1Mgh 14 - Hdi

Gwaɗa Ahiya ta ghəŋa la ga Yaruvgham

¹ Ma tsa fitik ya, ka zləmbanatá ɗaŋwa ta Aviya, zwaŋa Yaruvgham.

² Ka Yaruvgham nda markwa taŋ tama mantsa: « Sliʼaf sliʼa ka slahwafta ka ta vgha ŋa kwala mnduha tsəmaftá kagha kazlay na markwa ini ka kəʼa, ka dzaʼa ka da Silu ma vli hada anabi Ahiya. Tsatsi ta mnihata kazlay na dzaʼa nzakway ka ka mghama na mnduha na kəʼa.

³ Hlaf hla ma dzvu ta buradiha ghwaŋ, nda gatuha, nda kuluŋa zuɗum, ka dzaʼa ka slanaghata, dzaʼa mnagha mna ta skwi dzaʼa slanaghatá na zwaŋ na, » kaʼa.

⁴ Ka magatá markwa Yaruvgham manda tsaya. Ka sliʼaftá tsi ka laghwi da Silu, ka lam tsi da həga ga Ahiya. Tsaw nghəgla a Ahiya ta vli wu, nda razla iri ni dabga halaku.

⁵ Ama tiŋlaghu tiŋla Yawe ta mnanatá Ahiya kazlay na: « Wya markwa Yaruvgham ta sagha ŋa ɗawa gwaɗa da kagha ta ghəŋa zwaŋa ni kul ɗughwanaku. Ka mnanata ka ta skwi mna gha yu ŋa mnanata. Ma ɓhagaghata ni, dzaʼa nza nza manda sana mndu tskəm, » kaʼa.

⁶ Na snaŋta Ahiya ta ghudzagata səla ni ta lagha tsi ta wa tgha, kaʼa mantsa: « Sam sa gha, markwa Yaruvgham! Kabgawu dzaʼa kəl ka ka nzata manda sana mndu tskəm na? Mniha mna lu ta gwaɗa ɗukɗukwa ŋa mnaghata.

⁷ La da mnanatá Yaruvgham: “Wya skwi mna Yawe, Lazglafta la Israʼila: Ŋlaghaf ŋla yu mataba mnduha, fa fa yu ta kagha ka mghama mnduha ɗa la Israʼila.

⁸ Zluʼaghu zluʼa yu ta ga mgham da la Dawuda, ka vlaghata. Aŋ mnda ni, klaf a ka ta saɗa kwalva ɗa Dawuda, si ta ŋanatá zlahuha ɗa, ka mbaɗa mista ɗa nda hya hya ŋuɗufa ni wu, ta ghəŋa skwi tɗukwa yeya ta mag tsi ta wa ira ɗa.

⁹ Maga maga kagha ta ghwaɗaka skwi ka malaghutá ŋa inda gwal ta tiŋlaghutá kagha. Laghu la ka da tsatsaftá sanlaha ma lazglaftaha, nda skwiha ŋa wuyay dgum dguma ka kfur nwap lu nda nwa, ŋa giɗiftá ɓasa ŋuɗuf, ka wuɗiɗtá ka.

¹⁰ Tsaya dzaʼa kəl yu ka kladaghatá zləmnda da la ga Yaruvgham, dzaʼa rwiŋ rwa yu ta inda zgwana ga ghuni ma Israʼila, dər vuʼa tsi, dər mndu nda pla vgha ni a tsi. Dzaʼa zaɗana zaɗa yu nekwnekw ta la ga ghuni manda ya ta nekwafta lu ta ŋəɗak ha ŋa kwal kul nghəglaŋta ya.

¹¹ Dər wati ma mndu ga la Yaruvgham dzaʼa mtuta ma luwa ná, kriha dzaʼa zuta, ya dzaʼa mtuta ma vwah ya guli, gugzlumha dzaʼa zuta. Mantsa nzakwa ni, Yawe ta mnata,” » kaʼa.

¹² Ka Ahiya nda tsa marakw ya mantsa: « Sliʼaf sliʼa kagha ka vra ka dzagha gha. Na dəmbekw ka səla gha ŋlamta ma luwa ya, dzaʼa mtu mta tsa zwaŋa gha ya.

¹³ Dzaʼa tawam tawa inda la Israʼila, dzaʼa paɗam paɗa lu. Mantsa nzakwa ni, tsatsi turtuktuk mataba la ga Yaruvgham dzaʼa lu paɗamta ma kulu, kabga tsatsi yeya mataba la ga taŋ mutsaf lu ta skwi ɗina da tsi ta kəma Yawe, Lazglafta la Israʼila.

¹⁴ Dzaʼa zlaganap zlaga Yawe ta ŋa ni mgham ta ghəŋa la Israʼila dzaʼa zaɗanatá la ga Yaruvgham. Dzaʼa sagha sa tsa fitik ya. Tsaya a na skwi ta magaku ndanana tama ra?

¹⁵ Dzaʼa zlghuŋ zlgha Yawe ta la Israʼila ŋa nzakwa ni manda gagaɗak ta gigiɗaku ma imi. Dzaʼa rtiŋ rta ta la Israʼila ta tsa ɗinakwa haɗik si vlaŋ tsi ta dzidzíha taŋ ya, ka wutsiŋta ni ta həŋ ta sana ɓla zala Yufratis, kabga gufanafta taŋ ta ŋuɗuf ta Yawe nda ma tsatsafta taŋ ta skwa wuyay Asera.

¹⁶ Dzaʼa zlanava zla Yawe ta la Israʼila dabga dmakuha maga Yaruvgham, nda ya dabga hlamta ni ta la Israʼila dida, » kaʼa.

¹⁷ Ka sliʼaftá markwa Yaruvgham, ka vraghata da Tirtsa. Ma fitika fata ni ta səla dəmbakw ta wa tgha həga ga taŋ ya, say saba hafu ma tsa zwaŋ ya tsa.

¹⁸ Ka paɗamtá lu, ka tawamtá inda la Israʼila taɓta gwaɗa ya mna Yawe nda ma wa kwalva ni anabi Ahiya.

¹⁹ Pɗakwa slnaha Yaruvgham, nda ya kəʼa si ta vulu, nda ya kəʼa si ta ga mgham ná, vivindam vivinda lu ma ɗelewera vinda slnaha mghamha la Israʼila.

²⁰ Hisambsak his mida vakwa Yaruvgham ta ga mgham, ka laghu tsi da dzidzíha ni. Ka lam zwaŋa ni Nadav da gá mgham ma vla ni.

Gá mghama Rəhavgham ma Yuda

²¹ Ma Yuda, ta ga Rəhavgham, zwaŋa Salumuŋ ta mgham. Fwaɗ mbsak ndeŋ mida ima Rəhavgham ta nzatá tsi ka mgham. Ghwaŋpəɗ ndəfáŋ vakwa ni ta gá mgham ma Ursalima, luwa ya zbap Yawe mataba inda mndəra la Israʼila ŋa nzakwa hga ni. Naghama hga ma ni ma Rəhavgham, makwa la Ghamuŋ ya.

²² Ka magatá la Yuda ta ghwaɗaka skwi ta wa ira Yawe. Ka zlurgwaftá həŋ ta draku ma ŋuɗufa ni, nda ma tsa dmaku ga həŋ ya ka malaghutá ŋa dzidzíha taŋ ta magata.

²³ Ka babaftá hahəŋ guli ta vliha tskal tskala. Ka dzagwatá palaha nda skwa wuyay Asera ta inda kuɗuŋurha tskal tskala, nda ya mista inda fuha lbuk lbukwa.

²⁴ Mamu gwal ma tsa haɗik ya guli ta vlatá ghəŋa taŋ ŋa ga karwa ma həga skwa wuyayha. Ka mag mnduha ta inda manzakɗawayha mndəra mnduha ya ghazliŋ Yawe ta kəma la Israʼila.

²⁵ Ta mahutafa vakwa Rəhavgham ta gá mgham, ka laf Sisak, mghama Masar guk liŋtá luwa Ursalima nda vulu.

²⁶ Ka hlaghatá tsi ta skwa gadghəl ma həga Yawe, nda ya ma həga ga mgham. Ka hlaghatá tsi nekwnekw. Ka hlaghatá tsi ta inda zalamha ka dasu ka dasu ya si mamagaf Salumuŋ.

²⁷ Ka magaftá mgham Rəhavgham da vla taŋ ta zalamha ka ghuva tili, ka pghanamta ma dzvu ta maliha ta ghəŋa gwal ngha wi tgha həga ga mgham.

²⁸ Inda fitika lagha mgham da həga Yawe ya, hlafta tsa gwal nghapta ya ta tsa zalamha ya, tahula tsa ŋa hladamta taŋ da dzuguva gwal ta nghapta.

²⁹ Pɗakwa slnaha Rəhavgham, nda inda skwi hɗam tsi ná, vivindam vivinda lu ma ɗelewera vinda slnaha mghamha la Yuda.

³⁰ Ka gɗavatá vulu mataba i Rəhavgham nda Yaruvgham.

³¹ Ka laghu Rəhavgham da dzidzíha ni, ka paɗamtá lu ta vata dzidzíha ni ma luwa Dawuda. Naghama hga ma ni, makwa la Ghamuŋ. Ka lam zwaŋa ni Aviyam da gá mgham ma vla ni.