1Mgh 16 - Hdi

¹ Ka gwaɗganatá Yawe ta anabi Yehu, zwaŋa Hanani ta ghəŋa Baghsa, kaʼa na:

² « Tsagap ma gəninika haɗik yu ta kagha, ka faghatá yu ka mali ta ghəŋa mnduha ɗa la Israʼila. Ama kabga ksafta gha ta saɗa Yaruvgham, ka hlamtá ka ta mnduha ɗa la Israʼila da dmaku, ka ŋəriɗiftá ŋuɗuf nda dmakuha taŋ ya,

³ wana yu dzaʼa zaɗanatá Baghsa nda la ga taŋ tani. Dzaʼa niŋ na yu ta la ga ghuni ka guram nda ŋa la ga Yaruvgham zwaŋa Nəvat.

⁴ Dər wati ma mndu ga la Baghsa dzaʼa mtuta ma luwa ná, kriha dzaʼa zuta, ya dzaʼa mtuta ma vwah ya guli, zarakha dzaʼa zuta, » kaʼa.

⁵ Pɗakwa slnaha Baghsa, nda skwiha maga tsi, nda mbrakwa ga mghama ni tani ná, vivindam vivinda lu ma ɗelewera vinda slnaha mghamha la Israʼila.

⁶ Ka laghu Baghsa da dzidzíha ni, ka paɗamtá lu ma Tirtsa. Ka lam zwaŋa ni Ila da gá mgham ma vla ni.

⁷ Ama nda ma wa anabi Yehu, zwaŋa Hanani mnata Yawe ta gwaɗa ta ghəŋa Baghsa nda la ga taŋ tani, dabga inda ghwaɗaka skwiha maga tsi ta wa ira Yawe, ka ŋranaftá ŋuɗuf nda ma slnaha ni manda va ŋa la ga Yaruvgham, nda ya kabga vəl zaɗanata ni ta la ga Yaruvgham.

Gá mghama Ila ma Israʼila

⁸ Ta mahisambsak mkuʼ mida vakwa Asa ta ga mgham ta ghəŋa la Yuda, lama Ila, zwaŋa Baghsa, da ga mgham ta ghəŋa la Israʼila. His vakwa ni ta ga mgham ma Tirtsa.

⁹ Ka ganavatá kwalva ni Zimri, mali ta ghəŋa rita mwata plisha ni ta sidi ŋa dzata. Ma Tirtsa Ila ta ghuytá ghuyakwa ni ma həga ga Artsa, mali ta ghəŋa həga ga mgham ma Tirtsa.

¹⁰ Ta mahisambsak ndəfáŋ mida vakwa Asa ta ga mgham ta ghəŋa la Yuda, ka lam Zimri dzatá Ila, ka lam tsi da ga mgham ma vla ni.

¹¹ Na tsa lama ni da ga mgham, ka nzaftá tsi ta dughurukwa ga mgham ya, ka pslatá tsi ta inda la ga Baghsa, pɗana a ta zgun dər turtuk nda hafu, dər ya ka zba ni, dər ya ka graha ni wa.

¹² Ka zaɗanatá Zimri ta inda la ga Baghsa, taɓta gwaɗa Yawe ta mnuta ta ghəŋa ni nda ma wa anabi Yehu.

¹³ Magu maga tsa skwi ya dabga inda dmakuha ga i Baghsa nda zwaŋa ni Ila, ka hlamtá həŋ ta la Israʼila da magay, ka ganaftá həŋ ta ɓasa ŋuɗuf ta Yawe, Lazglafta la Israʼila, nda ma skwa wuyayha taŋ kul haɗ hayhaya taŋ ya.

¹⁴ Pɗakwa slnaha Ila, nda inda skwiha maga tsi tani ná, vivindam vivinda lu ma ɗelewera vinda slnaha mghamha la Israʼila.

Gá mghama Zimri ma Israʼila

¹⁵ Ta mahisambsak ndəfáŋ mida vakwa Asa ta ga mgham ta ghəŋa la Yuda, lama Zimri zatá fitik ndəfáŋ ta ga mgham ta ghəŋa la Israʼila ma Tirtsa. Ma tsa fitik ya fata la Israʼila ta ghuɓa taŋ ka tsamtá Gibtuŋ luwa ta nzakway ma dzva la Filisti nda vulu.

¹⁶ Snaŋta taŋ kazlay ganava ga Zimri ta sidi ta mgham ka dzata kəʼa, ka gi famtá inda la Israʼila ta Ghumri si ka mali ta ghəŋa bakwa gwal vulu ya, ka mghama la Israʼila baɗ va tsa fitik ya ma ghuɓu.

¹⁷ Ka sliʼaftá Ghumri kawadaga nda inda la Israʼila ma Gibtuŋ, ka tsamtá Tirtsa ŋa vulu.

¹⁸ Nghanata Zimri ta ŋafta lu ta luwa ná, ka laghu tsi shwet da dzuguvi ma matsaka huzlu ma həga gá mgham, ka fiŋtá tsi ta tsa həga ga mgham ya nda vu nda tsatsi nda tsatsi ka mtuta.

¹⁹ Dabga dmaku ga tsi nda ma maga ghwaɗaka skwi ta wa ira Yawe, nda ma klaftá saɗa Yaruvgham, nda ma vlaŋtá ghəŋa ni ŋa dmakuha ya maga Yaruvgham, nda ya nda ma hlamta ni ta la Israʼila da magay.

²⁰ Pɗakwa slnaha Zimri, nda ga sida ya gə tsi tani ná, vivindam vivinda lu ma ɗelewera vinda slnaha mghamha la Israʼila.

²¹ Ma tsa fitik ya, ka dgavaptá mnduha la Israʼila his gamndər: Rita mnduha ya ná, kumaŋ kuma hahəŋ ta nzakwa Tivni zwaŋa Ginat ka mgham, sana rita mnduha ya guli ná, Ghumri ŋa hahəŋ.

²² Ama malaghu mala gwal mista Ghumri ta gwal mista Tivni, zwaŋa Ginat. Ka mtutá Tivni, ka lam Ghumri da ga mgham.

Gá mghama Ghumri ma Israʼila

²³ Ta mahkən mbsak ndeŋ mida vakwa Asa ta ga mgham ta ghəŋa la Yuda, lama Ghumri da ga mgham ta ghəŋa la Israʼila. Ghwaŋpəɗ his vakwa ni ta ga mgham. Tahula guta ni ta mgham ma Tirtsa ka vaku mkuʼ,

²⁴ ka skwatá tsi ta kuɗuŋura Samari da Semer ka sulay dəmbuʼ mkuʼ (6.000). Ka babaftá tsi ta həgaha ta tsa kuɗuŋur ya, ka hgə tsi ta tsa luwa baf tsi ya ka Samari ŋa hava Semer, tsa mndu ta skwanaptá tsa kuɗuŋur ya.

²⁵ Ka mag Ghumri ta ghwaɗaka skwi ta wa ira Yawe, ka magatá tsi ta ghwaɗaka skwi ka malaghutá ŋa inda mghamha ta tiŋlaghutá tsatsi ya.

²⁶ Ka ksaftá tsi kahwathwata ta saɗa Yaruvgham, zwaŋa Nəvat, ka vlatá tsi ta ghəŋa ni ŋa maga dmakuha ya hlam tsa mndu ya ta la Israʼila da magay ya, ka ganaftá ɓasa ŋuɗuf ta Yawe, Lazglafta la Israʼila, nda ma tsa skwa wuyayha taŋ kul haɗ hayhaya taŋ ya.

²⁷ Pɗakwa slnaha Ghumri, nda skwiha maga tsi, nda mbrakwa ga mghama ni tani ná, vivindam vivinda lu ma ɗelewera vinda slnaha mghamha la Israʼila.

²⁸ Ka laghu Ghumri da dzidzíha ni, ka paɗamtá lu ma Samari. Ka lam zwaŋa ni Ahav da gá mgham ma vla ni.

Gá mghama Ahav ma Israʼila

²⁹ Ta mahkən mbsak tghas mida vakwa Asa ta ga mgham ta ghəŋa la Yuda, lama Ahav, zwaŋa Ghumri da ga mgham ta ghəŋa la Israʼila. Hisambsak his mida vakwa ni ta ga mgham ta ghəŋa la Israʼila ma Samari.

³⁰ Ka mag Ahav, zwaŋa Ghumri ta ghwaɗaka skwi ta wa ira Yawe, ka malaghutá piw ta ŋa inda mghamha ta tiŋlaghuta tsatsi.

³¹ Ta slaghu a tsa vlatá ghəŋ ŋa dmakuha Yaruvgham, zwaŋa Nəvat ya wu kəʼa, ka klaftá tsi ka marakw ta Izabel, makwa Itbaghal, mghama la Tsiduŋ, ka laghu tsi da maganatá slna ta Baghal, ka tsəlɓu tsi ta tsəlɓu ta kəma ni.

³² Ka banaftá tsi ta həga Baghal ma Samari, ka banaftá tsi ta gwira pla ghəŋ ta Baghal.

³³ Ka tsaftá Ahav guli ta skwa wuyay Asera. Nda ma slna ni, ka ganaftá tsi ta ɓasa ŋuɗuf ta Yawe, Lazglafta la Israʼila, ka malaghutá ŋa inda mghamha la Israʼila ta tiŋlaghutá tsatsi.

³⁴ Ta ŋa ni zamana, ka bəglaftá Hiʼel sana mnda la Betel ta Yeriku. Tahafta ni ta tughuha ni ya, ka mtutá zumala ni Aviram. Pghamta ni ta wa tghaha, ka mtutá zughva ni Seguv, taɓta gwaɗa Yawe ta mnata nda ma wa Yəhusuwa, zwaŋa Nuŋ.