1Sam 12 - Hdi

Kwanaha gwaɗa Samuyel ŋa la Israʼila

¹ Ka Samuyel nda inda la Israʼila mantsa: « Snaghuna sna yu ta inda skwi mniha kuni, ka faghunamtá yu ta mgham.

² Daga ndana tama, nana na mgham dzaʼa klaghunatá kəma. Iʼi ná, nda hala yu, nda ɓa ghəŋa ɗa, kawadaga zwana ɗa nda kaghuni. Iʼi ta kləgaghunaptá kəma daga ma ga duhwala ɗa ha ka sagha ta gita.

³ Wana yu ta kəma ghuni! Ka mamu skwi magaghuna yu kul raku, mnihawa mna ta kəma Yawe, nda ya ta kəma na mgham fam tsi nda ma pghanaghatá rɗi na. Mamu mndu klaghu yu ta sla ni, ka kəɗiha ni a tsi ra? Wa ya tsaghu yu? Wa ya ganap yu tiri? Wa mndu ya zlghaf yu ta sməɗ da tsi ŋa haftá iri ta ghəŋa ghwaɗaka slna ni na? Ta vravaghuna vra yu, » kaʼa.

⁴ Ka həŋ mantsa: « Tsaghu a ka ta aŋni wa. Gaŋnap a ka tiri wa. Haɗ skwa mndu tsuʼaf ka wu, » ka həŋ.

⁵ Kaʼa nda həŋ mantsa: « I Yawe nda mgham, mndu ya zbaf tsi nda ma pghanaghatá rɗi masləmtsəka ghuni gita kazlay haɗ skwi ŋa tsiɗivata ghuni wu, » kaʼa. Ka həŋ mantsa: « Mantsa nzakwa ni! » ka həŋ.

⁶ Ka Samuyel nda mnduha guli mantsa: « Yawe na masləmtsəka ɗa, tsatsi ta fatá i Musa nda Haruna ŋa hlagaftá dzidzíha ghuni ma Masar ya.

⁷ Ndanana, sladawa slada hada ta kəma Yawe, dzaʼa tsaghunagha tsa yu ta guma. Dzaʼa havaghunak hava yu ta inda tɗukwa skwi ya magaghuna Yawe, ŋa ghuni nda dzidzíha ghuni.

⁸ Manda ɓhadaghata Yakubu da Masar, ka wahu dzidzíha ghuni ta wahu da Yawe. Ka ghunaftá Yawe ta i Musa nda Haruna. Ka hlagaptá həŋ ta dzidzíha ghuni ma Masar, ka pghatá həŋ ma na haɗik na.

⁹ Ama ka zanaptá dzidzíha ghuni ta Yawe, Lazglafta taŋ. Tsaya kəl tsi ka skwanaptá Sisəra, mala gwal vula Hatsur, nda la Filisti, nda mghama Muwav, ka zatá həŋ ta həŋ nda vulu.

¹⁰ Ka wahugəltá həŋ ta wahu da Yawe, ka həŋ mantsa: “Gaga ŋni ta dmaku, kabga zanap za ŋni ta Yawe, ka laghwi da maganatá slna ta Baghalha nda Ghasturetha. Ama, paliŋnis pala ma dzva ghumaha ŋni, ka magaghata ŋni ta slna,” ka həŋ.

¹¹ Ka ghunaftá Yawe ta i Yərubaghal, nda Bədaŋ, nda Yifta, nda Samuyel, ka palighunista ma dzva ghumaha ghuni ta waghunafta, ka nzakw kuni ta nzakwa ghuni ləŋləŋ nda hanatá ghəŋ.

¹² Ama manda nghaŋta ghuni ta Nahas, mghama la Ghamuŋ, ta sagha da lighunista, ka kuni nda iʼi na: “Mantsa a wu, ta kumay ŋni ta mgham!” ka kuni, manda skwi mghama ghuni a Yawe, Lazglafta ghuni wu.

¹³ Ndanana tama, wana mgham zbap kuni, ya ɗawaŋ kuni, ka vlaghunatá Yawe.

¹⁴ Ka zləŋa zləŋa kuni ta Yawe, ka maganata ghuni ta slna, ka snata ghuni ta gwaɗa ni, ka ganava a kuni ta sidi ta gwaɗa Yawe wu, kaghuni nda mgham ta ga mgham ta ghəŋa ghuni ka ndiʼafta ghuni ta vgha ta Yawe, Lazglafta ghuni, dzaʼa nza nza kuni ləŋləŋ.

¹⁵ Ama ka fana a kuni ta sləməŋ ta gwaɗa Yawe wu, ka ta ga sidi kuni nda zlahuha Yawe, dzaʼa ksaghunaŋ ksa Yawe ta mbrakwa ni, manda ya magana tsi ta dzidzíha ghuni.

¹⁶ Ndanana guli, sladglawa slada hadna, ka ngha kuni ta skwa mandərmimi dzaʼa magata Yawe ta wa ira ghuni.

¹⁷ Fitika tska alkama ta vwah a na wu ra? Dzaʼa hgaŋ hga yu ta Yawe ŋa ŋəzlata luwa ŋa nzagatá ni ta imi. Mantsa ya dzaʼa kəl kuni ka grafta ka snaŋtá glakwa ghwaɗaka skwi magana kuni ta Yawe nda ma ɗawafta ghuni ta mgham da tsi, » kaʼa.

¹⁸ Ka hgaŋtá Samuyel ta Yawe, baɗ va tsaya ka ghudzaganatá Yawe ta luwa, ka nzagatá tsi ta imi, ka zləŋ inda mnduha katakata ta Yawe, nda Samuyel tani.

¹⁹ Ka inda mnduha nda Samuyel mantsa: « Ndəɓana ndəɓa ta dzvu ta Yawe, Lazglafta gha ta ghəŋa aŋni kwalvaha gha, kada kwala ŋni ta rwuta, kabga aŋni ta sganaghatá dmakwa ŋni, dmakwa ɗawaŋta ŋni ta mgham, » ka həŋ.

²⁰ Ka Samuyel nda mnduha mantsa: « Ma zləŋ kuni ta zləŋ! Manda va tsaya nzakwa ni, gaga kuni ta inda tsa dmaku ya. Ama ma mbəɗana kuni ta hul ta Yawe. Maganawa maga ta slna ma hya hya ŋuɗufa ghuni.

²¹ Ma mbəɗaghu kuni ta vgha, ka dzaʼa mista skwiha ka bətbət kul haɗ dzaʼa kataghunata, nda ya dzaʼa kwal kul mbaghunafta, kabga skwiha bətbət həŋ.

²² Zlavaghunata a Yawe wu, dabga hga ni dagala, kabga kura kura Yawe ta naghunafta ka mnduha ni.

²³ Iʼi ná, va a yu ɗekɗek ta ganata ɗa ta dmaku ta Yawe, nda ma zlanata ɗa ta maga duʼa da tsi ta ghəŋa kaghuni wa! Katək na, dzaʼa gɗa gɗa yu ta taghaghunatá tvi tɗukwa, ndəɗapa.

²⁴ Katkata ni ná, zləŋawa zləŋa ta Yawe, ka maganata kuni ta slna nda kahwathwata, nda ŋuɗuf turtuk. Nghadapwa ngha ta skwi dagala maga tsi mataba ghuni!

²⁵ Ama ka gɗa gɗa kuni ta maga ghwaɗaka skwi, dzaʼa zaɗaghuna zaɗa lu, kaghuni nda mghama ghuni tani, » kaʼa.