1Rus 29 - Hdi

Mbəhuha ŋa ba həga Lazglafta

¹ Ka mgham Dawuda nda inda guyatá ghəŋ mantsa: « Nana zwaŋa ɗa Salumuŋ, kɗakwa ya zbap Lazglafta na ná, ta ka galaɓay, ta ka mbaway, dagala slna ŋa magay guli, kabga na həga gá mgham na ná, ŋa mnda səla a wu, ama ŋa Yawe, Lazglafta ya.

² Nda inda mbrakwa ɗa, papayaf papaya yu ta skwiha ŋa həga Lazglafta ɗa: Dasu, ŋa maga ya ka dasu, kfura tsedi, ŋa ya ka kfura tsedi, ghuva tili, ŋa ya ka ghuva tili, kfur, ŋa ya ka kfur, udzu, ŋa ya ka udzu, palaha uniks, nda palaha ŋa wirtsapta, nda palaha ta wuɗaku, nda ya kavghakavgha usa ni, nda inda palaha ɗina ɗina, nda kɗiŋizliŋha nda ndəgha.

³ Ta ghəŋa tsaha ya, kabga zɗəgihata həga Lazglafta ɗa, vla vla yu ŋa həga Lazglafta ɗa ta skwa gadghəla vərɗa iʼi, dasu nda kfura tsedi, ŋa sganaghata ta ghəŋa ya papayaf yu ŋa tsa həga nda ghuɓa ya.

⁴ Vla vla yu ta kiluʼa dasa haɗika Ufir dəmbuʼ dərmək (100.000), nda kiluʼa kfura tsedi ghenen dəmbuʼ his dərmək nda fwaɗ mbsak (240.000) ŋa sləhay ŋa rka ta vata həga nda ma huɗi,

⁵ nda dasu, ŋa maga ya ka dasu, kfura tsedi, ŋa maga ya ka kfura tsedi, ŋa magay gwal masəm ta slna nda tsi. Wa dzaʼa vlay nda ŋuɗuf turtuk, ka fata ni ta ghəŋa ni ŋa Yawe gita na? » kaʼa.

⁶ Mantsa tama, ka valatá mala ga həgaha, nda maliha ma mndəra la Israʼila, nda maliha ta ghəŋa bakwa gwal vulu dəmbuʼ dəmbuʼ, nda maliha ta ghəŋa bakwa gwal vulu dərmək dərmək, nda maliha ta ghəŋa slnaha mgham ta mbəhuha nda ɗvay taŋ.

⁷ Ka valatá həŋ ŋa maga slna həga Lazglafta ta kiluʼa dasu dəmbuʼ dərmək nda ndəfáŋ mbsak (170.000), nda tsedi ka dasu dəmbuʼ ghwaŋ (10.000), nda kiluʼa kfura tsedi dəmbuʼ hkən dərmək nda fwaɗ mbsak (340.000), nda kiluʼa ghuva tili dəmbuʼ mkuʼ dərmək nda ghwaŋpəɗ his (612.000), nda kiluʼa kfur mleŋwi hkən nda dəmbuʼ fwaɗ dərmək (3.400.000).

⁸ Inda mndu ya mamu palaha ɗina ɗina da tsi ta vlaŋtá Yəhiʼel mnda la Gersuŋ, ŋa dzuguva ɗifa skwa gadghəl ma həga Yawe.

⁹ Ka rfu inda mnduha ta rfu nghanar həŋ ta skwiha vla lu nda ŋuɗuf turtuk ŋa Yawe, ka rfu mgham Dawuda guli ta rfu katakata.

Duʼa Dawuda

¹⁰ Ka rfanaghatá Dawuda ta Yawe ta kəma inda guyatá ghəŋ, kaʼa mantsa: « Rfu ŋa gha daga manda ghalya ha ŋa ɗekɗek, Yawe, Lazglafta Israʼila, dzidza ŋni!

¹¹ Yawe, ŋa kagha glaku, nda mbraku, nda wuɗaku, nda ghubu, nda tsuwaɗak, kabga ŋa gha inda skwiha ta luwa nda ya ta haɗik. Yawe, gá mgham ná, ŋa gha ya, hem kagha ta ghəŋa inda skwiha.

¹² Kagha ta vla gadghəl nda glaku, kagha ta gá mgham ta ghəŋa inda skwi. Ma dzva gha prəsl nda mbraku, dzva gha ta laviŋta ŋlanaftá mndu ka mbranafta.

¹³ Ndanana, Lazglafta ŋni, ta rfaghagha rfa ŋni, ta zləzləvay ŋni ta hga gha ka sgit dzeʼdzeʼ.

¹⁴ Wa iʼi, wa mnduha ɗa, ŋa mutsafta ŋni ta mbrakwa magatá mbəhu nda ɗvay gərndana na? Da kagha sagha tsi demdem, ma dzva gha guli sagha skwi ta vlata ŋni.

¹⁵ Mayəm aŋni ta kəma gha, ka matbay ŋni, gwal ta nzakw ŋa ɗasu ɗasu, manda ŋa dzidzíha ŋni demdem. Manda sulkum ya fitika ŋni ma ghəŋa haɗik, fa a ghəŋ tida wa.

¹⁶ Yawe, Lazglafta ŋni, ma dzva gha sagha inda na ŋəzatá skwiha payaf ŋni ŋa baftá həga ŋa gha, ŋa vlaŋtá sgit ta hga gha nda ghuɓa. Ŋa gha inda ni.

¹⁷ Nda sna yu, Lazglafta ɗa kazlay na ta nghadam ngha kagha ta ŋuɗufa mndu, zɗəgagha zɗa mndu ta nzakw tɗukwa kəʼa. Guli ná, magaghaf maga yu ta na mbəhu nda ɗvay na, nda ŋuɗuf tɗukwa. Ta nghay yu ndanana nda rfu ta mnduha gha hadna ta vla mbəhu ŋa gha nda ɗvay taŋ.

¹⁸ Yawe, Lazglafta dzidzíha ŋni i Abraham, nda Izak, nda Israʼila, hanam ha ta mndərgana ndanu na ŋa ɗekɗek ma ghəŋ ta mnduha gha. Ka dihanata ka ta ŋuɗufa taŋ ŋa gha.

¹⁹ Vlaŋ vla ta zwaŋa ɗa Salumuŋ, ta fatá ŋuɗuf tasl ŋa ŋanatá zlahuha gha, nda tva skwiha ŋa magay, nda tva dva mnda gha, ka maga tsi ta slna nda həŋ demdem, ka bafta tsi ta na həga gha dagala papayaf yu ta skwiha ŋa bay na, » kaʼa.

²⁰ Tahula tsa, ka Dawuda nda inda guyatá ghəŋ mantsa: « Kdəkwakdək! Rfanaghawa rfa ta Yawe, Lazglafta ghuni, » kaʼa. Ka rfanaghata inda guyatá ghəŋ ta Yawe, Lazglafta dzidzíha taŋ. Ka dzadzatá həŋ ta ghəŋ, ka tsətsəlɓata ta kəma Yawe, nda ya ta kəma mgham.

²¹ Ga mahtsima ni, ka vlatá həŋ ta skwiha ŋa pla ghəŋ ŋa Yawe, ka vlatá həŋ ta skwiha ŋa pla ghəŋ ŋa dray tsuh tsuh ŋa Yawe: Lghəŋha Dəmbuʼ (1.000), nda maŋazakha dəmbuʼ (1.000), nda slaɓalakwa maŋazakha dəmbuʼ (1.000), kawadaga nda skwiha ŋa slranata, nda sanlaha ma pla ghəŋha ta ndəghuta ŋa la Israʼila demdem.

²² Baɗ tsaya, ka zutá həŋ, ka sutá həŋ nda rfu dagala ta skwi ta kəma Yawe. Ka mahis, ka mnəglaŋtá həŋ ta nzakwa Salumuŋ zwaŋa Dawuda ka mgham. Ka pghəganatá həŋ ta rɗi ma ghəŋ ŋa famta da mgham ta kəma Yawe. Mantsa ya guli ŋa Tsaduk ka mali ta ghəŋa gwal dra skwi ŋa Lazglafta.

Famtá Salumuŋ da gá mgham

²³ Ka nzaftá Salumuŋ ta dughurukwa Yawe, ŋa nzakw ka mgham ma vla da ni Dawuda. Ka dzaʼa tsi ta kəma ta kəma, ka snə inda la Israʼila ta gwaɗa da tsi.

²⁴ Ka haniŋtá inda maliha, nda gwal ka bikwira vulu, nduk nda inda zwana mgham Dawuda ta ghəŋ mista mgham Salumuŋ.

²⁵ Ka kapanaftá Yawe ta Salumuŋ katakata, ka ŋlanafta ta wa ira la Israʼila demdem, ka vlaŋtá sgita gá mgham, ya kul maguta nda sana mgham ma kɗaku tsatsi ma Israʼila.

Mtakwa Dawuda

²⁶ Mantsa ya ka Dawuda zwaŋa Yisay gutá mgham ta ghəŋa la Israʼila demdem.

²⁷ Fwaɗ mbsak vakwa ni ta gá mgham ta ghəŋa la Israʼila. Ndəfáŋ vakwa ni ta gá mgham ma Hevruŋ, hkən mbsak hkən mida ma Ursalima.

²⁸ Ka mtutá Dawuda ma halaku hunzekw, tahula nzuta ni ta nzakw ɗina, nzəɗava nzəɗa dagala nda gadghəl nda ya nda glaku. Ka lam zwaŋa ni Salumuŋ da gá mgham ma vla ni.

²⁹ Rusa ta ghəŋa mgham Dawuda, nda zlrafta ni nda kɗavakta ni ná, vivindam vivinda lu ma ɗelewerha rusa Samuyel ka slayaŋ, nda ŋa anabi Nataŋ, nda ŋa Gat ka slayaŋ ya.

³⁰ Ta rusay lu ma tsa ɗelewerha ya ta inda gá mghama ni, nda viɗakwa ni, nda skwiha ta slaslanaghata, nda la Israʼila, nda ya nda inda gá mghama sanlaha ma haɗikha ta wanaftá həŋ.