1Mgh 3 - Hdi

Klafta Salumuŋ ta makwa Firʼawna

¹ Ka ksaftá Salumuŋ ta gra nda Firʼawna mghama Masar, nda ma klaftá ni ta makwa ni ka marakw. Ka klaghatá tsi da luwa Dawuda, ka kəzla kɗiŋta ni ta baftá vərɗa ŋa ni ma həga, nda həga Yawe, nda matsak ta wanaftá Ursalima.

² Ma tsa fitik ya, ta vliha tskal tskala yeya ta vla mnduha ta skwa pla ghəŋ ŋa Lazglafta, kabga ta baf a lu ta həga ŋa vlaŋtá sgit ta Yawe wa.

³ Ka ɗvutá Salumuŋ ta Yawe, ka mbaɗ tsi ta mbaɗa manda ya mnanaf da ni Dawuda. Kulam nda tsa, ta ma vliha tskal tskala ta vla tsi ta skwa pla ghəŋ, hada ta dra tsi ta urdiha.

Ɗaway Salumuŋ ta ɗifil da Yawe

⁴ Ka lagha mgham Salumuŋ da Givghuŋ da vlatá skwa pla ghəŋ, kabga tsaya katkata vli tskala. Ka vlatá tsi ta skwa pla ghəŋ ŋa dray tsuh tsuh dəmbuʼ (1.000) ta tsa gwir ya.

⁵ Ma Givghuŋ, ka zlagaptá Yawe da Salumuŋ ga rviɗik ma suni. Ka Lazglafta nda tsi mantsa: « Ɗawiha ɗawa ta skwi ta kum ka, ka vlaghata yu! » kaʼa.

⁶ Ka Salumuŋ mantsa: « Maranaŋ mara ka ta zɗaku dagala ta kwalva gha da ɗa Dawuda, kabga mbaɗa ni ta kəma gha ka mndu tɗukwa ŋa faftá ghəŋ tida, ka ŋərma mndu. Ka kɗaŋta ka ta maranaŋtá ta zɗaku dagala nda ma vlaŋtá gha ta zwaŋa zgun ta nzaku ta dughurukwa ga mghama ni gita.

⁷ Ndanana, Yawe, Lazglafta ɗa, kagha ta vlihatá ga mgham, ta iʼi kwalva gha, ma vla da ɗa Dawuda. Tsaw tama ná, ta ka zwaŋ kwitikw yu, sna a yu ta skwi ŋa magay ɗa ŋa ŋanata mnduha wu.

⁸ Wana kwalva gha mataba mnduha gha, gwal ya zabap ka, mnduha ta ndəghuta kul laviŋtá lu ta mbəɗaftá mbsaka taŋ həŋ.

⁹ Vlaŋ vla ta ɗifil tɗukwa ta kwalva gha ta gá mgham ta ghəŋa mnduha gha, ŋa tsislaptá skwi ɗina nda skwi kul ɗinaku. Ka haɗ tsi mantsa wu, wa dzaʼa laviŋtá gá mgham ta ghəŋa mnduha gha, nana ndəghata mnduha na na? » kaʼa.

¹⁰ Ka zɗəganatá tsa ɗaway Salumuŋ ya ta Rveri.

¹¹ Ka Lazglafta nda tsi mantsa: « Ka si tsaya ɗawaŋ ka, ka si ɗawaŋ a ka ŋa gha ta dər slravaghata hafa gha wu, dər gadghəl, dər rwuta ghumaha gha wu, ama ka ɗawaŋtá ka ta ɗifil ŋa maga skwi tɗukwa tɗukwa ya,

¹² dzaʼa magagha mag yu manda ya ɗawaŋ ka. Ta vlagha vla yu ta ɗifil nda ghwinslak ta hemuta, ya kul haɗ ma kɗaku kagha, ya dzaʼa kwal lu walaŋta nghaŋtá mndu ka guram nda kagha.

¹³ Dzaʼa vlagha vla yu ta skwi kul ɗawaŋtá ka: Ta vlagha vla yu ta gadghəl, nda glaku ta fərtuta katakata ŋa kwal kul slanaghatá mgham ta gara vgha nda kagha ma nzakwa gha nda hafu.

¹⁴ Ka ta mbaɗa ka ta tviha ɗa nda ma ŋanatá zlahuha ɗa, nda skwiha ta mnafta yu manda da gha Dawuda katsi, dzaʼa slranagha slra yu ta hafa gha, » kaʼa.

¹⁵ Ka sliʼavatá Salumuŋ, tsaw suni ya. Ka vraghatá tsi da Ursalima, ka lagha tsi ta kəma akwata dzratá wa Rveri. Ka vlatá tsi ta skwa pla ghəŋha ŋa dray tsuh tsuh, nda skwa pla ghəŋha zɗaku, ka maganatá tsi ta skwa zay ta kwalvaha ni.

Tsata Salumuŋ ta guma nda ɗifil

¹⁶ Ma sana fitik, ka lagha sana karwaha his ta kəma mgham Salumuŋ.

¹⁷ Ka sani ma tsa miʼaha ya mantsa: « Kdəkkdək rvera ɗa, nana marakw na nda iʼi ná, ma həga turtuk ta nzakwa ŋni, ka dgatá yu hada tsatsi.

¹⁸ Tahula fitik hkən manda dgatá ɗa, ka dgatá na marakw na guli, kawadaga ŋni, haɗ sana mndu ma tsa həga ya ta ghəŋa aŋni hista ŋni wa.

¹⁹ Ka mtutá zwaŋa na marakw na girviɗik ma vəl hanafta ni tida.

²⁰ Ka sliʼaftá tsi ma takala, ka klaftá tsi ta zwaŋa ɗa ta vata iʼi, dza dza hani ta kurɗa gha, ka hananata ma ghuva ni, ka klaftá tsi ta tsa zwaŋa ni nda mtá ya, ka haniɗimta ma ghuva.

²¹ Ka sliʼavatá yu ga sərɗək ŋa suŋtá uʼa ta zwaŋa ɗa, kəʼa ka yu ná, nda mtá. Tsaɗata vli, ka vitsanavatá yu ɗasuwa, zwaŋa ɗa a wu, tsa yaga iʼi ya a wu, » kaʼa.

²² Ka tsa sana marakw ya mantsa: « Mantsa a wa! Zwaŋa ɗa nana ta ndiri na, zwaŋa kagha tsa nda mta ya, » kaʼa. Ama ka tsa marakw taŋtaŋ ya mantsa: « Kadzeŋkadzeŋ! Zwaŋa kagha tsa nda mta ya, zwaŋa iʼi nana ta ndiri na, » kaʼa. Mantsa ya ka həŋ zlərɗanafta ta kəma mgham.

²³ Ka mgham mantsa: « Ka sani na: “Zwaŋa ɗa na ta ndiri na, zwaŋa kagha tsa nda mta ya,” kaʼa. Ka sani mantsa: “Kusekw! Zwaŋa kagha tsa nda mta ya, zwaŋa iʼi na ta ndiri na,” » kaʼa.

²⁴ Ka mgham tama mantsa: « Klagiɗaghawa kafay ya! » kaʼa. Ka klədanaghatá lu ta kafay.

²⁵ Ka mgham mantsa: « Tsanapwa tsa his ta tsa zwaŋ ta ndiri ya, ka vlaŋta kuni ta rita ni ta ya marakw, rita ni ŋa ya marakw, » kaʼa.

²⁶ Ka tsa marakw ta ndiri ŋa ni ya, ksur tsa zwaŋa ni ya ka hiɗahiɗa nda mgham mantsa: « Ari rvera ɗa! Vlaŋwa vla ta na zwaŋ ta ndiri na, ma dza kuni! » kaʼa. Ama ka tsa sana marakw ya mantsa: « Ma nza tsi ŋa gha, ma nza tsi dər ŋa ɗa. Tsanapta! » kaʼa.

²⁷ Ka mgham mnata tama mantsa: « Vlaŋwa tsa zwaŋ ta ndiri ya ta tsa taŋtaŋa marakw ya, ma dza kuni, tsatsi ma ni ma na zwaŋ ta ndiri na, » kaʼa.

²⁸ Ka snaŋtá inda la Israʼila ta tsa tsatá guma mgham ya. Ka zləŋ həŋ nda zləŋa ta mgham, kabga nghadapta taŋ ná, mamu ɗifila Lazglafta ma ghəŋa ni ŋa tsa guma nda tva ni.