1Mgh 19 - Hdi

Hwayaghata Iliya ta Hwarev

¹ Ka rusanaftá Ahav ta Izabel ta inda skwi ya maga Iliya, nda ya kəʼa pslatá inda anabiha nda kafay.

² Ka ghunaftá Izabel ta mnda ghunay da Iliya ŋa mnanata: « Ka tsiɗagha tsa lazglaftaha ta guma katakata, ka mahtsim, ta va na luwa na, ka magagha a yu ta skwi ya magana ka ta tsa anabiha ya! » kaʼa.

³ Ka ksaftá zləŋ ta Iliya, ka sliʼaftá tsi ka hwayaghuta ŋa kata hafa ni. Ka ɓhadaghatá tsi da Bəʼerseva luwa ma dzva la Yuda, ka zlanatá tsi ta duhwala ni hada.

⁴ Tsatsi ya, ka laghu tsi, tep vagha ni ta mbaɗa ma mtak. Ka lagha tsi da nzata mista sana mubuk. Ka ɗawu tsi ta mtaku, kaʼa mantsa: « Lavgliŋ a yu wa! Ndana tama Yawe, kla ta hafa ɗa, kabga malaghu a iʼi ka dzidzíha ɗa wu, » kaʼa.

⁵ Tahula tsa, ka hanatá tsi mista tsa mubuk ya, ka dzatá hani. Ka gi lagha duhwala Lazglafta da ksaŋta, kaʼa nda tsi mantsa: « Sliʼava sliʼa ka za ka ta skwa zay! » kaʼa.

⁶ Ka nghaptá tsi, kəʼa kəʼa ta vata vla fatá ghəŋa ni ná, ka nghaŋtá tsi ta datá gatu ta palaha ghandand ka vu, nda beŋwbeŋwa imi. Ka zutá tsi, ka siŋtá tsi ta imi, ka hangladatá tsi.

⁷ Ka vraktá duhwala Yawe ka mahis, ka ksaŋtá tsi, kaʼa nda tsi mantsa: « Sliʼava sliʼa gha, ka za ka ta skwa zay, kabga diʼiŋ tvi dzaʼa ka da mbaɗay, » kaʼa.

⁸ Ka sliʼaftá Iliya, ka zutá tsi, ka siŋtá tsi ta imi, ka vlaŋtá tsa skwa zay zu tsi ya ta mbraku. Fwaɗ mbsak vaghu, fwaɗ mbsak rviɗik maga tsi ta mbaɗa, ha ka ɓhadaghatá tsi ta Hwarev, ghwá Lazglafta.

Maravata Yawe da Iliya

⁹ Hada, ka lam tsi da sana galigha, ka hanay. Ka gwaɗganatá Yawe: « Nu ta mag ka hadna ní, Iliya? » kaʼa.

¹⁰ Kaʼa zlghanaftá wi mantsa: « Ŋava ŋa yu nda inda mbrakwa ɗa ka maganatá slna ta Yawe, Lazglafta mghama gwal vulu. Ama zlanava zla la Israʼila ta dzratá wa gha, ka dzaɓiŋtá həŋ ta gwirha gha, ka pslatá anabiha gha nda kafay. Ka pɗatá iʼi turtukwa ɗa. Ta zba iʼi həŋ guli ŋa dzata, » kaʼa.

¹¹ Ka Yawe mantsa: « Sab sa ka sladata ka ta ghwá ta kəma Yawe, dzaʼa lab la Yawe! » kaʼa. Mbaɗa falak ta malaghutá mbraku ka vyaku katakata ta kəma Yawe, ka tatanaptá ghwáha, ka paslanaptá kutumbaha, ama haɗ Yawe ma tsa falak ya wa. Tahula laghwa tsa falak ya, ka gigiɗavaftá haɗik, ama haɗ Yawe guli ma tsa gigɗakwa haɗik ya wa.

¹² Tahula gigɗavafta haɗik, ka sab vu, ama haɗ Yawe ma tsa vu ya wa. Tahula vu, ka snaku zwaŋa lwi sleɗeɗa.

¹³ Na snaŋta Iliya ta tsa lwi ya, ka bukwamtá tsi ta kuma ni nda sɗakwa ni, ka sab tsi ma tsa galigha ya ka nzuŋta ta wa ni. Ka gwaɗganatá sana lwi: « Nu ta mag ka hadna ní, Iliya? » kaʼa.

¹⁴ Kaʼa zlghanaftá wi mantsa: « Ŋava ŋa yu nda inda mbrakwa ɗa ka maganatá slna ta Yawe, Lazglafta mghama gwal vulu. Ama zlanava zla la Israʼila ta dzratá wa gha, ka dzaɓiŋtá həŋ ta gwirha gha, ka pslatá anabiha gha nda kafay. Ka pɗatá iʼi turtukwa ɗa, ta zba iʼi həŋ guli ŋa dzata, » kaʼa.

¹⁵ Ka Yawe nda tsi mantsa: « Vra, ksa ta tva gha nda ma mtak ha da Damas. Ɓhadaghata gha da hada ya, ka pghanaghata ka ta rɗi ta Hazaʼel, ka famta ka ka mghama la Aram.

¹⁶ Ka famta ka nda ma pghanaghatá rɗi ta Yehu, zwaŋa Nimsi ka mghama la Israʼila. Ka famta ka nda ma pghanaghatá rɗi ta Ilisa, zwaŋa Safat, mnda luwa Avelʼməhula ŋa nzakwa ni ka anabi ma vla gha.

¹⁷ Inda mndu dzaʼa waratá kafaya Hazaʼel, Yehu dzaʼa dzata. Inda mndu dzaʼa waratá kafaya Yehu, Ilisa dzaʼa dzata.

¹⁸ Ama dzaʼa zlana zla yu ta mnduha dəmbuʼ ndəfáŋ (7.000) ma Israʼila, inda gwal kul tsəlɓaŋtá tsəlɓu ta kəma Baghal, kul walaŋta brusata nda wubisima taŋ ya, » kaʼa.

Hgafta Iliya ta Ilisa

¹⁹ Ka sliʼaftá Iliya hada ka laghwi slanaghatá Ilisa, zwaŋa Safat ta hva. Mamu slaha his his his ha ghwaŋpəɗ his ta kəma ni. Vərɗa Ilisa ta kla tsa maghwaŋpəɗ hisa ni ya. Ka gavadaghatá Iliya ta vata Ilisa, ka wuɗanaftá sɗakwa ni.

²⁰ Ka zlanavatá Ilisa ta slaha ni, ka hwayaghata mista Iliya, kaʼa nda tsi mantsa: « Zliha zla ka brusata yu ta i da ɗa nda ma ɗa, ka dzaʼa yu mista gha, » kaʼa. Ka Iliya nda tsi mantsa: « La ka vrakta ka! Ka ndanapta ka ka skwi maga gha yu, » kaʼa.

²¹ Diʼiŋaghuta Ilisa nda Iliya, ka hlaftá tsi ta slaha his, ka vlata ka skwa pla ghəŋ. Nda udza tsa slaha ya, ka datá tsi ta sluʼa tsa slaha ya, ka vlaŋtá tsi ta mnduha ŋa zay taŋ. Tahula tsa, ka sliʼaftá tsi ka laghwi mista Iliya, ka nzatá tsi ka maganatá slna.