1Mgh 17 - Hdi

Anabi Iliya nda ghwalata luwa

¹ Ka sana anabi ta hgə lu ka Iliya, sana mndu mataba la Tisbe ma kwakwara Gilghat nda Ahav mantsa: « Ta waɗa waɗa yu nda hga Yawe, Lazglafta la Israʼila nda hafu mida, ta maganata yu ta slna: Ma na vakuha ta kəma na ná, haɗta a wuninik wu, haɗta a imi wu, ba ta ɗawaŋta ɗa kasiʼi, » kaʼa.

² Ka gwaɗganatá Yawe ta Iliya:

³ « Sliʼaf sliʼa hadna, la nda ga silwa, ka ɗifaghuta ka ma lika Kərit ta ɓla Yardeŋ nda təv safa fitik ya.

⁴ Ma tsa lika ya dzaʼa sa ka ta imi, zarakataghuvi mnanaf yu ŋa vla skwa zay ŋa gha hada, » kaʼa.

⁵ Ka laghu Iliya ka magata taɓta gwaɗa Yawe. Ka laghu tsi da nzata ma lika Kərit ta ɓla Yardeŋ nda təv safa fitik.

⁶ Ka klə zarakataghuvi ta buradi, nda sluʼi ŋa ni, nda sərɗək tani, nda hawu tani, ka sə tsi ta imi ma tsa lika ya.

⁷ Kɗatá fitika ni, ka suʼitá imi ma tsa lika ya, kabga kwal kul nzagatá imi ta tsa haɗik ya.

Iliya ga sana markwa wadgu ma Tsarfat

⁸ Ka gwaɗganatá Yawe ta Iliya, kaʼa mantsa:

⁹ « Sliʼaf sliʼa, la da luwa Tsarfat ta haɗika Tsiduŋ ka nzata ka hada, ya mnanaf mna yu ta sana markwa wadgu, ŋa vla skwa zay ŋa gha, » kaʼa.

¹⁰ Ka sliʼaftá tsi ka laghwi da Tsarfat, ɓhadaghata ni ta tva lami da luwa, ka nghaŋtá tsi ta sana markwa wadgu ta tska nivi. Ka hgaŋtá tsi, kaʼa mantsa: « Kdəkkdək la zbiɗiktá imi kiʼa ma bəzleghwa ya ka saʼata yu! » kaʼa.

¹¹ Ta sliʼi tsa marakw ya da zba tsa imi ya, ka hgəglaŋtá Iliya, kaʼa mantsa: « Kdəkkdək, klaɗik kla ta tsata buradi ya ma dzva gha! » kaʼa.

¹² Ka tsa marakw ya zlghanaftá wi mantsa: « Ta waɗa waɗa yu nda hga Yawe, Lazglafta gha nda hafu mida! Haɗ skwi da lu nda da da iʼi wu, ta ghəŋa hpu zluk ma dzvu ta kwatahpu yeya da iʼi, nda rɗi kiʼa ma hwarak. Wana yu ta tska nivi, laba ɗa dzagha ya, ŋa data ɗa ŋa ŋni nda zwaŋa ɗa, ŋa zuta ŋni. Tahula tsa ŋa rwuta ŋni, » kaʼa.

¹³ Ka Iliya nda tsi mantsa: « Ma zləŋ ka! La dzagha, ka magata ka ta skwi mna ka. Kweŋkweŋa ni ná, diha da ta ŋa ɗa karaku nda tsa da kagha ya ta gatu kiʼa, ka klaɗikta ka. Tahula tsa, ŋa magata gha ta ŋa ghuni nda zwaŋa gha.

¹⁴ Wya ka Yawe, Lazglafta la Israʼila mnata: “Haɗ kwatahpu dzaʼa nzata kuslaŋ wu, haɗ hwaraka rɗi dzaʼa nzata tekw tekw wu, ha baɗ fitik ya dzaʼa vlagata Yawe ta imi ta ghəŋa haɗik,” » kaʼa.

¹⁵ Ka laghu tsa marakw ya, ka magatá tsi ta skwi mnana Iliya. Nzəɗava nzəɗa tsa marakw ya ta zay, tsatsi nda la ga taŋ, nda Iliya tani.

¹⁶ Kɗava a tsa hpu ta kwatahpu ya wu, kɗava a tsa rɗi ta hwarak ya guli wu, taɓta gwaɗa Yawe ta mnata nda ma wa Iliya.

Vranamta Iliya ta hafu da zwaŋa tsa wadgu ma Tsarfat ya

¹⁷ Wya skwi ta maguta tahula magatá tsa skwiha ya: Ka ksaftá ɗaŋwa ta zwaŋa tsa markwa wadgu ta tsuʼaftá anabi ya. Ka sgavaghatá tsa ɗaŋwa ni ya, ka sab hafu mida.

¹⁸ Ka tsa marakw ya nda Iliya mantsa: « Nya mataba u ní, a mnda Lazglafta? Ŋa havaktá krughuva ɗa, nda ya ŋa dzatá zwaŋa ɗa sagha ka da ini ra? » kaʼa.

¹⁹ Kaʼa zlghanaftá wi mantsa: « Yaha tsa zwaŋa gha ya! » kaʼa. Ka klaghutá tsi ma dzva tsa marakw ya, ka kladafta da dzuguvi ta nzakw tsi ta ghəŋa həga, ka hananaftá tsi ta ghəzləŋa ni.

²⁰ Ka hgaŋtá tsi ta Yawe, kaʼa mantsa: « Yawe, Lazglafta ɗa, ta kumay ka ta maganatá ghwaɗaka skwi ta na marakw ta tsuʼaftá iʼi ga taŋ na, ha ŋa dzatá zwaŋa ni ra? » kaʼa.

²¹ Tahula tsa, ka hananaghatá Iliya ta ghəŋa tsa zwaŋ ya hkən səla, ka hga Yawe, kaʼa mantsa: « Yawe, Lazglafta ɗa, kdəkkdək, ka vram vra hafa na zwaŋ na! » kaʼa.

²² Ka tsuʼaftá Yawe ta ndəɓa dzva Iliya, ka vramtá hafa tsa zwaŋ ya, ka nzatá tsi nda hafu.

²³ Ka tsukwaftá Iliya ta tsa zwaŋ ya daga ma tsa dzuguvi ta ghəŋa həga ya, ka klagata ha da dzuguvi ma həga. Ka vlaŋtá ma ni, kaʼa mantsa: « Ngha ɓa! Nda hafu zwaŋa gha, » kaʼa.

²⁴ Ka tsa marakw ya nda Iliya mantsa: « Ndana tama, nda sna yu kazlay na, mnda Lazglafta ka kəʼa. Gwaɗa Yawe ta mnagapta ka ma wa gha guli ná, kahwathwata nzakwa ni, » kaʼa.