Zuize 6 - ꞌRe Ihâimana Uꞌâsi Mono Zadawa Wasuꞌu

Gidiãhã wasu'u

¹ Tawamhã Izaraéu nhihudu norĩ, Uburé Danhib'apito wi, ma tô apâ tiwasédé hã te te 're 'manharĩ za'ra. Tahawa 7 wahum na midiãnita norĩ nhib'rata 're hâimana za'ra mono da, ma tô tãma hâiba nhomri za'ra.

² Tahawa Izaraéu nhihudu norĩ, ma tô midiãnita norĩ wi aima'uri za'ra, ẽtẽ 'rãihâ zahâpâ ab're ãma, duré nima niwĩ ẽtẽ nhi'ridi ihâimana za'ra ãma, tãma romnhimimnhasi za'ra ãna hâimana za'ra da, midiãnita norĩ hã tãma siptete za'ra wa.

³ Tawamhã Izaraéu nhihudu norĩ te te sima 're robzuri za'ra mono sidâpâsi, ma tô midiãnita norĩ hã, amalequita norĩ hã duré a'uwẽ ropsi 're isa'wari mono ãma 're ihâimana za'ra mono norĩ hã sô 're sisisi.

⁴ Tawamhã isipti'ai 're, ma tô te te sima 're 'ri nhoré u'âsi za'ra. Ãhã wa, ma tô Izaraéu nhihudu norĩ buru nho na te te tiwi ãma 're robaba pese za'ra, hâiwa nhimire niwĩ Gaza na romnhisi 'rata 're ihâimana mono u. Tahawa Izaraéu nhihudu norĩ ma isõ hã, isimizama norĩ pone'ẽrebâ hã, powawẽ hã, duré awaru po'repore hã te te tãma 're 'mairẽme za'ra mono õ di, ãma 're ihâimana za'ra mono zéb da hã.

⁵ Tirom hawi ma tô sipowawẽ ahâ uptabi na hã duré tite romhâ 'manharĩ na 'ri ré hã 're sihutu, 'ridi i'ahâ uptabi ne. Ta norĩ hã duré isi'awaru ba'õmore norĩ hã, ahâ uptabi wa, ni'wa hã te te sa'rata waihu'u õ di. Ta norĩ hã isipti'a na te te ãma 're irowamnarĩ za'ra mono da si, ma tô 're sisisi.

⁶ Taha zarina, Izaraéu nhihudu norĩ hã simarĩ ãna te oto 're si'ubumro. Tahawa ma tô Uburé Danhib'apito wi te te sina 're rowaptẽrẽ za'ra, te te sõ'reptu za'ra da.

⁷ Tawamhã midiãnita norĩ te te ãma 're irowamnarĩ za'ra mono u'âbâ, Izaraéu nhihudu norĩ, Uburé Danhib'apito ma, mreme 'rãihâ na tãma mreme zusi wa,

⁸ ma tô tizadawa 'mahârâ'wa hã itẽme satõrĩ za'ra. Tahawa, ma tô ta hã ãne tãma sadawa wasu'u za'ra: — Ãne Uburé Danhib'apito, Izaraéu nhihudu norĩ te, 'Re ihâimana u'âsi mono hã te tinha: “Wa hã wa tô Ezitu ãma aipawa'âbâ ãna dama 're iromhuri za'ra wa'aba mono zém hawimhã we asani za'ra wa'wa.

⁹ Wa hã wa tô ezipsiu norĩ wi hã asõ'reptu za'ra wa'wa. Duré ã hã ti'ai 're, te te 're i'ai'wapé za'ra wa'aba mono wi zama, wa tô duré asõ'reptu za'ra wa'wa. Tawamhã asitob'ru norĩ wa'wa, te aima sate za'ra wa'aba mono wamhã, wa tô duré isipti'a hã aima sõmri za'ra wa'wa.

¹⁰ Wa hã, Uburé Danhib'apito, ate za'ra wa'wa 'Re ihâimana u'âsi mono na wa tô aima ĩsiwasu'u za'ra wa'wa. Amoreu norĩ te, ihâiba'õ norĩ na 're aiwata za'ra wa'aba mono tõ da wa tô duré aiwi sawi za'ra wa'wa, ã hã ti'ai 're, 're ihâimana za'ra mono ãma hã. Tane nherẽ, asima wẽ za'ra wa'aba õ di, asiwi ĩmreme wapari aba da hã.”

¹¹ Tawamhã Uburé Danhib'apito ma Romhuri'wa ma tô wei mo. Wei morĩ wamhã, ma tô 'ri wa'õno Opra na isisi 'rata carvariu na wede nhisi, 're isa mono zahâpâmhã nhamra. Ã wede Abi'ézé norĩ siré, Zoasihi te hã. Tahawa, i'ra Gidiã, te amnho trigu hã 'maipré'é sima'uri sina, uwa i'rãi wa'u zô da te 're iwati za'ra mono zéb ãma, midiãnita norĩ hã te te siwi sõpẽtẽ tõ da.

¹² Tawamhã Uburé Danhib'apito ma Romhuri'wa ma tô tãma sihâi'ré. Tawamhã ma tô tãma tinha ãne: — Dasi'wapéi 'manharĩ'wa asib'ru, Uburé Danhib'apito te tô asiré hã 're hâimana!

¹³ Tawamhã Gidiã ma te ãma sada'â ãne: — Uburé Danhib'apito, wanhib'a'uwẽ norĩ siré sena na 're hâimana mono zahã, ma te bété ãne na hã wama tiromhâimana za'ra. E mahãta tawamhã, Ezitu hawi we te te awazere wa, Uburé Danhib'apito nhimi'manharĩ wẽ zé, wahi'rata norĩ te te wama 're iwasu'u za'ra mono hã. Õ hã ma tô warẽme za'ra. Ma tô duré midiãnita norĩ ma hã wahâiba nhomri za'ra.

¹⁴ Tawamhã Uburé Danhib'apito, Gidiãhã ma, ma tô tãma waihu'u ãne: — Ma'ãpé asiptete sina aimorĩ, Izaraéu nhihudu norĩ sõ'reptu za'ra da, midiãnita norĩ wi. Aimorĩ da, wa wa hã aima rob'ru.

¹⁵ Tawamhã Gidiã ma te ãne duré ãma sada'â: — Ĩnhib'apito, e niha wa za Izaraéu nhihudu norĩ hã anho'reptu. Ĩsiré norĩ hã, Manaséhé nhihudu norĩ 'remhã danhipai u dama simarĩ za'ra õ di. Duré wa hã ĩsiré norĩ zahâpâ, wa ĩwapure na tãma za'ra 're ĩhâimana.

¹⁶ Tane nherẽ, Uburé Danhib'apito te duré ãne tãma tinha: — Tane nherẽ, te za ãne hã i'manha, wa hã za te aipawapto wa. Tahawa te za a hã midiãnita norĩ ãma uburé i'ai'uté za'ra, ihâiba za'ra aima hã misi dahâiba ne.

¹⁷ Tawamhã Gidiã, ma te duré ãne ãma sada'â: — Ĩma aipẽ'ẽ toi wamhã, ma'ãpé tô marĩ ĩma 'manharĩ, sena tô a hã ĩma nharĩ wamhã.

¹⁸ Ĩzawi na hã, ma'ãpé duré a'â aimorĩ tõ, ĩnhoprubzé hã te we a'â aima âri da. — Wa za a'â tô ãme nhamra, we apâ a hã asina isirizéb u! — Ãne te 'Re ihâimana u'âsi mono hã asa tãma tinha.

¹⁹ Tawamhã Gidiã 'ripara u sébré wamhã, ma tô pone'ẽrebâ zéré uzé 'ra na dasa hã 'manha. Ma tô duré i'u'ẽtẽ wapu duptoi'õ na 'manha, 10 kilu na trigu zub'a na hã. Taha pari dasa te te i'manharĩ hã, ma tô si'õtõ 're tisẽ. Ma tô duré iwa'ui ré hã piza'a 'remhã tisẽ. Tawamhã dasai ré te te oto âri wamhã, ma tô Uburé Danhib'apito ma Romhuri'wa, carvariu zahâpâ isãmra ma tãma tisõ oto.

²⁰ Tawamhã 'Re ihâimana u'âsi mono ma, Hâiwa ãma Romhuri'wa ma te tãma waihu'u ãne: — Ma'ãpé ã hã ẽtẽ nhisiwi abaze nhi hã duré i'u'ẽtẽ wapu hã sa'ra na. Taha pari te za duré romnhi wa'u hã isa'wa isisiwimhã. Tawamhã Gidiã te te tãma i'ruzé hã, ma tô 'manha.

²¹ Tahawa, Hâiwa ãma Romhuri'wa, tinhib'rata wedehu te te 're i'âri hã ma tô sarõtõ hâimo. Taha 'rãsutu na ma tô romnhi hã, i'u'ẽtẽ wapu me hã ãma upi zahuré. Tawamhã ẽtẽ hawi uzâ iro'o watobro na, ma tô romnhi norĩ hã, i'u'ẽtẽ wapu me hã ãma sazu zahuré. Ãhã pari ma tô hâiwa ãma romhuri'wa zô hã oto tirobaba.

²² Tawamhã Gidiã Hâiwa ãma Romhuri'wa na te te i'madâ'âzém na hã ma tô waihu'u. Tawamhã pẽ'ẽwara wa, te ãne 're sadari: — Uburé Danhib'apito, ite 'Re ihâimana u'âsi mono! Wa hã wa tô Hâiwa ãma Romhuri'wa hã 'madâ, 'râwi pesere!

²³ Tane nherẽ, Uburé Danhib'apito, ma te ãne duré ãma tãma wa'rã: — Aipahi tõ. Aima rowẽ di za. Duré atâ'â õ di za.

²⁴ Tawamhã tame Gidiã, ma tô ẽtẽ za'ra hã 'manha, Uburé Danhib'apito ma, marĩ zatazéb da hã. Tawamhã ma tô sisi, “Uburé Danhib'apito ãma si rowẽ za'ẽne hã”. Tawamhã ãhã na zama te zahadu ẽtẽ za'ra Abi'ézéhé siré norĩ te, 'ri nho'u Opra na isisi ãma hã 're sa.

²⁵ Tawamhã tô taha mara na, Uburé Danhib'apito, te Gidiãhã ma hã tinha ãne: — Aimama te powawẽ iba'õmore, duré ihâiba amo 7 na ãma iwahu me hã ma'ãpé saprõni zahuré na. Tawamhã te za duré aimama te ihâiba'õ Baau, romhâibarĩ hã ipru. Ihâiba'õ Asera wede na ipoto 'manharĩ isababa 're isa mono zama te za duré i'marõwĩ.

²⁶ Taha parip si te za Uburé Danhib'apito, ate 'Re ihâimana u'âsi mono ma, ẽtẽ nhisi ãma ẽtẽ za'ra tãma i'manha, danhoprubzé zatazéb da hã. Taha pari te za duré maparane ãma powawẽ iba'õmore hã isisiwi izatare, 'Re ihâimana u'âsi mono ma, ihâiba'õ Asera wede na ipodo hã za i'marõwĩrĩ na ãma ro'o da.

²⁷ Tawamhã Gidiã tite romhuri'wa norĩ 10 na ihâiba za'ra norĩ zô hârâ wamhã, ma tô Uburé Danhib'apito te te tãma inharĩzéb zarina 'manha. Tane nherẽ, tisiré norĩ ma, duré a'uwẽ 'ri nho'õmo ãma 're ihâimana za'ra mono norĩ ma, pahi zép te, ma tô bâtâ upana mara wapsi 'manha.

²⁸ Tawamhã 'ri nho'õmo ãma aibâ norĩ 're ihâimana za'ra mono robza'rã ré utu za'ra wamhã, ma tô Baau romhâibarĩ sipru hã, Asera wede na ipoto zabzé isime hã, duré maparane ãma powawẽ iba'õmore zada hã siwi 'madâ, ẽtẽ za'ra tame Gidiã te te i'manharĩ nhisiwimhã.

²⁹ Tahawa te ãne 'râwi sisadanharĩ za'ra: — E 'wa ma te merẽ ãne hã 'manha. Tawamhã te te waihu'u za'ra da, sô sõpré mono wa, ma tô oto siwi upsibi me, Zoasihi 'ra, Gidiã te te ãne hã i'manharĩ na.

³⁰ Tahawa te Zoasihi ma nharĩ za'ra ãne: — Ai'ra ma'ãpé we rob u wazere! Dâ'âre hâ! E marĩ wa. Ta hã ma tô Baau romhâibarĩ hã pru. Ma tô duré Asera wede na ipoto zabzé hã time.

³¹ Tane nherẽ, Zoasi, uburé sada isi'rã'õtõ norĩ ma, ma tô tãma nharĩ za'ra ãne: — E a norĩ wa'wa hã ma tô Baauhu 'wawimhã asimi'rãmi za'ra wa'wa. Ni'wa i'wawi simi'rãmi wamhã, te za dârâ, ãma awẽ õ ré. Duré tô Baau sena ihâiba'õ waihu'u pese wamhã, 'râwi pé si'wawimhã simapa. Oro õhõ hã waihu'u pese za, pé marĩ te te 'manharĩ.

³² Tawamhã ta hawimhã haré ma tô Gidiã hã oto Zerubau na da te 're sisi za'ra. E marĩ wa. Zoasi te te nharĩ wa ãne: — Tô Baauhu si 'râwimhã pé si'wawi simi'rãmi. Oro õhõ ma, romhâibarĩ da te mei õm ne.

³³ Tawamhã uburé midiãnita norĩ, amalequita norĩ, duré a'uwẽ rop si 're irosa'wari mono ãma 're ihâimana za'ra mono norĩ hã ma tô si'rã'õtõ. Uburé si'rã'õtõ wamhã, ma tô panho'u Zodã pa na saprĩ za'ra. Tahawa, ma tô duré sima 'ri nhoré za'ra, Zezereu na romharé nhisi wa.

³⁴ Tawamhã Uburé Danhib'apito pẽ'ẽzani, Gidiãhã wamhã, ma tô ãzé. Tahawa ma tô pone'ẽrebâ õmo na danhimnhihârâzé isadawazare hã dazô hârâ. Ãhã wa, ma tô Abi'ézéhé nhib'a'uwẽ norĩ hã itẽme ai'rã'õtõ.

³⁵ Tawamhã Gidiã, ma tô dama rowasu'u 'wapéi'wa norĩ zama hã 'mazatõrĩ za'ra, Manaséhé nhihudu norĩ zô, Aséhé nhihudu norĩ zô, Zébulõhõ nhihudu norĩ zô, duré Naftalihi nhihudu norĩ zô, hârâ za'ra da. Tahawa ta norĩ zama ma tô duré itẽme ai'aba'ré, ime si'rã'õtõ da.

³⁶ Tawamhã Gidiã, te 'Re ihâimana u'âsi mono ma tinha ãne: — 'Re ihâimana u'âsi mono, wa ĩsima wẽ, sena na te waihu'u da, ĩhâimana u'âbâmhã Izaraéu nhihudu norĩ hã anho'reptu da, iropisutuzéb zarina.

³⁷ Wẽ di tô. Tane wamhã, ãne wa za 'manha pé. Suru na pone'ẽrebâ zéré hã wa za 'maza'ra, amnho trigu, wa te 're ipré'é za'ra mono zé wa. Tawamhã awẽm na mararé pone'ẽrebâ zéré si atébré te te di'i wamhã, i'uirĩ na ti'a si te te di'i õ wamhã, wa za waihu'u, za Izaraéu nhihudu norĩ, ĩhâiba u'âbâmhã i'anho'reptu na hã, iropisutuzéb zarina.

³⁸ Tawamhã te te inharĩzéb zarina, ma tô tô tiromhâiba. Awẽm na mararé Gidiã utu wamhã, ma tô pone'ẽrebâ zéré hã wati, atébré zô. Tawamhã ta hawi â i'a'a na ma tô piza'a 'renho'a 'reptõ hã ãma 'masisi.

³⁹ Ãhã wa, ma tô duré 'Re ihâimana u'âsi mono wi tiwi rowaptẽ ãne: — Ma'ãpé ĩzada asahi tõ. A'â duré bâdâ hã ĩma sa'ré na, misi irẽme ma, te duré aiwi waptẽrẽ da. Ma'ãpé ĩzawi na hã ĩma waprosi, niha zô pone'ẽrebâ zéré a'â duré te sa'ra na sahu da, pé pone'ẽrebâ zéré si ãhã na hã te te waihi ãna hâimana zô, pé duré oto ti'a si te te waihi zô, atébré hã.

⁴⁰ Tawamhã 'Re ihâimana u'âsi mono taha mara na ma tô tô ãne hã 'manha. Ãhã wa, te pone'ẽrebâ zéré si 'ré na hã tihâiba. Tahawa, ma tô duré atébré, ti'a si te te ubu oto.