1Rus 18 - Hdi

Sganaghata Dawuda ta gá mghama ni

¹ Tahula tsa, ka zatá Dawuda ta ghwa ta ghəŋa la Filisti, ka ŋursanatá həŋ. Ka hlaghutá tsi da la Filisti ta luwa Gat nda vliha ta wanafta.

² Ka zatá tsi ta ghwa ta ghəŋa la Muwav, Ka nzakw la Muwav ka vuʼa mista Dawuda ka pla dzumna ŋa ni.

³ Ka zatá Dawuda guli ta ghwa ta ghəŋa Hadadghezer, mghama Tsuva, ndusa nda Hamat, ma fitika lagha ni da fanaghatá mbrakwa ni ta kwakwara zala Yufratis.

⁴ Ka klaghutá Dawuda ta mwata plisha dəmbuʼ (1.000) da tsi, nda gwal ŋla plis dəmbuʼ ndəfáŋ (7.000), nda gwal vulu nda səla dəmbuʼ hisambsak (20.000) mataba gwal vula ni. Ka ratsiŋtá tsi ta dzalakwa plisha ta tɗa mwata plis demdem, ka pɗanatá tsi ta həŋ dərmək (100) kweŋkweŋ.

⁵ Ka sliʼadaghatá la Aram ma Damas da katá Hadadghezer, mghama Tsuva. Ama ka rwanatá Dawuda ta mnduha dəmbuʼ hisambsak his mida (22.000) mataba taŋ.

⁶ Ka pghanamtá tsi ta guvnaha ta la Aram ma Damas. Ka vraganatá la Aram ta ghəŋ mista Dawuda ka pla dzumna ŋa ni. Ta vlaŋ vla Yawe ta zatá ghwa ta Dawuda dər lagha da vli ga tsi.

⁷ Ka hlaghutá Dawuda ta ghwadziha ka dasu ta hlə sludziha Hadadghezer, ka hlaghata da Ursalima.

⁸ Ka hlagaghutá mgham Dawuda guli ta ghuva tili ŋulum katakata ma Tivhat, nda ya ma Kuŋ, luwaha Hadadghezer. Ka magaftá Salumuŋ ta glifiŋ dagala ka ghuva tili, nda guguɗiha, nda huzlaha ka ghuva tili nda tsi.

⁹ Ka snaŋtá Tughu, mghama Hamat, kazlay na za za Dawuda ta ghwa ta ghəŋa inda gwal vula Hadadghezer, mghama Tsuva kəʼa.

¹⁰ Ka ghunaftá Tughu ta zwaŋa ni Haduram da mgham Dawuda ŋa ganaghatá zgu, nda ya ŋa rfanaghata ta ghəŋa laba ni vulu nda Hadadghezer ka zatá tsi ta ghwa, kabga ghuma Tughu na Hadadghezer. Ka hlədanaghatá Haduram ta Dawuda ta huzla kavghakavgha ka dasu, nda ya ka kfura tsedi, nda ya ka ghuva tili.

¹¹ Ka pghanatá mgham Dawuda ta tsaha ya guli ta Yawe, manda ya pghana tsi ta kfura tsedi, nda ya nda dasu ya hlagaghu tsi da inda sanlaha ma mndəra mnduha: La Idum, nda la Muwav, nda la Ghamuŋ, nda la Filisti nda la Ghamalek ya.

¹² Ka pslatá Avisay, zwaŋa Tseruya ta la Idum dəmbuʼ ghwaŋpəɗ tghas (18.000) ma didiŋa Slughul.

¹³ Ka fafatá Dawuda ta guvnaha ma Idum. Ma inda Idum fafata tsi ta guvnaha. Ka nutá inda la Idum ka vuʼa Dawuda. Ta vlaŋ vla Yawe ta zatá ghwa ta Dawuda ma inda vli ta lagha tsi.

Maliha ta maganatá slna ta Dawuda

¹⁴ Ka gə Dawuda ta mgham ta ghəŋa inda la Israʼila. Ka tsanatá tsi ta guma nda ra, tɗukwa ta inda mnduha ni.

¹⁵ Yuʼav zwaŋa Tseruya, mali ta ghəŋa gwal vulu. Yəhusafat, zwaŋa Ahilut ka mnda tskanatá ɗelewera gwaɗa ga mgham.

¹⁶ I Tsaduk, zwaŋa Ahituv, nda Avimelek, zwaŋa Aviyatar gwal dra skwi ŋa Lazglafta. Savsaʼ mnda vindi.

¹⁷ Benaya zwaŋa Yəhuyada mali ta ghəŋa la Kəret nda la Pəlet. Zwana Dawuda slufaha mgham.