəluŋ, turtuk ŋa Gat, turtuk ŋa Ghekruŋ.

¹⁸ Mbsaka fwatuha mbəga ka dasu ná, vla vla həŋ taɓ ta mbsaka inda luwaha la Filisti ka ŋa tsa mghamha hutaf ya, daga ta luwaha ŋaŋam lu ma matsaka huzlu, nduk nda zwana luwaha kul ŋaŋamtá lu ma matsak, ha ta tsa pala dagala faf lu ta akwata Yawe tida ya. Ta ma vwaha Yəhusuwa mnda la Betʼsemes tsa pala ya ha gita.

¹⁹ Ka rwanatá Yawe ta la Betʼsemes kabga hɗiŋadata taŋ ta akwata Yawe. Ka pslatá tsi ta mnduha ndəfáŋ mbsak mataba taŋ. Ka wahu mnduha ta wahu, kabga rwanata Yawe ta həŋ katakata nda zləmnda.

²⁰ Ka la Betʼsemes mantsa: « Wa dzaʼa laviŋtá sladata ta kəma Yawe tsa Lazglafta nda ghuɓa ya na? Dzaʼa klaghata diga mu diʼiŋ nda amu ta akwata ni na? » ka həŋ.

²¹ Ka ghunaftá həŋ ta gwal ghunay da la Kiriyatʼyegharim, ŋa mnanatá həŋ: « Vraganagha vra la Filisti ta akwata Yawe, sawa sa da klay, ka kladafta kuni da kaghuni, » ka həŋ.