1Mgh 1 - Hdi

Zbanaktá makwata ghuva ta Dawuda

¹ Haluhala mgham Dawuda, lula ima ni. Ka buku lu ma lgut, kulam nda tsa, haɗ ta vlaŋtá hurfuk wa.

² Ka kwalvaha ni nda tsi mantsa: « Ka zbaghak zba ŋni ta daghala makwa ta kul snaŋtá zgun, a rveri, mghama ɗa. Ka maganata tsi ta slna ta mgham, ŋa nghapta ni, ŋa hananavata ni ta slərpu ŋa vlaŋtá hurfuk ta rveri mghama ɗa, » ka həŋ.

³ Ka zbə həŋ ta inda kwakwara la Israʼila ta daghala makwa ɗina, ka mutsaftá həŋ ta Avisag makwa la Sunem. Ka klanaktá həŋ ta mgham.

⁴ Tsa makwa ya ná, ɗinu ɗina katakata. Ka nghaptá tsi ka mgham, ka mag tsi ta slna ŋa ni. Nziya nza tsi ná, ksaŋ a mgham wa.

Zbay Aduniya ta zluʼa gá mgham

⁵ Ka ghərɓu Aduniya ta ghərɓaku, zwaŋ ya yana Hagit ta Dawuda, kaʼa mantsa: « Iʼi dzaʼa nzakway ka mgham » kaʼa. Ka hlaghutá tsi ta mwata plisha nda plisha, nda bakwa mnduha hutaf mbsak ta hwaya ta kəma ni.

⁶ Ka yawu nzakwa Aduniya, ta dvanagha a da ni ɗekɗek kazlay na: « Kabgawu ta kəl ka ka magay mantsa na? » kəʼa wa. Tahula yatá Avsalum yata lu ta tsatsi, ɗinu ɗina katakata.

⁷ Ka dzərku Aduniya ta dzərku nda Yuʼav zwaŋa Tseruya, nda ya nda Aviyatar mnda dra skwi ŋa Lazglafta, ka tsuʼaftá həŋ ta sləha hula ni.

⁸ Ama haɗ Tsaduk mnda dra skwi ŋa Lazglafta, nda Benaya, zwaŋa Yəhuyada, nda anabi Nataŋ, nda Simghi, nda Reghi, nda gwal bikwira vula Dawuda mista Aduniya wa.

⁹ Ka vlatá Aduniya ta skwa pla ghəŋ nda rina fisik, nda slaha, nda mamakwa slaha nda uwasla nda uwasla, ndusa nda pala Zuhelet ta vata Gheŋʼrugel. Ka hagaftá tsi ta inda zwana ma ni, zwana mgham, nda inda mnduha la Yuda ka kwalvaha mgham.

¹⁰ Ama hgaŋ a ta anabi Nataŋ, dər Benaya, dər gwal bikwira vula Dawuda, dər zwaŋama ni Salumuŋ wa.

Gwaɗa i Nataŋ nda Batʼseva ta kəma Dawuda

¹¹ Ka Nataŋ nda Batʼseva, ma ni ma Salumuŋ mantsa: « Sna a kagha kazlay na, nuna Aduniya zwaŋa Hagit ka mgham kul snaŋtá rvera mu Dawuda kəʼa ra?

¹² Kdəkkdək, ndanana ka vlagha vla yu ta hiɗaku, kada katapta ka ta hafa gha nda ŋa zwaŋa gha Salumuŋ.

¹³ La da mgham Dawuda, ka ka dazlay nda tsi na: “Kagha rveri, mghama ɗa a ta waɗihata iʼi kurɗa gha kazlay na: Zwaŋa ɗa Salumuŋ dzaʼa ga mgham tahula gha, tsatsi dzaʼa nzafta ta dughurukwa ga mghama gha kəʼa kay ra? Kabgawu kəl Aduniya ka nuta ka mgham na?” ka ka dzaʼazlay.

¹⁴ Ma tsa fitik ta ta tsa gwaɗa ya kagha nda mgham ya, dzaʼa lam la iʼi guli ŋa ŋlanaghata ɗa ta tsa gwaɗa gha ya, » kaʼa.

¹⁵ Ka sliʼaftá Batʼseva ka lam da mgham, ma dzuguva ni. Haluhala mgham katakata, Avisag makwa la Sunem ta maganatá slna.

¹⁶ Ka dzatá Batʼseva ta ghəŋ, ka tsəlɓata ta kəma mgham, ka mgham nda tsi mantsa: « Nu ta kum ka na? » kaʼa.

¹⁷ Ka tsa marakw ya nda tsi mantsa: « Rvera ɗa, ka ka waɗanatá kurɗa gha nda hga Yawe, Lazglafta gha na: “Zwaŋa ɗa Salumuŋ dzaʼa ga mgham tahula gha, tsatsi dzaʼa nzakway ta dughurukwa gha,” ka ka mnata.

¹⁸ Ama ndanana, waʼa Aduniya ka mgham, a rveri, mghama ɗa, sna a kagha wa!

¹⁹ Vla vla ka pla ghəŋ ta ndəghata lghəŋha, nda mamakwa slaha nda uwasla nda uwasla, nda rina fisik, ka hagaftá tsi ta inda zwana mgham, mantsa ya Aviyatar mnda dra skwi ŋa Lazglafta, nda Yuʼav mala gwal vulu, ama hgaŋ a ta kwalva gha Salumuŋ wa.

²⁰ Rveri, mgham ɗa, inda la Israʼila ná, ta kagha pghafta həŋ ta iri, ŋa mnanata gha ta həŋ ta mndu dzaʼa nzakway ta dughurukwa ga mghama gha tahula kagha.

²¹ Ka haɗ tsi mantsa wu, laghwər rveri, mghama ɗa da dzidzíha ni ná, dzaʼa gay lu ta iri ŋa ɗa nda zwaŋa ɗa Salumuŋ manda gwal ta gatá dmaku, » kaʼa.

²² Ta ta tsa gwaɗa ya tsa marakw ya nda mgham ta lam anabi Nataŋ.

²³ Ka mnanatá lu ta mgham: « Wana anabi Nataŋ! » kaʼa. Ka lagha Nataŋ tsəlɓata ka dzadatá kuma ta haɗik ta kəma mgham,

²⁴ kaʼa mantsa: « Rveri, mghama ɗa, kagha ta mnata kazlay na: “Aduniya dzaʼa ga mgham tahula gha, tsatsi dzaʼa nzata ta dughurukwa ga mghama gha” kəʼa ra?

²⁵ Kəl yu ka mnay mantsa ná, waʼa la la gita da Gheŋʼrugel, ka vlatá tsi ka skwa pla ghəŋ ta ndəghata lghəŋha, nda mamakwa slaha nda uwasla nda uwasla, nda rina fisik. Ka hagaftá tsi ta inda zwana mgham, nda maliha gwal vulu, nda Aviyatar mnda dra skwi ŋa Lazglafta. Ta zay zay həŋ ta skwa zay, nda sa skwa say ta kəma ni. Ka həŋ na: “Ta mblam ka hafa mgham Aduniya!” ka həŋ.

²⁶ Ama hgiha a ta iʼi kwalva gha, dər Tsaduk mnda dra skwi ŋa Lazglafta, dər Benaya, zwaŋa Yəhuyada, dər kwalva gha Salumuŋ wa.

²⁷ Kahwathwata ná, rveri, mghama ɗa ta mnafta kəl tsi ka magaku ra? Wya snanam a ka ta kwalva gha ta mndu dzaʼa nzakway ta dughurukwa ga mghama gha tahula kagha wu, » kaʼa.

Zbapta Dawuda ta Salumuŋ ŋa da vla ni

²⁸ Ka mgham Dawuda mantsa: « Hgaŋwa Batʼseva ya ka vragamta tsi! » kaʼa. Ka lagha tsa marakw ya ta kəma mgham.

²⁹ Wya ká mgham waɗata: « Ta waɗa waɗa yu nda hga Yawe nda hafu mida, ta pliɗista ma nzakwa ɗa ma inda ghuya ɗaŋwaha.

³⁰ Gita u na, dzaʼa maga maga yu manda ya waɗagha yu nda hga Yawe, Lazglafta la Israʼila kazlay na: “Zwaŋa gha Salumuŋ, dzaʼa ga mgham tahula ɗa, tsatsi dzaʼa nzata ta dughurukwa ɗa ma vla ɗa, kəʼa ya,” » kaʼa.

³¹ Ka tsəlɓatá Batʼseva ka dzadatá kuma ta haɗik ta kəma mgham. Kaʼa mantsa: « Ta mblam ka hafa gha ŋa ɗekɗek mghama ɗa Dawuda! » kaʼa.

³² Ka mgham Dawuda tama mantsa: « Hgigiɗaghawa i Tsaduk, mnda dra skwi ŋa Lazglafta, nda anabi Nataŋ, nda Benaya, zwaŋa Yəhuyada ya! » kaʼa. Ka lagha həŋ ta kəma mgham.

³³ Ka mgham nda həŋ mantsa: « Hlafwa hla mista ghuni ta kwalvaha daŋahəga ghuni, ka fafta kuni ta zwaŋa ɗa Salumuŋ ta plisa ghwandala vərɗa iʼi, ka kladata kuni da Gihuŋ.

³⁴ Hada, ka pghanaghata i Tsaduk, mnda dra skwi ŋa Lazglafta, nda anabi Nataŋ ta rɗi ŋa famta ka mghama la Israʼila, ka vyata kaghuni ta duli nda hla wi kazlay: “Ta mblam ka hafa mgham Salumuŋ!” kəʼa.

³⁵ Ka vragafta kuni mista ni, ka sagha tsi nzafta ta dughurukwa ga mghama ɗa, tsatsi dzaʼa ga mgham ma vla ɗa, tsatsi mnaf yu ŋa nzakway ka mali ta ghəŋa la Israʼila nda la Yuda, » kaʼa.

³⁶ Ka Benaya, zwaŋa Yəhuyada zlghanaftá wi mantsa: « Ka nza tsi mantsa! Má ka mnaf mna Yawe, Lazglafta rveri, mghama ɗa manda tsaya!

³⁷ Má ka nza Yawe nda Salumuŋ manda si nzakwa ni nda rveri, mghama ɗa ya. Má ka ŋlanaf ŋla tsi ta ga mghama ni ka malaghuta ta ghəŋa ŋa rveri, mghama ɗa Dawuda! » kaʼa.

³⁸ Ka laha i Tsaduk mnda dra skwi ŋa Lazglafta, nda anabi Nataŋ, nda Benaya, zwaŋa Yəhuyada, nda la Kəret, nda la Pəlet. Ka faftá həŋ ta Salumuŋ ta plisa ghwandala mgham Dawuda, ka klaghata da Gihuŋ.

³⁹ Ka klaftá Tsaduk, mnda dra skwi ŋa Lazglafta ta dula rɗi ma həga tumpul, ka pghanaghatá Salumuŋ, ka fata ka mgham. Ka vyatá lu ta duli, ka hlaftá inda mnduha ta wi: « Ta mblam ka hafa mgham Salumuŋ! » ka həŋ.

⁴⁰ Ka laf inda mnduha mista ni nda vya siŋlak, nda rfu katakata, ka gigiɗavaftá haɗik da hlawa taŋ.

Skway Aduniya ta htsiŋ da Salumuŋ

⁴¹ Ta kɗay kɗay i Aduniya nda inda mbalata graha ni ta za skwa zay, ka snaŋtá həŋ ta tsa hla wi ya. Snaŋta Yuʼav ta lwa duli, kaʼa mantsa: « Kabgawu ta kəl lu ka hla wi ma luwa na? » kaʼa.

⁴² Ta ta tsa gwaɗa ya tsatsi nda lagha Yunataŋ, zwaŋa Aviyatar mnda dra skwi ŋa Lazglafta. Ka Aduniya nda tsi mantsa: « Sagha sa, mndu nda sgit tida ka, mamu lfiɗa gwaɗa kahwathwata da kagha ŋa mnay, » kaʼa.

⁴³ Ka Yunataŋ nda Aduniya mantsa: « Haɗ ɗekɗek wa! Fam fa rvera ŋni, mgham Dawuda ta Salumuŋ ka mgham!

⁴⁴ Ka ghunaftá mgham kawadaga nda Salumuŋ ta i Tsaduk, mnda dra skwi ŋa Lazglafta, nda anabi Nataŋ, nda Benaya, zwaŋa Yəhuyada, nda la Kəret, nda la Pəlet, ka faftá həŋ ta plisa ghwandala mgham.

⁴⁵ Ka pghanaghatá i Tsaduk mnda dra skwi ŋa Lazglafta, nda anabi Nataŋ ta rɗa famta ka mgham ma Gihuŋ. Ka sliʼagaftá həŋ daga hada nda rfu, ka sliʼanaftá tsi kuɗukuts ta vli ma luwa, tsaya tsa hla wi snaŋ kaghuni ya.

⁴⁶ Ka nzaftá vərɗa Salumuŋ ta dughurukwa ga mgham.

⁴⁷ Ka lagha kwalvaha mgham da rfanaghatá rvera mu, mgham Dawuda guli, ka həŋ mantsa: “Má, ka ŋlanaf ŋla Lazglafta gha ta Salumuŋ ka laghwa hga ni da zərwa ka malaghutá ŋa gha, má ka ŋlanafta tsi ta dughurukwa ga mghama ni ka malaghutá ŋa gha!” ka həŋ. Mantsa tama, ka tsəlɓatá mgham ta ghəzləŋa ni ka vlaŋtá glaku ta Lazglafta.

⁴⁸ Kaʼa mnata guli na: “Rfu ŋa Yawe, Lazglafta la Israʼila ta vlata gita ta mndu ŋa nzafta ta dughurukwa ga mghama ɗa, ka nghaŋtá ira ɗa,” kaʼa, » kaʼa.

⁴⁹ Ka ghudzaku inda mbalata graha Aduniya ta ghudzaku snaŋər həŋ ta tsa gwaɗa ya, ka sliʼaftá həŋ, dər wa ta hwayaghuta ta ŋa ni tvi.

⁵⁰ Ka sliʼaftá Aduniya, ka hwayaghuta ɗifaghuta ma həga tumpul, ka kasavata ta duliha gwir, kabga zləŋa Salumuŋ.

⁵¹ Ka snanamtá lu ta Salumuŋ kazlay na: « Waʼa laghu la Aduniya kasavata ta duliha gwir, kabga zləŋa mgham Salumuŋ kəʼa. Kaʼa na: “Ka waɗiha waɗa mgham Salumuŋ karaku ka dzata a tsi ta iʼi kwalva ni nda kafay kaʼa!” » kaʼa.

⁵² Ka Salumuŋ mantsa: « Ka ta nzay tsi ta nzaku ka ŋərma mndu, haɗ ya dər turtuk ma swida ghəŋa ni dzaʼa dɗadata ta haɗik wu, ama ka maga maga tsi ta ghwaɗaka skwi katsi, dzaʼa mtaku, » kaʼa.

⁵³ Ka ghunaftá mgham Salumuŋ ta mnduha ŋa slurtagata ta gwir. Ka lagha tsi da tsəlɓata ta kəma mgham Salumuŋ. Ka Salumuŋ nda tsi mantsa: « La dzagha gha! » kaʼa.