1Rus 28 - Hdi

Vlay Dawuda ta mbraku ŋa Salumuŋ ŋa ba həga Lazglafta

¹ Ka tskanatá Dawuda ma Ursalima ta inda maliha la Israʼila, gwal ma mndəra mnduha, nda maliha ma dagata bakuha ta maganatá slna ta mgham, maliha ta ghəŋa bakwa gwal vulu dəmbuʼ dəmbuʼ, nda ya ta ghəŋa bakwa gwal vulu dərmək dərmək, nda maliha ta ghəŋa inda skwiha, nda bra rina mgham, nda ŋa zwana ni, nda gwal dagaladagala ta maganatá slna, nda gwal viɗviɗ, nda inda gwal ka bikwira vulu.

² Ka sliʼaftá mgham Dawuda, ka sladata, kaʼa mantsa: « Fihawa fa ta sləməŋ zwana ma ɗa, mnduha ɗa! Si kumaf kuma yu ma ŋuɗufa ɗa ta baftá həga vli ŋa mbiʼa vgha akwata dzratá wa Yawe, vli ŋa fa səla Lazglafta mu. Si nda paya vgha ɗa ŋa bay,

³ ama ka Lazglafta nda iʼi na: “Haɗ ka dzaʼa baɗiftá həga ŋa vlaŋtá sgit ta hga ɗa wu, kabga mnda vulu ka, pghiŋ pgha ka ta us,” kaʼa.

⁴ Zbap zba Yawe, Lazglafta la Israʼila ta iʼi mataba inda la ini, ŋa nzakwa ɗa ka mgham ŋa ɗekɗek ta ghəŋa la Israʼila. Zbap zba ta Yuda ka mali, ka zbaptá tsi ta la ga da ɗa ma mndəra la Yuda. Mataba zwani yaya da ɗa, iʼi kumaf tsi ŋa gá mgham ta ghəŋa inda la Israʼila.

⁵ Mataba inda zwana ɗa, kabga vliha vla Yawe ta ndəghata zwani, ka zbaptá tsi ta zwaŋa ɗa Salumuŋ ŋa nzanafta ta dughurukwa gá mghama Yawe ta ghəŋa la Israʼila.

⁶ Kaʼa nda iʼi mantsa: “Zwaŋa gha Salumuŋ dzaʼa baɗiftá həga, nda daɓiha ta wanafta, kabga zbap zba yu ŋa nzakwa ni ka zwaŋa ɗa ta nzatá iʼi ka da ni.

⁷ Dzaʼa dihana diha yu ta gá mghama ni ŋa ɗekɗek, ka ndiʼaf ndiʼa tsi ta vgha ta zlahuha ɗa nda tva skwiha ŋa magay, ka ksa slna nda həŋ, manda va na ta mag tsi gita na,” kaʼa.

⁸ Ndanana, ta wa ira inda la Israʼila, guyatá ghəŋa mnduha Yawe, nda ya ta kəma Lazglafta mu, ŋanawa ŋa ɓurkuts ta inda zlahuha Yawe, Lazglafta ghuni, kada nzakwa na haɗik ɗina na ka ŋa ghuni, ŋa zlanaŋta ghuni ka haɗika za həga ŋa ɗekɗek ta zwana ghuni tahula kaghuni.

⁹ Kagha zwaŋa ɗa Salumuŋ, snaŋ sna ta Lazglafta da gha, ka maganata ka ta slna nda hya hya ŋuɗufa gha, ka ɗvuta ka nda hafa gha, kabga da hya ŋuɗuf ta nghadamta Yawe, ka gala inda ndanu. Ka ta zbay ka, dzaʼa fagha fa ta vgha, ama ka zlanava zla ka, dzaʼa wuɗighis wuɗa ŋa ɗekɗek.

¹⁰ Ngha ndanana ɓa, zbap zba Yawe ta kagha ŋa banaftá həga ka vla ni nda ghuɓa. Ŋava ŋa, ka maga ka ta slna! » kaʼa.

Vlaŋta Dawuda ta tva ba həga ta Salumuŋ

¹¹ Ka vlaŋtá Dawuda ta zwaŋa ni Salumuŋ ta mndərga tva batá rmaka həga Lazglafta, nda həgaha ni, nda dzuguva tska skwiha, nda dzuguviha ta ghəŋa həga, nda dzuguviha ma huɗa ni, nda dzuguva paɗuwa vla kliŋtá dmaku.

¹² Vlaŋha ta mndərga tva magatá inda skwiha ndanaŋ tsi ta magay ma ghəŋa ni nda daɓiha həga Yawe, nda inda dzuguviha ta wanafta, ŋa ɗifa skwa gadghəl ma həga Lazglafta, nda ŋa skwiha faghu lu nda ghuɓa.

¹³ Ka mnanaftá Dawuda ta Salumuŋ ta tva payata dagatá bakuha gwal dra skwi ŋa Lazglafta, nda la Levi, ŋa maga slna ma həga Yawe, nda inda huzlaha ŋa maga slna ma həga Yawe.

¹⁴ Ka mnanaftá Dawuda ta gwaɗa ta ghəŋa kiluʼa dasu, nda kfura tsedi dzaʼa lu da maga inda huzlaha kavghakavgha nda tsi, ŋa maga inda slna.

¹⁵ Ka mnanatá tsi ta Salumuŋ ta kiluʼa dasu nda kfura tsedi ŋa tsaftá sundulha pitirla, nda pitirlaha taɓta slna dzaʼa lu magay nda inda taŋ,

¹⁶ nda kiluʼa dasu ŋa maga inda tabəlha ŋa sərɓaftá buradiha ta pghaghuta lu ŋa Yawe tida, nda kiluʼa kfura tsedi ŋa maga tabəlha ka kfura tsedi.

¹⁷ Ka mnanatá tsi guli ta kiluʼa dasu ghenen ŋa maga gayaha, nda nzəganzəga, nda kwapha, nda kiluʼa dasu ŋa maga inda leghwa. Ka mnaŋtá tsi guli ta kiluʼa kfura tsedi dzaʼa kəl lu ka maga inda leghwa.

¹⁸ Mnanaha ta kiluʼa dasu ghenen dzaʼa kəl lu ka magaftá gwira dra urdi ŋa dray nda dra. Vlaŋha ta mndərga tva tsatá mwata plis ka kerubaha ka dasu ta zlataptá zlambakha, ka bukwamtá akwata dzratá wa Yawe.

¹⁹ Ka Dawuda mantsa: « Inda tsaha ya ná, mamu vindata ni ma ɗelewer vindaf Yawe nda dzva ni. Ka vlihatá tsi ta mahizl ŋa paslapta turtuk turtuk ta mndərga tva maga tsa slnaha ya, » kaʼa.

²⁰ Ka Dawuda nda zwaŋa ni Salumuŋ mantsa: « Mbra ta vgha, ka ŋavata ka ka maga slna! Yaha ka da zləŋ, yaha ka da ghudzaku, kawadaga Yawe, Lazglafta, ka Lazglafta ɗa, nda kagha. Haɗ dzaʼa zlaghata wu, haɗ dzaʼa zlaghata ŋa zləmbuta gha wu, ha ka kɗatá inda tsa slna ba həga Yawe ya wa.

²¹ Ngha, wya bakuha gwal dra skwi ŋa Lazglafta, nda ŋa la Levi guli, ŋa maga inda slna həga Lazglafta. Ta vata kagha, mamu gwal ta fatá ghəŋa taŋ nda ɗifil ma ghəŋa taŋ ŋa maga inda slna, maliha nda inda mnduha, nda fa ghəŋa taŋ ŋa snatá inda zlahuha gha, » kaʼa.