1Rus 15 - Hdi

Payay Dawuda ta kla akwata dzratá wi

¹ Ka babaftá Dawuda ta həgaha ni ma luwa Dawuda, ka payaftá tsi ta vli ŋa akwata Lazglafta, ka dzugwanatá tsi ta tumpul.

² Kaʼa tama mantsa: « La Levi kweŋkweŋ dzaʼa kla akwata Lazglafta, kabga hahəŋ zbap Yawe ŋa ɗekɗek ŋa kla akwata Yawe, ŋa maganatá slna, » kaʼa.

³ Ka tskanatá Dawuda ta la Israʼila demdem ma Ursalima ŋa kladaftá akwata Yawe da tsa vli payanaf tsi ya.

⁴ Ka tskanatá Dawuda ta zivira la Haruna nda la Levi.

⁵ Mataba la Kehat na: Uriʼel mala taŋ, nda zwana da ni dərmək nda hisambsak (120).

⁶ Mataba la Mərari na: Ghasaya mala taŋ, nda zwana da ni his dərmək nda hisambsak (220).

⁷ Mataba la Gersum na: Yuʼel mala taŋ, nda zwana da ni dərmək nda hkən mbsak (130).

⁸ Mataba la Ilitsafaŋ na: Səmaghya mala taŋ, nda zwana da ni his dərmək (200).

⁹ Mataba la Hevruŋ na: Iliʼel mala taŋ, nda zwana da ni, tghas mbsak.

¹⁰ Mataba la Ghuziʼel na: Ghaminadav mala taŋ, nda zwana da ni dərmək nda ghwaŋpəɗ his (112).

¹¹ Ka hgaftá Dawuda ta gwal dra skwi ŋa Lazglafta i Tsaduk nda Aviyatar, nda la Levi: I Uriʼel, nda Ghasaya, nda Yuʼel, nda Səmaghya, nda Iliʼel, nda Ghaminadav.

¹² Kaʼa nda həŋ mantsa: « Kaghuni mala ga həgaha mataba la Levi. Tsaɗiŋwa tsaɗa ta nzakwa ghuni, kaghuni nda zwana ma ghuni, ka kladafta kuni ta akwata Yawe, Lazglafta la Israʼila, da vli payaf yu.

¹³ Nziya nza tsi, gufaf gufa ŋuɗufa Yawe, Lazglafta mu ta ghəŋa aŋni ma taŋtaŋa səla, kabga kwala ghuni kul haɗ hada, zbaŋ a ŋni nda tva ni wu, » kaʼa.

¹⁴ Ka tsaɗiŋtá gwal ta dra skwi ŋa Lazglafta, nda la Levi ta nzakwa taŋ tama ŋa kladaftá akwata Yawe, Lazglafta la Israʼila.

¹⁵ Ka klaftá la Levi ta akwata Lazglafta ta badzaga taŋ nda matalaha, manda ya mnanaf Musa ta həŋ taɓta gwaɗa Yawe.

¹⁶ Ka Dawuda nda maliha la Levi mantsa: « Pgham pgha ma vla taŋ ta zwana da ghuni, ka gwal fa laha, ka gwal dza huzla skalu: Htimbil, kəzliŋkəzliŋ, ndeŋndeŋ ŋa ghudzaganata nda mbraku ka ŋizla rfu, » kaʼa.

¹⁷ Ka pghamtá la Levi ma slna taŋ ta i Hemaŋ zwaŋa Yuʼel, nda Asaf zwaŋa Berekyahu, mataba zwana da ni, nda Itaŋ zwaŋa Kusayahu mataba zwana da taŋ la Mərari.

¹⁸ Mamu zwana da taŋ ka sagəŋ mista taŋ: I Zakari, nda Beŋ, nda Yaghaziʼel, nda Səmiramut, nda Yəhiʼel, nda Ghuni, nda Iliʼav, nda Benaya, nda Maghaseya, nda Matitiya, nda Ilifəlehu, nda Mikneyahu, nda gwal ngha wa tgha, i Ghuvetʼidum nda Yəghiʼel.

¹⁹ Gwal fa laha ta ghudza ndeŋndeŋ ka ghuva tili na: I Hemaŋ, nda Asaf, nda Itaŋ həŋ.

²⁰ Gwal dza htimbil ka zliha na: I Zakari, nda Ghaziʼel, nda Səmiramut, nda Yəhiʼel, nda Ghuni, nda Iliʼav, nda Maghaseya, nda Benaya həŋ.

²¹ Gwal dza kəzliŋkəzliŋ ka ŋululuk, ŋa kla lwa laha na: I Matitiya, nda Ilifəlehu, nda Mikneyahu, nda Ghuvetʼidum, nda Yəghiʼel, nda Ghazazyahu ya.

²² Kənanyahu, mali ta ghəŋa la Levi, tsatsi ta ghəŋa gwal fa laha, kabga pərɗaf pərɗa ta magay.

²³ I Berehiya nda Ilkana, gwal ngha akwati.

²⁴ Gwal dra skwi ŋa Lazglafta ta vya talakwaha ta kəma akwata Lazglafta na: I Səvaniya, nda Yusafat, nda Netaŋʼel, nda Ghamasay, nda Zakari, nda Benaya, nda Ilighezer həŋ. I Ghuvetʼidum nda Yəhiya ya guli, ngha akwati ŋa taŋ.

Ɓhadanaghatá akwata dzratá wi da Ursalima

²⁵ Mantsa tama, ma tsa rfu ya, ka laghu i Dawuda nda la galata mnduha la Israʼila, nda maliha ta ghəŋa bakwa gwal vulu dəmbuʼ dəmbuʼ ŋa kladaftá akwata dzratá wa Yawe daga ga Ghuvetʼidum.

²⁶ Nda kata mnda Lazglafta klafta la Levi ta tsa akwata dzratá wa Yawe ya, ka vlatá həŋ ta lghəŋha ndəfáŋ nda maŋazakha ndəfáŋ ŋa pla ghəŋ.

²⁷ Ka suɗavatá Dawuda ta sɗakw gaf lu nda sləvdza liŋ kulefeɗfeɗa, mantsa ya inda tsa la Levi ta kla tsa akwati ya, nda gwal fa laha, nda Kənanyahu mala gwal fa laha. Suɗava suɗa Dawuda guli ta ifuta ka liŋ.

²⁸ Inda la Israʼila, ka kladaftá həŋ ta tsa akwata dzratá wa Yawe, ka dzaʼa nda hayayi, nda vya duli, nda vya talakwa, ghudza ndeŋndeŋ, nda dza htimbil, nda dza kəzliŋkəzliŋ.

²⁹ Manda ɓhadanaghata tsa akwata dzratá wa Yawe ya da luwa Dawuda, ka diɗanavatá Mihal, makwa Sawulu ta vgha ta vata finitir. Ka hriŋagaptá tsi ka mgham Dawuda ta vavalaku, ka skalu, ka hərtətata tsi katakata.