1Rus 22 - Hdi

¹ Ka Dawuda mantsa: « Hadna dzaʼa nzakwa həga Yawe, Lazglafta, hadna dzaʼa nzakwa gwira pla ghəŋ ŋa dray tsuh tsuh ŋa la Israʼila! » kaʼa.

Papaya skwiha ŋa ba həga Lazglafta

² Ka mnaftá Dawuda ta tskanatá inda la mayəm ta nzakw ta haɗika la Israʼila, ka mblaftá tsi ta həŋ ŋa fifiɗatá palaha ŋa ba həga Lazglafta.

³ Ka papayaftá Dawuda ta kfurha nda ndəgha ŋa kusaha ŋa baŋbaŋa tgha, nda htsiŋha ni ŋa habay, nda ghuva tili kul laviŋtá lu ta mbəɗafta,

⁴ nda udza sedra kul laviŋtá lu ta mbəɗafta, kabga hlədanagha hla la Tsiduŋ nda la Tir ta Dawuda ta udza sedra ta ndəghuta.

⁵ Ka Dawuda ma ghəŋa ni mantsa: « Ta ka galaɓay zwaŋa ɗa Salumuŋ, ka mbaway, tsaw na həga dzaʼa lu banaftá Yawe na ná, həga ŋa laghwa hga ni da zərwa ya, dzaʼa mamu sgita ni ta inda haɗikha. Tsaya dzaʼa kəl yu ka papayaftá skwiha, » kaʼa. Mantsa tama, ma kɗaku Dawuda ka mtutá, ka papayaftá tsi ta skwiha nda ndəgha.

Salumuŋ dzaʼa baftá həga Lazglafta

⁶ Ka hgaftá Dawuda ta zwaŋa ni Salumuŋ, ka mnanaftá tsi ta baftá həga ŋa Yawe, Lazglafta la Israʼila,

⁷ kaʼa nda tsi mantsa: « Zwaŋa ɗa, si ɗvu ɗva yu ma ŋuɗufa ɗa ta baftá həga ŋa vlaŋtá sgit ta hga Yawe, Lazglafta ɗa,

⁸ ama ka gwaɗgihatá Yawe: “Dagala us pghiŋ ka, dagala vulu vula ka. Haɗ ka dzaʼa baftá həga ŋa vlaŋtá sgit ta hga ɗa wu, kabga dagala us pghiŋ ka ta haɗik ta kəma ɗa,

⁹ ama dzaʼa yaya ka ta zwaŋ, dzaʼa vlaŋ vla yu ta mbiʼa vgha, nda ma klapta ma dzva inda ghumaha ni ta wanafta, Salumuŋ dzaʼa hga lu. Dzaʼa vlaŋ vla yu ta nzakw ləŋləŋ ma zɗaku ta la Israʼila ma nzakwa ni nda hafu.

¹⁰ Tsatsi dzaʼa baftá həga ŋa vlaŋtá sgit ta hga ɗa. Tsatsi dzaʼa nzakway ka zwaŋa ɗa, dzaʼa nzakway iʼi ka da ni, dzaʼa dihana diha yu ŋa ɗekɗek ta dughurukwa gá mghama ni ma Israʼila,” kaʼa.

¹¹ Ndana tama, ka nza Yawe kawadaga nda kagha zwaŋa ɗa, kada katsafta ka ta baftá həga Yawe, Lazglafta gha, manda ya mnaŋ tsi ta ghəŋa kagha!

¹² Kweŋkweŋ ná, ka vlagha vla Yawe ta ndanu ɗina nda mahizl, ka dihaghata tsi ta ghəŋa la Israʼila, ŋa ŋanatá gha ta zlaha Yawe, Lazglafta gha.

¹³ Mantsa tama, dzaʼa katsay ka ka ŋana ŋa ka kahwathwata ta tva skwiha ya ŋa magay mnanaf Yawe ta Musa ŋa la Israʼila. Mbra ta vgha, ka ŋavata ka! Yaha ka da zləŋ, yaha ka da ghudzaku.

¹⁴ Wya dzadza yu ta vgha, ka payaftá yu ŋa həga Yawe, ta dasu ka kiluʼ dəmbuʼ hkən nda fwaɗ dərmək (3.400), nda kfura tsedi ka kiluʼ dəmbuʼ hkən mbsak fwaɗ mida (34.000), nda ghuva tili, nda kfur, kul laviŋtá lu ta grafta, dagala katakata. Payaf paya yu guli ta udzuha, nda palaha, ka sganaghata ka guli.

¹⁵ Nda ndəgha gwal ta magaghatá slna, nda gwal pasla pala, nda gwal fifiɗa pala nda udzuha, inda masəmha ma inda slnaha.

¹⁶ Mamu ka nda dasu, nda tsedi, nda ghuva tili nda ya nda kfur ya, kul laviŋtá lu ta mbəɗafta. Sliʼaf sliʼa, ka maga ka ta slna, ka nza Yawe kawadaga nda kagha! » kaʼa.

¹⁷ Ka mnanaftá Dawuda ta inda maliha ma la Israʼila, ŋa kataŋta taŋ ta zwaŋa ni Salumuŋ, kaʼa mantsa:

¹⁸ « Haɗ Yawe, Lazglafta ghuni kawadaga nda kaghuni ra? Vlaghuna a ta mbiʼa vgha dər ndiga ndiga ra? Vliha vla ma dzva ɗa ta mnduha ma haɗik, ka hananatá tsa haɗik ya ta ghəŋ ta kəma Yawe, nda ya ta kəma mnduha ni.

¹⁹ Pghawa pgha ndanana tama ta ŋuɗufa ghuni, nda hafa ghuni ka zba Yawe, Lazglafta ghuni. Sliʼafwa sliʼa ka ba kuni ta vli ta ghuɓuta ŋa Yawe, Lazglafta, kada hlagaghata kuni ta akwata dzratá wa Yawe, nda huzlaha nda fa ka ŋa Lazglafta da tsa həga dzaʼa bafta lu ŋa vlaŋtá sgit ta hga Yawe ya, » kaʼa.