1Mgh 6 - Hdi

Ba həga Lazglafta

¹ Vaku fwaɗ dərmək nda tghas mbsak (480) tahula saba la Israʼila ma haɗika Masar, ka zlraftá mgham Salumuŋ ta ba həga ŋa Yawe, ta mafwaɗa vakwa ni ta ga mgham ta ghəŋa la Israʼila, ma tila Ziv ta nzakway ka tila mahis.

² Tsa həga baf mgham Salumuŋ ŋa Yawe ya ná, mitər hkən mbsak slrakwa ni, mitər ghwaŋ bughwata ni, mitər ghwaŋpəɗ hutaf lafa ni ta luwa.

³ Ta kəma huɗi dagala ma tsa həga ya, mamu sana rmak ta tva lami ka mitər ghwaŋ slrakwa ni, ka gragra nda bughwata həga Lazglafta, ka mitər hutaf lata ni nda ta kəma tsa həga ya.

⁴ Ka tsatsaptá mgham ta finitirha ta ghudzifa tsa həga ya, ka paghamtá katsarha.

⁵ Ka babanavatá tsi ta vata həga Lazglafta ta həgaha nzəgiɗ nzəgiɗ hkən ka wanafta dendesl ta vata həga Lazglafta, nda huɗi dagala nda ya nda ma mndəra ni.

⁶ Bughwata tsa huɗi nda ma mndər ya ná, mitər his nda rita, tsa huɗi ta ghəŋa ni ma takataka ya, mitər hkən bughwata ni, tsa mahkəna huɗi ta ghəŋa tsa mahisa ni ya guli ná, mitər hkən nda rita bughwata ni. Ghudzifa tsa həga Lazglafta ya nda ma bli ná, nda hta dəkata ni nda ta luwa, ŋa kwala dzaʼuwa lagha ksaŋtá ghudzifa həga Lazglafta.

⁷ Ta bə lu ta tsa həga ya ná, palaha ghada lu ta fifiɗata ta hlə lu, snava a ghudzaga nduvul dər slpaɗa dər ka kiʼa wu, dər sana skwi ka kfur a tsi ma tsa həga ta bə lu ya wa.

⁸ Wa tgha lami da tsa huɗi ta mndər ya ná, nda ga zeghwa həga Lazglafta nzakwa ni. Ta madzəɓara ta ŋladafta lu ka mbəɗavata, ka lami da tsa ma tabu ya, ŋa sliʼafta ma tsa ma tabu ya guli, ka lafi ŋa lami da tsa mahkən ya.

⁹ Tahula bafta Salumuŋ ta tsa həga ya ka kɗiŋta, ka pliɗaftá tsi nda udzuha, nda ya nda katakuha sedra.

¹⁰ Tsa həga nzəgiɗ nzəgiɗ hkən babanava lu ta vata tsa həga Lazglafta ya ná, ka mitər his nda rita, his nda rita lafa dər wati ma həŋ ta luwa, ka nzugwanavatá lu ta vata həga Lazglafta nda matala sedra.

¹¹ Ka gwaɗganatá Yawe ta Salumuŋ, kaʼa mantsa:

¹² « Ta ghəŋa na həga ta bə ka na ná, ka ta ksay ka ta slna nda zlahuha ɗa, ka ta snay ka ta skwiha nda ra, ta ŋana ŋa ka ta inda gwaɗaha ɗa katsi, dzaʼa hɗagham hɗa yu ta gwaɗa ɗa ya mnana yu ta da gha Dawuda.

¹³ Dzaʼa nza nza yu mataba la Israʼila, haɗ yu dzaʼa zlanavatá mnduha ɗa la Israʼila wu, » kaʼa.

Payanatá huɗa həga Lazglafta

¹⁴ Kɗiŋta Salumuŋ ta baftá tsa həga Lazglafta ya,

¹⁵ ka zləɓanavatá tsi ta vata tsa həga ya nda ma huɗi nda katakwa sedra daga ta haɗik dikw da pliɗi. Ka zləɓaftá tsi manda tsaya ta huɗa ni nda udzu, ka dzəɓatá tsi ta daɓa tsa həga ya nda katakwa bərus.

¹⁶ Ka zləɓanavatá tsi nda katakwa sedra ka mitər ghwaŋ ta vata huɗa tsa huɗi nda ma mndər ta vata həga Lazglafta ya, daga ma daɓa ni dikw da pliɗi, ka baghutá tsi ta vli ma huɗa ni ka vli ta ghuɓuta.

¹⁷ Nda ta kəma tsa vli ta ghuɓuta ya, mamu huɗi dagala ka mitər hisambsak slrakwa ni.

¹⁸ Ta tsa zləɓata katakwa udza sedra ta vata tsa huɗa həga ya ná, ka tsatsaftá lu ta ŋwalima manda yakwa kuwaha nda ya nda gwanata vzlizlaha. Nda udza sedra magafta lu ta inda ni demdem, nghava a palaha dər turtuk wa.

¹⁹ Ma huɗa tsa həga Lazglafta ya, ka payaftá tsi ta huɗi ta ghuɓuta ŋa fa akwata dzratá wa Yawe.

²⁰ Tsa huɗi ya ná, mitər ghwaŋ slrakwa ni, mitər ghwaŋ bughwata ni, mitər ghwaŋ slada ni. Ka zlərɓatá tsi ta huɗa tsa həga ya demdem nda dasu ghenen. Ka zləɓanavatá tsi ta gwir nda katakwa sedra.

²¹ Ka zlərɓatá Salumuŋ nda dasu ghenen ta huɗa tsa həga Lazglafta ya. Ka hahagatá tsi ta gatá ziɗaha dasu ta wa tgha tva lami da tsa huɗi ma huɗa həga ya, ka zlərɓata nda dasu.

²² Ka zlərɓatá tsi nda dasu ta inda tsa həga Lazglafta ya, tsa həga ya demdem, ka zlərɓatá tsi nda dasu ta gwir demdem ta nzakway ta kəma tva lami da tsa huɗi ta ghuɓuta ya.

²³ Ka magaftá Salumuŋ ma tsa huɗi ta ghuɓuta ya ta kerubaha his nda udza zaytuŋa mtak, ka mitər hutaf, hutaf slada taŋ.

²⁴ Zlambaka taŋtaŋa keruba ná, mitər his nda rita ya, tsaya ta maga mitər hutaf mtaka ni, sliʼafta ta wa sana zlambak, dikw ta wa sana zlambak.

²⁵ Tsa mahisa keruba guli, mitər hutaf ŋa tsatsi. Ka skwa turtuk tsatá həŋ his his.

²⁶ Slada dər wati ma tsa kerubaha ya his his ná, mitər hutaf ya.

²⁷ Ka pghatá Salumuŋ ta tsa kerubaha ya ma tsa huɗi ta ghuɓuta ya, nda zlatatá zlambakha taŋ. Ka ksaŋtá zlambaka taŋtaŋa ni ta sana vata həga, ŋa tsa mahis ya guli ná, ndəʼets guyatá həŋ nda sana vata həga. Nda guya wa tsa sanlaha ma tsa zlambakha taŋ ya ma takataka tsa huɗi ya.

²⁸ Ka zlərɓatá tsi nda dasu ta tsa kerubaha ya guli.

²⁹ Ka tahaftá tsi ta inda vata həga tsa huɗiha his ma həga Lazglafta ya, ta fwata kerubaha, nda zlizlamha, nda ya nda gwanata vzlizlaha.

³⁰ Ka viwatá tsi nda dasu ta daɓa huɗa tsa huɗiha his ma həga Lazglafta ya.

³¹ Ka tsuŋtá tsi ta wa tgha tva lami da tsa huɗi ta ghuɓuta ya ta guyata parawalha his nda udza zaytuŋa mtak. Zləŋata ni, nda səla ni ná, hutaf ghulŋuɗha tida.

³² Tsa guyatá parawalha his ya ná, ka udza zaytuŋa mtak həŋ, ka tahaftá tsi ta kerubaha, nda zlizlamha, nda gwanatá vzlizlaha tida, ka zlərɓata tsi ta həŋ nda dasu. Ka ndeʼaftá tsi guli ta dasu ta tsa kerubaha nda tsa zlizlamha ya.

³³ Manda va tsaya guli, ka magaftá tsi ta səla wa tghaha tsa huɗi dagala ma həga Lazglafta ya nda udza zaytuŋa mtak, fwaɗ ghulŋuɗha tida.

³⁴ Ka magaftá lu ta parawalha his nda katakwa bərus, tsaha ta gunu lu, sani turtuk ta guɓaghata nda ga zlaɓa lu, sani turtuk guli ta guɓaghata nda ga zeghwi lu ya.

³⁵ Ka tahaftá tsi ta fwata kerubaha, nda zlizlamha, nda gwanata vzlizlaha, ka zlərɓafta ɗina ta dasu ta tsa tahatá skwiha ya.

³⁶ Ka baghutá tsi ta daɓi nda ma huɗi nda dzugura fifiɗata palaha ka ɓalal hkən, nda ɓalala matalaha udza sedra.

³⁷ Ta mafwaɗa vakwa Salumuŋ ta ga mgham, ma tila Ziv, fata lu ta tughwa tsa həga Yawe ya.

³⁸ Ta maghwaŋpəɗ ndeŋa vaku ma tila Bul ta nzakway ka tila matghas, kɗiŋta lu ta baftá tsa həga ya nekwnekw, nda inda slna tida tani manda ya mnaf lu. Ndəfáŋ vaku maga lu ta bay.