1Mgh 21 - Hdi

Dzatá Navut ta ghəŋa vwaha ni

¹ Tahula tsa skwiha ta maguta ya, wya skwi ta slaku. Mamu sana mnda la Yizrəghel Navut hga ni, nda vwaha inaba ni ma Yizrəghel, ndusa nda həga ga mgham Ahav, mghama Samari.

² Ma sana fitik, ka gwaɗganatá Ahav ta Navut, kaʼa mantsa: « Zlaɗiŋ zla ta na vwaha inaba gha na ŋa hva niɗala ɗa, kabga ndusa nda həga ɗa. Dzaʼa vlagha vla yu ŋa da manaka ni ta vwaha inabi ta malaghutá ɗinaku, ka ta kumay ka katsi guli, plaghaha yu ta sgita ni ka tsedi, » kaʼa.

³ Ka Navut zlghanaftá wi ta Ahav mantsa: « Ka pyaf pya Yawe ta iʼi ta zlaghaŋtá skwa za həga ɗa daga ta dzidzíha ɗa! » kaʼa.

⁴ Ka laghu Ahav dzagha ni nda gufatá ŋuɗuf, nda gatá sidi, dabga tsa gwaɗa mnana Navut mnda la Yizrəghel ya: « Haɗ yu dzaʼa vlaghatá skwa za həga ɗa daga ta dzidzíha ɗa wu! » kəʼa ya. Ka hanatá tsi ta ghəzləŋa ni, ka mbəɗaghatá kuma nda təv vata həga, ka kwalaghutá za skwa zay.

⁵ Ka lagha markwa taŋ Izabel slanaghata, kaʼa nda tsi mantsa: « Nya kəl ka ka nzata suʼanaka, za a ka ta skwa zay wu na? » kaʼa nda tsi.

⁶ Kaʼa zlghanaftá wi mantsa: « Gwaɗa ya gwaɗgana yu ta Navut mnda la Yizrəghel, ka yu nda tsi na: “Zlaɗiŋ zla ta na vwaha inaba gha na ka skwata yu nda tsedi, ka ta kumay ka guli, vlaghaha yu ta sana vwaha inabi ŋa da manaka ni,” ka yu nda tsi. Ama kaʼa zlghaɗiftá wi na: “Haɗ yu ta vlaghatá vwaha inaba ɗa wu,” kəʼa, » kaʼa.

⁷ Ka markwa taŋ Izabel nda tsi tama mantsa: « Kagha ta ga mgham kahwathwata ndanana ta ghəŋa la Israʼila guli ra? Sliʼaf sliʼa gha, za ta skwa zay, ka rfa ŋuɗufa gha ta rfu. Iʼi dzaʼa vlaghatá tsa vwaha inaba Navut mnda la Yizrəghel ya! » kaʼa.

⁸ Ka vivindaftá tsa marakw ya ta ɗelewerha nda hga Ahav, ka fafaftá tsi ta ŋizla mgham ta həŋ. Ka tsaghanaftá tsi ta la galata mndu, nda gwal dagaladagala ma luwa Navut.

⁹ Wya skwi vindaf tsi ta tsa ɗelewerha ya: « Mnawa mna ta fitik ŋa maga sumay. Ka hagakta kuni ta mnduha, ka fata kuni ta Navut ta taŋtaŋa vla sgit ta kəma mnduha.

¹⁰ Ka pghata kuni ta falaya mnduha his mbəŋ nda tsi, ka tsanavata həŋ ta gwaɗa kazlay na: “Kagha ta razanaftá i Lazglafta, nda mgham,” ka həŋ dzaʼazlay. Tahula tsa, ka klaghata kuni ta hula luwa ŋa zlambata ha ka mtata ni! » kaʼa.

¹¹ Ka magatá la galata mndu, nda gwal dagaladagala ma tsa luwa Navut ya, taɓta skwi mnaf Izabel. Ka magatá həŋ manda va ya nda vinda ma tsa ɗelewerha tsaghanaf tsi ta həŋ ya.

¹² Ka mnatá həŋ ta fitik ŋa maga sumay, ka fatá həŋ ta Navut ta taŋtaŋa vla sgit ta kəma mnduha.

¹³ Ka lagha falayha his nzata mbəŋ nda Navut, ka tsanavatá həŋ ta gwaɗa ta kəma mnduha kazlay na: « Navut ta razanaftá i Lazglafta, nda mgham! » ka həŋ. Tahula tsa, ka klaghatá lu ta hula luwa, ka zlambata ha ka mtuta ni.

¹⁴ Ka ghunaghatá lu ta mndu mnanatá Izabel: « Zlamba zlamba lu ta Navut, ka mtutá tsi, » kaʼa.

¹⁵ Snaŋta Izabel ta tsa gwaɗa ya, kaʼa nda Ahav mantsa: « Sliʼaf sliʼa gha, kla ŋa gha ta vwaha inaba Navut mnda la Yizrəghel, si ta kwalaghutá skwaghapta ka tsedi ya, kabga ta haɗ Navut nda hafu wu, nda mta, » kaʼa.

¹⁶ Snaŋta Ahav kazlay na nda mta Navut kəʼa, ka sliʼaftá tsi ka laha da tsa vwaha inabi Navut mnda la Yizrəghel ya, ŋa klaghuta ŋa ŋa ni.

Mnaŋta Iliya ta guma dzaʼa slanaghatá Ahav

¹⁷ Ka gwaɗganatá Yawe ta Iliya, mnda la Tisbe:

¹⁸ « Sliʼaf sliʼa, la la da guyaku nda Ahav, mghama la Israʼila ta nzakw ma Samari ya. Wa a la la da vwaha inaba Navut, ŋa klaghuta ŋa ŋa ni.

¹⁹ Ka mnanata ka: “Wya ka Yawe mnata: Nu? Tahula dzata gha ta mndu ná, ka kuma ka ta klaghuta ŋa ŋa gha ta skwa ni!” kaʼa. Ka ka da sganaghata guli na: “Wya ka Yawe mnata: Ma va tsa vla niʼay kriha ta usa Navut ya, dzaʼa niʼa həŋ ta usa vərɗa kagha guli,” ka ka dzaʼazlay nda tsi, » kaʼa.

²⁰ Ɓhadaghata Iliya, ka Ahav nda tsi mantsa: « Sləgləɗigha sla ka ɓa, a ghuma ɗa? » kaʼa. Kaʼa mantsa: « Sləglaghagha sla yu, kabga skwap skwa ka ta ghəŋa gha ŋa maga ghwaɗaka skwi ta wa ira Yawe.

²¹ Wya ka Yawe nda kagha: “Dzaʼa klaghak kla yu ta zləmnda, dzaʼa faɗaghis faɗa yu, dzaʼa zaɗaghuna zaɗa yu nekwnekw ta ghəŋa haɗik, kagha nda zivira gha tani, dzaʼa hliŋ hla yu ma Israʼila ta inda zgwana ga ghuni, dər vuʼa tsi, dər mndu nda pla vgha ni a tsi.

²² Dzaʼa niŋ na yu ta la ga ghuni ka guram nda ŋa la ga Yaruvgham, zwaŋa Nəvat, nda ya nda ŋa la ga Baghsa, zwaŋa Ahiya, kabga ŋriɗifta gha ta ŋuɗuf, ka hlamtá ka ta la Israʼila da gatá dmaku,” kaʼa.

²³ Ka gwaɗganatá Yawe guli ta Izabel, kaʼa mantsa: “Kriha dzaʼa zutá Izabel mista matsaka Yizrəghel.

²⁴ Dər wati ma mndu ga la Ahav dzaʼa mtuta ma luwa ná, kriha dzaʼa zuta, ya dzaʼa mtuta ma vwah ya guli, gugzlumha dzaʼa zuta,” » kaʼa.

²⁵ Haɗ mndu ɗekɗek taɓta Ahav ta skwaptá ghəŋa ni ŋa maga ghwaɗaka skwi ta wa ira Yawe, kabga gagafta markwa taŋ Izabel wa.

²⁶ Maga maga ta skwa manzakɗaway katakata nda ma ndiʼafta ni ta vgha ta skwa wuyay, manda ya ta mag la Amuru, tsa mnduha ghazliŋ Yawe ta həŋ ta kəma la Israʼila ya.

Hanaganata Ahav ta ghəŋ

²⁷ Snaŋta Ahav ta tsa gwaɗa Iliya ya, ka kwahiŋtá tsi ta lguta ni, ka favatá buhu ta vgha, ka suma. Ka han tsi nda tsa buhu ya nda tsa buhu ya, ka mbaɗ tsi ta mbaɗa zehha.

²⁸ Ka gwaɗgəlganatá Yawe ta Iliya, mnda la Tisbe, kaʼa mantsa:

²⁹ « Nda ngha ka ká Ahav hanaganatá ghəŋ ta kəma ɗa kiʼe? Tsəhala hanagana hana tsi ta ghəŋ ta kəma ɗa ya, haɗ yu dzaʼa ghunanaktá tsa zləmnda ya ma nzakwa ni nda hafu wu, ama ma fitika ga mghama zwaŋa ni dzaʼa klakta yu ta ghəŋa la ga taŋ, » kaʼa.