1Rus 13 - Hdi

Vradanafta Dawuda ta akwata dzratá wi da Ursalima

¹ Ka nzatá Dawuda ka dzərku nda maliha ta ghəŋa bakwa gwal vulu dəmbuʼ dəmbuʼ, nda dərmək dərmək, nda inda gwal dagaladagala.

² Tahula tsa, ka Dawuda nda inda guyatá ghəŋa la Israʼila mantsa: « Ka zɗəgaghuna zɗa tsi, ka sagha da Yawe, Lazglafta mu tsi katsi, tsaghanaf ma tsagha ta lwi ta inda zwanama mu ta nzakw ma inda haɗika la Israʼila, nda gwal dra skwi ŋa Lazglafta, nda la Levi ma luwaha ta nzakw həŋ, ŋa sagha gwaftá vgha nda amu.

³ Tahula tsa, ŋa vraganaghata mu da amu ta akwata Lazglafta mu, kabga kulaf a mu ta fitika gá mghama Sawulu wu, » kaʼa.

⁴ Ka tsuʼaftá inda guyatá ghəŋ ta magata mantsa ya, kabga zɗəgana zɗa tsa gwaɗa ya ta inda mndu.

⁵ Ka tskanatá Dawuda ta la Israʼila demdem, daga ta wa Sihur ma Masar nda ga maghura ha da Levuʼhamat nda ga mazlay, ŋa vraganaghatá akwata Lazglafta ma Kiriyatʼyegharim.

⁶ Ka laghu Dawuda nda inda la Israʼila da luwa Baghala, tsaya Kiriyatʼyegharim ta haɗika Yuda ŋa vradanaftá akwata Lazglafta, tsa akwati tsaf lu tida ta hga Yawe ta nzaku ma takataka kerubaha ya.

⁷ Ɓhadaghata taŋ da Avinadav, ka klagapta həŋ ta tsa akwata Lazglafta ya, ka famtá həŋ ma lfiɗa mwata sla. I Ghuza nda Ahyu ta klay.

⁸ Ka dzaʼa i Dawuda nda inda la Israʼila nda skalu nda mbraku nda mbraku ta kəma Lazglafta, ka pghay nda laha, nda dza htimbil, nda vya talakwa, nda dza kəzliŋkəzliŋ, nda dza dewdew, nda dza ndeŋndeŋ.

⁹ Ɓhadaghata taŋ ta blikwa Kiduŋ, ka hədzikatá tsa akwata Lazglafta ya kabga tsəhiŋta skwi ta tsa slaha ya, ka fadaptá Ghuza ta dzvu ŋa ŋanata.

¹⁰ Ka gufaftá ŋuɗufa Yawe ta ghəŋa Ghuza, ka dzuŋtá tsi, kabga vəl fadapta ni ta dzvu ŋa ŋanatá tsa akwati ya. Ka mtutá tsi hada hada ta kəma Lazglafta.

¹¹ Ka ɓasaftá Dawuda ta ŋuɗuf, kabga dzata Yawe ta Ghuza. Ha gita, Perets Ghuza ta hga lu ta tsa vli ya.

¹² Ka zləŋaftá Dawuda ta Lazglafta katakata baɗ tsaya, kaʼa mantsa: « Dzaʼa laviŋ lava yu ta kladaghatá akwata Lazglafta da ini ra? » kaʼa.

¹³ Kladagha a Dawuda tama ta tsa akwati ya da taŋ, ma luwa Dawuda wu, ama ka faghutá tsi ma həga ga Ghuvetʼidum, mnda la Gat.

¹⁴ Ka nzatá tsa akwata Lazglafta ya ka tili hkən ga Ghuvetʼidum, ma həga ga taŋ. Ka tfanaghatá Yawe ta wi ta həga ga Ghuvetʼidum, nda inda skwiha ni.