1Mgh 7 - Hdi

Bafta Salumuŋ ta həga ga mgham

¹ Ka baftá Salumuŋ guli ta həga ga mghama ni. Ghwaŋpəɗ hkən vaku maga tsi ta bay ha ka kɗiŋta ni nekwnekw.

² Tiŋəl kəʼa baftá sana həga ta hgə lu ka: « Həga fuha Ləvanuŋ. » Ka mitər hutaf mbsak slrakwa ni, mitər hisambsak hutaf mida bughwata ni, mitər ghwaŋpəɗ hutaf slada ni. Bafta ndərha guguɗiha udza sedra fwaɗ lu, mamu matalaha sedra ta tsa ndərha guguɗiha ya.

³ Ka pliɗaftá ka udza sedra, pghaf lu ta guguɗiha fwaɗ mbsak hutaf mida. Ghwaŋpəɗ hutaf, ghwaŋpəɗ hutaf dzatá ndəra ni hkən.

⁴ Mamu dzatá ndəra finitirha hkən, inda finitira tsa ndər hkən ya, mbəŋ ya mbəŋ ya həŋ.

⁵ Inda wa tghaha nda inda səla wa tghaha ná, ka skwa turtuk tsatá həŋ. Inda tsa ndəra finitirha hkən ya, mbəŋ nda ya mbəŋ nda ya həŋ.

⁶ Ka magaftá tsi ta « Rmaka guguɗiha. » Ka mitər hisambsak hutaf mida slrakwa ni, mitər ghwaŋpəɗ hutaf bughwata ni. Nda ta wi tgha, mamu sana rmaka guguɗiha mbəsaf lu nda ta kəma.

⁷ Ka baftá Salumuŋ ta « Rmaka dughurukwa gá mgham, » ta həgə lu guli ka « Rmaka tsa guma, » vli ta kəl tsi ka tsa guma. Ka dzəɓatá tsi ta udza sedra ma daɓa huɗa ni, zləɓanavaha ta vata həga huɗa ni guli dikw dista pliɗi.

⁸ Həga nzakwa ni ya guli ná, ka baftá tsi manda va tsaya, ta sana daɓi nda ta hula tsa rmak ya. Ka baftá Salumuŋ ta sana həga manda va tsa ramak ya, ŋa makwa Firʼawna klaf tsi ka marakw ya.

⁹ Ŋa inda tsa babaku ya ná, palaha ɗina ɗina hlə lu, garaf lu nda gara ta fifiɗay, ka raratsata nda zarta ta huɗa ni nda hula ni. Tsa palaha ya hlə lu ka badafta daga ta tughwa ni ha nuʼatá ghəŋa ni, nda ya nda mabli ha ta daɓi tgha dagala.

¹⁰ Nda palaha ɗina ɗina, nda slara nda slara, ta maga mitər fwaɗ fwaɗ ka hutaf hutaf a tsi tahafta lu ta tughuha taŋ.

¹¹ Ta ghəŋa tsa tughuha ya, pghanaghata lu ta sana fifiɗata palaha ɗina ɗina garaf lu nda gara, nda ya nda matalaha sedra.

¹² Wanaf nda bata dzugura palaha ka ɓalal hkən fifiɗata ni, nda ya nda ɓalala udzuha sedra lu ta tsa daɓi dagala ya, manda ya magaf lu ta ŋa daɓi nda ma huɗa həga Yawe, nda ŋa rmaka həga Yawe.

Slnaha fanam lu ta Hiram ma dzvu

¹³ Ka klagaghata mgham Salumuŋ ma Tir ta sana mndu ta hgə lu ka Hiram.

¹⁴ Zwaŋa sana markwa wadgu makwa mndəra la Naftali ya, la Tir da ni, ta maga slna ghuva tili. Hiram ná, mndu nda ɗifil, nda mahizl ma ghəŋa ni katakata ya, masəm ya ma maga inda slna ghuva tili. Ka lagha tsi da mgham Salumuŋ, ka maganatá tsi ta inda tsa slnaha ni ya.

Guguɗiha ka ghuva tili

¹⁵ Ka tsatsaftá tsi ta guguɗiha his ka ghuva tili. Mitər təmbay təmbay slada taŋ, zuʼi ka mitər mkuʼ ta laviŋtá kurafta ŋazlakwa taŋ.

¹⁶ Ka tsatsaftá tsi guli ta dzugwaha his ka ghuva tili, ŋa fafagata ta ghəŋa tsa guguɗiha ya. Mitər his nda rita lafa ni ta luwa, manda tsaya mahisa ni guli.

¹⁷ Ka rkanaftá tsi ta rka ta tsa dzugwaha ya nda madagalgal gaf lu nda ziɗa. Madagalgal ndəfáŋ ta ghəŋa inda tsa dzugwaha ya.

¹⁸ Ka magaftá tsi ta skwiha manda rimuŋha ndər ndər his ka wanaftá inda tsa madagalgalha ya ŋa dzuɓa dzugwaha ta ghəŋa tsa guguɗiha ya.

¹⁹ Ta ghəŋa inda tsa guguɗiha rmak ya, mamu sana mahisa dzugwa ka mitər his slada ni. Manda vzlizla kayək ya nzakwa ni.

²⁰ Ta ghəŋa tsa dzugwaha ya, mamu vliha guɗuŋur guɗuŋura. Nda ta ghəŋa tsa madagalgal ya tsa guɗuŋurha ya, nda dzəɓatá skwiha manda rimuŋha his dərmək (200) ka wanaftá inda tsa dzugwaha ya.

²¹ Ka dzagwatá tsi ta guguɗiha ndusa nda rmaka wa tgha tsa həga Lazglafta ya. Ka dzugwatá tsi ta guguɗi nda ga zeghwi, ka hgə tsi ka Yahiŋ, dzugwaha guli nda ga zlaɓa, ka hgə tsi ka Bughaz.

²² Ta ghəŋa tsa guguɗiha ya, mamu tsatsatá skwiha manda vzlizla kayək manda vzlizla kayək. Mantsa ya kɗata magatá tsa guguɗiha ya.

Glifiŋ dagala ka ghuva tili

²³ Ka tsaftá Hiram ta glifiŋ dagala hdəwər nda kfur nwap lu. Mitər hutaf gunatá wa ni nda təv sani, hdəwər nzakwa ni nda təv sani, mitər his nda rita slada ni, laviŋ lava lu ta graftá wa ni dendesl nda təɓaŋ ka mitər ghwaŋpəɗ hutaf.

²⁴ Mista ɓlatá wa tsa glifiŋ ya, ka magiŋtá lu ta ŋwalimaha manda yakwa kuwaha hisambsak ta mitər turtuk ka ndər his ka wanafta. Tsa ŋwalimaha ya ná, nwap ka skwa turtuk lu nda tsa glifiŋ ya.

²⁵ Ka faftá lu ta tsa glifiŋ ya ta tsatsatá fwata lghəŋha ghwaŋpəɗ his mbaɗana lu hkən nda təv mazlay, hkən nda təv dɗakwa fitik, hkən nda təv maghura, hkən nda təv safa fitik, ka mbaɗanatá mndəra taŋ nda ma huɗi. Ta həŋ nzafta tsa glifiŋ ya.

²⁶ Taɓta bughwata dzvu na dəkata ni, wa ni guli, manda ɓlatá wa kwap ka vzlizla kayək a tsi nzakwa ni, laviŋ lava ta zutá imi ka litər dəmbuʼ fwaɗ mbsak (40.000).

Ameleŋkiha ka ghuva tili

²⁷ Tahula tsa, ka magaftá tsi ta ameleŋkiha ghwaŋ ka ghuva tili. Ameleŋki turtuk ná, mitər his slrakwa ni, mitər his bughwata ni, mitər nda rita slada ni.

²⁸ Wya ka lu magaftá tsa ameleŋkiha ya: Kəslambatsha magaf lu nda ghuva tili, ka hahamta ma gaŋaŋha.

²⁹ Ta tsa kəslambatsha ya, mamu fwata rveriha, nda lghəŋha, nda kerubaha. Ta tsa gaŋaŋha ya, nda ta ghəŋ nda ya nda ma mndər mamu fwata rveriha nda lghəŋha, mamu madagalgalha nda rkata rka manda vzlizla.

³⁰ Ya turtuk ma tsa ameleŋkiha ya ná, fwaɗ səla mista ni ka ghuva tili. Ka hahamtá lu ta sarakha fwaɗ ka ghuva tili ma tsa səlaha fwaɗ ya. Nda mista inda tsa glifiŋha ya mamu litikha fwaɗ fwaɗ nda rkata rka ŋa ŋaŋanata.

³¹ Ta ghəŋa inda tsa ameleŋkiha ya, mamu kliŋa hdəwər ka rita mitər nda ta luwa, saŋtimitər ndəfáŋ mbsak hutaf mida gagadwaŋata ni ŋa ŋanatá tsa glifiŋ ya. Ta tsa kliŋa ya guli, ka rkanaftá lu ta rka. Tsa kəslambatsha ya ná, ka adada nzakwa taŋ, dəwrek a wa.

³² Pghiŋ mista tsa kəslambatsha ya lu ta səlaha fwaɗ, nda sarakha tsa ameleŋkiha ya. Saŋtimitər ndəfáŋ mbsak hutaf mida gagadwaŋata inda tsa səlaha ya.

³³ Manda səla mwata plis magafta lu ta səlaha ni. Sarakha ni, nda gidaŋha ni, nda riyawŋha ni, nda skwiha ŋa ŋay tani ná, ka kfur nwap lu nda nwa həŋ.

³⁴ Ta inda tuldiha fwaɗ ta tsa ameleŋkiha ya, mamu litikha fwaɗ fwaɗ mamagaf lu ka skwa turtuk ta tsa ameleŋkiha ya.

³⁵ Ta wa inda tsa ameleŋkiha ya, mamu sana skwi hdəwər ka saŋtimitər hisambsak hutaf mida ta wanafta. Litikha nda kəslambatsha taŋ tani ná, ka skwa turtuk magafta lu ta həŋ nda tsa ameleŋkiha ya.

³⁶ Ka tsatsaftá Hiram ta kerubaha, nda rveriha, nda zlizlamha ta litikha nda ya ta kəslambatsha taŋ taɓta vli mamu, nda madagalgalha ka wanafta.

³⁷ Manda tsaya kəʼa magaftá tsa ameleŋkiha ghwaŋ ya, nda kfur nwap lu nda nwa. Ka skwa turtuk garata həŋ, nda tsatsatá həŋ demdem.

³⁸ Ka magaftá tsi guli ta sanlaha ma glifiŋha ghwaŋ ka ghuva tili, mitər his his babahahata həŋ, ta zay dər wati ma həŋ ta litəra imi dəmbuʼ (1.000). Ta ameleŋki turtuk nzafta ya turtuk ma tsa glifiŋha ya.

³⁹ Ka pghatá tsi ta tsa ameleŋkiha ya hutaf ta slərpu nda ga zeghwa tsa həga Lazglafta ya, pghaha ta gwal hutaf guli nda ga zlaɓa ni. Tsa glifiŋ dagala ya, ka fatá tsi nda ga zeghwa tsa həga Lazglafta ya nda təv safa fitik, nda ga suda ni.

⁴⁰ Ka magaftá Hiram guli ta zwana glifiŋha, nda pelha, nda nzəganzəgaha ŋa wutsikanatá skwi. Mantsa ya ka Hiram kɗiŋta magatá inda slnaha mnana mgham Salumuŋ ŋa magata ma həga Yawe.

Mbsaka huzla ka ghuva tili ŋa da həga Lazglafta

⁴¹ Wya skwiha magaf tsi: Guguɗiha his, nda dzugwaha his dzuluh dzuluh ŋa fay ta ghəŋa tsa guguɗiha ya, nda gatá ziɗaha his ŋa bukwa tsa dzugwaha dzuluh dzuluh ta ghəŋa tsa guguɗiha ya,

⁴² nda rimuŋha fwaɗ dərmək (400) ŋa tsa gatá ziɗaha his ya, ndər ndər his rimuŋ ma inda tsa gatá ziɗa ta bukwamtá tsa dzugwaha dzuluh dzuluh ta tsa guguɗiha ya,

⁴³ nda ameleŋkiha ghwaŋ, nda glifiŋha ghwaŋ tida,

⁴⁴ nda glifiŋ dagala, nda tsatsatá fwata lghəŋha ghwaŋpəɗ his mista ni,

⁴⁵ nda zwana glifiŋha, nda pelha, nda nzəganzəga ŋa wutsikanatá skwi. Inda tsa huzlaha mnana mgham Salumuŋ ta Hiram ŋa magafta ni ŋa həga Yawe ya ná, mamagaf nda ghuva tili lu ka kakərzlafta.

⁴⁶ Ta daɓa Yardeŋ, ma takataka Sukut nda Tsartaŋ nawapta mgham Salumuŋ ma rɓisl ta həŋ.

⁴⁷ Ka pghatá Salumuŋ ta inda tsa huzlaha ya ma vla taŋ, fərtu fərta, laviŋ a lu ta graftá ndəgakwa tsa ghuva tili kəl lu ka magaftá həŋ ya wa.

Huzlaha ka dasu

⁴⁸ Ka magaftá Salumuŋ guli ta inda huzlaha ŋa da həga Yawe: Gwira dra urdi ka dasu, nda tabəl ka dasu ŋa faftá buradi ta kəma Yawe,

⁴⁹ nda gaŋaŋha pitirlaha ka dasu ghenen, hutaf nda ga zeghwi, hutaf nda ga zlaɓa, ta kəma huɗi nda ghuɓa, nda vzlizlaha, nda pitirlaha, nda lmislha ka dasu,

⁵⁰ nda glifiŋha, nda maŋaha, nda nzəganzəga ŋa wutsikanatá skwi, nda leghwaha, nda gədzehha ka dasu ghenen, nda pumela tghaha ka dasu ma vli ta ghuɓuta, nda ŋa wa tghaha huɗi dagala ma həga Lazglafta.

⁵¹ Mantsa ya kɗiŋta mgham Salumuŋ ta magatá inda tsa slnaha ba həga Yawe ya, ka hlaktá tsi ta skwiha ya si pghaghu da ni Dawuda ŋa Yawe: Kfura tsedi, nda dasu, nda inda huzlaha kavghakavgha, ka pghatá tsi demdem ma dzuguva ɗifa skwa gadghəl ma həga Yawe.