1Mgh 11 - Hdi

Miʼa Salumuŋ nda skwa wuyayha taŋ

¹ Ka ɗvutá mgham Salumuŋ ta ndəghata kwagha mayəm zlanaha lu ta makwa Firʼawna, ka hlaftá tsi ta kwagha la Muwav, nda la Ghamuŋ, nda la Idum, nda la Tsiduŋ, nda la Het.

² Nda nza həŋ ka ɓuzula la mayəm ya mnə Yawe ŋa la Israʼila kazlay na: « Yaha kuni da ndiʼa vgha nda həŋ, yaha hahəŋ guli da ndiʼa vgha nda kaghuni kəʼa ya həŋ. Ka mantsa a tsi wu, dzaʼa mbəɗiŋ mbəɗa həŋ ta ŋuɗufa ghuni ŋa famta taŋ ta kaghuni da tsəlɓu ŋa lazglaftaha taŋ, » kaʼa. Tsaw ta kwagha tsa mnduha ya ndiʼafta Salumuŋ ta vgha, tɗagha ɗvu.

³ Ndəfáŋ dərmək (700) miʼi hlaf mgham, nda miʼaha hkən dərmək (300) ka miʼa sanagha, ka mbəɗiŋtá tsa miʼaha ya ta ŋuɗufa ni.

⁴ Ma fitika haluta Salumuŋ, ka mbəɗiŋtá tsa miʼaha ya ta ŋuɗufa ni təv sanlaha ma lazglaftaha, fəglana a tɗukwa ta hya hya ŋuɗufa ni ta Yawe, Lazglafta ni, manda ŋa da ni Dawuda wa.

⁵ Ka laghu Salumuŋ mista Ghasturet, lazglafta la Tsiduŋ, nda Milkum, manzakɗawaya lazglafta la Ghamuŋ.

⁶ Ka mag Salumuŋ ta ghwaɗaka skwi ta wa ira Yawe, nzəglaf a tevzel ta Yawe, manda ŋa da ni Dawuda wa.

⁷ Ma tsa fitik ya, ka baftá Salumuŋ ta kuɗuŋur dagala təv safa fitik ma Ursalima, ta vli tskala ŋa Kəmus, manzakɗawaya lazglafta la Muwav, nda ŋa Mulek, manzakɗaway lazglafta la Ghamuŋ.

⁸ Ka mag tsi manda tsaya ŋa inda tsa miʼa ni ka mayəm ya, ŋa laviŋta taŋ ta dra urdi, nda pla ghəŋ ŋa lazglaftaha taŋ.

⁹ Ka gufaftá ŋuɗufa Yawe katakata ta ghəŋa Salumuŋ, kabga mbəɗaghuta ni ta ŋuɗufa ni, ka zlanatá Yawe, Lazglafta la Israʼila, ta zlagapta his səla da tsi ya.

¹⁰ Si mnanaf mna ta gwaɗa ta ghəŋa ni, ka pyafta ta ndiʼa vgha nda sanlaha ma lazglaftaha, ama ka kwalaghutá Salumuŋ ta snatá tsa skwi mnanaf Yawe ya.

¹¹ Ka Yawe nda Salumuŋ tama mantsa: « Ka si mantsa magata ka, sna a ka ta dzratá wa ɗa, nda zlahuha mnaghaf yu ya wu, dzaʼa zluʼaghu zluʼa yu ta ga mgham da kagha, dzaʼa vlaŋtá kwalva gha yu.

¹² Nziya nza tsi, dabga da gha Dawuda, haɗ yu dzaʼa klaghutá na ga mgham na ma fitika nzakwa gha ta nda hafu wu, ama da zwaŋa gha dzaʼa zluʼaghuta yu ta ga mgham.

¹³ Haɗ yu dzaʼa zluʼaghutá inda ga mghama ni guli wu, dzaʼa zlanaŋ zla yu ta mndəra mndu turtuk, dabga kwalva ɗa Dawuda, nda ya dabga Ursalima luwa ya zbap yu, » kaʼa.

Ghumaha Salumuŋ

¹⁴ Ka zlaganaptá Yawe ta ghuma ŋa Salumuŋ: Tsaya Hadat, mnda la Idum, mataba zivira mgham Idum.

¹⁵ Ghalya ta fitika zata Dawuda ta ghwa ta ghəŋa la Idum, ka laf Yuʼav mala gwal vulu da papaɗamtá mbliha la Israʼila. Tahula tsa, ka pslatá tsi ta inda zgwana ma Idum.

¹⁶ Ka nzatá tsi ka tili mkuʼ ma Idum kawadaga nda inda la Israʼila, ha ka zaɗanata ni ta inda zgwana ma Idum.

¹⁷ Ma tsa fitik ya, ta ka zwaŋa galaɓay na Hadat, ka pərɗaftá tsi ta hwayaghuta da Masar kawadaga nda sanlaha ma la Idum kwalvaha da ni.

¹⁸ Ka sliʼaftá həŋ ma kwakwara la Midyaŋ ka taghatá mtaka Paraŋ. Ka hlaghatá həŋ ta sanlaha ma la Paraŋ mista taŋ, ka ɓhadaghatá həŋ da Masar, da Firʼawna, mghama Masar. Ka vlaŋtá tsaya ta həga ta Hadat, vlaŋha ta skwa zay, tsanafha ta haɗik guli.

¹⁹ Ka mutsaftá Hadat ta zɗakatahuɗi katakata da Firʼawna, ha ka vlaŋtá tsi ka marakw ta mesa ni, makuma ni ma markwa həga ni Tahpənes, markwa mgham.

²⁰ Ka yanatá tsa makuma ni ma Tahpənes ya ta zwaŋa zgun ta Hadat, ka tsanaftá tsi ta hga ni ka Genuvat. Ka glanaftá Tahpənes ma huɗa həga ga Firʼawna kawadaga nda zwana mgham.

²¹ Snaŋta Hadat ma Masar kazlay na laghu la Dawuda da dzidzíha ni, nda mta Yuʼav mala gwal vulu guli kəʼa, ka ɗawaŋtá tsi da Firʼawna: « Zliha zla ka dzaʼa yu ta haɗika ɗa, » kaʼa.

²² Ka Firʼawna nda tsi mantsa: « Nahgani ya ta htəgudughusta da iʼi, kəl ka ka zba dzaʼa ta haɗika gha na? » kaʼa. Kaʼa zlghaftá wi mantsa: « Haɗ skwi wu, ama vliha vla ta tvi ka dzaʼa yu, » kaʼa.

²³ Ka zlaganaptá Lazglafta ta sana ghuma ŋa Salumuŋ. Tsaya Rəzuŋ, zwaŋa Ilyada, si ta hwayapta ga daŋahəga ni Hadadghezer, mghama Tsuva ya.

²⁴ Ma fitika zaɗanata Dawuda ta bakwa gwal vula Hadadghezer, ka tskanatá Rəzuŋ ta gwal badza vli ta vata ni, ka nzakw tsatsi ka mala taŋ. Ka laghu həŋ da Damas, ka nzatá həŋ hada, ka famtá lu ka mgham.

²⁵ Ka nzakw Rəzuŋ ka ghuma la Israʼila ma inda fitika ga mghama Salumuŋ ta ta ghəŋa ghwaɗaka skwi maga Hadat. Ka gə Rəzuŋ ta mgham ta ghəŋa la Aram, ka husaŋtá la Israʼila.

Sliʼavafta Yaruvgham ta ghəŋa Salumuŋ

²⁶ Mamu sana mndu ta sliʼavaftá ta ghəŋa mgham, Yaruvgham zwaŋa Nəvat mnda la Ifrata ma Tsereda ya, si ka kwalva Salumuŋ. Sana markwa wadgu ta hgə lu ka Tserugha ma ni.

²⁷ Wya kəʼa magaku kəl tsi ka sliʼavafta ta ghəŋa mgham: Ta dzay dzay Salumuŋ ta ghərzla ta hgə lu ka Milu, ta nuʼa ghurum ta matsaka luwa Dawuda, da ni.

²⁸ Tsa Yaruvgham ya, sana duhwal ya warakrak, nda mbra guli. Ka nghanatá Salumuŋ kəʼa ta maga slna ni, ka vlaŋtá tsi ta slna nghapta ka inda slnaha mbraku mbraku ta mag mnduha ta sab ma mndəra la Yusufu.

²⁹ Ma tsa fitik ya, ka sab Yaruvgham ma Ursalima, ka gumatá tsi ta tvi nda anabi Ahiya mnda la Silu, nda suɗatá lfiɗa sɗakw ta vgha ni. Hista taŋ həŋ ta hula luwa.

³⁰ Ka ŋanatá Ahiya ta tsa lfiɗa sɗakw ta vgha ni ya, ka kwahanapta ghwaŋpəɗ his.

³¹ Kaʼa nda Yaruvgham mantsa: « Hlaʼa hla ta pehuha na sɗakw na ghwaŋ ŋa gha! Wya ka Yawe, Lazglafta la Israʼila mnata: Kura kura yu ta zluʼaghutá ga mgham ma dzva Salumuŋ, ka pghaghamta ma dzvu ta mndəra mnduha ghwaŋ.

³² Ama mndəra mndu turtuktuk dzaʼa pɗata da tsi dabga kwalva ɗa Dawuda nda Ursalima, luwa ya zbap yu mataba mndəra la Israʼila demdem.

³³ Dzaʼa maga maga manda tsaya, kabga zlaɗivata la Israʼila, ka laghwi da tsəlɓu ŋa Ghasturet, lazglafta la Tsiduŋ, nda ya ta kəma Kəmus, lazglafta la Muwav, nda ya ta kəma Milkum, lazglafta la Ghamuŋ. Ksaf a həŋ ta tviha ya mnana yu ta həŋ manda ya maga Dawuda, da ni ma Salumuŋ wa. Maga a həŋ ta skwi ya tɗukwa nghadap yu wu, kwalaghu kwala həŋ ta snatá skwi ya ta raku mnaf yu, nda zlahuha ɗa.

³⁴ Haɗ yu dzaʼa klaghuta da Salumuŋ ta ga mgham demdem wa. Dzaʼa zlana zla yu ka mali ma nzakwa ni nda hafu, dabga kwalva ɗa Dawuda, zbap yu ta ŋanatá zlahuha ɗa nda skwiha ya mnaf yu ya.

³⁵ Nziya nza tsi, dzaʼa klaghu kla yu ma dzva zwaŋa Salumuŋ ta mndəra mnduha ghwaŋ ta gə tsi ta mgham ta ghəŋa taŋ, ka vlaghata ma dzva gha.

³⁶ Dzaʼa zlanaŋ zla yu ta mndəra mndu turtuk ta zwaŋa Salumuŋ, kada gɗavata pitirla kwalva ɗa Dawuda ta kəma ɗa ma Ursalima, luwa ya zbap yu ŋa nzakwa hga ɗa.

³⁷ Dzaʼa klaf kla yu ta kagha Yaruvgham, ŋa gay gha ta mgham ta ghəŋa inda kwakwar ya dzaʼa kumaŋta ka, ŋa nzakwa gha ka mgham ta ghəŋa la Israʼila.

³⁸ Ka sna sna ka ta inda skwi dzaʼa mnaghafta yu, ka ta ksay ka ta tviha ya nghadap yu tɗukwa, nda ma ŋanata gha ta skwiha ta raku, nda zlahuha ɗa, manda ya maga kwalva ɗa Dawuda, dzaʼa nza nza yu kawadaga nda kagha. Dzaʼa vlagha vla yu ta həga ga mgham nda diha, manda ya maga yu ŋa Dawuda, dzaʼa fagham fa yu ma dzvu ta la Israʼila.

³⁹ Dzaʼa ŋursagana ŋursa yu ta zivira Dawuda dabga dmakwa taŋ, ama ŋa ɗekɗek a wu, » kaʼa.

⁴⁰ Tahula tsa, ka zbə Salumuŋ ta dzatá Yaruvgham, ama ka sliʼafta Yaruvgham ka hwayaghutá da Masar ɗifaghuta ga Sisak, mghama Masar. Ka nzatá tsi hada ha ka mtatá Salumuŋ.

Mtakwa Salumuŋ

⁴¹ Pɗakwa slnaha Salumuŋ, nda inda skwiha maga tsi, nda ɗifila ni tani ná, vivindam ma ɗelewera slnaha Salumuŋ lu.

⁴² Fwaɗ mbsak vaku maga Salumuŋ ta gá mgham ma Ursalima ta ghəŋa inda la Israʼila.

⁴³ Tahula tsa, ka laghu Salumuŋ da dzidzíha ni, ka paɗamtá lu ma luwa da ni Dawuda. Ka lam zwaŋa ni Rəhavgham da gá mgham ma vla ni.