1Mgh 4 - Hdi

Maliha ta ksanata slna ta Salumuŋ

¹ Ka nzakw Salumuŋ ka mgham ta ghəŋa inda la Israʼila.

² Wya hga maliha si ta ksanatá slna: Ghazaryahu, zwaŋa Tsaduk, mnda dra skwi ŋa Lazglafta,

³ nda i Ilihuref nda Ahiya zwana Sisa, hahəŋ gwal vindi, nda Yəhusafat zwaŋa Ahilut, mnda tskanatá ɗelewera gwaɗa ga mgham,

⁴ nda Benaya zwaŋa Yəhuyada, mali ta ghəŋa gwal vulu, nda i Tsaduk nda Aviyatar, gwal dra skwi ŋa Lazglafta,

⁵ nda Ghazaryahu zwaŋa Nataŋ, mali ta ghəŋa guvnaha, nda Zavut zwaŋa Nataŋ, tsatsi mnda dra skwi ŋa Lazglafta, mnda vla hiɗaku ŋa mgham guli,

⁶ nda Ahisar, mali ta ghəŋa həga ga mgham, nda Aduniram zwaŋa Ghavda, tsatsi fa lu ŋa ngha gwal maga slna mbraku.

Kwakwarha ghwaŋpəɗ his nda guvnaha taŋ

⁷ Ghwaŋpəɗ his guvnaha Salumuŋ ta ghəŋa inda la Israʼila. Hahəŋ ta vla skwa zay ŋa mgham nda inda gwal ta maga slna ma həga ga taŋ. Dər wati ma həŋ ta tskaktá skwa zay da mnduha ma kwakwara taŋ ŋa həga ga mgham ŋa tili turtuk ma vaku.

⁸ Wya hga taŋ: Beŋʼhur ta ŋa kwakwar ta ghwá Ifrayim,

⁹ nda Beŋʼdeker ta ŋa kwakwara Makats, nda Saghalvim, nda Betʼsemes, nda Iluŋ Betʼhanaŋ,

¹⁰ nda Beŋʼheset ta ŋa Arubut, nda Suhu, nda inda kwakwara Hefer,

¹¹ nda Beŋʼavinadav ta ŋa inda Nafatʼdur. Tsatsi ta klaftá Tafat makwa Salumuŋ ka markwa taŋ.

¹² Baghana zwaŋa Ahilut ta ŋa Taghnak nda Məgidu, nda inda Betseʼaŋ ndusa nda Tsartaŋ, mista Yizrəghel, sliʼafta ni ma Betseʼaŋ dikw da Avelʼməhula, ka tsughwaɗaghutá ɓla Yukməgham,

¹³ nda Beŋʼgever ta ŋa Ramut ma Gilghat, ta ŋa ghuɓuha Yaʼir, zwaŋa Mənase ma Gilghat, nda kwakwara Arguv ma Basaŋ: Mkuʼ mbsak luwaha dagala dagala mida nda matsak nda matsak, nda ŋaŋərzlatá həŋ nda kra wa tghaha ka ghuva tili,

¹⁴ nda Ahinadav zwaŋa Ghidu ta ŋa Mahanayim,

¹⁵ nda Ahimaghats ta klaftá Basmat makwa Salumuŋ, ta ŋa Naftali,

¹⁶ nda Baghana zwaŋa Husay ta ŋa Aser nda Beghalut,

¹⁷ nda Yəhusafat zwaŋa Paruʼah, ta ŋa Yisakar,

¹⁸ nda Simghi zwaŋa Ila ta ŋa kwakwara la Biŋyamiŋ,

¹⁹ nda Gever zwaŋa Uri, ta ŋa kwakwara Gilghat si kwakwara Sihuŋ, mghama la Amuru, nda Ghug, mghama Basaŋ. Mamu sana guvna guli ta ŋa haɗika Yuda.

²⁰ Ndəghundəgha la Yuda nda la Israʼila manda wutak ta wa drəf. Ta zay həŋ, ta say həŋ, ta rfu həŋ.