1Mgh 8 - Hdi

Guna həga Yawe

¹ Tahula tsa, ka tskanatá mgham Salumuŋ ma Ursalima, ta galata mnduha la Israʼila, nda inda maliha ma mndəra mnduha, nda la zəʼala həgaha ma Israʼila ta vata ni, ŋa klaftá akwata dzratá wa Yawe daga ma luwa Dawuda, ta nzakway ka Tsiyuŋ.

² Ka tskavatá inda la Israʼila ta vata mgham Salumuŋ ma tila Itanim, ta nzakway ka tila mandəfáŋ, ma fitika skala dumbi.

³ Ɓhadaghata inda galata mnduha la Israʼila, ka klaftá gwal dra skwi ŋa Lazglafta ta akwata dzratá wi.

⁴ Ka klaftá həŋ ta akwata Yawe, nda tumpula guyaku, nda inda huzla nda ghuɓa si ma tsa tumpul ya. Gwal dra skwi ŋa Lazglafta, nda la Levi ta hladafta,

⁵ ta sladatá i mgham Salumuŋ nda guyatá ghəŋa la Israʼila demdem kawadaga nda tsi ta kəma tsa akwata dzratá wi ya, ta vlatá həŋ ka skwa pla ghəŋ, ta ndəghata rina fisik nda slaha kul laviŋtá lu ta mbəɗafta dər uwalaŋta.

⁶ Ka kladaghatá gwal dra skwi ŋa Lazglafta ta akwata dzratá wa Yawe da vla ni, da tsa huɗi nda ma huɗa həga Lazglafta ya, da vli ta ghuɓuta, dista zlambakha kerubaha.

⁷ Nda zlatatá zlambak tsa kerubaha ya ma tsa vli fa lu ta tsa akwati ya, ka bukwamtá həŋ ta tsa akwati ya nda sandlaŋha ni tani.

⁸ Nda slara tsa sandlaŋha ya, ta nghaku wa taŋ daga ma tsa huɗi dagala makəɗ lu lami da tsa huɗi nda akwati ya, ama nghava a ma bla ni wa. Hada həŋ ma tsa vli ya ha gita.

⁹ Tsa klamha his pgham Musa ma Hwarev yeya ma tsa akwati ya, manda dzrafta Yawe ta wi nda la Israʼila ta sab həŋ ma haɗika Masar.

¹⁰ Ma fitika sliʼagapta gwal dra skwi ŋa Lazglafta ma tsa vli nda ghuɓa ya, ka ndəghanaftá kusay ta huɗa tsa həga Yawe ya.

¹¹ Ka traptá gwal dra skwi ŋa Lazglafta ta kəɗaŋtá maga slna taŋ dabga tsa kusay ya, kabga ndəghanaf ndəgha glakwa Yawe ta tsa həga ya.

¹² Ka Salumuŋ tama mantsa: « Mna mna Yawe kazlay dzaʼa nzata ma grum tɗika yu kəʼa.

¹³ Ama iʼi, ka baghaftá yu ta həga ta ɗinuta, vli ya ŋa nzakwa gha ŋa kɗekedzeŋ! » kaʼa.

Gwaɗa Salumuŋ ta kəma la Israʼila baɗ guna həga Yawe

¹⁴ Ka mbəɗavatá mgham ka tfanaghatá wi ta guyatá ghəŋa la Israʼila demdem ta sladu hada.

¹⁵ Kaʼa mantsa: « Rfu da Yawe, Lazglafta la Israʼila ta mnanata nda wa ni ta da ɗa Dawuda, ka hɗamtá tsi nda mbrakwa ni ta skwi mna tsi. Kaʼa mnuta na:

¹⁶ “Daga baɗ hlagapta ɗa ma Masar ta mnduha ɗa la Israʼila, haɗ luwa ya zbap yu mataba inda mndəra la Israʼila ŋa baftá həga ŋa nzakwa hga ɗa wu, ama zbap zba yu ta Dawuda ŋa gay ni ta mgham ta ghəŋa mnduha ɗa, la Israʼila,” kaʼa.

¹⁷ Si ɗvaŋ ɗva da ɗa Dawuda ta baftá həga ŋa vlaŋtá sgit ta Yawe, Lazglafta la Israʼila.

¹⁸ Ama ka Yawe nda da ɗa Dawuda mantsa: “Kum kuma ka ma ŋuɗufa gha ta baftá həga ŋa hga ɗa, ɗina tsa kumafta gha ya.

¹⁹ Nziya nza tsi ná, kagha a dzaʼa bafta wu, ama zwaŋa gha, ya yaga ka ma huɗa gha ya, tsatsi dzaʼa baftá tsa həga ŋa vlaŋtá sgit ta hga ɗa ya,” kaʼa.

²⁰ Hɗam hɗa Yawe ta gwaɗa ni ya mna tsi nda wa ni. Iʼi ta lami da vla da ɗa Dawuda, ka nzaftá yu ta dughurukwa ga mghama la Israʼila, manda va ya mna Yawe, ka baftá yu ta na həga na ŋa vlaŋtá sgit ta Yawe, Lazglafta la Israʼila.

²¹ Ka payanatá yu ta vli mida ŋa akwata dzratá wa Yawe, tsa dzratá wi ya dzraf tsi nda dzidzíha mu manda hlagap ni ta həŋ ma haɗika Masar ya, » kaʼa.

Duʼa Salumuŋ ta ghəŋa həga Yawe

²² Ka sladatá Salumuŋ ta kəma gwira Yawe, mbəŋ nda guyatá ghəŋa la Israʼila demdem. Ka kapaftá tsi ta dzvuha ni nda ta luwa, kaʼa mantsa:

²³ « Ari Yawe, Lazglafta la Israʼila! Haɗ lazglafta ta gwagwaya vgha nda kagha wu, dər nda gaftək ta luwa, dər ndakalandala ta haɗik! Ta ŋana ŋa ka ta dzratá wa gha nda zɗakwa gha nda kwalvaha gha, gwal ta mbaɗa ta kəma gha nda hya hya ŋuɗufa taŋ!

²⁴ Ka ŋanata ka ta tatá imi ta sləməŋ tanaf ka ta kwalva gha da ɗa, Dawuda. Skwi ya mna ka nda wa gha ta hɗamta ka gita nda mbrakwa gha.

²⁵ Ndanana, Yawe, Lazglafta la Israʼila, hɗam hɗa ta tatá imi ya tanaf ka ta sləməŋ ta kwalva gha, da ɗa Dawuda. Ka kagha nda tsi na: “Pɗata a ka ɗekɗek ta mndu turtuk ma zivira gha ta nzaku ta kəma ɗa ta dughurukwa ga mghama la Israʼila wa. Kweŋkweŋa ni ná, ka nghapta zivira gha ka nzakwa taŋ, ka mbaɗay taŋ ta mbaɗa ta kəma ɗa manda ya mbaɗ kagha ta kəma ɗa,” ka ka.

²⁶ Ndanana, kdəkkdək hɗam hɗa vərɗa kagha Lazglafta la Israʼila ta tsa tatá imi tanaf ka ta sləməŋ ta kwalva gha da ɗa, Dawuda ya!

²⁷ Ama kahwathwata ná, dzaʼa nzay Lazglafta ta haɗik ra? Dər luwa ta luwa ta ghəŋa luwa ná, laviŋ a ta ŋaftá kagha wu! Nana həga baf yu na yeya rki!

²⁸ Kulam nda tsa, Yawe, Lazglafta ɗa, fa fa ta sləməŋ ka sna duʼa, nda taw, mantsa nzakwa ni, fa fa ta sləməŋ ka sna ka ta haga kagha ta hag yu gita.

²⁹ Ka fafta ka ta ira gha nda rviɗik tani, nda fitik tani ta na həga na, ta na vli mnə kagha kazlay na: “Hada, dzaʼa nzata yu!” kəʼa ya. Sna ta duʼa kwalva gha ta magay nda təv na vli na!

³⁰ Fa fa ta sləməŋ ka sna tawa kwalva gha, nda ŋa mnduha gha la Israʼila, ta mag həŋ ta duʼa nda təv na vli na! Daga ma vli ta nzakw ka ta nzakwa gha, daga ta luwa, tsuʼaŋnaf tsuʼa ta duʼa ŋni, plaŋnaha ka ta dmakwa ŋni!

³¹ Ka lagha mndu ka ganatá dmaku ta sana mndu, ka mblafta lu ŋa waɗatá waɗu, ka sagha sa tsi da waɗu ta kəma gwira gha, ma na həga na,

³² ka snagata ka daga ta luwa Yawe, ka maga ka ta slna gha, ka tsanaghata ka ta guma ta kwalvaha gha. Ka tsanaghata ka ta guma ta mnda dmaku, vranaf vra ta dmakwa ni ta ghəŋa ni. Mndu tɗukwa ya guli ná, ka maraŋta lu ta tsatsi ka mndu kul haɗ dmakwa ni, ka vranamta lu ta skwi taɓta nzakwa ni tɗukwa.

³³ Ka lagha ghuma ka zatá ghwa ta ghəŋa mnduha gha la Israʼila, kabga vəl gaghata taŋ ta dmaku katsi, ka vragagha vra həŋ tama da kagha, ka zləzləva hga gha, ka ndəɓa dzvu da kagha, ka taw da kagha ma na həga na katsi,

³⁴ snaga sna ta luwa nda gaftək, plana pla ta dmakwa mnduha gha, la Israʼila, ka vraganaghata ka ta həŋ ta haɗik ya vlaŋ ka ta dzidzíha taŋ.

³⁵ Ka lagha luwa ka ghwaluta, haɗ imi wu, kabga vəl gaghata taŋ ta dmaku, ka mag həŋ ta duʼa nda təv na vli na, ka zləzləva hga gha, ka mbəɗana mbəɗa həŋ ta hul ta dmakuha taŋ, kabga tsanaghata gha ta guma ta həŋ katsi,

³⁶ snaga sna daga ta luwa nda gaftək, plana pla ta dmakwa kwalvaha gha, nda mnduha gha, la Israʼila. Mantsa nzakwa ni, taghanaf tagha tama ta həŋ ta tvi ɗina, ya ŋa mbaɗay taŋ ta mbaɗa tida, nzaga nza ta imi ta haɗik ya vlaŋ ka ka skwa za həga ta mnduha gha!

³⁷ Ka lagha maya ka slata, ka ketsepi a tsi, ka madzaɓdzaɓ a tsi, ka maghweftegeɗ a tsi, ka hiʼa maya a tsi, ka manzufi a tsi, ka ghumaha a tsi ta tsamtá mnduha gha ma haɗika taŋ ma luwaha taŋ, ka rwaku a tsi ta slata, ka sanlaha ma ɗaŋwa a tsi,

³⁸ ka magata dər wati ma mndu, ka inda mnduha gha, la Israʼila a tsi ta duʼa, dər mndərga wati ma duʼa tsi, ka taw, kabga tsatsafta taŋ ta skwi ta kuzlaŋtá həŋ ta ŋuɗufa taŋ, ka kapaftá dzvuha nda təv na həga na,

³⁹ snaga sna daga ta luwa nda gaftək, daga ma vla nzakwa gha, ka planata ka ta dmakuha taŋ. Maga, ka vlaŋta ka ta dər wati ma mndu taɓta mbaɗa ni, ya nda sna kagha ta ŋuɗufa inda mndu ya. Mantsa nzakwa ni, kagha turtukwa gha nda sna ta ŋuɗufa mnda səla demdem,

⁴⁰ kada zləŋa həŋ ta kagha ma inda nzakwa taŋ ta haɗik ya vlaŋ ka ta dzidzíha ŋni.

⁴¹ Dər mayəm, mndu ya kul sabi ma mnduha gha, la Israʼila, dzaʼa sagha sa ta sana haɗik diʼiŋ dabga hga gha.

⁴² Dzaʼa snaŋ sna həŋ kazlay na, dagala glakwa hga gha, nda mbrakwa gha, nda slna dzva gha kəʼa saghər mayəm da maga duʼa nda təv na həga na.

⁴³ Snaga sna daga ta luwa, ma vla nzakwa gha, ka tsuʼanafta ka ta inda skwi ya dzaʼa ɗawaghata tsi! Mantsa ya, dzaʼa snaŋta inda mndəra mnduha ta ghəŋa haɗik ta hga gha, ŋa zləŋay taŋ ta kagha manda ya ta mag mnduha gha, la Israʼila, dzaʼa snaŋ sna həŋ kazlay na ŋa vlaŋtá glaku ta hga gha bafta yu ta na həga na kəʼa.

⁴⁴ Ka lagha mnduha gha ka sliʼagapta ŋa dzaʼa da vulu nda ghuma taŋ, nda ta tviha ya mnanaf ka ta həŋ, ka ndəɓ həŋ ta dzvu da Yawe, ka mbəɗavata ka ngha vli nda təv luwa ya zbap ka, nda ya nda təv na həga baf yu ŋa vlaŋtá sgit ta hga gha na katsi,

⁴⁵ snaga sna daga ta luwa nda gaftək ka duʼa taŋ, nda tawa taŋ, ka maganata ka ta skwi tɗukwa ta həŋ.

⁴⁶ Ka lagha taŋ ka gaghatá dmaku, kabga haɗ mndu kul ga dmaku wu, ka gufaftá ŋuɗufa gha ta ghəŋa taŋ, ka vlatá ka ta həŋ ma dzva ghuma dzaʼa hlaghatá həŋ ta haɗika ghuma diʼiŋ, ka ndusa a tsi,

⁴⁷ ka vraganagha vra həŋ ta ghəŋa taŋ ma tsa haɗik dzaʼa hlaghata lu ta həŋ da ga vuʼa ya, ka vrak vra həŋ da kagha, ka taw həŋ ta taw da kagha ma tsa haɗika gwal ta hlaghatá həŋ ya, ka ka həŋ mantsa: “Gaga ŋni ta dmaku, gaga ŋni ta krughuvi, maga maga ŋni ta ghwaɗaka skwi,” ka həŋ,

⁴⁸ ka vrak vra həŋ da kagha nda hya hya ŋuɗufa taŋ, nda inda kɗavakta hafa taŋ ma tsa haɗika ghumaha taŋ ta hlaghatá həŋ ya, ka ndəɓ həŋ ta dzvu da kagha, ka mbəɗavata nda təv haɗika taŋ ya vlaŋ ka ta dzidzíha taŋ, nda ya təv luwa ya zbap ka, nda ya təv həga ya baf yu ŋa vlaŋtá sgit ta hga gha katsi,

⁴⁹ snaga sna daga ta luwa nda gaftək, daga ma vli ya ta nzakw ka, ka ndəɓa dzva taŋ, nda tawa taŋ, ka maganata ka ta skwi tɗukwa ta həŋ.

⁵⁰ Plana pla ta dmakwa mnduha gha, nda inda bisibisa taŋ ta gavaghata! Kuksa ta gwal ta ŋanatá həŋ ka vuʼa, kada tawata həŋ ta hiɗahiɗa ta həŋ,

⁵¹ kabga mnduha gha həŋ, skwa za həga gha həŋ, gwal hlagap ka ta həŋ ma Masar ma duda vwa nwaptá kfur!

⁵² Fa fa ta iri ka ngha tawa kwalva gha, nda ŋa mnduha gha, la Israʼila, ŋa tsuʼanaftá həŋ ma inda fitik dzaʼa hgaghata həŋ.

⁵³ Kagha, a rveri ɗa Yawe, ta talaptá həŋ mataba inda sanlaha ma mndəra mnduha ta ghəŋa haɗik, ŋa nzakwa taŋ ka skwa za həga gha, manda ya mna ka nda ma wa kwalva gha Musa, ma hlagapta gha ta dzidzíha ŋni ma Masar, » kaʼa.

Tfa wi ŋa guyatá ghəŋ

⁵⁴ Kɗiŋta Salumuŋ ta maga tsa duʼa ya nda inda tsa taw ya ŋa Yawe, ka sliʼaftá tsi ta kəma gwira Yawe, ma tsa vli tsəlɓa tsi nda kapatá dzvuha ni nda ta luwa ya.

⁵⁵ Ta sladu ta sladu ka tfanaghatá tsi ta wi ta guyatá ghəŋa la Israʼila demdem nda lwi dagala dagala, kaʼa mantsa:

⁵⁶ « Rfu da Yawe ta vlaŋtá mbiʼa vgha ta mnduha ni, la Israʼila, manda va ya tanaf tsi ta imi ta sləməŋ ta həŋ! Haɗ ya dər turtuk ma gwaɗaha zɗa zɗa mna tsi nda ma wa kwalva ni Musa, kul maguta wa.

⁵⁷ Ka nza Yawe, Lazglafta mu kawadaga nda amu, manda ya nza tsi nda dzidzíha mu! Ma vzimis tsi, ma zlama tsi.

⁵⁸ Ka mbəɗana mbəɗa tsi ta ŋuɗufa mu nda təv tsatsi, kada mbaɗa mu ta mbaɗa ta inda tviha ni, ka snata mu ta zlahuha ni, nda tva skwi ŋa magay ya mnanaf tsi ta dzidzíha mu!

⁵⁹ Ka nza na gwaɗa taw mnana yu ta Yawe na nda fitik tani nda rviɗik tani ta kəma Yawe, Lazglafta mu, ka maganata tsi inda fitik ta skwi tɗukwa ta kwalva ni, nda mnduha ni, la Israʼila.

⁶⁰ Mantsa ya dzaʼa kəl inda mndəra mnduha ta ghəŋa haɗik ka snaŋta kazlay na, Yawe, Lazglafta, haɗ sani wu, kəʼa.

⁶¹ Ka nza ŋuɗufa ghuni nda ndiʼa kahwathwata ta Yawe, Lazglafta mu, ŋa ksa tva skwi ya ŋa magay nda ya ŋa snatá zlahuha ni, manda na nzakwa ni gita na, » kaʼa.

Taŋtaŋa skala rfu ma həga Yawe

⁶² Ka vlatá mgham nda inda la Israʼila kawadaga nda tsi ta skwiha ŋa pla ghəŋ ta kəma Yawe.

⁶³ Ka vlatá Salumuŋ ta slaha dəmbuʼ hisambsak his mida (22.000), nda rina fisik dəmbuʼ dərmək nda hisambsak (120.000) ka skwa pla ghəŋa zɗaku vla tsi ŋa Yawe. Mantsa ya ka mgham nda inda la Israʼila gunanaftá həga Yawe.

⁶⁴ Baɗ tsa fitik ya, ka faghutá mgham ŋa Lazglafta ta takataka daɓi ta kəma həga Yawe, kabga ma tsa vli ya vlata tsi ta skwa pla ghəŋ ŋa dray tsuh tsuh, nda mbəhuha nimaya, nda ghwaviɗa skwa pla ghəŋa zɗaku. Tsa gwir ka ghuva tili ta kəma Yawe ya ná, nda hta katakata ŋa ŋafta.

⁶⁵ Ma va tsa tila mandəfáŋ ya ka fatá Salumuŋ ta skala dumbi, nda inda la Israʼila kawadaga nda tsi. Ka sliʼadaghatá ndəghata guyatá ghəŋa mnduha daga ma Levuʼhamat dikw ta wa lika Masar, ka tskavata ta kəma Yawe, Lazglafta mu, ka fitik ndəfáŋ, ka magəglatá həŋ ta fitik ndəfáŋ, tsaya fitik ghwaŋpəɗ fwaɗ.

⁶⁶ Baɗ matghasa fitik, ka ghuniŋtá tsi ta mnduha. Ka rfanaghatá həŋ ta mgham ka vraghutá həŋ dzagha taŋ, nda rfu nda wunahata ŋuɗuf dabga inda skwi ɗina ɗina magana Yawe ta kwalva ni Dawuda, nda mnduha ni la Israʼila tani.