1Rus 4 - Hdi

Sanlaha ma zivira la Yuda

¹ Wya zivira la Yuda: I Perets, nda Hetsruŋ, nda Karmi, nda Hur, nda Suval həŋ.

² Rəʼaya zwaŋa Suval, tsatsi da ni ma Yahat, ka yayatá Yahat ta i Ahumay nda Lahat. Tsaha ya la Tsurgha ta uʼa taŋ.

³ Wya zwana Hur: Da ni ma i Ghetam, nda Yizrəghel, nda Yismaʼ, nda Yidbas. Hatsəlelpuni hga makuma taŋ.

⁴ Pənuʼel da ni ma Gədur, Ghezer da ni ma Husa. Tsaha ya zwana Hur, zumala Ifrata, ta zlraftá ma Betʼlehem.

⁵ Asur da ni ma Tekuwa, his miʼa ni: I Helʼah nda Naghara.

⁶ Ka yayanatá Naghara ta Ahuzam, nda Hefer, nda la Temeŋ, nda la Haʼahastar. Tsaha ya zwana Naghara.

⁷ Wya zwana Helʼah: I Tseret, nda Tsuhar, nda Itnaŋ həŋ.

⁸ Ka yayatá Kuts ta i Ghanuv, nda Hatsuveva, nda la Aharhel ta uʼa taŋ, zwaŋa Harum.

⁹ Ka malaghutá lu ta vlaŋtá sgit ta Yaghbets ka zwana ma ni. Ka tsanaftá ma ni ta hgu ka Yaghbets, kabga nda ɗaŋwa yata tsi.

¹⁰ Ka taw Yaghbets ta taw da Lazglafta la Israʼila, kaʼa mantsa: « Ka tfiɗaghata ka ta wi kahwathwata nda ma sgiɗaghatá kwakwara ɗa! Ka ha ka ta dzvu mista ɗa! Ka ngha ka ta iʼi da zləmnda nda inda ghuya ɗaŋwa, » kaʼa. Ka tsuʼanaftá Lazglafta ta skwi ɗawaŋ tsi.

¹¹ Ka yatá Kəluv zwaŋama ni ma Suha ta Məhir, Məhir da ni ma Istuŋ.

¹² Istuŋ ta yatá Betʼrafa, nda Paseyah, nda Təhina. Təhina ta thaftá Ghirʼnahas. Hahəŋ gwal ta nzakw ma Reha.

¹³ Zwana Kənaz na: I Ghutniʼel nda Səraya həŋ. Zwaŋa Ghutniʼel na: I Hatat nda Məghunutay həŋ.

¹⁴ Ka yatá Məghunutay ta Ghufra. Səraya ta yatá Yuʼav, tsatsi ta thaftá Geʼharasim. Mantsa ta hga lu ta tsa vli ya, kabga gwal ka masəm ta nzakw hada.

¹⁵ Zwana Kalep, zwaŋa Yəfune na: I Ghiru, nda Ila, nda Nagham həŋ. Zwaŋa Ila na: Kənaz ya.

¹⁶ Zwana Yəhalelʼel na: I Zif, nda Zifa, nda Tiriyaʼ, nda Asarʼel həŋ.

¹⁷ Zwana Ghezrah na: I Yeter, nda Meret, nda Ghefer, nda Yaluŋ həŋ. Ka klaftá Meret ta Bitya ta yayanatá i Miryam, nda Samay, nda Yisbah, da ni ma Istemuwa.

¹⁸ Tsaha ya zwana Bitya, makwa Firʼawna, klaf Meret. Ka yatá markwa taŋ makwa la Yuda ta Yeret, da ni ma Gədur, nda Hever, da ni ma Suhu, nda Yəkutiʼel, da ni ma Zanuwah.

¹⁹ Zwana markwa Hudiya, makuma ni ma Naham na: Tsaha ya da ni ma Kəghila mnda la Gerem, nda Istemuwa mnda la Maghaha.

²⁰ Zwana Simuŋ na: I Amnuŋ, nda Rinah, nda Beŋʼhanaŋ, nda Tiluŋ həŋ. Zwana Yisghi na: I Zuhet nda Beŋʼzuhet həŋ.

²¹ Zwana Sela, zwaŋa Yuda na: I Gher, da ni ma Leha, nda Laghda, da ni ma Maresa, nda la ta uʼa taŋ ma həga ta maga slna liŋ kulefeɗ, ma Betʼaseba,

²² nda Yukim, nda la Kuzeva, nda Yuʼas, nda Saraf. Hahəŋ ta gá mgham ta ghəŋa la Muwav nda la Yasubiʼlehem. Skwiha ta luta ghalya tsaha ya.

²³ Si gwal ta tsatsa huzla ta nzakw ma Nətaghim nda Gədera həŋ, ndusa nda mgham si ta nzakwa həŋ ta maganatá slna.

Zivira Simghuŋ

²⁴ Zwana Simghuŋ na: I Nəmuʼel, nda Yamiŋ, nda Yariv, nda Zerah, nda Sawulu.

²⁵ Huɗuhuɗa zwana Sawulu na: I Salum, nda Mivsam, nda Mismagh həŋ.

²⁶ Zwana Mismagh na: I Hamuʼel, nda Zakur, nda Simghi həŋ.

²⁷ Ka yayatá Simghi ta zwana zgwana ghwaŋpəɗ mkuʼ, nda kuʼaha mkuʼ, ama mutsaf a zwana ma ni ta zwana zgwana nda ndəgha wu, ya a hahəŋ demdem ta uʼa taŋ manda la Yuda wa.

²⁸ Vla nzakwa taŋ na: Ma Bəʼerseva, nda Mulada, nda Hatsarsuʼal,

²⁹ nda Bilhah, nda Ghetsem, nda Tulat,

³⁰ nda Bətuʼel, nda Hurma, nda Tsiklag,

³¹ nda Betʼmarkavut, nda Hatsarʼsusim, nda Betʼbiri, nda Sagharayim. Tsaha ya luwaha taŋ ha ka lagha ta fitika gá mghama Dawuda.

³² Zwana luwaha taŋ na: Ghetam, nda Ghayiŋ, nda Rimuŋ, nda Tuheŋ, nda Ghasaŋ, zwana luwaha hutaf ya,

³³ nda zwana luwaha taŋ ta wanaftá tsa luwaha ya guli, dikw da Baghal. Tsaha ya vla nzakwa taŋ, ka mndər ka mndər.

³⁴ Wya sanlaha ma mndəra la Simeyuŋ: Məsuvav, nda Yamlek, nda Yusa zwaŋa Amatsiya,

³⁵ nda Yuʼel, nda Yehu zwaŋa Yusivyah, zigha Səraya, zigha ndindliŋa Ghasiʼel,

³⁶ nda Ilyughenay, nda Yaghakuva, nda Yəsuhaya, nda Ghasaya, nda Ghadiʼel, nda Yəsimiʼel, nda Benaya,

³⁷ nda Ziza, zwaŋa Sifghi, zwaŋa Aluŋ, zwaŋa Yədaya, zwaŋa Simri, zwaŋa Səmaghya.

³⁸ Tsaha mbəɗaga lu ya ná, hahəŋ mala ga həgaha ta uʼa taŋ. Ka yaku mndəra taŋ katakata.

³⁹ Ka lagha həŋ ta tva lami da Gədur dikw təv safa fitik nda ma didiŋa, da zba vla kuzuŋ ŋa braha rina taŋ.

⁴⁰ Ka slaftá həŋ ta vla kuzuŋ ləhtəɗ ɗina, dagala mtaka tsa haɗik ya, leɓtekw zɗa nzakw mida. Gwal si ta nzakw hada ghalya ná, mndəra la Ham ya.

⁴¹ Ta fitika gá mghama Hizkiya, mghama la Yuda ɓhadaghata tsa mnduha mbəɗaga lu ta hga taŋ ya. Ka hwanzaɓiŋtá həŋ ta tumpulha la Ham nda la Məghuŋ si ta nzakw hada, ka zaɗanatá həŋ nekwnekw ha gita. Ka nzatá həŋ ma vla taŋ, kabga mamu vla kuzuŋ ŋa ngha rina fisika taŋ hada.

⁴² Ka laghu mnduha hutaf dərmək mataba tsa zwana Simghuŋ ya ta ghwáha Seghir. Zwana Yisghi i Platiya, nda Nəgharya, nda Rfaya, nda Ghuziʼel ta klanatá kəma ta həŋ.

⁴³ Ka pslatá həŋ ta pɗakwa la Ghamalek si ta hwahwayapta, ka nzatá hahəŋ hada ha gita.