1Sam 10 - Hdi

¹ Ka klaftá Samuyel ta hwaraka rɗi, ka pghəganatá Sawulu ma ghəŋ. Ka brusatá tsi. Kaʼa mantsa: « Yawe ta zbaptá kagha nda ma pghaghaghatá rɗi ŋa nzakwa gha ka mali ta ghəŋa mnduha ni, la Israʼila skwa za həga ni.

² Gita, tahula sliʼafta gha da iʼi, dzaʼa guyaku ka nda sana mnduha his ndusa nda kula Rasel ta mukuma nda la Biŋyamiŋ, ma Tsəltsah. Ka həŋ dzaʼazlay nda kagha na: “Tsa kəɗihha laghu ka da zbay ya ná, slaf sla lu ta həŋ. Ndanana, haɗ da gha ta ndangəltá kəɗihha wu, kaghuni ta ndan tsi. Kaʼa ta mnay na: Waká yu dzaʼa magay ŋa nghaŋtá zwaŋa ɗa?” kaʼa, ka həŋ dzaʼazlay, kaʼa.

³ Zadapta gha diʼiŋ ya, dzaʼa ɓhadagha ɓha ka ndusa nda halalaya fu ma Tavur. Hada, dzaʼa lagha la mnduha hkən ta ŋlu ŋa dzaʼa da pla ghəŋ ŋa Lazglafta ma Betel slaghaghata. Sani ta hla slaɓalakwha gu hkən, sani guli ta hla zlamblaha buradi hkən, mahkəna ni ya, ta kla hulama ima inabi.

⁴ Dzaʼa gaghagha ga həŋ ta zgu, ŋa vlaghata taŋ ta zlamblaha buradi his. Ka tsuʼafta ka da həŋ.

⁵ Tahula tsa, ŋa ɓhadaghata gha da Givgha Lazglafta, ma vla bakwa gwal vula la Filisti. Ta lam ka da luwa, dzaʼa slaf sla ka ta tskatá la anabi ta sliʼagata ta vli tskala. Dzaʼa tsap tsa tsa mnduha ya ta kəma gha nda dza htimbil, nda dewdew, nda siŋlak, nda kəzliŋkəzliŋ. Ta kla lwa Lazglafta həŋ.

⁶ Gi suw dzaʼa saha Sulkuma Yawe ta ghəŋa gha, ŋa lama kagha guli da kla lwa Lazglafta, ŋa mbəɗuta gha ka sana mndu.

⁷ Manda nghaŋta gha ta tsa ŋizlaha dzaʼa magaghata ya, ka maga ka ta inda skwi ya dzaʼa slanaghata ka ŋa magay, kabga kawadaga Lazglafta nda kagha.

⁸ Tahula tsa, tiŋəl kagha dzaʼa laha da Gilgal ka iʼi, ŋa laha ɗa slaghaghata dazlay, ŋa vla skwiha pla ghəŋ ŋa dray tsuh tsuh, nda skwiha pla ghəŋa zɗaku. Ndəfáŋ fitik dzaʼa ka magata ta kəzla iʼi, ha ka laha ɗa da slaghaghata, ŋa snaghamta ɗa ta skwi dzaʼa ka da magay, » kaʼa.

⁹ Na tsa gi mbəɗata Sawulu ta hul ka zlanatá Samuyel ya, ka mbəɗanaftá Lazglafta ta ŋuɗufa ni, ka magatá tsa ŋizlaha ya baɗ va tsaya.

¹⁰ Ɓhadaghata i Sawulu nda kwalva ni da Givgha, ka lagha tskatá anabiha da guyay. Gi ka saha Sulkuma Lazglafta suw ta ghəŋa ni, mbaɗa ka kla lwa Lazglafta mataba taŋ.

¹¹ Ka nghə gwal si nda sna ta tsatsi ghalya ná, ta kla lwa Lazglafta Sawulu kawadaga nda anabiha! Ka mnduha mataba taŋ mantsa: « Nya ta slanaghatá zwaŋa Kis na? Mataba anabiha na Sawulu guli ra? » ka həŋ.

¹² Ka sana la Givgha mantsa: « Wa da taŋ na? » kaʼa. Tsaya kəl lu ka mna mahdihdi ta mnay kazlay na: « Nda nza Sawulu guli mataba anabiha ra? kəʼa ya, » kaʼa.

¹³ Kɗakwa ni ta kla lwa Lazglafta, ka ɓhadafghatá tsi ta vli tskala.

¹⁴ Ka dasliʼiŋa ni nda Sawulu nda ya nda kwalva ni mantsa: « Si laghu diga kuni na? » kaʼa. Kaʼa zlghaftá wi mantsa: « Si laghu da zba kəɗihha ŋni, ama ngha a ŋni ta həŋ wu, ka laghu ŋni da Samuyel, » ka həŋ.

¹⁵ Ka dasliʼiŋa Sawulu mantsa: « Kdəkkdək, rusaɗif rusa ta skwi mnaghuna Samuyel, » kaʼa.

¹⁶ Ka Sawulu nda dasliʼiŋa ni mantsa: « Mnaŋna mna kazlay ta nghaku tsa kəɗihha ya, » kəʼa. Ama gwaɗa ta ghəŋa ga mgham ya ná, kulunus a ta skwi mnana Samuyel wa.

Famtá Sawulu da mgham

¹⁷ Ka hagadaghatá Samuyel ta mnduha da Mitspa ta kəma Yawe.

¹⁸ Kaʼa nda la Israʼila mantsa: « Wya ka Yawe, Lazglafta la Israʼila mnata: “Iʼi ta hlagaftá la Israʼila ma Masar, ta zluʼaptá kaghuni ma dzva la Masar, nda ya ma dzva inda ga mgham si ta sa duni ŋa ghuni.”

¹⁹ Ama kaghuni gita, ka vziŋtá kuni ta Lazglafta ghuni, ya ta mbaghunafta ma inda ɗaŋwaha ghuni, nda inda skwi ta ga zləŋ ŋa ghuni. Ka kuni nda tsi na: “Vlaŋna vla ta mghama ŋni!” ka kuni. Ndanana, sladawa slada ta kəma Yawe, ka mndəra mndu ka mndəra mndu, ka uʼa ka uʼa, » kaʼa.

²⁰ Ka gavadanaghatá Samuyel ta inda mndəra la Israʼila, ka vzaftá vindima: Ka dɗaftá tsi ta mndəra la Biŋyamiŋ.

²¹ Ka gavadanaghata tsi ta mndəra la Biŋyamiŋ ta uʼa taŋ ta uʼa taŋ: Ka dɗaftá tsi ta uʼa la Matri. Ma kɗavakta ni, ka dɗaftá tsi ta Sawulu zwaŋa Kis. Ka zbə lu ta Sawulu, ama slanagha a lu wa.

²² Ka ɗawuglaŋtá lu da Yawe: « Sagha sa tsa mndu ya da hadna ra? » ka lu. Ka Yawe mantsa: « Wya tsi ta ɗifaghuta mataba huzla, » kaʼa.

²³ Ka hwayadaptá lu ksagapta, ka sab tsi sladata ma takataka mnduha. Mal tsatsi slrakwa ni ta ghəŋa inda mnduha.

²⁴ Ka Samuyel nda inda mnduha mantsa: « Nghawa ngha! Wana mndu ya zbap Yawe. Haɗ mndu ŋa gray nda tsatsi mataba inda mnduha wu, » kaʼa. Ka ndəɓ inda mnduha ta dzvu, nda hla wi kazlay na: « Ta mblam ka hafa mgham! » kaʼa.

²⁵ Ka mbəɗanaftá Samuyel ta mnduha ta skwiha ta raŋtá mgham, ka vindamta ma ɗelewer, ka fata ta kəma Yawe. Tahula tsa, ka ghuniŋtá Samuyel ta dər wa dzagha ni.

²⁶ Ka laghu Sawulu dzagha ni ma Givgha. Ka pghaftá gwal nda sgit, gwal kasaŋ Lazglafta ta ŋuɗufa taŋ kawadaga nda tsi.

²⁷ Ama ka falayha mantsa: « Waká tsaya dzaʼa mbamafta na? » ka həŋ. Ka hərtətatá həŋ, ka kwalaghutá həŋ ta klədanaghatá skwa mbəhuha. Ama ndanaŋ a Sawulu wa.