1Rus 23 - Hdi

Hlamta Dawuda ta la Levi da slna taŋ

¹ Manda haluta Dawuda, lula fitika ni, ka famtá tsi ta zwaŋa ni Salumuŋ da mgham ta ghəŋa la Israʼila.

² Ka tskanatá tsi ta inda maliha la Israʼila, nda gwal ta dra skwi ŋa Lazglafta, nda la Levi.

³ Ka mbəɗaftá lu ta la Levi ta klaftá imi hkən mbsak ka laghwi ta kəma. Mbsaka taŋ manda mbəɗaftá həŋ ta tember ta tember, zgwana zgwana ná, dəmbuʼ hkən mbsak tghas mida (38.000) həŋ.

⁴ Ka Dawuda mantsa: « Dəmbuʼ hisambsak fwaɗ mida (24.000) mataba taŋ ya, ka gwal ŋa nghapta ka slna həga Yawe katsi. Dəmbuʼ mkuʼ (6.000) ya, ka gwal vindi nda gwal tsa guma ka həŋ.

⁵ Dəmbuʼ fwaɗ (4.000), ka gwal ngha wi tgha ka həŋ. Dəmbuʼ fwaɗ (4.000) ka gwal ŋa zləzləva Yawe nda huzlaha magaf yu ŋa zləzləvu ka həŋ » kaʼa.

⁶ Ka daganaptá Dawuda ta həŋ ka baku ka baku, taɓta nzakwa zwana Levi ta uʼa taŋ: La Gersuŋ, nda la Kehat, nda la Mərari.

⁷ La Gersuŋ na: I Laghdaŋ nda Simghi həŋ.

⁸ Zwana Laghdaŋ na: I Yəhiʼel zumali, nda Zetam, nda Yuʼel, hkən həŋ.

⁹ Zwana Simghi na: I Səlumut, nda Haziʼel, nda Haraŋ, hkən həŋ. Hahəŋ mala ga həgaha ma la Laghdaŋ.

¹⁰ Sanlaha ma zwana Simghi guli na: I Yahat, nda Ziza, nda Yəghus, nda Bərigha, fwaɗ həŋ.

¹¹ Yahat taŋtaŋa ni, Ziza mahisa ni, ama ya ya a i Yəghus nda Bərigha ta zwani nda ndəgha wu, ka nzakw həŋ manda gwal ta uʼa turtuk.

¹² Zwana Kehat na: I Ghamram nda Yitshar, nda Hevruŋ, nda Ghuziʼel, fwaɗ həŋ.

¹³ Zwana Ghamram na: I Haruna nda Musa. Ka faghutá lu ta Haruna ŋa ɗekɗek, tsatsi nda zivira ni ŋa nzakwa taŋ ka gwal ta nghapta ka skwiha faghu lu ta ghuɓuta, ŋa dra urdi, nda ya ŋa maga slna ta kəma Yawe, nda ya ŋa vla tfa wi nda hga ni ŋa ɗekɗek.

¹⁴ Ama Musa, mnda Lazglafta ya ná, mbəɗam mbəɗa lu ta zwana ni mataba mndəra la Levi.

¹⁵ Zwana Musa na: I Gersum nda Ilighezer həŋ.

¹⁶ Zwaŋa Gersum na: Səvuʼel zumali.

¹⁷ Zwaŋa Ilighezer na: Tsaya Rəhavya. Mutsaf a Ilighezer ta sana zwaŋ wu, ama nda ndəgha zwana Rəhavya.

¹⁸ Zwaŋa Yitshar na: Tsaya Səlumit, zumali ya.

¹⁹ Zwana Hevruŋ na: Yəriya taŋtaŋ, Amarya mahis, Yahaziʼel mahkən, Yəkamgham mafwaɗ.

²⁰ Zwana Ghuziʼel na: Mika taŋtaŋ, Yisiya mahis.

²¹ Zwana Mərari na: Tsaha ya i Mahli, nda Musi. Zwana Mahli na: Tsaha ya i Ilghazar nda Kis.

²² Ka mtutá Ilghazar, ya a ta zwaŋa zgun wu, ama kuʼaha yeya yaya tsi. Ka hlaftá zwana Kis, zwana dasliʼiŋa taŋ ta həŋ ka miʼa taŋ.

²³ Zwana Musi na: Tsaha ya i Mahli, nda Gheder, nda Yəremut, hkən həŋ.

²⁴ Tsaha ya zwana Levi ta uʼa taŋ ta uʼa taŋ, mala ga həgaha, vivindaf lu ta hga taŋ turtuk turtuk, ma fitika mbəɗaftá mbsaka mnduha. Hisambsak ima taŋ ta hlaftá lu ŋa maga slna ma həga Yawe.

²⁵ Ka Dawuda si mnata na: « Vlaŋ vla Yawe, Lazglafta la Israʼila ta mbiʼa vgha ta mnduha ni. Dzaʼa gɗava gɗa tsatsi guli ŋa ɗekɗek ma Ursalima.

²⁶ Guli ná, haɗ la Levi dzaʼa gɗəglata ta kla həga tumpul, nda inda huzla pgha lu ŋa maga slna ni wu, » kaʼa.

²⁷ Ta tsa kwanaha gwaɗa Dawuda ya mbəɗa lu ta mbsaka la Levi sliʼafta ni ta imi hisambsak.

²⁸ Slna taŋ ná, nzanavata ta vata zivira Haruna ŋa maga slna ma həga Yawe, ma daɓiha nda ya ma huɗa həgaha, ka tsaɗiŋtá inda skwiha faghu lu ka ŋa Lazglafta, nda inda slnaha ma həga Lazglafta.

²⁹ Hahəŋ dzaʼa nghapta ka buradi ta vlaŋta lu ta Lazglafta ta tabəl, nda hpu kəzlitit ka mbəha nimaya, nda biskwitha kul haɗ is mida, nda gatuha ta sulata lu ta gədzeh, nda ya ta data lu nda da. Hahəŋ guli dzaʼa nghapta ka huzlaha ta kəl lu ka gara skwiha.

³⁰ Ta lagha la həŋ nda sərɗək tani, nda hawu tani sladata ka fa laha, ka zləzləva Yawe,

³¹ mantsa ya ta fitika vlay lu ŋa Yawe ta inda skwa pla ghəŋ ŋa dray tsuh tsuh baɗ sabatha, nda ŋa ngha tili, nda ŋa skala rfuha. Inda fitik həŋ ta maga tsa slna ya ta kəma Yawe, taɓta mbsaka taŋ nda tva skwiha ŋa magay.

³² Ta nghap ngha həŋ ka həga tumpula guyaku, nda vli nda ghuɓa, nda kataŋta zivira Haruna zwanama taŋ ma slna ma həga Yawe.