1Rus 11 - Hdi

Ga mghama Dawuda ta ghəŋa la Israʼila demdem

¹ Ka sliʼadaghatá inda la Israʼila slanaghatá Dawuda ma Hevruŋ, ka həŋ mantsa: « Wana ŋni, sluʼuvgha gha ŋni, usa gha ŋni.

² Ghalya, daga ma fitika nzakwa Sawulu ka mgham ná, kagha si ta gɗata ta klanatá kəma ta la Israʼila, kagha ta vranaktá həŋ. Ka Yawe, Lazglafta gha na: “Kagha dzaʼa nghapta ka mnduha ɗa la Israʼila, kagha dzaʼa nzakway ka mala taŋ,” kaʼa » ka həŋ.

³ Mantsa tama, ka sliʼadaghatá inda galata mnduha la Israʼila slanaghatá mgham Dawuda ma Hevruŋ. Hada, ka dzraftá Dawuda ta wi nda həŋ ta kəma Yawe ma Hevruŋ. Ka fatá həŋ nda ma pghanaghatá rɗi ta Dawuda ŋa nzakwa ni ka mgham ta ghəŋa la Israʼila taɓta gwaɗa Yawe ta mnata nda ma wa Samuyel.

Zluʼata Dawuda ta Ursalima

⁴ Ka sliʼaftá i Dawuda nda la Israʼila demdem ka laghwi da Ursalima, tsaya Yəbus. Hada ta nzakwa la Yəbus.

⁵ Ka la Yəbus nda Dawuda mantsa: « Haɗ ka dzaʼa sami da hadna wu! » ka həŋ. Ama ka zluʼatá Dawuda ta Tsiyuŋ vli ya ŋam lu ma matsaka huzlu, ta hgə lu tahula tsa ka luwa Dawuda ya.

⁶ Ká Dawuda si mnata guli na: « Ka tiŋəl wa dzaʼa lafi ka zlraftá psla la Yəbus ya ná, tsaya dzaʼa nzakway ka mali dagala ta ghəŋa gwal vulu, » kaʼa. Ka tiŋlaghutá Yuʼav zwaŋa Tseruya ta lafi, ka nzatá tsi ka mali.

⁷ Ka nzatá Dawuda ma tsa vli ŋam lu ma matsaka huzlu ya, tsaya kəl lu ka hgay ka luwa Dawuda.

⁸ Tahula tsa, ka bəglaftá tsi ta tsa luwa ya ka wanafta, zlrafta ta ghərzla ta hgə lu ka Milu dikw da vliha ta wanafta, ka papayaftá Yuʼav ta pɗakwa tsa luwa ya.

⁹ Ka dzaʼa mbrakwa Dawuda ta kəma ta kəma, kawadaga Yawe mghama gwal vulu nda tsi.

Bikwirha vula Dawuda

¹⁰ Wya maliha ka bikwira vulu, gwal ta hinistá dzvu kahwathwata ta Dawuda ma gá mghama ni, nda inda la Israʼila ŋa fata ka mgham, taɓta gwaɗa Yawe ta mnata ta ghəŋa la Israʼila.

¹¹ Wya hga mnduha Dawuda ka bikwira vulu: Yasuvgham, zwaŋa Hahmuni, mali ta ghəŋa ghuɓu ta hgə lu ka hkən ya. Ka rwanatá tsi nda gwadama ni ta mnduha hkən dərmək (300) baɗ turtuk.

¹² Mista ni Ilghazar, zwaŋa Dudu, mnda la Ahuhi, tekw tsatsi mataba tsa gwal hkən ka bikwira vulu ya.

¹³ Tsatsi si kawadaga nda Dawuda ma Pasʼdamim, si ma fitika tskavata la Filisti ŋa vulu ya. Ma tsa vli ya, mamu sana vwah ləgdaʼ urz tida, ka hwayaftá mnduha ta kəma la Filisti.

¹⁴ Ama ka dihavatá həŋ ma takataka tsa vwah ya, ka katatá həŋ. Ka rwanatá tsi ta la Filisti. Ka hɗamtá Yawe ta zatá ghwa katakata.

¹⁵ Ka laha gwal hkən mataba bikwira vulu hkən mbsak da Dawuda ma dzaŋ ma galigha Ghadulam, ta fatá la Filisti ta ghuɓa taŋ ma didiŋa la Rafa.

¹⁶ Ma tsa fitik ya, ma vla ɗifa ni Dawuda, ta fatá la Filisti ta sana bakwa vula taŋ ma Betʼlehem.

¹⁷ Ka dzə ndala ta Dawuda, kaʼa mantsa: « Wa suɗustá a imi ma vavrəm ta wi tgha Betʼlehem a ɓa! » kaʼa.

¹⁸ Mantsa tama, ka lam tsa mnduha hkən ka bikwira vulu ya ka mbraku da ghuɓa la Filisti, ka tagistá imi ma tsa vavrəm ta wi tgha Betʼlehem ya. Ka kladaghatá həŋ ka vlaŋtá Dawuda. Ama ka kwalaghutá tsi ta say, ka pghiŋtá tsi ka skwa mbəhu ŋa Yawe.

¹⁹ Kaʼa mantsa: « Ka pyaf pya Lazglafta ɗa ta iʼi ka maga mndərga skwi manda tsaya! Kinawu rakwa say ɗa ta usa tsa mnduha ta laghwi da skwaptá hafa taŋ ya na? Hafa taŋ skwap həŋ ka klagaghata, » kaʼa. Ka kwalaghutá tsi ta say. Tsaya skwi maga tsa mnduha hkən ka bikwira vulu ya.

²⁰ Avisay, zwaŋama ni ma Yuʼav, mali ta ghəŋa tsa gwal hkən ya. Ka pslatá tsi nda gupa ni ta mnduha hkən dərmək (300). Ka laghu hga ni da zərwa mataba tsa gwal hkən ya.

²¹ Ka sganaghatá lu ta vlaŋtá sgit, ka malaghutá ŋa tsaha hkən ya, ka nzakw tsatsi ka mala taŋ, ama nza a tsatsi tekw mataba tsaha hkən ya wa.

²² Benaya, zwaŋa Yəhuyada, bikwira vulu ma Kavtseʼel ya, ka magatá tsi ta ndəghata slnaha dagala dagala. Tsatsi ta pslatá zwana Aryel his mnda la Muwav. Ma sana fitik ta fitika mazlam katakata, tsatsi ta laha dzatá rveri ma vavrəm.

²³ Tsatsi guli ta dzatá sana mnda la Masar, ka mitər his nda rita slada ni, nda ŋatá gupa manda matala ma dzva ni. Ka laha Benaya nda sarak valafta tida, ka zluʼaghutá tsa gupa ma dzva ni ya, ka dzata nda tsi.

²⁴ Tsaha ya mndərga skwiha maga Benaya, zwaŋa Yəhuyada. Ka mutsaftá tsatsi guli ta sgit katakata mataba tsa mnduha hkən ka bikwira vulu ya.

²⁵ Ka malglaghutá lu ta vlaŋtá sgit ta tsatsi ka tsaha hkən mbsak ya, ama nza a tsatsi tekw mataba tsaha hkən ya wa. Ka klaftá Dawuda ka mali ta ghəŋa gwal ta ngha vərɗa tsatsi.

²⁶ Wya sanlaha viɗviɗ ma gwal vulu: Ghasaʼel, zwaŋama ni ma Yuʼav, nda Ilhanaŋ, zwaŋa Dudu, mnda la Betʼlehem,

²⁷ nda Samut mnda la Harur, nda Helets mnda la Pəluŋ,

²⁸ nda Ghira, zwaŋa Ghikes, mnda la Tekuwa, nda Avighezer mnda la Ghanatut,

²⁹ nda Sibəkay, mnda la Husa, nda Ghilay mnda la Ahuhi,

³⁰ nda Mahray, mnda la Nətufa, nda Helet zwaŋa Baghana, mnda la Nətufa,

³¹ nda Itay, zwaŋa Rivay mnda la Givgha ma kwakwara la Biŋyamiŋ, nda Benaya, mnda la Pirghatuŋ,

³² nda Huray mnda la zlərɗaha Gaghas, nda Aviʼel, mnda la Gharba,

³³ nda Ghazmavet, mnda la Baharum, nda Ilyahbaʼ, mnda la Saghalbuŋ,

³⁴ nda zwana Hasem, mnda la Gizuŋ, nda Yunataŋ, zwaŋa Sageʼ, mnda la Harar,

³⁵ nda Ahiʼam, zwaŋa Sahar, mnda la Harar, nda Ilifal, zwaŋa Ur,

³⁶ nda Hefer mnda la Məherat, nda Ahiya mnda la Pəluŋ,

³⁷ nda Hetsru mnda la Karmel, nda Nagharay, zwaŋa Izbay,

³⁸ nda Yuʼel, zwaŋa ma ni ma Nataŋ, nda Mivhar, zwaŋa Hagri,

³⁹ nda Tselek mnda la Ghamuŋ, nda Nahray, mnda la Berut, si ta kla huzla vula Yuʼav, zwaŋa Tseruya,

⁴⁰ nda i Ghira nda Garev mnduha la Yeter,

⁴¹ nda Uriya mnda la Het, nda Zavat, zwaŋa Ahlay,

⁴² nda Ghadinaʼ, zwaŋa Sizaʼ mnda la Rubeŋ, mala ga həga ma la Rubeŋ, nda ya ma ghuɓa sludziha hkən mbsak,

⁴³ nda Hanaŋ, zwaŋa Maghaha, nda Yusafat mnda la Meteŋ,

⁴⁴ nda Ghuziyaʼ mnda la Ghastarut, nda i Samagh nda Yəghiʼel, zwana Hutam mnda la Gharugher,

⁴⁵ nda Yədighaʼel, zwaŋa Simri, nda zwaŋa ma ni Yuhaʼ, mnda la Tits,

⁴⁶ nda Iliʼel mnda la Mahava, nda i Yərivay nda Yusavya, zwana Ilnagham, nda Yitma mnda la Muwav,

⁴⁷ nda Iliʼel, nda Ghuvet, nda Yaghasiʼel mnda la Tsuvaʼ.