1Mgh 15 - Hdi

Gá mghama Aviyam ma Yuda

¹ Ta maghwaŋpəɗ tghasa vakwa Yaruvgham, zwaŋa Nəvat ta gá mgham ta ghəŋa la Israʼila, lama Aviyam da gá mgham ta ghəŋa la Yuda.

² Hkən vakwa ni ta gá mgham ma Ursalima. Maghaha hga ma ni, makwa Avisalum.

³ Ka kɗaŋtá tsi ta maga inda dmaku ya si ga da ni ma kɗaku tsatsi. Ndiʼaf a ta vgha ni kahwathwata ta Yawe, Lazglafta ni, manda ya si maga dzidza ni, Dawuda wa.

⁴ Ama dabga Dawuda, ka vlaŋtá Yawe, Lazglafta ni ta zivir ma Ursalima ŋa gá mgham ma vla ni, yaha mndəra la mgham zwaɗuta, manda ya ta mtuta pitirla, ŋa nzakwa Ursalima nda diha ŋa ɗekɗek.

⁵ Maga maga Yawe manda tsaya kabga maga maga Dawuda ta skwi ya tɗukwa ta wa ira ni, mbəɗana a ta hul ta ya dər turtuk ma zlahuha ni ma nzakwa ni wu, ba skwi ya maga tsi nda Uriya mnda la Het yeya.

⁶ Ka gɗavatá vulu mataba i Rəhavgham nda Yaruvgham ma nzakwa Rəhavgham.

⁷ Pɗakwa slnaha Aviyam, nda inda skwi hɗam tsi ná, vivindam vivinda lu ma ɗelewera vinda slnaha mghamha la Yuda. Ka vulu Aviyam guli ta vulu nda Yaruvgham.

⁸ Ka laghu Aviyam da dzidzíha ni, ka paɗamtá lu ma luwa Dawuda. Ka lam zwaŋa ni Asa da gá mgham ma vla ni.

Gá mghama Asa ma Yuda

⁹ Ta mahisambsaka vakwa Yaruvgham ta ga mgham ta ghəŋa la Israʼila, lama Asa da ga mgham ta ghəŋa la Yuda.

¹⁰ Fwaɗ mbsak ndeŋ mida vakwa ni ta ga mgham ma Ursalima. Maghaha hga midza ni, makwa Avisalum.

¹¹ Ka mag Asa ta skwi tɗukwa ta wa ira Yawe, manda ŋa dzidza ni Dawuda.

¹² Ka hliŋtá tsi ta gwal ta ga karwa ma həga skwa wuyay ta haɗika ni, ka zaɗanatá tsi ta inda skwa wuyayha si tsatsaf dzidzíha ni.

¹³ Ka kliŋtá mgham Asa ta midza ni Maghaha markwa mgham ma nzakwa ni ka markwa mgham, kabga vəl magafta ni ta skwa wuyay Asera ta vla hula ŋa mndu. Ka hliŋtá Asa ta skwa wuyay ni, ka driŋta ta wa lika Kidruŋ.

¹⁴ Dər má ndiʼaf ndiʼa Asa ta vgha kahwathwata ta Yawe, ma nzakwa ni nda hafu, hlu a tsa vliha tskal tskala ya wa.

¹⁵ Ka hladaghatá tsi da həga Yawe ta skwiha si pghaghu da ni, nda ya pghaghu vərɗa tsatsi ŋa Yawe: Tsaya tsedi, nda dasu, nda huzlaha kavghakavgha.

¹⁶ Ka nzakw vulu mataba i Asa mghama la Yuda nda Baghsa, mghama la Israʼila, ma nzakwa taŋ.

¹⁷ Ka laf Baghsa mghama la Israʼila guk liŋtá la Yuda, ka ŋamtá tsi ta Rama ŋa pyaftá dər wa ta lami nda sabi ta kwakwara Asa, mghama la Yuda.

¹⁸ Ka hlagaptá Asa ta inda pɗakwa kfura tsedi, nda dasu ma dzuguva ɗifa skwi ma həga Yawe, nda skwa gadghəl ma həga ga mgham, ka pghanamtá kwalvaha ni ma dzvu. Tahula tsa, ka ghunaghatá tsi ta həŋ slanaghatá Benʼhadat, zwaŋa Tavrimuŋ, zigha Hezyuŋ, mghama la Aram ta nzakw ma Damas ya. Ka mgham Asa nda tsi mantsa:

¹⁹ « Dzraf u dzra ta wi, manda si nzakwa ni mataba i da gha nda da ɗa ya. Wya kfura tsedi nda dasu ta tsəghaghafta yu ka mbəhu. Skwi ta ɗaw yu da kagha na: La, ka dzaʼa ka da tsiŋtá tsa dzratá wi mataba gha nda Baghsa, mghama la Israʼila ya, ka zliɗiŋta həŋ ta haɗika ɗa, » kaʼa.

²⁰ Ka snanatá Benʼhadat ta mgham Asa, ka ghunaftá tsi ta maliha ta ghəŋa gwal vula ni liŋtá luwaha la Israʼila, ka zluʼatá tsi ta luwaha Ghiyuŋ, nda Daŋ, nda Avelbetʼmaghaka, nda inda kwakwara la Naftali nda haɗika Kineret tani.

²¹ Na tsa snaŋta Baghsa ta tsa gwaɗa ya, ka zlanatá tsi ta ŋaŋgəltá Rama, ka vraghatá tsi da nzata ma Tirtsa.

²² Mantsa tama, ka hgatá mgham Asa ta inda la Yuda, kul haɗ galaptá mndu. Ka hlaghatá həŋ ta palaha, nda udzuha si kəl Baghsa ka ŋamtá Rama nda tsi ya. Ka hlaftá tsi ŋa ŋamtá Gevagh ta kwakwara la Biŋyamiŋ nda Mitspa.

²³ Pɗakwa inda slna Asa, nda inda ŋavata ni, nda inda skwiha maga tsi, nda luwaha babaf tsi ná, vivindam vivinda lu ma ɗelewera vinda slnaha mghamha la Yuda. Ma halata ni, ka ksaftá ɗaŋwa ta səlaha.

²⁴ Ka laghu Asa da dzidzíha ni, ka paɗamtá lu ta vata dzidzíha ni ma luwa dzidza ni Dawuda. Ka lam zwaŋa ni Yəhusafat da gá mgham ma vla ni.

Gá mghama Nadav ma Israʼila

²⁵ Ta mahisa vakwa Asa ta ga mgham ta ghəŋa la Yuda, lama Nadav, zwaŋa Yaruvgham, da ga mgham ta ghəŋa la Israʼila. His vakwa ni ta ga mgham ta ghəŋa la Israʼila.

²⁶ Ka mag tsi ta ghwaɗaka skwi ta wa ira Yawe, ka ksaftá tsi ta saɗa da ni, nda ma vlata ni ta ghəŋa ni ŋa maga dmaku, ya si hlam da ni ta la Israʼila da magay.

²⁷ Ka ndanatá Baghsa, zwaŋa Ahiya, ma mndəra la Yisakar ta dzatá Nadav, ka dzatá tsi ma Gibtuŋ luwa ya ta nzakway ma dzva la Filisti, ma fitika tsamta i Nadav nda inda la Israʼila ta Gibtuŋ nda vulu.

²⁸ Ka dzatá Baghsa ta Nadav ta mahkəna vakwa Asa ta ga mgham ta ghəŋa la Yuda. Ka gə tsi ta mgham ma vla ni.

²⁹ Na tsa gi nzakwa ni ka mgham ya, ka pslatá tsi ta inda la ga Yaruvgham. Haɗ mndu pɗana tsi dər turtuk nda hafu wu, ka zaɗanatá tsi nekwnekw manda ya mna gwaɗa Yawe nda ma wa kwalva ni Ahiya mnda la Silu.

³⁰ Magu maga manda tsaya kabga ŋranafta Yaruvgham ta ŋuɗufa Yawe, Lazglafta la Israʼila nda dmakuha ni, nda ya nda hlamta hlam tsi ta la Israʼila da magay.

³¹ Pɗakwa slnaha Nadav, nda inda skwiha hɗam tsi ná, vivindam vivinda lu ma ɗelewera vinda slnaha mghamha la Israʼila.

³² Ka nzakw vulu mataba i Asa, mghama la Yuda, nda Baghsa, mghama la Israʼila ma nzakwa taŋ.

Gá mghama Baghsa ma Israʼila

³³ Ta mahkəna vakwa Asa ta ga mgham ta ghəŋa la Yuda, lama Baghsa, zwaŋa Ahiya, da ga mgham ta ghəŋa inda la Israʼila, ma Tirtsa. Hisambsak fwaɗ mida vakwa ni ta ga mgham.

³⁴ Ka mag tsi ta ghwaɗaka skwi ta wa ira Yawe, ka ksaftá tsi ta saɗa Yaruvgham nda ma vlata ni ta ghəŋa ni ŋa maga dmakuha, nda ya nda hlamta hlam tsi ta la Israʼila da magay.