1Sam 3 - Hdi

Gwaɗganata Yawe ta Samuyel

¹ Ta maga slna tsa zwaŋ, ka Samuyel ya ŋa Yawe mista Iliya. Katakata a ta gwaɗganata Yawe ta mnda səla ma tsa fitik ya, dər ka maravata manda skwi ma suni guli wa.

² Tsa Iliya ya ná, ta htaku htaku mbrakwa ira ni, nghəgla a ta vli tɗukwa wa. Ma sana fitik, ta han tsi ta hana ni ma vli ya snu tsi,

³ ta mtá a pitirla Lazglafta karaku wu, ta hana ni Samuyel ma həga Yawe, ndusa nda vla fatá akwata Lazglafta,

⁴ ka hgaŋtá Yawe ta Samuyel. Ka zlghaftá tsi ta wi, « Away, wana yu! » kaʼa.

⁵ Ka hwayadaptá tsi da Iliya, kaʼa mantsa: « Wana yu, ta hga iʼi ka ra? » kaʼa. Ka Iliya nda tsi mantsa: « Hgaŋ a yu ta kagha wu, vra da hana gha, » kaʼa. Ka vraghutá tsi da hana ni.

⁶ Ka hgəglaŋtá Yawe ta Samuyel. Ka sliʼaftá Samuyel, ka lagha slanaghatá Iliya, kaʼa nda tsi mantsa: « Wana yu, ta hga iʼi ka ra? » kaʼa. Ka Iliya nda tsi mantsa: « Hgaŋ a yu ta kagha sagəŋ wu, vra da hana gha, » kaʼa.

⁷ Ta sna a Samuyel ta Yawe karaku wu, kabga ta mnanaŋ a Yawe ta gwaɗa ni karaku wa.

⁸ Ka hgəglaŋtá Yawe ta Samuyel ŋa mahkəna səla. Ka sliʼaftá tsi ka lagha slanaghatá Iliya, kaʼa nda tsi mantsa: « Wana yu, kagha ta hga iʼi ra? » kaʼa. Tsaya tama, ka graftá Iliya kazlay na Yawe ta hga tsa zwaŋ ya, kəʼa.

⁹ Ka Iliya nda Samuyel mantsa: « Vra da hana gha, ka hgəglagha hga tsi, ka ka dzaʼazlay nda tsi na: “Gwaɗa ta gwaɗa gha Yawe, ta snay snay kwalva gha,” ka ka dazlay, » kaʼa. Ka laghu Samuyel da vla hana ni.

¹⁰ Ka lagha Yawe sladata hada, ka hgaŋta manda ya tazlay. « Samuyel! Samuyel! » kaʼa. « Mna ta gwaɗa gha, ta snay snay kwalva gha! » kaʼa.

¹¹ Ka Yawe nda Samuyel mantsa: « Wana yu dzaʼa magatá sana skwi ma Israʼila. Inda mndu ya dzaʼa snaŋta, dzaʼa nza nza daghəzlaw.

¹² Baɗ tsaya dzaʼa hɗamta yu ta inda skwi mna yu ta ghəŋa Iliya nda gwal taŋ tani, daga zlrafta ha kɗavakta ni.

¹³ Snanam sna yu kazlay na dzaʼa tsanagha tsa yu ta guma ta la ga taŋ ŋa ɗekɗek dabga krughuva ni, kəʼa: Nda sna kazlay ta raza Lazglafta zwana ni, zlahanagha a ta həŋ wu, kəʼa.

¹⁴ Tsaya tama, waɗana waɗa yu ta la ga Iliya kazlay na haɗ dər skwa pla ghəŋ, dər skwa mbəhuha, dzaʼa walaŋta hərɗiŋtá krughuva taŋ wu kəʼa, » kaʼa.

¹⁵ Ka han Samuyel ta hana ni ha ga sərɗək. Sliʼafta ni, ka gwanatá tsi ta wa tghaha həga Yawe. Ka zləŋaftá Samuyel ta mna tsa skwi snaŋ tsi manda skwi ma suni ya, ŋa Iliya.

¹⁶ Ama ka hgaftá Iliya ta Samuyel, kaʼa nda tsi mantsa: « Samuyel, zwaŋa ɗa! » kaʼa. « Away, wana yu, » kaʼa.

¹⁷ Ka Iliya mantsa: « Nahgani tsa gwaɗa mna gha Yawe ya kay? Ma manaɗighu ka. Kdəkkdək, ka manaɗighu mana ka ta skwi dər turtuk ma inda gwaɗa ya mna gha Lazglafta katsi, ka tsaghagha tsa Lazglafta ta guma katakata, » kaʼa.

¹⁸ Mantsa tama, ka rusanaftá Samuyel ta inda ni demdem kul mananaghuta. Ka Iliya mantsa: « Tsatsi Yawe, ka maga tsi ta skwi ya ta zɗəganata! » kaʼa.

¹⁹ Ka glaku Samuyel. Kawadaga Yawe nda tsi, haɗ gwaɗaha ya ta sab ma wa ni ta dɗaghuta ta haɗik wa.

²⁰ Ka snaŋtá inda la Israʼila daga ma Daŋ ga mazlay dikw da Bəʼerseva ga maghura kazlay nda nza Samuyel ka vərɗa anaba Yawe kəʼa.

²¹ Ka gɗatá Yawe ta maravata da Samuyel ma Silu. Ta marava mara Yawe da Samuyel ma Silu, nda ma gwaɗa ni.