1Rus 27 - Hdi

Maliha bakuha gwal vulu

¹ Wya mbsaka la Israʼila ta maganatá slna ta mgham: Mala ga həgaha, maliha ta ghəŋa dəmbuʼ dəmbuʼ, nda maliha ta ghəŋa dərmək dərmək, nda maliha ma slna mgham. Slna taŋ ná, tsaya nghapta ka bakuha sludzi ta zatá tili turtuk ta maga slna ma vaku, ta mbaɗa vgha. Dər wati ma bakwa sludziha ná, sludziha dəmbuʼ hisambsak fwaɗ mida (24.000) həŋ.

² Yasuvgham, zwaŋa Zavdiʼel mali ta ghəŋa taŋtaŋa baku ma taŋtaŋa tili. Mnduha dəmbuʼ hisambsak fwaɗ mida (24.000) ma tsa bakwa ni ya.

³ Ma zivira la Perets tsatsi, tsatsi mali ta ghəŋa inda maliha bakuha gwal vulu ma taŋtaŋa tili.

⁴ Duday mnda la Ahuhi mali ta ghəŋa baku ta maga slna ma mahisa tili. Miklut slufa ni ma tsa baku ya. Mnduha dəmbuʼ hisambsak fwaɗ mida (24.000) ma bakwa ni.

⁵ Benaya, zwaŋa Yəhuyada, mnda dra skwi ŋa Lazglafta, mali ta ghəŋa baku ta maga slna ma mahkəna tili. Mnduha dəmbuʼ hisambsak fwaɗ mida (24.000) ma bakwa ni.

⁶ Tsa Benaya ya ná, bikwira vulu ta ghəŋa bakwa bikwirha vulu hkən mbsak. Zwaŋa ni Ghamizavat slufa ni ma tsa ŋa ni baku ya.

⁷ Ghasaʼel zwaŋa ma ni ma Yuʼav, mali ta ghəŋa baku ta maga slna ma mafwaɗa tili. Tahula tsatsi zwaŋa ni Zəvadiya ta lami da vla ni. Mnduha dəmbuʼ hisambsak fwaɗ mida (24.000) ma bakwa ni.

⁸ Samhut mnda la Yizrah mali ta ghəŋa baku ta maga slna ma mahutafa tili. Mnduha dəmbuʼ hisambsak fwaɗ mida (24.000) ma bakwa ni.

⁹ Ghira zwaŋa Ghikes mnda la Tekuwa mali ta ghəŋa baku ta maga slna ma mamkuʼa tili. Mnduha dəmbuʼ hisambsak fwaɗ mida (24.000) ma bakwa ni.

¹⁰ Helets mnda la Pəluŋ, mataba la Ifrayim mali ta ghəŋa baku ta maga slna ma mandəfáŋa tili. Mnduha dəmbuʼ hisambsak fwaɗ mida (24.000) ma bakwa ni.

¹¹ Sibəkay mnda la Husa mataba la Zerah mali ta ghəŋa baku ta maga slna ma matghasa tili. Mnduha dəmbuʼ hisambsak fwaɗ mida (24.000) ma bakwa ni.

¹² Avighezer mnda la Ghanatut, mataba la Biŋyamiŋ, mali ta ghəŋa baku ta maga slna ma matəmbaya tili. Mnduha dəmbuʼ hisambsak fwaɗ mida (24.000) ma bakwa ni.

¹³ Mahray mnda la Nətufa, mataba la Zerah, mali ta ghəŋa baku ta maga slna ma maghwaŋa tili. Mnduha dəmbuʼ hisambsak fwaɗ mida (24.000) ma bakwa ni.

¹⁴ Benaya mnda la Pirghatuŋ, mataba la Ifrayim, mali ta ghəŋa baku ta maga slna ma maghwaŋpəɗ ndeŋa tili. Mnduha dəmbuʼ hisambsak fwaɗ mida (24.000) ma bakwa ni.

¹⁵ Həlday, mnda la Nətufa ta uʼa la Ghutniʼel, mali ta ghəŋa baku ta maga slna ma maghwaŋpəɗ hisa tili. Mnduha dəmbuʼ hisambsak fwaɗ mida (24.000) ma bakwa ni.

Maliha ma mndəra la Israʼila

¹⁶ Maliha ta ghəŋa mndəra la Israʼila ná, wya həŋ: Ma mndəra la Rubeŋ ná, tsaya Ilighezer zwaŋa Zihri. Ma mndəra la Simghuŋ, tsaya Səfatyahu zwaŋa Maghaha.

¹⁷ Ma mndəra la Levi, tsaya Hasavya zwaŋa Kəmuʼel. Ma zivira la Haruna, tsaya Tsaduk.

¹⁸ Ma mndəra la Yuda, tsaya Ilihu zwaŋa ma ni ma Dawuda. Ma mndəra la Yisakar, tsaya Ghumri zwaŋa Mikaʼel.

¹⁹ Ma mndəra la Zəvuluŋ, tsaya Yismaghyahu, zwaŋa Ghuvadyahu. Ma mndəra la Naftali, tsaya Yəremut zwaŋa Ghazriʼel.

²⁰ Ma mndəra la Ifrayim, tsaya Huseyagh zwaŋa Ghazazyahu. Ma rita mndəra la Mənase, tsaya Yuʼel zwaŋa Pədaya.

²¹ Ma rita mndəra la Mənase ma Gilghat ná, tsaya Yidu zwaŋa Zakari. Ma mndəra la Biŋyamiŋ, tsaya Yaghasiʼel zwaŋa Avner.

²² Ma mndəra la Daŋ, tsaya Ghazarʼel, zwaŋa Yəruham. Tsaha ya maliha ta ghəŋa mndəra la Israʼila.

²³ Vindaf a Dawuda ta mbsaka gwal ta klaftá imi hisambsak ka saha nda sa wu, kabga mna mna Yawe, kazlay na: Dzaʼa yanaf ya yu ta la Israʼila manda tekwatsaha ta luwa kəʼa.

²⁴ Ka zlraftá Yuʼav zwaŋa Tseruya ta mbəɗay, ama kɗiŋ a wa. Tsaya ta klaktá gufanavata Yawe ta ŋuɗuf ta la Israʼila. Haɗ tsa mbsak ya ma ɗelewera vinda slna mgham Dawuda wa.

Gwal nghapta ka skwa mgham

²⁵ Ghazmavet zwaŋa Ghadiʼel ta nghapta ka dzuguviha ɗifa skwa gadghəla mgham. Yunataŋ zwaŋa Ghuziyahu ta nghapta ka dzuguviha tska huzla mgham ya ta hula luwa, nda ya ma luwaha, nda ya ma zwana luwaha, nda ya ma həga nda slra.

²⁶ Ghezri zwaŋa Kəluv mali ta ghəŋa gwal ta hva ma tsa haɗik ya.

²⁷ Simghi mnda la Rama mali ta ghəŋa vwaha inabi. Zavdi mnda la Səfam mali ta ghəŋa dzuguviha pgha ima inabi.

²⁸ Baghalʼhanaŋ mnda la Geder, mali ta ghəŋa zaytuŋha, nda ghurafa sla, ma luwaha ta kuɗuŋurha. Yughas mali ta ghəŋa dzuguviha pgha rɗa zaytuŋ.

²⁹ Sitray mnda la Saruŋ, mali ta ghəŋa slaha ta nghə lu ma daɓa Saruŋ. Safat zwaŋa Ghadlay mali ta ghəŋa slaha ma didiŋaha.

³⁰ Uvil mnda la Yismaghel mali ta ghəŋa ŋalibwaha. Yehdəyahu mnda la Merunut mali ta ghəŋa kəɗihha.

³¹ Yaziz mnda la Hagar, mali ta ghəŋa rina fisik. Inda tsaha ya ná, gwal nghapta ka skwiha mgham Dawuda həŋ.

Gwal vla hiɗaku ŋa mgham Dawuda

³² Yunataŋ, dasliʼiŋa Dawuda, mnda vla hiɗaku, mndu nda sna ta skwi ya, mnda vindi ya. Yəhiʼel zwaŋa Hahmuni ta nghapta ka zwana mgham.

³³ Ahitufel mnda vla hiɗaku ŋa mgham. Husay, mnda la Arki gra mgham.

³⁴ Tahula mtatá Ahitufel, ka lam Yəhuyada, zwaŋa Benaya, nda Aviyatar da vla ni. Yuʼav mali ta ghəŋa gwal vula mgham.