1Mgh 20 - Hdi

Wanafta mghama la Aram ta luwa Samari

¹ Ka tskanatá Benʼhadat, mghama la Aram ta gwal vula ni demdem. Hkən mbsak his mida mghamha kawadaga nda tsi, nda plisha, nda mwata plisha. Ka laf tsi da ŋamtá luwa Samari, ka liŋta guk nda vulu.

² Ka ghunaftá tsi ta gwal ghunay da luwa da Ahav, mghama la Israʼila,

³ ŋa mnanata: « Wya ka Benʼhadat: “Tseda gha nda dasa gha ná, ŋa ɗa həŋ. Miʼa gha nda zwana gha ta ɗiɗinuta ya guli ná, ŋa ɗa həŋ” kəʼa, » kaʼa.

⁴ Ka mghama la Israʼila zlghanaftá wa ni mantsa: « Manda tsa ta mnə ka ya, a rveri, mghama ɗa ná, ŋa gha yu, nda inda skwi ya ka ŋa ɗa, » kaʼa.

⁵ Ka vrəgladaghatá tsa gwal ghunay ya da mnəglay ŋa Ahav kazlay: « Wya ka Benʼhadat mnata: “Mnaghaf mna yu ka vlihata ka ta tseda gha, nda dasa gha, nda miʼa gha, nda zwana gha.

⁶ Mahtsim ta na luwa na, dzaʼa ghunadap ghuna yu ta kwalvaha ɗa da kagha, ŋa psapta taŋ ta həga gha, nda ŋa kwalvaha gha. Dzaʼa hlagaghu hla həŋ ta inda skwiha gha ya nda bla nda bla,” » kaʼa.

⁷ Ka hagaftá mghama la Israʼila ta galata mnduha demdem ta haɗika ni, kaʼa nda həŋ mantsa: « Grafwa gra kazlay na: Ta zba magamatá ghwaɗaka skwi tsa mndu ya kəʼa! Ɗawiha ɗawa ta miʼa ɗa, nda zwana ɗa, nda tseda ɗa, nda dasa ɗa, kwalaghu a yu ta vlaŋta wu! » kaʼa.

⁸ Ka inda la galata mndu nda inda mnduha, nda Ahav mantsa: « Ma snə ka, ma tsuʼanaf ka! » ka həŋ.

⁹ Ka Ahav nda gwal ghunaya Benʼhadat mantsa: « Lawa mnanatá rveri mghama ɗa: “Dzaʼa magay yu ta inda tsa skwi ɗawaŋ ka taŋtaŋ da kwalva gha ya, ama nana ta ɗaw ka ka mahis na ná, laviŋ a yu ta magay wu,” » kaʼa. Ka vraŋtá tsa gwal ghunay ya ta zlgha wa ni ta daŋahəga taŋ.

¹⁰ Ka ghunaftá Benʼhadat ta mndu da Ahav ŋa mnanata: « Ka tsiɗagha tsa lazglaftaha ta guma katakata, ka dzaʼa slaghu sla rgitika Samari ŋa ndəghanaftá guɗekwa dzva sludziha ta pgha iʼi, » kaʼa.

¹¹ Ama ka mgham Ahav zlghanaftá wi mantsa: « Lawa tama da mnanata! Yaha mndu ta hba huɗi ŋa dzaʼa da vulu dá dza ghuva, manda mndu ta vrakta tahula zata ni ta ghwa! » kaʼa.

¹² Klədanaghata lu ta tsa gwaɗa ya ta Benʼhadat ta sutá ghuza ni tsatsi ma dumbiha kawadaga nda sanlaha ma mghamha, kaʼa nda kwalvaha ni mantsa: « Hbawa vgha! » kaʼa. Ka hbaftá həŋ ta vgha ŋa liŋtá tsa luwa ya.

Zata Ahav ta ghwa ta ghəŋ mghama la Aram

¹³ Ma va tsa fitik ya, ka gavadaghatá sana anabi ta vata Ahav, mghama la Israʼila, kaʼa mantsa: « Wya ka Yawe mnata: Nda ngha ka ta na glakwa tskatá sludziha na ra? Dzaʼa vla vla yu ta həŋ gita ma dzva gha, dzaʼa nda sna ka kazlay na, iʼi Yawe kəʼa, » kaʼa.

¹⁴ Ka Ahav mantsa: « Nda ma dzva wa dzaʼa vlihata ka na? » kaʼa. Kaʼa mantsa: « Wya ka Yawe mnata: Nda ma dzva duhwalha mista maliha ma kwakwarha, » kaʼa. Ka Ahav mantsa: « Wa dzaʼa zlraftá vulay? » kaʼa. Kaʼa mantsa: « Kagha ya, » kaʼa.

¹⁵ Ka tskanatá Ahav ta duhwalha vulu his dərmək nda hkən mbsak his mida (232), gwal mista maliha ma kwakwarha. Tahula tsa, ka tskanatá tsi ta inda sludziha dəmbuʼ ndəfáŋ (7.000) mataba la Israʼila.

¹⁶ Ka sab həŋ nda fitik ma ghəŋ, ta ghuytá ghuyakwa ni Benʼhadat ma dumbiha kawadaga nda tsa mghamha hkən mbsak his mida ta sagha ŋa kataŋta ya.

¹⁷ Tsa duhwalha mista maliha ma kwakwarha ya ta tiŋlaghuta sabi. Ka ghunaftá Benʼhadat ta gwal ŋa vitsapta, ka klanaktá lu ta wuna wa ni: « Ya sliʼagap sliʼa mnduha ma luwa Samari, » ka lu.

¹⁸ Kaʼa mantsa: « Dər má sab da ɗawa zɗaku həŋ, dər má ŋa vulu a tsi ná, kasafwa kasa nda kasa ta həŋ! » kaʼa.

¹⁹ Sliʼagapta tsa duhwalha ya, nda sludziha ta dzaʼa mista taŋ ya ma luwa,

²⁰ gwedza gwedza guya guya həŋ, dər wa ta dzatá ghuma ni. Ka hwayaftá la Aram, ka hwayiŋtá la Israʼila ta həŋ. Ka ndaptá Benʼhadat, mghama la Aram ta plis nda sanlaha ma gwal ta ŋla plis.

²¹ Ka sab mghama la Israʼila, ka zaɗanatá plisha, nda mwata plisha, ka rwanatá la Aram katakata.

²² Ka gavadaghatá tsa anabi ya ta vata mghama la Israʼila, kaʼa nda tsi mantsa: « La! Mbra ta vgha, nghadap ngha ɗina ka skwi dzaʼa ka da magay, kabga saghar sana vaku ná, dzaʼa səglaf sa mghama la Aram guk lighista nda vulu, » kaʼa.

Vləglaŋta Yawe ta zatá ghwa ta la Israʼila

²³ Ka kwalvaha mghama la Aram nda tsi mantsa: « Lazglafta la Israʼila ná, lazglafta ghwáha ya. Tsaya kəl həŋ ka mbruta ta ghəŋa amu. Ama liŋma la ta həŋ ma daɓi, ka haɗ lu dzaʼa ngha mbranaghata mu ta həŋ.

²⁴ Wya skwi dzaʼa ka da magay: Hliŋ hla ta inda mghamha ma vla slna taŋ, ka mbaɗapta ka ta həŋ nda guvnaha.

²⁵ Vərɗa kagha, hlaf hla ta gwal vulu, manda va tsaha ta lugughusta ya, nda plisha nda mwata plisha manda va tsaha ya. Tahula tsa, ka dzaʼa mu da vulay ma daɓi, ka ngha lu ka mbranaghata a mu ta həŋ, » ka həŋ. Ka snanatá mgham ta həŋ, ka magatá tsi manda va tsaya.

²⁶ Sagha sana vaku tama, ka sliʼaftá Benʼhadat nda sludziha ni, ka laf həŋ nda təv Afek, ŋa liŋtá la Israʼila nda vulu.

²⁷ Ka tskaftá la Israʼila ta vgha taŋ guli, ka hlanaftá lu ta huzla ta həŋ, ka laghu həŋ ŋa gumata nda la Aram. Ka fatá la Israʼila ta ghuɓa taŋ mbəŋ nda həŋ, ama manda bra gu hutsekw hutsekw his hahəŋ, ta ndəghanaftá la Aram dəɓaʼ ta inda vli ma daɓi.

²⁸ Ka lagha mnda Lazglafta ta vata mghama la Israʼila, kaʼa nda tsi mantsa: « Wya skwi mna Yawe: “Ka la Aram mnata na: Yawe ná, lazglafta ghwáha ya, lazglafta daɓiha a wu, ka həŋ. Dzaʼa vla vla yu ta inda na ndəghata sludziha na ma dzva gha, dzaʼa nda sna kuni kazlay na: Iʼi Yawe, kəʼa,” » kaʼa.

²⁹ Ka fatá həŋ ta ghuɓa taŋ ka nzata mbəŋ ya mbəŋ ya ka fitik ndəfáŋ. Baɗ mandəfáŋ, ka zlraftá vulu. Ka rwanatá la Israʼila ta gwal vula la Aram dəmbuʼ dərmək (100.000) baɗ turtuk.

³⁰ Ka hwayaghutá pɗakwa gwal ta nda hafu da luwa Afek. Ama hada, ka zləmbanaghatá matsak ta gwal dəmbuʼ hisambsak ndəfáŋ mida (27.000). Ka hwayaghatá Benʼhadat da tsa luwa ya guli da ɗifaghuta. Hada, ka kakafaku tsi ka ra vli, lamha da ya dzuguvi lamha da ya dzuguvi.

³¹ Ka kwalvaha ni nda tsi mantsa: « Snaŋ sna ŋni ta mnay kazlay na, mghamha guyatá ghəŋa la Israʼila ná, mghamha ta zɗakatahuɗi həŋ kəʼa. Habivma buhuha misti, ka wawamta mu ta tɓaŋha ma ghəŋ, ka laba mu da mghama la Israʼila, kawayaka skwi dzaʼa zlagha zla nda hafu, » ka həŋ.

³² Ka habivtá həŋ ta buhu misti, ka wawamtá tɓaŋha ma ghəŋ, ka laghu həŋ da mghama la Israʼila, ka həŋ mantsa: « Ka kwalva gha Benʼhadat na: “Kdəkkdək, ka zlaɗiŋ zla tsi ta hafa ɗa!” kaʼa, » ka həŋ. Ka Ahav mantsa: « Ta nda iri ra? Zwaŋama ɗa ya! » kaʼa.

³³ Ka gi klaftá tsa kwalvaha ni ya ta tsa gwaɗa ya ka ŋizla zɗaku, ka gi tsuʼaghutá həŋ ta tsa gwaɗa ya ta wa Ahav, ka həŋ mantsa: « Aŋi, Benʼhadat ya, zwaŋama gha ya! » ka həŋ. « Lawa klakta, » ka Ahav. Ka sab Benʼhadat ma vla ɗifa ni ka lagha da tsi. Ka klaftá Ahav ta mwata plisa ni.

³⁴ Ka Benʼhadat nda tsi mantsa: « Tsa luwaha si hlaghu da ɗa da da gha ya ná, dzaʼa vravagha vra yu, ŋa laviŋta gha ta dzaʼa da tsakala gha ma Damas, manda ya si ta mag da ɗa ma Samari ya, » kaʼa. Ka Ahav nda tsi mantsa: « Iʼi, dzaʼa zlaghis zla yu tahula dzrafta u ta wi, » kaʼa. Ka dzraftá tsi ta wi tama nda tsi, ka zlanata ka laghu tsi.

Mnaŋta sana anabi ta guma dzaʼa slanaghatá Ahav

³⁵ Ka sana mndu mataba guyatá ghəŋa anabiha nda sana gra ni manda ya mnanaf Yawe mantsa: « Kdəkkdək, dzuɗis dza! » kaʼa. Ama ka kwalaghutá tsa mndu ya ta dzuŋta.

³⁶ Kaʼa nda tsi tama mantsa: « Ka si kwalaghu kwala ka ta snatá lwa Yawe ya, na gi laghwa gha ta vata iʼi ya, dzaʼa ksa ksa rveri ta kagha, » kaʼa. Laghwa tsa mndu ya ta vata ni, ka guyatá tsi nda rveri ta dzata.

³⁷ Ka guyatá tsa anabi ya nda sana mndu guli, kaʼa nda tsi mantsa: « Kdəkkdək, dzuɗis dza! » kaʼa. Ka dzuŋtá tsa mndu ya, ka balanata.

³⁸ Ka hbamtá tsa anabi ya tama ta gərzaŋ ma kuma ŋa kwal kul tsəmafta. Ka laghu tsi da nzata ta tsa tvi ksagha mgham Ahav ya.

³⁹ Ta lab la mgham, ka wahatá tsi mista ni, kaʼa mantsa: « Kwalva gha yu si ma takataka vulu. Gi ka gavaptá sana mndu, ka kləgiɗaghatá sana mndu ksaf lu ka vuʼa, kaʼa mantsa: “Ŋana ŋa ta na mndu na. Ka hwayaghu hwaya tsi, hafa gha ŋa da manaka ni ŋa mbəɗa tsa mndu ya, ka kiluʼa tsedi hkən mbsak a tsi ta plata ka,” kaʼa.

⁴⁰ Tsaw, ta laghu kwalva gha da gugsaku ya ná, ta laghu tsa mndu ya rək! » kaʼa. Ka mghama la Israʼila nda tsi mantsa: « Tsaya gwaɗa gha ra, vərɗa kagha ta tsanaghatá guma ta ghəŋa gha! » kaʼa.

⁴¹ Gi ka kliŋtá tsa anabi ya ta tsa gərzaŋ ma kuma ni ya, ka tsəmaftá mghama la Israʼila kazlay na si sani mataba anabiha ya kəʼa.

⁴² Ka tsa anabi ya nda tsi tama mantsa: « Wya skwi mna Yawe: Fitika zliŋta gha ta mndu ya faghu yu ŋa zaɗiŋta ya, hafa gha ŋa mbəɗaptá tsa mndu ya, mnduha gha guli, ŋa da manaka mnduha tsatsi, » kaʼa.

⁴³ Ka vraghutá mghama la Israʼila dzagha ni ma Samari, nda ɗahata ŋuɗuf, nda gufatá ŋuɗuf.