1Mgh 10 - Hdi

Lagha marakw ka mgham ma Seva da Salumuŋ

¹ Ka snaŋtá sana marakw ka mgham ta haɗika Seva ta gwaɗa ta laghwa hga Salumuŋ da zərwa katakata nda zɗakatahuɗa Yawe, ka lagha tsi da dzəghaŋta nda ɗawayha nda bla nda bla.

² Ka ɓhadaghatá tsi da Ursalima nda ndəghatá gwal ta pghay, nda ŋalibwaha ta hla urdiha ŋa dray nda dra, nda dasu dagala katakata, nda palaha nda bla nda bla dzva ni. Ɓhadaghata ni da Salumuŋ, ka mnanaŋtá tsi ta inda skwiha ma ŋuɗufa ni.

³ Ka zlaghanaftá Salumuŋ ta wa inda skwi ɗawaŋ tsi. Haɗ skwi ya nda bla trap mgham ta zlghanaftá wa ni wa.

⁴ Ka nghanatá tsa marakw ka mgham ma Seva ya ta inda ɗifila Salumuŋ, nda tsa həga baf tsi ya,

⁵ nda skwa zay ta kuwata ɗafa ni, nda həgaha kwalvaha ni, nda tva paya slna taŋ, nda mndərga lgutha taŋ, nda gwal ga lghu, nda skwa pla ghəŋ ŋa dray tsuh tsuh ta vlə tsi ma həga Yawe. Ka faftá tsi ta dzvu ta wi ndakrawa.

⁶ Kaʼa nda mgham tama mantsa: « A va kahwathwata tsa skwiha snaŋ yu ta mnay ma haɗika ɗa ta ghəŋa gwaɗaha gha nda ya ta ghəŋa ɗifila gha ya katək!

⁷ Zlghaf a yu sizlay ta tsa gwaɗaha ya ta kul sagha yu wu, ka nghaŋta yu nda ira ɗa. Rusaɗif a lu ta dər rita ni wa! Malaghu mala ɗifila gha, nda gadghəla gha ta inda skwi ya snaŋ yu ta gwaɗay.

⁸ Zɗakwa həga ŋa inda mnduha gha, nda gwal ta magaghatá slna, ta sna ɗifila gha inda fitik həŋ.

⁹ Rfu da Yawe, Lazglafta gha, zɗəgana ka, ka faghaftá tsi ta dughurukwa gá mghama la Israʼila! Dabga ɗvuta ni ŋa kɗekedzeŋ ta la Israʼila, kəl Yawe ka faftá kagha ka mgham ŋa tsay gha ta guma nda rakwa ni, tɗukwa, » kaʼa.

¹⁰ Ka vlaŋtá tsa marakw ka mgham ya ta mgham Salumuŋ ta dasu ta malaghutá kiluʼ dəmbuʼ fwaɗ (4.000), nda urdiha dagala katakata, mantsa ya palaha nda bla nda bla dzva ni. Haɗ mndu ta walaŋtá kləgəldaghatá urdiha ŋa dray nda dra ta malaghutá ŋa tsa marakw ka mgham ma Seva ta vlaŋtá mgham Salumuŋ ya wa.

¹¹ Tsa kwambaluha Hiram si ta hladaghatá dasu daga ma Ufir ya, ta hladaghata guli ta udza saŋtal dagala katakata, nda palaha nda bla nda bla dzva ni.

¹² Nda tsa udza saŋtal ya rkamta lu ta rka ma həga Yawe, nda ya ma həga ga mgham, mantsa ya kəzliŋkəzliŋha nda htimbilha ŋa gwal falaha. Hləglagagha a lu ta udza saŋtal dagala manda tsaya wu, nghəgliŋ a lu ɗekɗek ha gita wa.

¹³ Ka vlaŋtá mgham Salumuŋ ta tsa marakw ka mgham ma Seva ya ta inda skwi kumaŋ tsi, ɗawaŋ tsi. Ka vlanaghatá tsi ta mbəhuha ta raŋtá mamgham mgham manda tsatsi. Tahula tsa, ka vraghatá tsi ka laghwi ta haɗika ni, nda kwalvaha ni.

Gadghəla Salumuŋ nda ɗifila ni

¹⁴ Ta magay ndəgakwa dasu ta kiluʼ dəmbuʼ hisambsak hkən mida (23.000) ta lagha da Salumuŋ inda vaku,

¹⁵ zlanaha lu ta ya ta hladaghata gwal wawaku, nda gwal tsakala, nda inda mghamha la Arap, nda guvnaha ta tsa haɗik ya.

¹⁶ Ka magaftá mgham Salumuŋ ta zalamha dagala dagala his dərmək (200) ka dasu ka dasu pəslap lu nda pəsla. Ka maga ya turtuk ná, kiluʼa dasu ndəfáŋ klaf lu.

¹⁷ Ka magaftá tsi guli ta zwana zalamha hkən dərmək (300) ka dasu pəslap lu nda pəsla. Ka maga ya turtuk ná, kiluʼ nda rita klaf lu. Ka pghamtá mgham ma həga ta hgə lu ka Həga fuha Ləvanuŋ.

¹⁸ Ka magaftá mgham ta dughurukwa gá mgham dagala guli nda sliʼiŋa gwiʼaŋ, ka zlərɓaftá tsi ta dasu ghenen tida.

¹⁹ Mkuʼ madzəɓara tva ŋlu ta tsa dughuruk ya, hdəwər vla diɗa hula ni nda təv hul. Mamu vla fa dzvuha ta slərpuha vla nzaku, ka tsatsatá lu ta fwatuha rveriha his ta sladu ndusa nda tsa vla fa dzvuha ya.

²⁰ Mamu tsatsatá fwatuha rveriha ghwaŋpəɗ his ta tsa maɗgweraha ni mkuʼ ya, mkuʼ nda ga zlaɓa, mkuʼ nda ga zeghwi. Haɗ skwi ta kəɗ magafta lu manda tsaya dər ma wati ma luwa ta gə lu ta mgham wa.

²¹ Inda leghwaha mgham Salumuŋ ná, ka dasu ka dasu nzakwa taŋ, inda huzla maga slna ma həga ta hgə lu ka Həga fuha Ləvanuŋ guli ná, ka dasu ghenen həŋ. Haɗ ya ka kfura tsedi wu, kabga ta fitika mgham Salumuŋ, kfura tsedi ná, ka kfur kul haɗ sgita ni ya nzakwa ni.

²² Kəl tsi ka nzakway mantsa ná, mamu kwambaluha mgham kawadaga nda kwambaluha Hiram ŋa tsakala. Inda vaku hkən ta vragaghata həŋ nda ndaghatá həŋ nda dasu, nda kfura tsedi, nda sliʼiŋa gwiʼaŋ, nda vdziha, nda zarakha mgham.

²³ Ka fikaghuta mgham Salumuŋ ta ghəŋa inda mghamha ta ghəŋa haɗik, ka galipi katakata nda ya nda ɗifil.

²⁴ Ka zbə inda mnduha ta ghəŋa haɗik ta guyata nda Salumuŋ ŋa nzata ka sna tsa ɗifil vlaŋ Lazglafta ya.

²⁵ Inda tsa mnduha ya ta lagha da nghanaghata ka kladanaghatá mbəhuha taŋ: Ka skwiha ka kfura tsedi, nda dasu, nda lgutha, nda huzla vulu, nda urdiha ŋa dray nda dra, nda plisha, nda plisha ghwandala. Mantsa ya kəʼa ta magaku inda vaku.

²⁶ Ka tskanatá Salumuŋ ta mwata plisha dəmbuʼ nda fwaɗ dərmək (1.400), nda gwal ŋla plis dəmbuʼ ghwaŋpəɗ his (12.000). Ka paghatá tsi ta həŋ ma luwaha ta pghə tsi ta mwata plisha ni, nda ya ma Ursalima ndusa nda vla nzakwa mgham.

²⁷ Ka nanaftá mgham ta kfura tsedi guli ma Ursalima manda ndəghata dzir, nda udzuha sedra manda ndəghata ghurafa sla ta ɗayaku ta kuɗuŋurha.

²⁸ Ma Masar nda ya ma Keve ta tsakalakta Salumuŋ ta plisha ni. Gwal ta tsakala ŋa mgham ta dzawakta ma Keve taɓta tsedi ta tsanafta lu ta həŋ.

²⁹ Mwata plis turtuk ta skwagafta lu ma Masar ná, sulay mkuʼ dərmək (600) dzva ni, plis turtuk guli, sulay dərmək nda hutaf mbsak (150) dzva ni. Manda va tsaya ta hlagapta həŋ ŋa inda mghamha la Het, nda mghamha la Aram.