1Sam 2 - Hdi

Fa laha Hana

¹ Ka magatá Hana ta duʼa, kaʼa mantsa: « Ndəghiɗif ndəgha Yawe ta ŋuɗufa ɗa nda rfu, manda ghwá kapaɗifta Yawe. Nda guna wa ɗa ŋa ghuɓasa ghumaha ɗa, kabga ta rfu yu nda mbaɗifta gha.

² Haɗ mndu nda ghuɓa manda Yawe wu, haɗ sani ta ghəŋa kagha wa. Haɗ sana kutumba ŋa ɗifa mida manda Lazglafta mu wa.

³ Ma bərfgiŋ kuni ta gwaɗa nda gla ghəŋ, ma səglap gwaɗa ghərɓaku ma wa ghuni, kabga Yawe ná, Lazglafta nda sna ta skwi demdem ya, tsatsi ta graftá ndəgakwa inda slna ta magata mndu.

⁴ Ɓalanap ɓala lu ta lgheɗa bikwirha vulu, ama ka mutsaftá gwal kul haɗ mbrakwa taŋ ta mbraku.

⁵ Ta zba slna ŋa mutsa skwa zay taŋ gwal si nda bagha, ama ta mbiʼa vgha taŋ gwal si ta dzə maya. Dər dzəghəŋ ná, ndəfáŋ səla yata tsi ta zwaŋ, ta tsutá marakw si ta ya zwaŋ daghəraʼ.

⁶ Yawe ta klaptá hafu ma mndu, tsatsi ta famtá hafu. Tsatsi ta kladata da haɗik, tsatsi ta vraganafta.

⁷ Yawe ta fatá mndu ka pɗu, tsatsi ta nanafta ka gadghəl, tsatsi ta vraganata, tsatsi ta ŋlanafta.

⁸ Tsatsi ta sliʼanaftá pɗu ta kurvusaku ma rgitik, ta tsukwaptá sləpɗu ta maghdzək, ŋa nzanata kawadaga nda gwal dagaladagala, ta vlaŋ vla ta həŋ ka ŋa taŋ ta dughurukwa glaku. Guguɗiha haɗik ná, ŋa Yawe ya, ta həŋ fafta tsi ta ghəŋa haɗik.

⁹ Ta nghuŋ ngha ta wa səla ŋərma mndu, ama dzaʼa hanaf ha lu ta wi ta gwal dmaku ma grum, kabga haɗ mndu dzaʼa zata ghwa nda ŋa ni ma mbraku wa.

¹⁰ Dzaʼa hurɓu hurɓa ghumaha Yawe, dzaʼa ŋəzla ŋəzla Yawe ta luwa ta ghəŋa taŋ. Dzaʼa tsanagha tsa ta guma ta ghəŋa haɗik tender. Dzaʼa vlaŋ vla ta mbraku ta mgham ya zbap tsi, ta ŋlanaf ŋla manda ghwá ta mndu ya pahap tsi nda ma pghanaghatá rɗi, » kaʼa.

¹¹ Ka vraghatá Ilkana dzagha ni ma Rama, ama ka zlanatá tsi ta tsa zwaŋ ya ŋa maganatá slna ta Yawe mista Iliya mnda dra skwi ŋa Lazglafta.

Dmakwa zwana Iliya

¹² Zwana Iliya ná, la falay həŋ, sna a həŋ ta Yawe wa.

¹³ Kulam nda nzakwa taŋ ka gwal dra skwi ŋa Lazglafta, wya ka həŋ ta magay ŋa mnduha: Inda vlata mndu ta skwa pla ghəŋa ni ya ná, ta sagha sa duhwala mnda dra skwi ŋa Lazglafta ta fitika da tsa sluʼi ya, nda ŋatá gaya nzərak hkən wa ni ma dzvu,

¹⁴ ŋa tsəghadata ni da siga, ka da matusa, ka da dziŋisl, ka da maleʼuleʼu a tsi nda tsa gaya ya. Inda sluʼi ya dzaʼa tsəhagafta tsa gaya ya ná, ŋa mnda dra skwi ŋa Lazglafta tsaya. Mantsa ya ka həŋ ta magay ma Silu nda inda la Israʼila ta lagha da hada.

¹⁵ Ma kɗaku lu ka driŋtá ghwaviɗ ya, ta lagha la duhwala mnda dra skwi ŋa Lazglafta da mnanatá mndu ta vla tsa pla ghəŋ ya: « Yaha ta sluʼi ŋa sulay ŋa mnda dra skwi ŋa Lazglafta, tsuʼafta a ta datá sluʼi da kagha wu, ndirndira ni ta kum tsi, » kaʼa.

¹⁶ Ka ka tsa mndu ya mantsa: « Ka draf dra lu ta ghwaviɗ karaku, ka klaʼata ka ta ya kumaŋ ka, » kaʼa, ka tsa duhwal ya ta zlgha wa ni na: « Kay! Vliha vla ndana ndana, ka mantsa a tsi wu, klaʼata ɗa ka mbraku! » kaʼa.

¹⁷ Fərtu fərta dmakwa tsa duhwalha ya ta kəma Yawe, kabga ta kfariŋ kfara həŋ ta skwa mbəhu ta vlata lu ŋa Yawe.

¹⁸ Ta magay Samuyel ta slna ta kəma Yawe, zwaŋ nda suɗatá ifut ka liŋ ta vgha manda ŋa mnda dra skwi ŋa Lazglafta ya.

¹⁹ Inda vaku ma ni ta ganaftá zwaŋa sɗakw, ka klədanafta ta laf tsi kawadaga nda zəʼala taŋ da vla skwa pla ghəŋ ma vaku.

²⁰ Ka tfə Iliya ta wi ŋa Ilkana nda markwa taŋ, kaʼa mantsa: « Má ka vlagha vla Yawe ta zivir nda ma na marakw na, ŋa da manaka na vla tsi ŋa Yawe na! » kaʼa. Tahula tsa, ŋa vra taŋ dzagha taŋ.

²¹ Ka maranaŋtá Yawe ta zɗaku ta Hana, ka zlagh tsi ta huɗi ka yayatá zwana zgwana hkən, nda kuʼaha his. Ta glutá glakwa ni Samuyel tani ta kəma Yawe.

Dvay Iliya ta zwana ni

²² Tsa Iliya ya ná, haluhala katakata. Ka snaŋtá tsi kinawu ká zwana ni ta magaku nda inda la Israʼila, nda ya ká həŋ guli ta hahanaku nda miʼaha ta tskavata ta wa tgha tumpula guyaku.

²³ Kaʼa nda həŋ mantsa: « Inda mndu ta mna gwaɗa ta ghwaɗaka skwi ta mag kuni ta snə yu. Kabgawu ta kəl kuni ka maga skwiha mantsa ya na?

²⁴ Zlanawa zla zwana ɗa! Tsa skwiha ta mag kuni ta snə yu ta mnay mnduha Yawe ya ná, zɗa a snay wa.

²⁵ Ka gana ga sana mndu ta dmaku ta sana mndu katsi, dzaʼa mbəɗay Lazglafta ta gwaɗa tida, ama ka gana ga tsi ta dmaku ta Yawe, wa dzaʼa mbəɗa gwaɗa tida na? » kaʼa. Ama nda warga ta sna həŋ ta tsa skwi ta mnə da taŋ ya, kabga ta kumay Yawe ta rwanatá həŋ.

²⁶ Ka kəɗ tsa zwaŋ ka Samuyel ya ta glaku, zɗəgana zɗa ta Yawe, nda mnduha tani.

Gwaɗa ta həga ga Iliya

²⁷ Ka lagha sana mnda Lazglafta da Iliya. Kaʼa nda tsi mantsa: « Wya ka Yawe: “Marava a yu da dzidzíha gha, ma fitika nzakwa taŋ ma Masar, ka vuʼa Firʼawna wu ra?

²⁸ Iʼi ta zbaptá həŋ mataba inda mndəra la Israʼila, ŋa magihatá slna ɗa, ka gwal dra skwi ŋa Lazglafta, ŋa lafi ta gwira ɗa, ŋa dra urdi, ŋa kla ifut ta kəma ɗa. Vlaŋ vla yu ta dzidzíha gha ta inda skwa pla ghəŋ ŋa dray ta vu ta vlata la Israʼila.

²⁹ Kabgawu ta kəl kuni ka kfariŋtá skwa pla ghəŋ ta vlata lu ŋa ɗa, nda mbəhuha mnaf yu ŋa magay ma həga nzakwa ɗa na? Kinawu kəʼa magaku kəl ka ka malaghuta vlaŋtá glaku ta zwana gha ka iʼi na? Kabgawu ta kəl kuni ka laghwi da nuʼa vgha ghuni nda skwiha ɗina ɗina ta hlagaghata mnduha ɗa la Israʼila ŋa mbəha iʼi na?”

³⁰ Tsaya tama, ka Yawe, Lazglafta la Israʼila na: “Si mna mna yu kahwathwata kazlay na dzaʼa nzay gwal ga ghuni, nda zivira dzidzíha gha ŋa magihatá slna ŋa ɗekɗek kəʼa, ama ndanana, nzəglata a mantsa ya wu!” ka Yawe mnata. “Ta vlay yu ta sgit ŋa gwal ta vla sgit ŋa ɗa, ama gwal ta kfara iʼi ya, dzaʼa kfaraku hahəŋ guli.

³¹ Wana sagha fitik dzaʼa ɓlanapta yu ta mbrakwa gha, nda zivira dzidzíha gha. Haɗ mndu dzaʼa ɗyaftá sliʼiŋ ma zivira gha wa.

³² Dzaʼa nda ngha ka ta mnda hərzla ghuva gha ma həga nzakwa ɗa, ta vlaŋtá Yawe ta nzakw ləŋləŋ ta la Israʼila. Haɗ mndu dzaʼa walaŋta ɗyaftá sliʼiŋ ma zivira gha wa.

³³ Hliŋta a yu ta inda zivira gha wu, ama mndu ya dzaʼa zlanata yu ŋa magihatá slna dra skwi ta gwira ɗa ná, dzaʼa magay ŋa ndəghaghamtá ima taw ma iri, nda ya ŋa gurɗaghaftá ŋuɗuf. Ma ga duhwal dzaʼa rwakwa zivira gha.

³⁴ Dzaʼa mutsay ka ta ŋizla ni ta skwi dzaʼa slanaghatá zwana gha his, i Hufni nda Pinhas: Dzaʼa rwu rwa həŋ his his turtuk fitik.

³⁵ Tahula tsa, dzaʼa klagap kla yu ta vərɗa mndu ŋa magihata slna dra skwi. Dzaʼa magay ta slna manda ya ta kum yu nda ya ta ndanu yu. Dzaʼa sladana slada yu ta mndəra taŋ, dzaʼa gəɗata ta maga slna ŋa ɗekɗek ta kəma mndu ya dzaʼa zbapta yu nda ma pghanaghatá rɗi.

³⁶ Dzaʼa lagha la inda pɗakwa la ghuni da tsəlɓu ta kəma ni, ŋa mutsaftá sulay turtuk, nda zlambla buradi. Ka həŋ dzaʼazlay na: Kdəkkdək, klaf kla ta iʼi dər ŋa maga wati ma slna dra skwi ŋa Lazglafta, kada mutsafta yu ta ɓlatá buradi ŋa zay, ka həŋ dzaʼazlay,” » kaʼa.