1Mgh 22 - Hdi

Dzratá wa i Yəhusafat nda Ahav

¹ Ka zatá lu ta vaku hkən kul haɗ vulu mataba la Aram nda la Israʼila.

² Ta mahkəna vaku tama, ka laha Yəhusafat, mghama la Yuda da nghanaghatá mghama la Israʼila.

³ Ka mghama la Israʼila nda kwalvaha ni mantsa: « Nda sna kuni kazlay na: Ramut ma Gilghat ná, ŋa mu ya kəʼa ra? Mbaɗa amu ka ndanay nda ndana ta dzaʼa klaghuta ma dzva mghama la Aram! » kaʼa.

⁴ Kaʼa nda Yəhusafat mantsa: « Ta kumay ka ta dzaʼa mista ɗa da vulu ma Ramut ma Gilghat ra? » kaʼa. Ka Yəhusafat nda mghama la Israʼila mantsa: « Ta dzaʼa yu mista gha. Kagha nda iʼi, sludziha gha nda sludziha ɗa, plisha gha nda plisha ɗa, haɗ dgəvgha u ɗekɗek wu, » kaʼa.

⁵ Ama ka Yəhusafat sganaghatá mghama la Israʼila mantsa: « Kdəkkdək, snana sna tama ndanana ta gwaɗa da Yawe karaku, » kaʼa.

⁶ Ka tskanatá mghama la Israʼila ta anabiha ta maga fwaɗ dərmək (400), kaʼa nda həŋ mantsa: « Dzaʼa laviŋ lava yu ta dzaʼa da vulu ma Ramut ma Gilghat re, ari ka kwalaghuta yu a na? » kaʼa. Ka həŋ mantsa: « Laf la gha! Dzaʼa vla vla Yawe ma dzva mgham, » ka həŋ.

⁷ Ama ka Yəhusafat mantsa: « Ta haɗ sana anaba Yawe hadna ŋa lavəgliŋta ɗawglamaŋta ra? » kaʼa.

⁸ Ka mghama la Israʼila nda Yəhusafat mantsa: « Ta mamu mndu turtuk dzaʼa laviŋta lu ta snanatá ndana Yawe nda da tsatsi, ama iʼi, husiha husa tsa mndu ya, kabga haɗ ta mnaŋtá skwi ɗina ta ghəŋa iʼi wu, ta ghəŋa ghwaɗaka ni ta mnə tsi. Mihayhu, zwaŋa Yimla ya, » kaʼa. Ka Yəhusafat mantsa: « Ma gwaɗ mgham ta gwaɗa mantsa! » kaʼa.

⁹ Ka hgaktá mghama la Israʼila ta sana mndu mataba maliha ta ksanatá slna, kaʼa nda tsi mantsa: « La misimmisim kudiɗ ka ka nda Mihayhu, zwaŋa Yimla ya! » kaʼa.

¹⁰ Ka nzatá i mghama la Israʼila nda Yəhusafat mghama la Yuda ta dughurukha gá mgham, nda susuɗatá lguta mamgham mgham ta vgha ta blikwi ta wi tgha tva lami da Samari, ta nzatá inda la anabiha Lazglafta ta kəma taŋ ta mna lwa Lazglafta.

¹¹ Ka slaraftá Tsidkiya, zwaŋa Kənaghana ta duliha ni ka kfur, kaʼa mantsa: « Wya skwi mna Yawe: Nda nza tsa duliha ya ka ŋizla mbraku ya dzaʼa kəl ka ka dzaɓidiŋtá sludziha la Aram ha ka kɗanatá həŋ, » kaʼa.

¹² Ka mnə inda sanlaha ma la anabiha ta lwa Lazglafta manda va tsaya, ka həŋ mantsa: « Ŋla da Ramut ma Gilghat, dzaʼa katsay ka! Dzaʼa vla vla Yawe ta həŋ ma dzva mgham, » ka həŋ.

Mnaŋta Mihayhu ta zləmbakwa Ahav

¹³ Ka tsa mnda ghunay si ta laghwi da hga Mihayhu ya, nda tsi mantsa: « Ka skwa turtuk gwaɗa anabiha demdem kazlay na dzaʼa katsay mgham kəʼa. Kdəkkdək ka nza gwaɗa kagha guli manda ŋa dər wati ma həŋ! Ka mna ka ta skwi ɗina! » kaʼa.

¹⁴ Ama ka Mihayhu nda tsi mantsa: « Ta waɗagha waɗa yu nda hga Yawe nda hafu mida, dzaʼa mnay yu ta skwi dzaʼa mnihata Yawe! » kaʼa.

¹⁵ Ɓhadaghata ni da mgham, ka ɗawaŋtá mgham da tsi: « Mihayhu, ka dzaʼa mu da liŋta nda vulu ta Ramut ma Gilghat re, ari ka kwalaghuta mu a na? » kaʼa. Kaʼa zlghanaftá wa ni mantsa: « Ŋla! Dzaʼa katsay ka! Dzaʼa vla vla Yawe ta həŋ ma dzva mgham! » kaʼa.

¹⁶ Ka mgham nda tsi mantsa: « Kidaghi səla dzaʼa famta yu ta kagha da waɗu ŋa mnihata gha ta kahwathwata kweŋkweŋ nda hga Yawe na? » kaʼa.

¹⁷ Ka Mihayhu mantsa: « Nda ngha yu ta inda la Israʼila ta tatá vgha ta ghwáha, manda rini kul haɗ mnda ngha həŋ. Ka Yawe mnata na: “Haɗ mala taŋ wu, ka vra dər wati ma həŋ nda vghata zɗaku dzagha taŋ!” » kaʼa.

¹⁸ Ka mghama la Israʼila nda Yəhusafat mantsa: « Si mna gha a yu kay wu ra? Haɗ ta mna lwa Lazglafta ɗina ta ghəŋa iʼi wu, ta ghəŋa skwi kul ɗinaku ta mnə tsi! » kəʼa kay wu ra?

¹⁹ Ka Mihayhu mantsa: « Katək ra! Sna tama ta gwaɗa Yawe: Nda ngha yu ta Yawe ta nzaku ta dughurukwa gá mghama ni, nda inda gwal vulu ta luwa ta sladu ta vata ni, nda ga zeghwa ni, nda ya nda ga zlaɓa ni.

²⁰ Ka Yawe mnata na: “Wa mndu dzaʼa gataftá Ahav ŋa lafa ni da vulu ma Ramut ma Gilghat, ka dzata lu na?” kaʼa. Ka zlghaftá həŋ ta wa ni, tskəm ka ya nda ŋa ni, tskəm ka ya nda ŋa ni.

²¹ Ama ka lagha sana sulkum da maravata ta kəma Yawe, kaʼa mantsa: “Iʼi dzaʼa gatafta,” kaʼa. Ka Yawe nda tsi mantsa: “Kinawu ká ka dzaʼa magay?” kaʼa.

²² Kaʼa zlghanaftá wi mantsa: “Ta dzaʼa yu, dzaʼa nzakway yu ka sulkuma tsakalawi ma wa inda anabiha ni,” kaʼa. Ka Yawe nda tsi mantsa: “Kahwathwata ná, dzaʼa gataf gata ka, dzaʼa katsay ka. La ka magata ka manda tsaya!” » kaʼa.

²³ Ka Mihayhu mantsa: « Nda ngha ka! Pgham pgha Yawe ta sulkuma tsakalawi ma wa inda na anabiha gha wana həŋ na. Yawe ya ta mnaftá zləmnda ta kagha, » kaʼa.

²⁴ Ka gavadaghatá Tsidkiya, zwaŋa Kənaghana, ka dzuŋtá Mihayhu ma lagəŋ, kaʼa mantsa: « Ndiga saba sulkuma Yawe ma iʼi ŋa gwaɗgaghata na? » kaʼa.

²⁵ Ka Mihayhu mantsa: « Dzaʼa nghay ka baɗ dzaʼa gha da ra vli, lam da ya dzuguvi, lam da ya dzuguvi da ɗifa, » kaʼa.

²⁶ Ka mghama la Israʼila mantsa: « Ksaf ksa ta Mihayhu, ka vriŋta ka da Amuŋ, guvna luwa, nda ya da zwaŋa ɗa, Yuʼas.

²⁷ Ka mnanafta ka ta həŋ: “Wya skwi mna mgham: Famwa fa ta na mndu na ma gamak, ka vla kuni ta buradi kiʼa nda imi kiʼa ŋa ni kweŋkweŋ, ha ka vrakta ɗa dzagha ma zɗaku,” » kaʼa.

²⁸ Ka Mihayhu mantsa: « Ka vragagha vra ka ma zɗaku katsi, ba nda ma iʼi a gwaɗata Yawe ta gwaɗa tama wu, » kaʼa. Kaʼa sganaghata mantsa: « Ta snay snay kaghuni mnduha demdem! » kaʼa.

Mtakwa Ahav

²⁹ Ka sliʼaftá i mghama la Israʼila nda Yəhusafat mghama la Yuda ka lafi da Ramut ma Gilghat.

³⁰ Ka mghama la Israʼila nda Yəhusafat mantsa: « Ka slahwaf slahwa yu ta vgha ŋa dzaʼa da vulu. Ama kagha, suɗava suɗa ta lguta gha, » kaʼa. Ka mbəɗavaftá mghama la Israʼila tama, ka laghu tsi da vulu.

³¹ Tsaw, wya ká mghama la Aram si mnanaftá maliha mwata plisa ni hkən mbsak his mida: « Yaha kuni da lmu nda hamata gwal vulu dər maliha taŋ, ama nda mghama la Israʼila kweŋkweŋ, » kaʼa.

³² Nghay maliha ta ghəŋa mwata plis ta Yəhusafat, ka həŋ mantsa: « Kahwathwata, mghama la Israʼila ya, » ka həŋ. Ka mbəɗadaghatá həŋ ta vgha nda ta vata ni si má ŋa lmu nda tsi, ama ka wahatá Yəhusafat.

³³ Nghay taŋ ná, mghama la Israʼila a wu, ka mbəɗaghutá həŋ ta vgha, ka zlanata.

³⁴ Ama ka hiŋtá sana mndu ta hava manda hazawa, ka lagha tsi krits slafta ta mghama la Israʼila ma vla guyata wa zalama ghuva ka kfur. Ka mgham nda mndu ta klanatá mwata plisa ni ya mantsa: « Mbəɗa ta vgha, ka klapta ka ta iʼi ma bakwa vulu, kabga nda bala yu, » kaʼa.

³⁵ Ɗavaf ɗa tsa vulu ya baɗ tsaya, ka ŋaŋanatá lu ta mgham ta sladu ta sladu ma mwata plisa ni mbəŋ nda la Aram. Ga hawu, ka mtutá tsi, ka mbəzamtá usa vəl balata ma huɗa mwata plis.

³⁶ Dɗakwa fitik, ka dzatá lu ta lili ma inda bakwa vulu: « Ka vra dər wa da luwa ni nda ya ta haɗika ni! » ka lu.

³⁷ Mantsa ya mtuta mgham. Ka klaghatá lu da Samari, ka paɗamtá lu hada.

³⁸ Ta ghuɓu lu ta tsa mwata plisa ni ya ma ghwa Samari, ka sliʼadaghatá kriha niʼa usa Ahav. Ka mbaz karwaha ta mbaza mida, taɓta gwaɗa Yawe si ta mnata.

³⁹ Pɗakwa slnaha Ahav, nda inda skwiha hɗam tsi, nda həga ga mgham baf tsi nda sliʼiŋa gwiʼaŋ, nda inda luwaha ŋaŋam tsi ma matsaka huzlu ná, vivindam vivinda lu ma ɗelewera vinda slnaha mghamha la Israʼila.

⁴⁰ Ka laghu Ahav da dzidzíha ni. Ka lam zwaŋa ni Ahaziya da gá mgham ma vla ni.

Gá mghama Yəhusafat ma Yuda

⁴¹ Ta mafwaɗa vakwa Ahav, mghama la Israʼila ta gá mgham, lama Yəhusafat, zwaŋa Asa da ga mgham ta ghəŋa la Yuda.

⁴² Hkən mbsak hutaf mida ima Yəhusafat ta lam tsi da gá mgham, hisambsak hutaf mida vakwa ni ta gá mgham ma Ursalima. Ghazuva hga ma ni, makwa Silhi.

⁴³ Ka ksaftá tsi kahwathwata ta saɗa da ni, Asa, dzimbiɗana a wu, ka mag tsi ta skwi tɗukwa ta wa ira Yawe.

⁴⁴ Kulam nda tsa, hlu a vliha tskal tskala wa. Ka gɗatá mnduha ta pla ghəŋ, nda dra urdi ŋa dray nda dra ta tsa vliha tskal tskala ya.

⁴⁵ Ka dzraftá Yəhusafat ta wi ŋa nzata ma zɗaku nda mghama la Israʼila.

⁴⁶ Pɗakwa slnaha Yəhusafat, nda mbrakwa ga mghama ni, nda vulu ya vula tsi ná, vivindam vivinda lu ma ɗelewera vinda slnaha mghamha la Yuda.

⁴⁷ Ka hliŋtá tsi ma tsa haɗik ya ta gwal ta ga karwa ma həga skwa wuyay, tsa gwal ta pɗaku nda hafu ta fitika ga mghama da ni, Asa ya.

⁴⁸ Ma tsa fitik ya, haɗ mgham ma Idum wu, ta ghəŋa sana guvna yeya fa mgham.

⁴⁹ Ka tsatsaftá Yəhusafat ta kwambaluha zɗindil zɗindil ŋa dzaʼa da tsakala dasu ta haɗika Ufir, ama ka traptá tsi ta ɓhata, kabga ta ɓalu ɓala tsa kwambaluha ya ma Ghetsiyuŋʼgever.

⁵⁰ Mantsa tama, ka ɗawaŋtá Ahaziya, zwaŋa Ahav da Yəhusafat: « Ta kumay ka ta dzaʼa kwalvaha ɗa kawadaga nda ŋa gha ta kwambaluha ra? » kaʼa. Ama ka kwalaghutá Yəhusafat.

⁵¹ Ka laghu Yəhusafat da dzidzíha ni, ka paɗamtá lu ta vata dzidzíha ni ma luwa dzidza ni Dawuda. Ka lam zwaŋa ni Yəhuram da gá mgham ma vla ni.

Gá mghama Ahaziya ma Israʼila

⁵² Ta maghwaŋpəɗ ndəfáŋa vakwa Yəhusafat ta ga mgham ta ghəŋa la Yuda, lama Ahaziya, zwaŋa Ahav da ga mgham ta ghəŋa la Israʼila, ma Samari. His vakwa ni ta ga mgham ta ghəŋa la Israʼila.

⁵³ Ka mag tsi ta ghwaɗaka skwi ta wa ira Yawe. Ka ksaftá tsi ta saɗa i da ni, nda ma ni, nda ghwaɗaka tva Yaruvgham, zwaŋa Nəvat ta hlamtá la Israʼila da ga dmaku ya.

⁵⁴ Ka maganatá tsi ta slna ta Baghal, ka tsəlɓu ta kəma ni. Ka ŋranaftá tsi ta ŋuɗuf ta Yawe, Lazglafta la Israʼila, manda va ya si maga da ni.