Zuize 7 - ꞌRe Ihâimana Uꞌâsi Mono Zadawa Wasuꞌu

Gidiã, midiãnita norĩ ãma te te i'ai'utézé wasu'u

¹ Tawamhã Zerubau, Gidiã na isisi amo, isib'a'uwẽ aibâ norĩ ihâimana za'ra me robza'rã ré utu za'ra wamhã, ma tô oto ai'aba'ré. Si'aba'réi wamhã, Harodi na â nhana'rata nhisi 'ratamhã ma tô sima 'ri nhoré za'ra. Tawamhã midiãnita norĩ te te sima i'ri nhoré za'ra hã hâiwa nhimi'e niwĩ ẽtẽ nhi'riti wa romharé, ẽne Moré na isisi 're ihâimana mono 'rata te tihâiba, 'ri hã.

² Tawamhã Uburé Danhib'apito, te Gidiãhã ma tinha ãne: — Ate aibâ norĩ ahâ uptabi di. Tahawa midiãnita norĩ ãma ai'uté za'ra wa'aba da, te aima sa'ré waihu'u za'ra wa'aba õ di za. Te aima sa'ré za'ra wa'aba wamhã, te za asina irosa'rata za'ra wa'wa, te aipawaptob za'ra wa'aba õ nherẽ, asi'uihâ na ãma i'ai'uté za'ra wa'aba na hã.

³ Tahawa ma'ãpé ãne a'uwẽ norĩ ma nharĩ za'ra na: “Ni'wam norĩ hã pahi sina hâimana za'ra wamhã, te za ẽne Ziliadi na isisi hawimhã ai'aba'ré apâ, 'ri u hã.” Tawamhã ãne na Gidiã te te tãma rowasu'u za'ra wa, ma tô 22 miu na dahâiba na apâ hã dasina siri za'ra ni. Tane nherẽ, 10 miu na dahâiba na te zahadu isiré tahâimana za'ra ni.

⁴ Tawamhã Uburé Danhib'apito, Gidiãhã ma te duré tãma tinha ãne: — Zahadu da'ahâ uptabi di. Ma'ãpé tahawa, uburé â u hã danhimroi mono. Tawamhã tame wa za aime isi'aba'ré da hã ãma aipo'o za'ra. Tawamhã duré wa hã ni'wa asiré morĩ da, te nharĩ wamhã, te za tô ta hã asiré mo. Duré ni'wa asiré morĩ dai õ wamhã, ta hã duré asiré imorĩ da hã, mare di za.

⁵ Tawamhã Gidiã, âi ba isib'a'uwẽ te te si'ra za'ra da hã, ma tô te te simro. Tahawa, Uburé Danhib'apito te duré tãma tinha ãne: — Uburé aibâ norĩ, wapsã te te 're i'âhuri mono ne, tizoto na te te i'âhuri hã te za ãma i'aipo'o za'ra, hi'rãtitõ tãma isi'ubumro norĩ nhiti.

⁶ Tawamhã aibâ norĩ 300 na ma tô tinhib'rata na hã âhu. Duré uburé isiré norĩ hã ma tô hi'rãtitõ tãma asimro, te te âhuri da.

⁷ Tawamhã Uburé Danhib'apito, te Gidiãhã ma tinha ãne: — Aibâ norĩ 300 na tinhib'rata na te te i'âhuri norĩ me hã, wa za wa hã asõ'reptu za'ra wa'wa, midiãnita norĩ ãma i'ai'uté za'ra wa'aba zém na hã. Tahawa ma'ãpé isiré norĩ ma tãma nharĩ za'ra na, apâ tinhorõwa u si'aba'ré da.

⁸ Tawamhã Gidiã, Izaraéu nhihudu norĩ ipo'o hâiba amo hã ma tô satõrĩ za'ra, apâ tinhorõwa u si'aba'ré da, 300 na ihâiba za'ra si i'ratamhã si'ubumro da. Ta norĩ hã sai ré, duré simnhihârâzéb ré, ma tô uburé asimro. Tahawa, midiãnita norĩ, ta norĩ zahâpâ te romharé ãma 'ri hã tãma sisõré.

⁹ Tawamhã tô taha mara na Uburé Danhib'apito, ma tô duré Gidiãhã ma tinha ãne: — Ma'ãpé ai'utu, midiãnita norĩ te 'ri u si'ra da, a'wapé da. Asib'rata wa za oto aima sõmri za'ra.

¹⁰ A'wapé da, tãma aipahi za'ra wamhã, ma'ãpé ite za'ra 'ri u hã si'ra na, aima romhuri'wa Puraha me.

¹¹ Tawamhã a hã te te sima irowasu'u za'ra zé wapari wamhã, te za aipẽ'ẽ nhiptete sina aihâiba za, a'wapé da, ite za'ra 'ri ãma. Tawamhã Gidiã norĩ, tipawapto'wai me, isitob'ru norĩ te romhâ 'manharĩ na 'ri isisõré mono 'ri mana u hã ma tô oto si'ra zahuré, te te sina rotété zahuré da.

¹² Midiãnita norĩ, amalequita norĩ, duré a'uwẽ rop si 're irosa'wari mono ãma romharé wa, 're hâimana za'ra mono da, te te sima iropéi mono norĩ hã, ahâ uptabi di, hâiwa nhirõno 'riti ne we 're isi'réi mono ne. Ta norĩ hã tite awaru ba'õmore norĩ me hã i'ahâ uptabi, supara 'ré â zada'ré na 're ihâimana za'ra mono ne.

¹³ Tawamhã Gidiã oto wisi wamhã, aibâ tisiwaihu'u ma, tinhimirosawẽrẽ te te iwasu'u hã, ma tô wapa. Ta hã te ãne tãma wasu'u, te te irosawẽrẽzé hã: — Ãne wa tô rosawẽ. Cewada 'manharĩ i'u'ẽtẽ wapu hã ma tô wanhorõwa za'ra 'ri nhoré u hã we sipizari. Tawamhã isipizari mono hã ma tô sa'ẽtẽ 'mai'ri na'rata wĩ. Tahawa, ma tô 'ri hã waptãrã. Waptã'ã wamhã, ma tô ti'ai wam haré nomro.

¹⁴ Tawamhã isiwaihu, ma te ãma sada'â ãne: — Zoasihi 'ra, Gidiãhã nhi'wa pa, te wasu'u, Izaraéu nhihudu hã! Ã hã te wasu'u, õhõ ma, za wanhib'a'uwẽ norĩ, duré wa te dasi'wapéi 'manharĩ'wa norĩ, 'Re ihâimana u'âsi mono te te tãma ihâiba nhomri za'ra zé.

¹⁵ Tawamhã Gidiã, rosawẽrẽ te te wapari wamhã, ma tô waihu'u, za marĩ iwatobrozé te te iwasu'uzém na hã. Tahawa hi'rãtitõ sãmra sina, ma tô 'Re ihâimana u'âsi mono ãma tiwata. Taha pari ma tô Izaraéu nhihudu norĩ isi'ubumrozéb u apâ sina siri. Tahawa, ma tô ãne tãma nharĩ za'ra: — Aiwahutu za'ra wa'aba! Uburé Danhib'apito, midiãnita norĩ te dasi'wapéi 'manharĩ'wa norĩ hã ma tô asib'ratamhã aima hâiba nhomri za'ra wa'wa.

¹⁶ Tawamhã Gidiã, 300 na dahâiba na hã ma tô si'ubdatõ dawa'õtõ na da'ãma sipo'o. Tawamhã aibâ hâiba mono bâ ma tô danhimizama õmo na danhimnhihârâzé hã te te tãma sõmri, duré piza'a wata 'rãza'itire zé'a 'manharĩ wa, 'rãsitõ iwa ihâimana za'ra zama.

¹⁷ Taha pari te ãne tãma nharĩ za'ra: — Asiwi ĩ'madâ'â aba mono za! Ĩnhitob'ru norĩ te 'ri u te ĩsina rotété wamhã, te za asiwi i'manharĩ 'wa, za marĩ hã wa hã te i'manharĩzéb zarina.

¹⁸ Tawamhã wa hã, ĩte dawa'õtõ me, danhimizama õmo na danhimnhihârâzé wa te hâsi wamhã, te za uburé a norĩ wa'wa romhâ 'manharĩ na 'ri, asiwi uirĩ za'ra wa'aba mono sina asimnhihârâzé hã ihãsi aba mo za. Tawamhã hâsi aba mono sina, te za ãne aihârâ 'rãihâ na aihãsi 'wa za: “Uburé Danhib'apito ma, duré Gidiãhã ma!”

¹⁹ Tawamhã Gidiã, 100 na tisiré aibâ norĩ hâiba me, imara wa'wabzéb ãma rob'madâ'â'wa norĩ hã sisaprĩ pari, ma tô 'ri nhoré u hã sina tété za'ra. Tawamhã ma tô tinhimnhihârâzé hã te te hãsi. Ma tô duré piza'a wata 'rãza'itire tinhib'rata te te i'wasari hã prub za'ra.

²⁰ Tawamhã si'ubdatõ dawa'õtõ norĩ, ma tô danhimnhihârâzé hã te te hãsi. Ma tô duré piza'a wata 'rãza'itire hã te te prub za'ra. Tahawa, 'rãsitõ ma tô tinhib'rata nhimi'e niwĩmhã te te tété za'ra. Duré tinhib'rata nhimire niwĩmhã, ma tô danhimnhihârâzé hã te te tété za'ra. Ãhã wa, te ãne hãsi, hârâ 'rãihâ na: “Sib'ézé 'wa pa, Uburé Danhib'apito ma, duré Gidiãhã ma!”

²¹ Tawamhã hâiba mono bâ 'ri mana wi, ma tô tisima'warazé mono bâ simasa, sirési ãna. Tawamhã uburé isitob'ru norĩ dasi'wapéi 'manharĩ'wa, ma tô sadari sina tãma sisa're.

²² Tahawa, 300 na aibâ norĩ danhimnhihârâzé te te hãsi wamhã, ma tô Uburé Danhib'apito, aibâ norĩ ma rob'manharĩ za'ra, tite sib'ézé 'wa pa na 'râwi si'wapé za'ra da hã. Tawamhã Zerera niwĩ sisa'rei mono wamhã, ma tô Bete-Sita na romnhisi niwĩ ai'aba'ré, Abéu-Meora na 'ri wa'õtõ nhisi zada'ré u, Tabate na rowamri 'ratab u.

²³ Tawamhã Naftalihi nhihudu si'aibâ norĩ zô, Aséhé nhihudu si'aibâ norĩ zô, duré Manaséhé nhihudu si'aibâ norĩ zô, ma tô tahãsi ni. Tawamhã ma tô midiãnita norĩ zarina sisa're.

²⁴ Tawamhã Gidiã, ma tô romreme 'wapéi'wa norĩ hã satõrĩ za'ra, Efraĩhĩ nhipti'ai wa ẽne 're isimasa mono ãma uburé 're idahâimana za'ra mono norĩ ma, te te dama nharĩ za'ra da ãne: — Mo oto si'ra za'ra wa'aba, midiãnita norĩ 'wapé za'ra wa'aba da hã. Duré ma'ãpé panho'u Zodã pa duré isipti norĩ isõ'reb za'ra hã asiwi âri aba, õ Bete-Bara na romnhisi u, te te ãma 'mazaprĩ tõ da. Tawamhã Efraĩhĩ nhihudu si'aibâ norĩ zô, ma tô tahãsi ni. Tahawa, ma tô panho'u, isipti norĩ me hã siwi ti'â, Bete-Bara u.

²⁵ Tawamhã ta norĩ hã ma tô midiãnita norĩ te maparane dama i'rãnho'õmo norĩ hã, Orebe norĩ, Ze'ebehe me hã siwi timra. Ãhã wa, Orebe na ẽtẽ tõmo wawẽ nhisi ãma ma tô Orebe hã siwi tiwĩ. Duré Ze'ebe hã ma tô siwi tiwĩ, uwa iwa'u zô, da te 're i'rãiwati za'ra mono zéb 're. Tawamhã midiãnita norĩ zarina isisa'rei mono na te te ãma uzusi za'ra wamhã, ma tô Orebehe 'rã hã, duré Ze'ebehe 'rã hã siré siwi timra, Gidiã panho'u Zodã pa zara niwĩ isãmrazéb u.