1Rus 17 - Hdi

Həga Lazglafta nda həga Dawuda

¹ Lama mgham Dawuda nzata ma həga gá mghama ni, kaʼa nda anabi Nataŋ mantsa: « Ngha ɓa! Ma həga udza sedra nzamta yu, ama ma tumpula patak nzamta akwata dzratá wa Yawe, » kaʼa.

² Ka Nataŋ nda Dawuda mantsa: « Maga ta inda skwi ya ndanaŋ ka ma ghəŋa gha, kabga kawadaga Lazglafta nda kagha, » kaʼa.

³ Ama ga rviɗik baɗ va tsaya, ka gwaɗganatá Lazglafta ta Nataŋ, kaʼa mantsa:

⁴ « La da mnanatá kwalva ɗa Dawuda: “Ka Yawe na: Kagha a dzaʼa baɗiftá həga ŋa nzakwa ɗa wa.

⁵ Ta nzam a yu ma həga daga baɗ hlagapta ɗa ta la Israʼila ma Masar ha ka sagha ta gita wu, ama ma tumpul ma tumpul nzata yu, sliʼafta ma ya vli, lagha da ya vli.

⁶ Ma inda vli ya lagha yu nda inda la Israʼila ná, walaŋ a yu ta mnanatá ya dər turtuk ma gwal tsa guma la Israʼila, ya mnanaf yu ta nghapta ka mnduha ɗa, kazlay na: Kabgawu kwal kuni baɗiftá həga nda udza sedra na? kəʼa wa.”

⁷ Ndanana tama, mnana mna ta kwalva ɗa Dawuda: “Wya ka Yawe mghama gwal vulu mnata: Iʼi ta klagaghutá kagha ta ngha rini ma mtak, mista tuwakha, ŋa nzakwa gha ka mali ta ghəŋa mnduha ɗa, la Israʼila.

⁸ Nza nza yu kawadaga nda kagha ma inda vli mbaɗ ka ta mbaɗa, ka zaɗanatá yu ta inda ghumaha gha ta kəma gha. Dzaʼa kapanaf kapa yu ta hga gha manda ŋa gwal dagaladagala ta ghəŋa haɗik.

⁹ Dzaʼa zbanaf zba yu ta vla nzaku ta mnduha ɗa la Israʼila, vli dzaʼa dihanata yu ta həŋ ŋa nzakwa taŋ hada, ŋa kwala zləŋ ksaŋtá həŋ ɗekɗek. Haɗ ghwaɗaka mnduha dzaʼa lagha ghuya ɗaŋwa ŋa taŋ manda ya ghalya,

¹⁰ ta fitika pghanaghata ɗa ta gwal tsa guma ta ghəŋa mnduha ɗa la Israʼila ya wa. Dzaʼa ŋursagana ŋursa yu ta inda ghumaha gha. Ka mnaghatá yu kazlay na, Yawe dzaʼa vlaghatá zivir ŋa ga mgham, kəʼa.

¹¹ Tahula hɗamta fitika gha, laghu la ka da dzidzíha gha ya, dzaʼa zlaganap zlaga yu ta mndu turtuk mataba zivirha gha, ya dzaʼa sabi ma kagha. Dzaʼa dihana diha yu dar ta ga mghama ni.

¹² Tsatsi dzaʼa baɗiftá həga, ŋa sladanafta ɗa ŋa ɗekɗek ta dughurukwa ni.

¹³ Dzaʼa nzakway yu ka da ka ŋa ni, ta nzatá tsatsi guli ka zwaŋ ka ŋa ɗa. Haɗ yu dzaʼa klaghutá zɗakwa ɗa da tsi, manda ya klaghu yu da mndu ya ta tiŋlaghutá kagha ya wa.

¹⁴ Dzaʼa ŋana ŋa yu ŋa ɗekɗek ma həga ɗa, nda ya ma gá mghama ɗa, dzaʼa nda diha dughurukwa gá mghama ni ŋa ɗekɗek,” » kaʼa.

¹⁵ Mantsa ya ka Nataŋ mnanatá inda tsa gwaɗaha ya, nda inda tsa skwiha manda skwi ma suni ya ta Dawuda.

Duʼa rfa Dawuda

¹⁶ Ka lagha mgham Dawuda nzata ta kəma Yawe, kaʼa mantsa: « Wa iʼi ni Yawe, Lazglafta ɗa, wa la ga ini ha ŋa ɓhagaɗighata gha da na vli mida yu na na?

¹⁷ Tsaw ta nda hta na maga ka na ta wa ira gha rki ní, Lazglafta ɗa, ta wana ka ta mna gwaɗa ta la ga kwalva gha, ya kəʼa dzaʼa nzakway dazlay. Ta nghə ka mndu dagala ka ta iʼi a Yawe, Lazglafta!

¹⁸ Nahgani ta dzaʼa mnəglaghata iʼi Dawuda ta ghəŋa glaku vliha ka na? Nda sna kagha ta kwalva gha.

¹⁹ Yawe, dabga ɗvuta gha ta iʼi kwalva gha, manda va ya ndanaŋ ka, hɗanamta ka ta inda tsa skwiha dagaladagala mamaraŋ ka ya.

²⁰ Yawe, haɗ mndu taɓta kagha wa! Kahwathwata haɗ sana Lazglafta ta ghəŋa kagha, manda ya ta gɗata ŋni ta snaŋta wa!

²¹ Mamu sana mndəra mndu dər turtuk ta ghəŋa haɗik manda mnduha gha la Israʼila ra? Ar Lazglafta, sasa ka da varatá həŋ ŋa nzakwa taŋ ka mnduha gha, ŋa tsaftá hga gha, nda ma magata gha ta skwiha ka makwitkwit nda mandərmimiha. Ka ghazliŋtá ka ta kəma mnduha gha varagap ka ma haɗika Masar ta mndəra sanlaha ma mnduha.

²² Fa fa ka ta mnduha gha la Israʼila ŋa nzakwa taŋ ka mnduha gha ŋa ɗekɗek, ta nzatá kagha Yawe guli ka Lazglafta taŋ.

²³ Ndanana tama Yawe, hɗam hɗa ŋa ɗekɗek ta gwaɗa ya mna ka ta ghəŋa kwalva gha nda ya ta ghəŋa la ga taŋ, ka maga ka manda ya mna ka.

²⁴ Ka maga maga tsi kahwathwata, ka ŋla hga gha ŋa ɗekɗek, ka mna dər wati ma mndu kazlay: “Yawe mghama gwal vulu, na Lazglafta la Israʼila, tsatsi Lazglafta ta ghəŋa la Israʼila kəʼa.” Ka nza la ga kwalva gha Dawuda nda diha ta kəma gha!

²⁵ Vərɗa kagha, Lazglafta ɗa, ta mnanatá kwalva gha kazlay na, dzaʼa banaf ba ka ta həga, kəʼa. Tsaya kəl yu ka mutsaftá ufata vgha, ka ndəɓa dzvu da kagha

²⁶ Ndanana, Yawe, kagha Lazglafta, ka tanaftá ka ta imi ta sləməŋ ta kwalva gha ŋa ŋatsa tsa zɗaku ya.

²⁷ Ndanana, kumaŋ kuma ka ta tfanaghatá wi ta zivirha kwalva gha, kada gɗavata tsi ŋa ɗekɗek ta kəma gha, kabga kagha Yawe ta tfanaghatá wi, nda tfa wi ni ŋa ɗekɗek! » kaʼa.