Zuize 8 - ꞌRe Ihâimana Uꞌâsi Mono Zadawa Wasuꞌu

Midiãnita norĩ ãma, da te i'ai'uté 'rãsutu za'ra zé wasu'u

¹ Tawamhã Efraĩhĩ nhihudu si'aibâ norĩ, te Gidiãhã ma ãne nharĩ za'ra: — E marĩ da, midiãnita norĩ a'wapé da wamhã, wazô aihârâ za'ra õ di. E marĩ da, ma tô ãne wama i'manharĩ za'ra. Ãne ma tô Gidiãhã ma, timreme pẽtẽ za'ẽtẽ za'ra.

² Tane nherẽ, Gidiã te ãne tãma nharĩ za'ra: — Midiãnita norĩ ma, marĩ wa hã te i'manharĩzé hã marĩ dai õ di, niha na marĩ 're i'manharĩ za'ra wa'aba mono zé ma hã. E bété wasété di, uwa 'rã, Efraĩhĩ nhihudu norĩ te te 're isinarĩ za'ra mono si'atarẽme hã. Ta hã wẽ uptabi di tãma hã, uburé Abi'ézéhé te aibâ norĩ te te siwi 're isinarĩ mono nhipai u hã.

³ 'Re ihâimana u'âsi mono, midiãnita norĩ ma i'rãnho'u, Orebe norĩ, Ze'ebehe me ma tô aima za'ra wa'aba hâiba nhomri zahuré. Ãne wa, e marĩ, wa tô bété wa hã 'manha, asimi'manharĩ za'ra wa'aba zé ma ipire hã. Baba di. Tawamhã ãne na Gidiã te te tãma nharĩ za'ra wa, ma tô Efraĩhĩ nhihudu si'aibâ norĩ hã suru na ti'rãiwahâ za'ra.

⁴ Tawamhã Gidiã tite aibâ norĩ 300 na ihâiba za'ra norĩ siré, wasutu uptabi za'ra nherẽ, õne haré tinhitob'ru zarina isisa'rei mono na te te ãma uzusi za'ra wa, ma tô oto panho'u Zodã pa u hã aihutu. Sihutu wamhã, ma tô taha pa na oto saprĩ za'ra.

⁵ Tawamhã Gidiã, ãne ma tô 'rinho'u Sucoti na isisi ãma aibâ norĩ 're ihâimana za'ra mono wi rowaptẽrẽ hã 'manha: — Wa hã wa tô midiãnita norĩ nhib'ihâ'a Zebaha zarina, Salmunahã me hã we isarina 're ĩmorĩ zahuré. Ta norĩ zarina wa, ĩte aibâ norĩ hã ma tô ãma wazere pese za'ra. Tahawa wasutu uptabi za'ra di. Tahawa ma'ãpé ĩzawi na hã ã norĩ ma, isa hã tãma sõmri za'ra na.

⁶ Tane nherẽ, Sucoti ãma danhib'ihâ'a norĩ hã ma tô ãne ãma sada'âbâ za'ra: — E marĩ da, wa za ate dasi'wapéi 'manharĩ'wa norĩ ma isa hã tãma sõmri za'ra ni. Zahadu a hã, Zeba norĩ, Salmunahã me hã mrami zahuré õ di!

⁷ Tawamhã Gidiã, ma te ãma tãma wa'rãmi za'ra ãne: — Wẽ di tô, marĩ õre di. Taré oto nimahã na, Uburé Danhib'apito, Zeba norĩ, Salmuna hã me te te ĩma hâiba nhomri zahuré wamhã, wa hã wa za, rop si 're irosa'wari mono ãma rob're na 'wabzéré 'wapa 're isimasa mono na hã te ai'anhiwazui wa'wa za.

⁸ Tawamhã Gidiã, Penué u ma tô mo. Morĩ wamhã, te te aré irowaptẽrẽzém ne ma tô tame aibâ norĩ wi duré aré rowaptẽ. Tane nherẽ, Penué ãma aibâ norĩ, Sucoti ãma te te ãma isada'âbâ za'ra zém ne, ma tô ãma sada'âbâ za'ra.

⁹ Tahawa Gidiã, te ta norĩ ma ãne nharĩ za'ra: — Nimahã na niwa te da'ãma ai'uté pari, rowẽ na we apâ te ĩsina siri wamhã, wa za 'ri 'rãihâ na dasipapara da te 're irob'madâ'â za'ra mono zé hã pru za.

¹⁰ Tawamhã Zeba norĩ, Salmunahã me, Carcu na romnhisi ãma ma tô tite zahuré dasi'wapéi 'manharĩ'wa norĩ ré hã tihâimana zahuré. Tahawa, dasi'wapéi 'manharĩ'wa norĩ rop si 're irosa'wari mono ãma a'uwẽ isi'mairẽme daza'u hã, ma tô asimro, 15 miu na. Tahawa 120 miu na hã ma tô simro ni, dasi'wapéi wamhã.

¹¹ Tawamhã Gidiã, bâdâdi rop si 're irosa'wari mono zada'réi baba ma tô mo, Noba na 'ri nho'õmo nhisi bâtâ pusizém niwĩ, duré Zobea na 'ri nho'õmo nhisi bâtâ pusizém niwĩ. Tahawa, tinhitob'ru dasi'wapéi 'manharĩ'wa norĩ hã simiza'rese ãna si'ubumroi ré, ma tô susi za'ra.

¹² Tawamhã midiãnita norĩ nhib'ihâ'a Zeba norĩ, Salmunahã me hã ma tô tãma asamro zahuré, Gidiãhã ma. Tane nherẽ, isarina zahuré wara wamhã, ma tô oto mrami zahuré. Ãhã wa, dasi'wapéi 'manharĩ'wa norĩ ãma ma tô uburé pese ãma ai'uté za'ra oto.

¹³ Tawamhã Zoasihi 'ra Gidiã, dasi'wapéi hawi ma tô apâ oto mo, Heresi na romnhisi wa'waibaba bâdâdi sõ'a 'rãihâ na inomro na.

¹⁴ Tahawa aibâ iprédupté Sucoti hawi a'uwẽ ma tô ti'â. Ta hã ma tô mreme nhiti'ru na sadanharĩ pese. Tawamhã ta hã ma tô Gidiãhã ma, Sucoti ãma 77 na danhib'ihâ'a norĩ nhisi na ãma tãma rob'ui'éré.

¹⁵ Tahawa Gidiã, Sucoti ãma aibâ norĩ 're ihâimana za'ra mono norĩ ma, te te tãma nharĩ za'ra da hã, ma tô mo. Ãhã wa, te ãne tãma nharĩ za'ra: — E ma tô aipo're pu'u za'ra wa'wa, nimahã na ĩ'ãma i'ato za'ra wa'aba zém na hã. Ma tô ĩma inharĩ za'ra wa'wa, ĩte dasi'wapéi 'manharĩ'wa norĩ te te ãma i'ãpusi za'ra norĩ ma, mra hã tãma sõmri za'ra wa'aba tõ da. E marĩ wa. Zahadu wa hã Zeba norĩ, Salmunahã me hã te mrami õ wa. Wẽ di. Marĩ õre di. Ãhãta te oto ãme wasiré aima'wara zahuré.

¹⁶ Tawamhã rop si 're irosa'wari mono ãma rob're na 'wabzéré 'wapa 're ihâimana za'ra mono hã, ma tô 'mai'â. Taha na ma tô Sucoti ãma danhib'ihâ'a norĩ ma hã ãma tãma rob'manharĩ za'ra.

¹⁷ Tawamhã ma tô Penué ãma 'ri 'rãihâ zama hã pru. Ma tô duré 'ri nho'õmo ãma aibâ norĩ 're ihâimana za'ra mono norĩ hã uprosi.

¹⁸ Tawamhã Gidiã, ma tô Zeba norĩ, Salmunahã me sadanharĩ zahuré ãne: — E 'wa sine hã ma tô Tabo ãma aibâ norĩ asiwi i'uprosi 'wa. — Asine hã ta norĩ hã. Duré danhib'apito 'ra sine hã, uburé ta norĩ hã. — Ãne ma te asa ãma tãma wa'rãmi zahuré:

¹⁹ Tawamhã Gidiã, te tãma nharĩ za'ra ãne: — Ta norĩ hã ĩsisãnawã, ĩna uptabi 'ra norĩ. Tahawa ãhã na awa'awi na hã wa za ropisutu, Uburé Danhib'apito nhisi na. A norĩ wa'wa hã ĩsisãnawã norĩ asiwi uprosi aba õ 'wa'âhã, aré duré ĩzama te ai'uprosi aba õ di.

²⁰ Tahawa ma tô ti'ra poto'rada Zétéhé ma tinha ãne: — Aiwahutu, pãrĩ da, ã norĩ hã. Tane nherẽ, ai'repudu tite sib'ézé wapa te te sada wazere zahuré õ di, pahi wa, duré zahadu hâiba tébre wa.

²¹ Tawamhã te Zeba norĩ Salmunahã me tãma si'ru zahuré ãne: — Ma'ãpé tô a hã we wazô ai'ré na, wapãrĩ da. E marĩ wa. Aibâ isib'ru si ãne da hã tô 're si'aibâ za'ra mono wa. Ãne wa, Gidiã, ma tô Zeba norĩ zô Salmunahã me hã sô ai'ré zahuré. Tahawa, ma tô õne haré tipã. Taha pari ma tô duré ite zahuré awaru ba'õmore nho'rebzu hã tiwi sani zahuré.

²² Tawamhã Izaraéu nhihudu si'aibâ norĩ hã ma tô Gidiãhã ma nharĩ za'ra ãne: — A hã ma tô midiãnita norĩ wi hã iwanho'reptu za'ra. Tahawa te za tô wama i'rãnho'õmo na 're aihâimana za'ra mo. Duré ai'uirĩ na hã ai'ra, duré asihudu te za tô i'rãnho'õmo na wama 're 'maihâimana za'ra.

²³ Tawamhã Gidiã, ma te ãne ãma tãma wa'rãmi za'ra: — Aima za'ra wa'aba isi'ĩ'rãnho'õmo da hã, duré ĩ'ra zama aima za'ra wa'aba isi'i'rãnho'õmo da hã, waihu'u õ di. Uburé Danhib'apito si, te za ate za'ra wa'aba na i'rãnho'õmo na hã aima 're hâimana za'ra wa'wa.

²⁴ Ma duré tawamhã timreme na ãma tãma uzusi za'ra ãne: — Tane nherẽ, wa za misi haré aiwi rowaptẽrẽ za'ra wa'wa ãne: Aihâiba mono bâ wa'aba te za dapo're za'ruzé, ãma i'ai'uté za'ra wa'aba na isani za'ra wa'wa hã ĩma isõmri za'ra wa'wa. (Midiãnita norĩ, ẽtẽ waipo pré oru 'manharĩ na isi'uwazi nhi'oto na hã, ma tô ãma 're sipo're za'ru za'ra, ta norĩ hã rop si 're irosa'wari mono ãma 're hâimana za'ra mono wa.)

²⁵ Tawamhã ma te duré ãne ãma sada'âbâ za'ra: — Marĩ õre di. Wapẽ'ẽ to sina wa za tô aima sõmri za'ra ni. Tawamhã da'uza hâpa te te siwi ihâ parapo wa, ma tô hâiba mono bâ dapo're za'ruzé midiãnita norĩ wi te te siwi isani za'ra hã nasi iwa siwi sa'ra tãma.

²⁶ Tawamhã Gidiã, ẽtẽ waipo pré oru 'manharĩ na dapo're za'ruzé te te iwaptẽrẽ pire pibuzé hã, ma aré watobro, 30 kilu na ipire pibuzéb u. Ãhã wa, duré ãne da te ipire pibu za'ra õ hã da'madâ'â wẽ zô danho'rebzuzé hã, midiãnita norĩ nhib'ihâ'a zazahâ hâiwaré na ãma 're isi'ubu za'ra mono zé hã, duré awaru ba'õmore ma isõ'rebzu te te ãma 're isasõmri za'ra mono hã.

²⁷ Tawamhã Gidiã, taha oru na ma tô sasedoti nho'utu'u ubuzéb da hã 'manha. Tahawa, ma tô tite 'rinho'u Opra na isisi ãma marĩ na sasõ. Ãhã zarina ma tô uburé Izaraéu nhihudu norĩ, 'Re ihâimana u'âsi mono ãma 're inomro mono zé hã siwi tirẽ. Tahawa, 'Re ihâimana u'âsi mono upana si ma tô taha na 're iwata za'ra mono zéb u si oto 're nomro. Ã hã Gidiãhã ma, duré isib'a'uwẽ norĩ ma, abaze da te ãma 're iwaibui mono zém ne 'râwi ãma 're isisitob za'ra mono zé hã ma tô tãma 're hâimana za'ra.

²⁸ Tawamhã ma tô midiãnita norĩ hã Izaraéu nhihudu norĩ nhiptete zahâpâmhã 're hâimana za'ra. Tahawa apâ 're 'rãiwahutu waihu'u za'ra mono õ di oto. Tawamhã Gidiã 're hâimana mono ré hã, ma tô 40 wahum na ti'ai 'remhã rowẽ na si 're romhâimana.

Gidiã idâ'âzé wasu'u

²⁹ Tawamhã Gidiã tinhorõwa u apâ te te oto sina siri wamhã, ma tô tamemhã oto 're sãmra.

³⁰ Taha 'ra hã 70 na ihâiba na, imro norĩ pi'õ ahâ na tãma 're hâimana za'ra mono wa.

³¹ Tawamhã Siquẽ ãma imro prã 're ihâimana mono ma zama, ma tô i'ra hã duré tãma podo. Ta hã Gidiã ma tô sisi, Abimelequi na.

³² Tawamhã Zoasihi 'ra Gidiã, si'ihi pese uptabi wapsi, ma tô oto dârâ. Dâ'â wamhã, ma tô imama da te isẽrẽzéb ãma dasiwi sẽrẽ ni, Opra na 'ri nho'õmo nhisi Abi'ézéhé nhib'a'uwẽ norĩ nhipti'ai ãma.

³³ Tawamhã Gidiã dâ'â parimhã, Izaraéu nhihudu norĩ, 'Re ihâimana u'âsi mono ãma 're inomro mono zé hã ma tô apâ rẽme zahi za'ra, cananeu norĩ te romhâibarĩ norĩ ãmap si 're wata za'ra mono da. Tahawa ta norĩ hã ma tô ihâiba'õ Baau-Berite na isisi hã te te sima 're pisutu za'ra, tite ihâiba'õ na si ãma 're nomro mono da.

³⁴ Tahawa Uburé Danhib'apito tite 'Re ihâimana u'âsi mono ãma 're sipo're pu'u za'ra mono õ di, isitob'ru norĩ te te i'uirĩ za'ra wi te te isõ'reptu za'ra ãma hã.

³⁵ Tawamhã Zerubau, Gidiã na isisi hâiba amo nhib'a'uwẽ norĩ ma hã, wẽ na tãma 're hâimana za'ra mono õ di, Izaraéu nhihudu norĩ hã. E marĩ wa. Uburé iwẽ te te tãma 're i'manharĩ za'ra mono zé hã te te sina 're sa'rata waihu'u za'ra mono õ wa oto, ta norĩ hã.