1Rus 26 - Hdi

Bakuha gwal ngha wa tghaha həga Lazglafta

¹ Bakwa gwal pgha lu ŋa ngha wa tgha na: Ma la Kurah, Məselemyahu, zwaŋa Kureʼ, mataba zwana Asaf.

² Ka yayatá Məselemyahu ta zwani: Zakari zumali, Yədighaʼel mahis, Zəvadyahu mahkən, Yatniʼel mafwaɗ,

³ Ghelam mahutafa ni, Yəhuhanaŋ mamkuʼa ni, Ilyughenay mandəfáŋa ni.

⁴ Ka yayatá Ghuvetʼidum ta zwani: Səmaghya zumali, Yəhuzavat mahis, Yuʼah mahkən, Sahar mafwaɗ, Netaŋʼel mahutaf,

⁵ Ghamiʼel mamkuʼ, Yisakar mandəfáŋ, Pəghulətay matghas. Tfanagha tfa Lazglafta ta wi ta Ghuvetʼidum.

⁶ Ka yayatá Səmaghya zumala ni ta zwani ta mutsaftá glaku mataba la taŋ, kabga mnduha ta pərɗaftá slna taŋ həŋ.

⁷ Zwana Səmaghya na: I Ghutni, nda Rəfaʼel, nda Ghuvet, nda i Ilzavat nda zwana ma ni, i Ilihu nda Səmahyaku, gwal viɗviɗ həŋ.

⁸ Inda tsaha ya zwana Ghuvetʼidum, hahəŋ nda zwana taŋ, nda zwana ma taŋ, gwal viɗviɗ həŋ, nda mbara nda mbara həŋ ka maga slna. Mkuʼ mbsak his mida həŋ ka ŋa Ghuvetʼidum.

⁹ Ma bakwa Məselemyahu ná, mamu zwani ni nda zwana ma ni, gwal viɗviɗ, ghwaŋpəɗ tghas həŋ.

¹⁰ Ka yayatá Husa ma la Mərari ta zwani: Simri zumali, aŋ mnda ni tsatsi a si zumali wu, ama ka fatá da ni ka zumali,

¹¹ Hilkiya mahis, Təvalyahu mahkən, Zakari mafwaɗ. Inda zwani ni nda zwana ma ni ma Husa ná, ghwaŋpəɗ hkən həŋ.

¹² Tsa bakuha gwal ngha wa tgha nda maliha taŋ ná, ta magay həŋ ta slna taŋ ka skwa turtuk ma həga Yawe.

¹³ Ka zabaptá həŋ nda ma vzaftá vindima ta wa tgha dzaʼa həŋ da nghay ga həga ga həga, zwani nda galata mndu tani.

¹⁴ Ka dɗaftá vindima ta Selemyahu ŋa ngha wa tgha nda təv safa fitik. Ka vzaftá lu ta vindima ta zwaŋa ni Zakari, mnda vla hiɗaku nda mahizl ma ghəŋa ni ya. Ka dɗaftá vindima tida ŋa ngha ya nda təv mazlay.

¹⁵ Ka dɗaftá vindima ta Ghuvetʼidum, ŋa ngha ya nda təv maghura. Ka dɗaftá vindima ta zwana ni ŋa ngha dzuguva tska huzlaha.

¹⁶ Ka dɗaftá vindima ta i Supim nda Husa ŋa ngha wa tgha nda təv dɗakwa fitik, nda wa tgha Salehet nda ta tva ŋlu. Ka dagaptá lu ta bakuha tsa gwal ta nghapta ya, nda fitika ni nda fitika ni ya tsaf lu manda ya:

¹⁷ Nda təv safa fitik, mkuʼ la Levi, nda təv mazlay, fwaɗ mnduha ka fitik ka fitik, nda təv maghura, fwaɗ mnduha ka fitik ka fitik, fwaɗ mnduha ta ngha dzuguva tska huzlaha ma vliha his kavgha kavgha.

¹⁸ Nda ma daɓi ta vata ni nda təv dɗakwa fitik, fwaɗ mnduha nda ta wa tvi, his mnduha nda təv tsa daɓi ya.

¹⁹ Tsaha ya bakuha gwal ta nghapta ka wa tghaha ma la Kurah nda la Mərari.

Slnaha valaŋ lu ta la Levi

²⁰ Ahiya, sani mataba la Levi ná, mnda ngha dzuguviha ɗifa huzlaha ma həga Lazglafta, nda dzuguviha ɗifa skwa gadghəl vlaŋ lu ta Lazglafta ya.

²¹ Laghdaŋ, sani mataba la Gersuŋ, tsatsi dzidza ndəghata mndəra mndu, tekw ŋa zwaŋa ni Yəhiʼel mataba taŋ.

²² Zwana Yəhiʼel, i Zetam nda Yuʼel zwaŋa ma ni ná, hahəŋ gwal ta ngha dzuguviha ɗifa skwa gadghəl ma həga Yawe.

²³ Ka vlaŋtá lu guli ta tsa slna ya ta la Ghamram, nda la Yitshar, nda la Hevruŋ, nda la Ghuziʼel:

²⁴ Səvuʼel ma zivira la Gersum, zwaŋa Musa ná, tsatsi mali ta ghəŋa gwal ta ngha dzuguviha ɗifa skwa gadghəl.

²⁵ Zwana ma ni ta sabi nda ma zivira la Ilighezer na: Tsaya i zwaŋa ni Rəhavya, nda zwaŋa ni Yəsaghyahu, nda zwaŋa ni Yuram, nda zwaŋa ni Zihri, nda zwaŋa ni Səlumit.

²⁶ Tsa Səlumit ya nda zwana ma ni ta ngha inda dzuguviha ɗifa skwa gadghəl pghaghu i mgham Dawuda, nda mala ga həgaha, nda maliha ta ghəŋa dəmbuʼ dəmbuʼ, nda maliha ta ghəŋa dərmək dərmək, nda maliha gwal vulu, ŋa Lazglafta.

²⁷ Mataba skwiha zləɗagagha həŋ ma vuluha, pghaghuta mnduha ta pama skwi ŋa paya həga Yawe.

²⁸ Inda skwi ya faghu Samuyel ka slayaŋ ya, nda Sawulu zwaŋa Kis, nda Avner zwaŋa Ner, nda Yuʼav zwaŋa Tseruya, nda inda gwal ta pghaghutá skwi ná, i Səlumit nda zwana ma ni ta nghanaghatá inda tsaha ya.

²⁹ Ma zivira la Yitshar ná, i Kananyahu nda zwana ni ta ngha hamata slnaha la Israʼila ma nzakwa taŋ ka maliha, nda gwal tsa guma.

³⁰ Ma zivira la Hevruŋ ná, i Hasavya nda zwana ma ni dəmbuʼ nda ndəfáŋ dərmək (1.700) viɗviɗ ta nghapta ka la Israʼila, ta ɓla Yardeŋ nda təv dɗakwa fitik, ŋa inda slna Yawe, nda slna mgham.

³¹ Ma zivira la Hevruŋ ná, Yəriya mali ta ghəŋa la Hevruŋ. Ta mafwaɗ mbsaka vakwa Dawuda ta gá mgham, ka lam lu da psa saba mndəra taŋ. Ka slanaghatá lu ma luwa Yaghzer ma kwakwara Gilghat ta mnduha mataba taŋ ta pərɗaftá slna taŋ.

³² Mamu zwana ma ni ma Yəriya ta pərɗaftá slna taŋ dəmbuʼ his nda ndəfáŋ dərmək (2.700), mala ga həgaha həŋ. Ka pghatá mgham Dawuda ta həŋ ka ghəŋ ka ghəŋ ta ghəŋa la Rubeŋ, nda la Gat, nda rita mndəra la Mənase, ŋa inda slnaha Lazglafta, nda slna mgham.