1Sam 5 - Hdi

Akwata Lazglafta da la Filisti

¹ Ka zluʼaghutá la Filisti ta akwata Lazglafta ma Iveŋghazer, ka klaghata da Asdut.

² Tahula zluʼaghata taŋ ta tsa akwata Lazglafta ya, ka laghu həŋ fata ma həga Daguŋ ta vata fwata Daguŋ skwa wuyay taŋ.

³ Ga mahtsima ni, ka sliʼaftá la Asdut wrək sərɗək, ka slanaghatá həŋ ta zləmbatá Daguŋ tɗubutsa ta haɗik ta kəma akwata Yawe. Ka klaftá həŋ ta Daguŋ, ka vranafta ta vla ni.

⁴ Ga sərɗək baɗ mahkən ta tsavəgəldaghatá həŋ tɗubutsa Daguŋ ta haɗik ta kəma akwata Yawe kay guli. Ghəŋa ni nda dzvuha ni, hunzuɓa ta wa tgha, ghuva Daguŋ yeya ta pɗata.

⁵ Tsaya, ha gita, ta kəl gwal dra skwi ŋa Daguŋ, nda inda gwal ta lami da həga Daguŋ ma Asdut, kul haɗ ta fa səla ta wa tgha.

⁶ Ka marəglanaŋtá Yawe ta mbrakwa ni katakata ta la Asdut, ka ghuya ɗaŋwa ŋa taŋ, ka vlaŋtá tsi ta ɗaŋwa basər ta həŋ nda inda gwal ta kwakwara ni.

⁷ Nghanata la Asdut ta skwi ta magaku ná, ka həŋ mantsa: « Ma nza na akwata Lazglafta la Israʼila na da amu, maramaŋ mara na Lazglafta na ta mbrakwa ni katakata, amu nda lazglafta mu, Daguŋ tani! » ka həŋ.

⁸ Ka hagadaghatá həŋ ta inda mghamha la Filisti, ka tskavata da həŋ, ka həŋ nda həŋ mantsa: « Nu dzaʼa mu magay nda na akwata Lazglafta la Israʼila na? » ka həŋ. Ka həŋ zlghaftá wa ni mantsa: « Klay da Gat, » ka həŋ. Ka klaghatá həŋ ta akwata Lazglafta la Israʼila tama da Gat.

⁹ Ama na tsa klaghata ya, ka ksanaŋtá Yawe ta mbrakwa ni ta mnduha ma tsa luwa ya, ka hlutá zləŋ ta tsaha ya katakata. Ka dzuŋtá tsi ta gwal ma tsa luwa ya, zlrafta ni ta zwani ha ta galata mnduha, ka hlutá basər ta həŋ.

¹⁰ Ka klaghatá həŋ ta tsa akwata Lazglafta ya da Ghekruŋ. Ama na tsa gi ɓhadaghata akwata Lazglafta da Ghekruŋ ya, ka wahu la Ghekruŋ ta wahu, ka həŋ mantsa: « Wana klagaghata həŋ ta akwata Lazglafta la Israʼila da amu ŋa rwamata, amu nda mnduha mu tani! » ka həŋ.

¹¹ Ka hagaftá həŋ ta mghamha la Filisti, ka tskavata. Ka həŋ mantsa: « Vriŋwa vra ta tsa akwata Lazglafta la Israʼila ya! Ka vra tsi dzagha ni, yaha dá zaɗaŋnata, aŋni nda mnduha ŋni tani, » ka həŋ. Mbaɗa zləŋ ka hlutá mnduha ka rway katakata ma inda vli ma tsa luwa ya, kabga ksanaŋ ksa Yawe ta mbrakwa ni katakata ta həŋ.

¹² Mnduha kul rwuta ya ná, basər ŋa hahəŋ ta ɓasay, ka laghu waha mnduha trezekw ta luwa.