1Sam 4 - Hdi

¹ Inda gwaɗay Samuyel ta gwaɗa ya ná, ta fana fa la Israʼila ta sləməŋ. Ma sana fitik, ka sab la Israʼila ŋa dzaʼa da guyata nda vulu nda la Filisti. Ka fata həŋ ta ghuɓa taŋ ndusa nda Iveŋghazer, ta fata la Filisti ta ŋa taŋ ma Afek.

Zluʼaghuta la Filisti ta akwata dzratá wi

² Ka dzaftá la Filisti ta vgha ŋa vulu nda la Israʼila, ka nzəvavaftá tsa vulu ya, ka zatá la Filisti ta ghwa ta ghəŋa la Israʼila, ka pslatá həŋ ta mnduha ta kla dəmbuʼ fwaɗ (4.000) ma tsa ghwata vulu ya.

³ Ka vraghutá mnduha da ghuɓa taŋ. Ka galata mnduha la Israʼila mantsa: « Kabgawu kəl Yawe ka zlanaŋtá tvi ta la Filisti ŋa zatá ghwa ta ghəŋa amu gita na? Mbaɗma da klaktá akwata dzratá wi nda Yawe ma Silu. Ka mataba amu tsi katsi ná, dzaʼa katap kata ta amu ma dzva ghumaha mu! » ka həŋ.

⁴ Ka ghunaftá mnduha ta gwal ghunay da Silu, ka klagaghatá həŋ ta akwata dzratá wa Yawe mghama gwal vulu ta nzamta mataba kerubaha. Hada tsa zwana Iliya his, i Hufni nda Pinhas ya kawadaga nda akwata dzratá wa Lazglafta.

⁵ Na gi ɓhadamta tsa akwata dzratá wa Yawe ya da ghuɓu, ka hlaftá inda la Israʼila ta wi katakata da rfu, ha ka gigɗavaftá haɗik.

⁶ Ka snaŋtá la Filisti ta tsa hla wi katakata ya, ka həŋ mantsa: « Nahgani na hla wi katakata ma ghuɓa la Hebru na na? » ka həŋ. Manda snaŋta la Filisti kazlay akwata Yawe ya ta ɓhadaghata da ghuɓu kəʼa,

⁷ ka zləŋaftá həŋ ta zləŋ, ka həŋ mantsa: « Lazglafta ta ɓhadaghata da ghuɓa la Hebru, » ka həŋ. « Kadzeŋkadzeŋ! Ta magu a skwi manda na na wu, wabaw ŋa amu!

⁸ Wabaw ŋa amu! Wa dzaʼa da kataptá amu ma dzva tsa Lazglafta ta mbruta ya na? Tsatsi ta dzuŋtá la Masar ma mtak nda inda mndərga zləmndaha.

⁹ Ka ŋavata kuni! ka nzata kuni ka zgun zgun, la Filisti! Yaha kuni dá nuta ka vuʼa la Hebru manda si nzakwa hahəŋ ka vuʼa ghuni ya! Nzawa nza ka zgun zgun! Ndawwa! » ka həŋ.

¹⁰ Ka dihavatá la Filisti ka tsa vulu ya. Ka kwaraftá lu ta la Israʼila, ka hwayamtá inda mndu da tumpula ni. Rwana rwa lu ta la Israʼila ka malaghutá mbraku, ha ka pslatá lu ta sludziha dəmbuʼ hkən mbsak (30.000).

¹¹ Ka klaghatá la Filisti ta akwata Lazglafta, ka pslatá həŋ ta tsa zwana Iliya his, i Hufni nda Pinhas ya.

Mtakwa i Iliya nda ghwaʼala ni

¹² Ka ndaptá sana mndu ma mndəra la Biŋyamiŋ nda hwaya ma ghuɓa tsa vulu ya, ka ɓhadaghata tsi da Silu baɗ va tsaya nda kwahatá lgut, nda klubuŋwata ghəŋ da haɗik ka ŋizla taw.

¹³ Ta ɓhadaghatá tsi, ta nzaku Iliya ta wa tvi ta dughurukwa ni ta kəzlay skwi dzaʼa magaku, kabga ta ndanu katakata ta ghəŋa akwata Lazglafta. Ka lam tsa mndu ya da mna tsa gwaɗa ya ma luwa, ka wahu inda mnduha ma luwa ta wahu.

¹⁴ Manda snaŋtá Iliya ta wahu ma luwa, kaʼa mantsa: « Nu na wahu ta wahu dəmga na na? » kaʼa. Ka gi ndadaghatá tsa mndu ya mna tsa gwaɗa ya ŋa Iliya.

¹⁵ Təmbay mbsak tghas mida ima Iliya. Nda razla ira ni ɗekɗek, nghəgla a ta vli wa.

¹⁶ Ka tsa mndu ya nda tsi mantsa: « Sagha ɗa na na ma ghwata vulu, gita hwayafta yu hada, » kaʼa. Ka Iliya mantsa: « Nya kəʼa magaku ní, sagəŋ? » kaʼa.

¹⁷ Ka tsa mndu ta klaktá lwi ya mantsa: « Hwayaf hwaya la Israʼila ta kəma la Filisti, psla psla həŋ ta mnduha ka malaghutá mbraku, nda rwa zwana gha his his guli, i Hufni nda Pinhas, klaghu kla həŋ ta akwata Lazglafta, » kaʼa.

¹⁸ Na tsa kulaŋta ni ta akwata Lazglafta ya, ka nzeghwagatá Iliya ka makɗiŋilŋil daga ta tsa dughurukwa ni ta wa tgha luwa ya, ka pslutá warga ni, ka mtutá tsi. Hala ta mndu ya, gərdiɓ nzakwa ni guli. Fwaɗ mbsak vakwa ni ta tsa guma ma Israʼila.

¹⁹ Nda huɗi ghwaʼala ni markwa Pinhas, zakazaka ka yaku. Manda snaŋta ni ta klaghatá akwata Lazglafta, nda mtatá dzidza ni, nda zəʼala taŋ tani, ka kuzlanaftá yaku, ka frukwatá tsi ka yata.

²⁰ Ma dzaʼa ni kla hafu, ka tsa miʼaha kawadaga nda tsi ya mantsa: « Ksata ŋuɗuf, zwaŋa zgun ya ya ka! » ka həŋ. Ama mbəɗanagha a wu, kabga nda daɗa ghəŋa ni.

²¹ Ka tsanaftá tsi ta hgu ta tsa zwaŋa ni ya, ka Ikavut, manda mnay kazlay na: « Nda zaɗa glaku ma Israʼila, » kəʼa ya, kaʼa, dabga tsa klaghatá akwata Lazglafta, nda ya dabga i dzidza ni, nda zəʼala taŋ tani ya.

²² Kaʼa guli na: « Nda hla glaku ma Israʼila, kabga klaghata lu ta akwata Lazglafta, » kaʼa.