1Sam 15 - Hdi

Vulu nda la Ghamalek

¹ Ka Samuyel nda Sawulu mantsa: « Iʼi ghunaf Yawe ŋa fatá kagha nda ma pghaghaghatá rɗi ŋa nzakwa gha ka mgham ta ghəŋa mnduha ni, la Israʼila. Ndanana tama, sna ta gwaɗaha mna Yawe.

² Wya ká Yawe mghama gwal vulu mnata: “Ta havak hava yu ta skwi ya magana la Ghamalek ta la Israʼila, ta sab həŋ ma Masar. Ka hanaftá həŋ ta tvi ta həŋ.

³ Ndanana tama, la pslatá la Ghamalek tuzluzl. Ka níŋta kuni ka skwa dzahay ta inda skwa taŋ. Yaha ka da zlanatá həŋ. Ka rwanata ka ta inda taŋ demdem, nda zgwana tani, nda miʼaha tani, nda zwani tani, nda vziʼuwa tani, nda slaha tani, nda rina fisik tani, nda ŋalibwaha tani, nda kəɗihha tani,” kaʼa, » kaʼa.

⁴ Ka tskanatá Sawulu ta sludziha ma Təlaʼim, ka mbəɗaftá tsi. Ka slanaghatá tsi ta gwal nda səla dəmbuʼ his dərmək (200.000), nda mnduha la Yahuda dəmbuʼ ghwaŋ (10.000).

⁵ Ka hladaptá Sawulu ta həŋ ndusa nda luwa la Ghamalek, ka pghatá həŋ ta buɗukwa ma lika.

⁶ Ka Sawulu nda la Keŋ mantsa: « Lawa la, tawa ta ta vgha, laghuwa la diʼiŋ nda la Ghamalek dá gwighunista yu mista taŋ, kabga maranaŋ mara kaghuni ta zɗaku ta la Israʼila ta sab həŋ ma Masar, » kaʼa. Ka dgaghutá la Keŋ ta vgha diʼiŋ nda la Ghamalek.

⁷ Ka pslatá Sawulu ta la Ghamalek daga ma Havila dikw ta tva lami da Sur mbəŋ nda Masar ya.

⁸ Ka ksaftá tsi ta nda hafu ta Agag mghama Ghamalek, ama ka rwanatá tsi tuzluzl ta mnduha ni nda kafay.

⁹ Ama ka zlanatá i Sawulu nda sludziha ni ta Agag, nda ya ɗina ɗina ma rina fisik, nda slaha, nda mahisa yakwa rini, nda slaɓalakwha maŋazakha, nda inda skwiha ya ɗina ɗina. Kumaŋ a həŋ ta pslatá həŋ wu, ama inda huzlaha ya kul haɗ sgita ni, nda ya kul ɗinaku, ka zaɗanatá həŋ nekwnekw ta həŋ.

Wuɗiŋta Yawe ta Sawulu

¹⁰ Ka gwaɗganatá Yawe ta Samuyel, kaʼa mantsa:

¹¹ « Ta hagay yu ta madər nda fata ɗa ta Sawulu ka mgham, kabga mbəɗaghu mbəɗa ta vgha ta vata iʼi. Haɗ ta maga slna nda gwaɗaha ta mnata yu wu, » kaʼa. Ka kuzlanaftá tsi ta Samuyel ta ŋuɗuf, ka han tsi ta wahu ta kəma Yawe petsuweɗ vli.

¹² Ka sliʼaftá Samuyel wrək tgha ŋa dzaʼa da guyaku nda Sawulu. Ka lagha lu da mnay ŋa Samuyel: « Waʼa laghu la Sawulu da Karmel, da vli ya baf tsi ta skwi ŋa gɗata ta hava zata ni ta ghwa. Daga hada, ka sliʼaftá tsi ka laha da Gilgal, » ka lu.

¹³ Ka lagha Samuyel slanaghatá Sawulu. Ka Sawulu nda tsi mantsa: « Ka tfaghagha tfa Yawe ta wi! Maga maga yu ta slna nda gwaɗa Yawe, » kaʼa.

¹⁴ Ka Samuyel mantsa: « Nahgani na ta taw manda rina fisik, nda slaha ta snə yu na na? » kaʼa.

¹⁵ Ka Sawulu mantsa: « Sludziha ta hlagaghu da la Ghamalek, ka zlanatá ya ɗina ɗina mataba rina fisik, nda slaha, ŋa pla ghəŋ ŋa Yawe, Lazglafta gha. Pɗakwa taŋ ya, zaɗana zaɗa ŋni tuzluzl ta həŋ, » kaʼa.

¹⁶ Ka Samuyel nda Sawulu mantsa: « Kəzla! Ka mna gha mna yu ta skwi mniha Yawe ta rviɗik ka sabi ma həga gita, » kaʼa. Ka Sawulu mantsa: « Mniha mna, » kaʼa.

¹⁷ Ka Samuyel mantsa: « Aŋ mndani, haɗ hayhaya ɗa wu ka kagha si ta ngha ghəŋa gha, nza a ka ka mali ta ghəŋa mndəra la Israʼila wu ra? Zbap a Yawe ta kagha nda ma pghaghatá rɗi ŋa nzakwa gha ka mgham ta ghəŋa la Israʼila wu ra?

¹⁸ Ka ghunaftá Yawe ta kagha. Kaʼa mantsa: “La da rwanatá tsa la Ghamalek gwal ta ga dmaku ya, nda vulu ha ka zaɗanata gha ta həŋ tuzluzl,” kaʼa.

¹⁹ Kabgawu kwal ka snatá skwi mna Yawe na? Kabgawu kəl ka ka laghwi da valafta ta skwa zləɗu, ka magatá ghwaɗaka skwi ta wa ira Yawe na? » kaʼa.

²⁰ Ka Sawulu nda Samuyel mantsa: « Sna sna yu ta skwi mna Yawe, maga maga yu manda ya ghunaf tsi ta iʼi. Ksagagha ksa yu ta Agag, mghama la Ghamalek. Vərɗa la Ghamalek guli ná, zaɗana zaɗa yu ta həŋ.

²¹ Mataba skwa zləɗu má ŋa hwanzaɓiŋta ta nzakway ka ta rina fisik nda slaha ya, ka hlaptá sludziha ta ya ɗina ɗina ŋa pla ghəŋ ŋa Yawe, Lazglafta gha, ma Gilgal, » kaʼa.

²² Ka Samuyel mantsa: « Mal zɗəganata pla ghəŋ ŋa dray tsuh tsuh, nda sanlaha ma skwa pla ghəŋ ta Yawe, ka snatá gwaɗa ni ra? Mantsa a wa! Mal snatá gwaɗa, ka pla ghəŋha. Malaghu mala fatá sləməŋ ɗina, ka ghwaviɗa maŋazak.

²³ Mantsa nzakwa ni, ka gragra kwal kul sna gwaɗa nda dmakwa gwal vza mandaŋ. Ga sidi guli ná, ka gragra nda dmakwa gwal wuya skwi. Manda vziŋta kagha ta snatá gwaɗa Yawe ya, vziŋ vza tsatsi guli ta nzakwa gha ka mgham, » kaʼa.

²⁴ Ka Sawulu nda Samuyel mantsa: « Gaga yu ta dmaku, ɓlanap ɓla yu ta skwi mnaf Yawe, nda gwaɗaha gha tani. Zləŋ zləŋaf yu da mnduha, ka snatá yu ta gwaɗa taŋ.

²⁵ Ndanana, wya dzvu, pliha pla ta dmakwa ɗa, vra kawadaga nda iʼi, ka dzaʼa yu tsəlɓata ta kəma Yawe, » kaʼa.

²⁶ Ka Samuyel nda Sawulu mantsa: « Haɗ yu ta vru mista gha wu, kabga wuɗiŋ wuɗa ka ta gwaɗa Yawe, ka wuɗighistá Yawe guli. Nzəglata a kagha ka mghama la Israʼila wu, » kaʼa.

²⁷ Manda mbəɗata Samuyel ta vgha ka sliʼi, ka ksaftá Sawulu ta wa guduŋgaba ni, ka kuhiŋtá tsi.

²⁸ Ka Samuyel nda tsi mantsa: « Kuhiŋ kuha Yawe gita ta ga mghama gha ta ghəŋa la Israʼila, ka vlaŋtá sana mndu ta malaghutá ŋərmuta ka kagha.

²⁹ Yawe, glakwa la Israʼila ná, haɗ ta tsakalawi wu, haɗ ta haga madər wu, kabga nza a tsatsi manda mnda səla ta haga madər ya wu, » kaʼa.

³⁰ Ka Sawulu mantsa: « Gaga yu ta dmaku! Wya dzvu, vliha vla ta sgit ta kəma la galata mnduha ɗa, nda ya ta kəma la Israʼila. Vra kawadaga nda iʼi, dzaʼa tsəlɓatá yu ta kəma Yawe, Lazglafta gha, » kaʼa.

³¹ Ka lab Samuyel mista Sawulu, ka tsəlɓatá Sawulu ta kəma Yawe.

³² Ka Samuyel mantsa: « Klagiɗaghawa kla ta Agag, mghama la Ghamalek, » kaʼa. Ka lagha Agag da tsi kul haɗ zləŋ. « Dzata a lu ta iʼi wu, » kaʼa ma ghəŋa ni.

³³ Ka Samuyel mantsa: « Manda va ya dgana kafaya gha ta ndəghatá miʼaha nda zwana taŋ ya, manda va tsaya dzaʼa dgata ma gha ta vgha nda zwaŋa ni guli! » kaʼa. Ka ɗatsanaptá Samuyel ta Agag ta kəma Yawe, ma Gilgal.

³⁴ Ka vraghatá Samuyel da Rama, ta vraghatá Sawulu dzagha ni ma Givgha Sawulu.

³⁵ Ləglagha a Samuyel da ngha Sawulu ha ka mtata ni wa. Ama ka taw tsi ta taw katakata ta ghəŋa ni, kabga ta haga madər Yawe nda famta ni ta Sawulu ka mgham ta ghəŋa la Israʼila.