Zuize 9 - ꞌRe Ihâimana Uꞌâsi Mono Zadawa Wasuꞌu

Abimelequihi wasu'u

¹ Tawamhã Abimelequi, Gidiãhã 'ra, 'rinho'u Siquẽ na isisi u ma tô mo, ina sisãnawã norĩ, uburé 're ihâimana za'ra mono zéb u. Tahawa, Siquẽ ãma aibâ norĩ 're ihâimana za'ra mono,

² te te ãne sadanharĩ za'ra da, ma tô tiwi rowaptẽrẽ za'ra, ina sisãnawã norĩ wi hã: — E ma hã te asima iwẽ za'ra wa'wa: E 70 na Gidiãhã 'ra norĩ aihĩni pese i'rãnho'õmo na aima 're hâimana za'ra wa'aba mono da hã, niha wamhã, duré misi aibâ hã aima 're hâimana za'ra wa'aba mono da. Ma'ãpé ĩ'ãma Abimelequihi ãma aipo're pu'u za'ra wa'aba, tô asiwapru za'ra wa'aba na hã.

³ Tawamhã ina sisãnawã norĩ, Siquẽ ãma aibâ norĩ 're ihâimana za'ra mono norĩ ma, te te ãne ãma tãma nharĩ zahu za'ra wa, ma tô sima ãma rowairébé za'ra, tô Abimelequihi si te te siwi pisutu da, ta hã isisãnawã za'ra dâ'âsina.

⁴ Tahawa ma tô õhõ ma, ẽtẽ waipo prã prata 70 na iwa'õtõ na Baau-Berite ãma romhâibarĩ na 're idawata za'ra mono zé 'ri hawi te te siwi isani za'ra hã tãma sõmri za'ra. Tawamhã tô taha wa'õtõ na ma tô Abimelequi, ni'wam norĩ aibâ niha na siwa'ru 're inomro mono norĩ hã pisutu za'ra, pawa'âbâ ré isib'a'uwẽ na 're nomro mono da.

⁵ Tawamhã Abimelequi, ma tô Opra ãma timama nhorõwa u hã mo. Tame tawamhã tisisãnawã norĩ Gidiãhã 'ra 70 na ihâiba za'ra hã ma tô uprosi, ẽtẽ tõmo wawẽ nhisiwi. Tane nherẽ, Zotã danoire hã ma tô tiwi aima'u. Tahawa ta hã te te wĩrĩ õ di.

⁶ Tawamhã Siquẽ ãma duré Bete-Miru ãma uburé aibâ norĩ 're ihâimana za'ra mono hã ma tô 're si'rã'õtõ, Siquẽ ãma wede iwazéb zahi, 're isa mono ãma. Tahawa, ma tô tame Abimelequi tãma si'apito za'ra da hã siwi tisẽ.

⁷ Tawamhã Zotã ãne hã te te waihu'u wa, ma tô Gerizi na ẽtẽ nhisi na sai'u. Te te sai'uri wamhã, ma tô ãne hârâ 'rãihâ na 'mahârâ za'ra: — Siquẽ ãma aibâ norĩ, asiwi ĩwapari aba! Tawapsi te za 'Re ihâimana u'âsi mono te te 're aiwapari za'ra wa'wa.

⁸ Tawamhã Zotã te ãne tãma ãma romnhimiré'é za'ra: — Nimahã na wede norĩ, ma tô sima rowairébé za'ra, sima 'masi'apito da, sisô sõpré da hã. Tawamhã te oriwera wede ma nharĩ za'ra ãne: “A hã za oto wanhib'apito za'ra.”

⁹ Tawamhã oriwera, ma te ãma sada'âbâ za'ra ãne: “Aima isi'ĩ'rãnho'õmo za'ra wa'aba da wamhã, wa hã wa za ĩhawi azeitona 'rãi wa'u hã pu'u zazâ, romhâibarĩ ipire wasu'uzéb da, duré nimahã a'uwẽ ipire wasu'uzéb da, da te tãma 're isõmri za'ra mono hã.”

¹⁰ — Tawamhã wede norĩ, figuera wede ma, te duré tãma nharĩ za'ra ãne: “Tane wamhã, a hã wama asi'apito za'ra na.”

¹¹ Tane nherẽ, figuera wede, ma te duré ãne ãma tãma wa'rãmi za'ra: “Aima ĩsi'ĩ'rãnho'õmo za'ra wa'aba wamhã, wa hã wa aré duré sõmri zazâ, ĩ'rã isei uptabi hã.”

¹² — Taha pari wede norĩ, te duré uwa 'rui ma nharĩ za'ra ãne: “Tane wamhã a hã te za wama asi'apito za'ra.”

¹³ Tane nherẽ, uwa 'ru, ma te duré ãma tãma wa'rãmi za'ra ãne: “Aima ĩsi'ĩ'rãnho'õmo za'ra wa'aba da wamhã, wa hã wa aré sõmri zazâ, ĩ'rãi wa'u isé ihâiba'õ norĩ ma, duré a'uwẽ norĩ ma, ãma tãma 're irowẽ pusi za'ra mono zé hã.”

¹⁴ — Tawamhã wede norĩ, te duré 'wabzéré ma nharĩ za'ra ãne: “Tane wamhã, a hã ma'ãpé wama asi'apito za'ra na.”

¹⁵ Tawamhã 'wabzéré, ma te ãne ãma tãma wa'rãmi za'ra: “Tô aima ĩsi'apito za'ra wa'aba da, asima ĩwẽ za'ra wa'aba wamhã, ma'ãpé we ãwa ai'aba'réi wa'aba, ĩ'awã zahâpâ asimroi wa'aba da. Duré ãne hã 'manharĩ za'ra wa'aba õ wamhã, te za 'wabzéré hawi uzâ hã ro'o watobro. Ta hã ro'o watobro wamhã, te za Libanu ãma wede nhinihã 're isimasa mono hã ãma sazu.”

¹⁶ Tawamhã Zotã, ma duré timreme na ãma tãma uzusi za'ra ãne: — E sena na i'uwaibaba na 're i'aihâimana za'ra wa'aba mono zarina, ma tô Abimelequi aima si'apito za'ra wa'aba da hã asiwi ipisutu 'wa. Duré e tô Gidiã hã duré ihawi a'uwẽ norĩ hã 're wazéb za'ra wa'aba mono sina, ma tô iwẽ hã tãma 're i'manharĩ za'ra wa'aba mo, marĩ iwẽ te te 're i'manharĩ mono zéb zarina.

¹⁷ Ma'ãpé ĩmama ai'ãma isi'wapé za'ra wa'aba zém na hã, ãma aipo're pu'u za'ra wa'aba. Ta hã ma tô midiãnita norĩ wi te te asõ'reptu za'ra wa'aba da, tãma simimnhasi nherẽ, ai'ãma da'wapé za'ra wa'wa.

¹⁸ Tane nherẽ, te ãhã na hã ĩmama hawi a'uwẽ da, aihâimana za'ra wa'wa. A norĩ wa'wa ma tô 70 na i'ra hâiba za'ra hã misi ẽtẽ tõmo wawẽ inomro nhisiwimhã asiwi i'uprosi 'wa! Taha pari ma tô Abimelequi, Siquẽ ãma si'apito da hã asiwi ipisutu 'wa, ĩmama ma romhuri'wai 'ra hã. Taha ma si, ma tô ãne hã i'manharĩ za'ra wa'wa, asisãnawã za'ra wa'aba wa.

¹⁹ Ãhã na Gidiãhã ma, duré ihawi a'uwẽ norĩ ma, sena na i'uwaibaba na tãma 'manharĩ za'ra wa'aba wamhã, tô Abimelequihi na asima rowẽ za'ra wa'aba. Duré tahawa, õhõ zama aima ipẽ'ẽ to za'ra wa'aba da si iwẽ hã.

²⁰ Mare wamhã, Abimelequihi hâiba hawi uzâ iwatobro da si iwẽ hã, Siquẽ ãma, duré Bete-Miru ãma aibâ 're ihâimana za'ra mono norĩ ãma te te isazu za'ra da hã. Siquẽ ãma, duré Bete-Miru ãma aibâ 're ihâimana za'ra mono hawi uzâ iwatobro da si iwẽ hã, Abimelequihi ãma te te isazu da hã.

²¹ Tawamhã Zotã hã ma tô aimani. Tahawa, Bé'é na 'ri wa'õtõ nhisi u ma tô mo, tame 're sãmra mono da. E marĩ wa. Tisisãnawã Abimelequihi ma tãma pahi wa.

Ga'au hã Abimelequihi zô isipi'razé wasu'u

²² Tawamhã Abimelequi si'ubdatõ wahum na ma tô Izaraéu nhihudu norĩ i'rãnho'õmo na te te 're a'madâ'â.

²³ Tahawa, 'Re ihâimana u'âsi mono, Abimelequi, Siquẽ ãma aibâ 're ihâimana za'ra mono wa'wa me, ma tô wa'uburé hâimana da hã itẽme satõrĩ za'ra. Taha zarina ma tô ta norĩ hã oto Abimelequihi zada tihâimana za'ra.

²⁴ Abimelequi, Siquẽ ãma aibâ norĩ, Gidiãhã 'ra 70 na ihâiba norĩ te te uprosi za'ra da, te te ipawaptob za'ra me, ma tô tinhimi'manharĩ wasété za'ra zé hã tihâiba na te te wa'âbâ za'ra da hã, ãne tãma tiromhâimana za'ra.

²⁵ Tahawa Siquẽ ãma 're ihâimana za'ra mono norĩ hã ma tô aibâ norĩ satõrĩ za'ra, ẽtẽ norĩ i'rãihâ u, tame Abimelequihi zô sima'uri za'ra da, te te siwi wĩrĩ da. Tawamhã ta norĩ hã taha bâdâdi wa, da te 're ro'rahâri za'ra mono sidâpâsi te danhimiza'rese õre dazô 're wairébé, danhibrob zô. Tahawa, Abimelequihi ma, ma tô ãne na hã tãma 'mairowasu'u ni.

²⁶ Tawamhã Ebedehe 'ra Ga'au, ma tô tisisãnawã norĩ siré mo, Siquẽ u. Morĩ wamhã, ma tô aibâ norĩ tame 're ihâimana za'ra mono hã te te siwi 're umnhasi.

²⁷ Tawamhã ta norĩ hã ma tô tinhimirob're za'ra u hã ai'aba'ré. Si'aba'réi wamhã, ma tô uwa 'ru 'rã hã te te siwi 're sinarĩ. Taha pari ma tô duré tipara na te te wati za'ra, iwa'u zô. Tawamhã ma tô duré dato siwi 'manha. Taha pari duré ite za'ra ihâiba'õ 're isa mono zé 'ri u sisisi wamhã, ma tô tisa hã tihu. Ma tô duré simihâri za'ra. Tahawa, ma tô duré Abimelequihi ãma hã wasété za'ra.

²⁸ Tawamhã Ga'au te tinha ãne: — Abimelequi, e marĩ na hâimana bâ wama za'ra hã, isapari tãma 're iwahâimana za'ra mono da hã. E niha bâ bété, wa norĩ aibâ na, Siquẽ ãma 're iwahâimana za'ra mono hã. E 'wa pâ wama za'ra hã. Õ hã tô Gidiãhã 'ra, Zebu hã te te 're isimi'rui mono. E marĩ da, wa za bété isaparimhã tãma 're wahâimana za'ra, wawapure na. Tahawa te za Siquẽhẽ mama aihi'rada Hamoho nhib'a'uwẽ ma si, sena na 're aihâimana za'ra wa'aba mo.

²⁹ Wa hã, ã hã a'uwẽ norĩ ma, ĩ'rãnho'õmo na 're ĩza mono neza! Taha 'wa'âhã, wa aré wa hã Abimelequi sama. Tawamhã wa aré duré tãma tinha ãne: “Ate dasi'wapéi 'manharĩ'wa norĩ na hã ma'ãpé ãma aihâ'â, we wazô aiwairébé aba da, duré wa'wapé za'ra wa'aba da!”

³⁰ Tawamhã Zebu 'ri nho'õmo te i'rãnho'u hã ma tô ab'ru, Ga'au ãne te te inharĩzé te te wapari wa.

³¹ Tahawa Abimelequihi u, ma tô rowasu'u 'wapéi'wa norĩ hã pi'uriwi itẽmemhã satõrĩ za'ra, te te siwi po're pu'u da ãne: — Ebedehe 'ra Ga'au, tisisãnawã norĩ me Siquẽ u we isi'aba'ré hã ma tô ãhã 'remhã asada da'rãiwamnarĩ za'ra.

³² Tahawa ma'ãpé ãne 'manharĩ: Bara na te za we ate aibâ norĩ me hã aiwairébé 'wa, rom na aima'uri za'ra wa'aba da hã.

³³ Tawamhã awẽm na mararé bâdâ 'rãiwatobro wi ai'utu za'ra wa'aba wamhã, te za 'ri nho'õmo ãma 're idahâimana za'ra mono norĩ simiza'rese õ ré isusi za'ra wa'wa. Tawamhã Ga'au tite aibâ norĩ ré si'wapé da, asô watobro za'ra wa'aba wamhã, te za niha hã asima iwẽ na tãma irob'manharĩ za'ra wa'wa za.

³⁴ Tawamhã Abimelequi, uburé tite aibâ norĩ me ma tô bara na hã oto wairé, Siquẽhẽ 'rata suru na romhâ na sima'uri za'ra da, maparane si'uiwa na dawa'õtõ na ãma sima isipo'o mono ré.

³⁵ Tawamhã Ga'au ma tô oto watobro. Tahawa, ma tô 'ri nho'õmo te 'ridawa za'ẽtẽ u hã mo. Taha ré Abimelequi tite aibâ norĩ me, ma tô isima'uri za'ra zém hawimhã oto sô wairé.

³⁶ Tawamhã Ga'au, ta norĩ hã te te 'madâ'â za'ra wamhã, ma tô Zebuhu ma tãma rob'mahâ ãne: — Ma'ãpé 'madâ'â! A'uwẽ ẽtẽ 'rãihâ hawi we isi'aba'ré hã! Tane nherẽ, Zebu ma te ãne ãma sada'â: — Aibâ norĩ hãi õ di ĩma hã, õ hã. Ẽtẽ awã!

³⁷ Tane nherẽ, Ga'au ma te ãne duré ãma tãma wa'rã: — Ma'ãpé tô 'madâ'â! Ti'a siwa'aba na rowa'wa ro inomro na te we ẽtẽ hawimhã si'ra za'ra ni. Te duré dawa'õtõ amo hã we ai'aba'ré ni, wede iwazéb zahi, 're isa mono wa'waibaba bâdâdi inomro na hã.

³⁸ Tawamhã Zebu te ãne duré tãma tinha asa: — E mahãta tawamhã, ãma i'asi'uihâ zanhozé hã õhõ ãma. Oro a hã nharĩ za ãne: “E 'wa pâ bété Abimelequi wama za'ra hã, õhõ ma si 're iwahâimana za'ra mono da hã.” E aibâ norĩ ãma a hã aiwa'ẽ za'ra ã bâ bété. Tahawa ma'ãpé ãhã na awa'awi na hã sô aiwatobro za'ra na, a'wapé da.

³⁹ Tawamhã Ga'au, Siquẽ ãma aibâ norĩ ma tô 'ri nho'õmo hawi 'ri nhiti te te simro. Tahawa, ma tô Abimelequi hã 'wapé, iré za'ra.

⁴⁰ Tawamhã Abimelequi, ma tô Ga'auhu zarina wara. Tahawa, ma tô Ga'au hã tãma wara. Ãhã wa, Siquẽ ãma aibâ norĩ da te i'u'a za'ra hã ma tô ahâ uptabi na bâdâdi na rere'e, 'ridawa za'ẽne 'ri nho'õmo te ihâimana u.

⁴¹ Tawamhã Abimelequi, te Aruma ãma nhamra u'â. Zebuhu si ma tô tawamhã Ga'au norĩ hã isisãnawã norĩ me Siquẽ hawimhã te te sate, nimomo isiti oto 're hâimana za'ra mono da hã.

⁴² Tawamhã Siquẽ ãma 're idahâimana za'ra mono norĩ, awẽ bâtâ na mararé ma tô a'ubuni u hã tawairébé ni. Ta hã ma tô Abimelequi hã waihu'u.

⁴³ Tahawa tite aibâ norĩ ãma si'ubdatõ iwa'õtõ na ãma sipo'o mono pari, ma tô simipari za'ra sina dazô si'ubumro da hã aima'uri za'ra. Tawamhã duré Abimelequi, 'ri nho'õmo hawi idawairébé na te te da'a'madâ'â wamhã, ma tô tisima'urizém hawi dazô watobro, te te da'awano'õ da.

⁴⁴ Tawamhã Abimelequi, tite dasi'wapé 'manharĩ'wa norĩ wa'õtõ me ma tô 'ri nho'õmo te 'ridawa za'ẽtẽ u dawi sina robzâri za'ra, danhisisi tõ da apâ. Tawamhã duré maparane iwa'õtõ hâiba amo norĩ hã ma tô rom na idahâimana za'ra hã siwi uprosi, uburé pese.

⁴⁵ Tahawa, Abimelequi ma tô 'ri nho'u bâtâ bâre 'wapé. Tahawa 'rinho'u te te âri wamhã, ma tô iwa 're idahâimana za'ra mono hã duré uprosi. Tawamhã 'rinho'u te te pru wamhã, ma tô ti'ai wamhã sa nhamra na hã te te ãma robzaza za'ra.

⁴⁶ Tawamhã Siquẽ ãma 'ri 'rãihâ nhib'ihâ'a norĩ ãne hã te te waihu'u za'ra wamhã, ma tô Baau-Berite ihâiba'õ te 'ri itete u hã ai'aba'ré, tame sima iwẽ na romnhimimnhasi ãna si'ubumro da.

⁴⁷ Tane nherẽ, Abimelequi õme isi'rã'õtõzém na ma tô duré waihu'u za'ra.

⁴⁸ Tahawa tite aibâ norĩ me ma tô Salmo na ẽtẽ nhisi na hã sai'uri za'ra. Tawamhã hâtâra te te i'âri na wede panhipti hã ma tô sizâ. Tinhisé na ma tô duré sima tihi. Taha pari ma tô tite aibâ norĩ ma nharĩ za'ra, isine waptu na sa'ẽtẽ te te sima sihâri za'ra mono da, tite mono bâ.

⁴⁹ Tawamhã uburé wede panhipti hâiba mono bâ te te sima sihâri za'ra pari, ma tô Abimelequihi siré hã oto ai'aba'ré. Si'aba'réi wamhã, ma tô 'ri itete na'rata na wede panhipti sisiwip si te te siwi sa'ra. Taha pari ma tô ãma siwi sazu, wede panhipti na. Ãhã wa, ma tô Siquẽ ãma 'ri 'rãihâ wa isi'ubumro norĩ hã uburé pese ai'utõ, miu na aibâ norĩ na, duré miu na pi'õ norĩ na.

⁵⁰ Taha pari Abimelequi, Tebe na 'ri wa'õtõ nhisi u morĩ wa, ma tô 'ri nho'u te te siwi uirĩ wa, duré ãma ai'uté za'ra, Abimelequi norĩ hã.

⁵¹ Tane nherẽ, Tebe ãma te 'ri 'rãihâ itete uptabi hã 're sa. Tawamhã tamomo uburé aibâ norĩ hã, duré pi'õ norĩ hã, dama i'rãnho'õmo norĩ hã ma tô sisa're, i'rep sisisi da. Taha pari, ma tô 'ridawa norĩ hã siwi tété siré. Ma tô duré tawamhã hâimo 'ri zahâpâ u hã sai'uri za'ra.

⁵² Tawamhã Abimelequi, 'ri 'rãihâ u morĩ wamhã, ma tô duré ta hã 'wapé. Ma tô duré taha 'ridawa u sina rotété, unhama na te te ãma sazu da aré.

⁵³ Tane nherẽ, pi'õ hâiwi hawi ma tô amnho zubzé ẽtẽ tõmo wawẽ hã isisiwi time. Tawamhã taha na te te ãma 'rãi uwaimrami wa, ma tô ãma 'rãihi pru.

⁵⁴ Tawamhã iprédupté tãma isi'wapézé mrami'wa sa'ẽtẽ te te 'mahârâ wamhã, ma tô ãne tãma tinha: — Ma'ãpé asi'wa wazere, ãma ĩwĩrĩ da. Te ĩsima wẽ õ di, pi'õ te te ĩwĩrĩ na da te ĩ'ãma dasima 're irobzanhamri za'ra mono da hã. Tahawa, iprédupté tisi'wapézé i'wa pa ma tô sada waze. Te te sada wazere wamhã, ma tô taha na ãma wĩrĩ pese oto.

⁵⁵ Tawamhã Izaraéu nhihudu norĩ, Abimelequi idâ'â na te te siwi 'madâ'â wamhã, ma tô uburé apâ 'ri u sina siri za'ra, tinhorõwa mono bâ.

⁵⁶ Ãne Abimelequi, tisisãnawã 70 na ihâiba za'ra te te i'uprosizém na timama ma, te te irob'manharĩ wasété wa'rãmimhã, ma tô oto 'Re ihâimana u'âsi mono, niha na hã tãma rob'manha.

⁵⁷ Tawamhã 'Re ihâimana u'âsi mono, Siquẽ ãma aibâ norĩ 're ihâimana za'ra mono ma zama, ma tô duré tãma rob'manharĩ za'ra, uburé tinhimi'manharĩ wasété za'ra zé te te ãma wa'âbâ za'ra da, robzépata na. Tawamhã Gidiãhã 'ra Zotã, iwẽ'õ si te te tãma 're i'apisutu mono zé hã ma tô i'reb za'ra hã tihâiba tô.