Zuize 5 - ꞌRe Ihâimana Uꞌâsi Mono Zadawa Wasuꞌu

Débora norĩ, Baraquihi me, 'Re ihâimana u'âsi mono ãma, tinho're na iwata zahuré zé wasu'u

¹ Tawamhã tô taha bâtâ na Débora norĩ, Baraqui, Abino'ãhã 'ra me ma tô ãne tinho're zahuré:

² Uburé Danhib'apito ãma 're wawata za'ra wa'aba mono! Izaraéu nhihudu norĩ, si'wapé za'ra da, ma tô sima waprosi za'ra. Ma tô duré rowẽ sina 're sipisutu za'ra.

³ Apito norĩ, duré dama i'rãnho'õmo norĩ, ma'ãpé asiwi ĩwapari aba! Ãhã na wa za ta'a, danho're wa ropta'azé hã. Wa za duré ĩnho're, Uburé Danhib'apito, Izaraéu nhihudu norĩ te 'Re ihâimana u'âsi mono ma!

⁴ Uburé Danhib'apito, ẽne Se'i na isisi hawi we aiwatobro wamhã, duré Edõ ti'ai hawi we aimorĩ wamhã, ma tô ti'a hã sãsã. Tã ma tô duré hâiwa hawi we asa'wa. Ĩhe, hâiwa'a hawimhã, ma tô tô â sa'ẽtẽ na we asa'wa.

⁵ Uburé Danhib'apito, Izaraéu nhihudu norĩ te 'Re ihâimana u'âsi mono nho're, ma tô ẽtẽ 'rãihâ norĩ hã popo, Sina'i ẽtẽ tede'wa nho're.

⁶ Tawamhã Sãga, Anatehe 'ra 're morĩ ré hã, duré Zaéu 're morĩ ré hã ma tô bâdâdi na 're idanomro pese mono zé dasiwi rẽme pese ni. Tahawa we ãma 're idanomro mono hã ma tô bâdâdi wãi wa, 're dasipa za'ra, aimawi bâdâdi na 're danomro mono da.

⁷ Tahawa, Izaraéu nhihudu norĩ te, 'ri wa'õtõ norĩ ãma hã ni'wai õ di. Baba na ma tô 're simasa, a hã Débora, Izaraéu nhihudu norĩ na ne, za 're i'aihâimana mono da hã we i'asihâi'rézéb u.

⁸ Izaraéu nhihudu norĩ, ihâiba'õ norĩ si te te sima ipisutu za'ra zarina, ma tô ite za'ra ti'ai wa'õtõ nho'õmo 'remhã dasi'wapé hã 're pusi. Ãhã wa, Izaraéu nhihudu si'aibâ norĩ 40 miu na ihâiba za'ra hã, danho'utu ubuzé hã duré isi'uwazi 'rã'wa hã te te siré 're 'wasari mono õ di.

⁹ Izaraéu nhihudu norĩ wada'uri'wai ãma wa ãma 're ĩsiri u'âsi za'ra, duré a'uwẽ norĩ to sina 're isipisutu za'ra mono norĩ ãma. Uburé Danhib'apito ãma si 're wawata za'ra wa'aba mono!

¹⁰ Tawamhã a norĩ wa'wa, awaru po'repore i'a na 're i'asa'rei wa'aba mono hã, ibazadâ na 're i'asimroi wa'aba mono hã, duré aipara na si 're i'anomro aba mono norĩ hã ma'ãpé ãne na ãma dama 're rowasu'u za'ra wa'aba mono.

¹¹ Ma'ãpé asiwi wapari aba! Robruru'u'wa norĩ, â zô ab're ihâimana za'ra te te siwi i'uirĩ, Uburé Danhib'apito te te da'ãma i'ai'utézém na hã, te te sima robzanhamri za'ra, duré Izaraéu nhihudu norĩ te te da'ãma i'ai'uté za'ra zém na hã. Tawamhã Uburé Danhib'apito nhib'a'uwẽ norĩ hã, ma tô si'ra za'ra, 'ri nho'õmo 'ridawa za'ẽtẽ u hã.

¹² Aiwahutu, Débora. Ma'ãpé aiwahutu! Tô aiwahutu, asõ're da, danho're na! Baraqui, Abino'ãhã 'ra, ma'ãpé aiwahutu! Airob u simroi mono, dasi'wapéi wa, da te aima iwaibu isimasam norĩ hã.

¹³ Tawamhã isi'mairẽme norĩ te te si'ra za'ra wa, dama ipire za'ra norĩ u si'aba'réi wamhã, ma tô Uburé Danhib'apito nhib'a'uwẽ, we ĩtẽme ai'aba'ré, isiptete uptabi norĩ da, hâimana za'ra da.

¹⁴ Tawamhã ta norĩ, Efraĩ hawi wairébé wamhã, ma tô ai'aba'ré, ẽtẽ siwa'aba wa ti'ai haré u, Bẽzamihĩ nhihudu norĩ zarina, duré isib'a'uwẽ zarina zama. Duré Maqui hawimhã ma tô dasi'wapéi 'manharĩ'wa 'madâ'â'wa norĩ hã si'ra za'ra. Tawamhã duré Zébulõ hawimhã danhib'ihâ'a hã ma tô we ai'aba'ré.

¹⁵ Tawamhã Isacaha hawi danhib'apito norĩ hã ma tô Déboraha siré ai'aba'ré. Ĩhe, duré Isacaha nhihudu norĩ a'uwẽ hã ma tô Baraquihi siré zama ai'aba'ré. Ta norĩ hã ẽtẽ nhi'riti wa romharé u ma tô isiré ai'aba'ré. Tane nherẽ, Rubẽhẽ nhihudu norĩ sima isipo hã, ma tô timreme na hã si'wapé za'ra. Tahawa duré ta norĩ hã dame si'aba'réi õ di.

¹⁶ E marĩ da, ma tô pone'ẽrebâ õme 're simasa mono da hã ãma irowairébé za'ra wa'wa. E te za tô te te 're i'madâ'â za'ra mono norĩ hârâ hã te te 're wapari za'ra za. Ĩhe, Rubẽhẽ nhihudu norĩ sima isipo hã, ma tô timreme na si'wapé za'ra. Tahawa ta norĩ hã dame si'aba'réi õ di.

¹⁷ Gadihi nhihudu norĩ ma tô Zodã pa bâtâ pusizém niwĩ pa zara niwĩ tihâimana u'âsi za'ra. Duré Dãhã nhihudu norĩ, du si ro 're isa'wari mono ãma ma tô tihâimana u'âsi za'ra. Tawamhã duré Aséhé nhihudu norĩ â poré ãma ma tô mazahâri za'ra. Tahawa ma tô supara zada'ré ãma tihâimana u'âsi za'ra.

¹⁸ Tane nherẽ, Zébulõhõ nhihudu norĩ, Naftali nhihudu norĩ me ma tô romnhimimnhasi nherẽ, a'ubuni wi dasi'wapé na tihâimana za'ra.

¹⁹ Tawamhã apito norĩ sô isi'aba'ré norĩ hã, ma tô 'wapé za'ra, sipti Megido na isisi 'rata, Ta'anaqui na 'ri nho'õmo nhisi 're ihâimana mono ãma. Tawamhã Cana'ã ãma apito norĩ ma tô 'wapé za'ra. Tane nherẽ, ta norĩ, tinhitob'ru norĩ wi ẽtẽ waipo prã prata 'manharĩ hã duré isimarĩ za'ra hã te te tiwi 'wasari õ di.

²⁰ Wasi norĩ zama te ãhã wamhã, ai'wapé za'ra. Hâiwa na 're siwa'rãmi za'ra mono ré, ma tô Sisera siwi 'wapé.

²¹ Panho'u Quisõ na isisi, duréi pese 're isa'wari mono â pré wa, i'âpusi mono ma tô danhitob'ru norĩ hã te te sate. Ãhã wa, wa hã te ropãrĩ mono sina awa'awi na ĩpẽ'ẽ nhiptete na wa za 're mo, wa za tô 're mo!

²² Tawamhã awaru sisari na 're sisa'rei mono wa, ma tô tinhimi'wa na hã te te ti'a zub za'ra.

²³ Uburé Danhib'apito ma, hâiwa ãma romhuri'wa te tinha ãne: “'Ri nho'u Merozi 're, 're ihâimana za'ra mono norĩ ma, ipipa si tãma pisutu za'ra na. E marĩ wa. Ta norĩ hã isiptete norĩ zada, Uburé Danhib'apito te te siwi pawaptob da hã, si'aba'réi õ wa.”

²⁴ Pi'õ Zaéu, Hébé queneu mro ma hã tãma rowẽ uptabi di, uburé pi'õ norĩ tisiré nhipai u. Taha ma hã irowẽ uptabi tô, romhâ 'manharĩ na 'ri 're, uburé pi'õ norĩ 're ihâimana za'ra mono nhipai u hã.

²⁵ Tawamhã Sisera te â si waptẽ. Tane nherẽ, abaze hâiwa'u si ma te tawamhã tãma tisõ. Abaze hâiwa'u top si ma tô tãma ti'â, hâsizé isa'ẽne iwaipo iwẽ uptabi wa.

²⁶ Tahawa, tinhib'rata hâiba amo niwĩ, ma tô wede 'rã'wa hã ti'â. Tinhib'rata hâiba amo niwĩmhã ma duré romhuri'wa norĩ nhimiromhurizé matéru hã ti'â. Tawamhã taha na Sisera te te ãma 'rã nhiptâ'â wamhã, ma tô 'rãi hâpâ pese. Ma tô u'rata 'repu'u. Ma duré 'rãi pru pese.

²⁷ Tawamhã ta hã pi'õi para ãma ma hi'rãtitõ nhamra. Taha pari dâ'â siromo waptã'ã wa, ma tô taha haré oto nomro.

²⁸ Tawamhã Siseraha na tinhorõwa zanela 'ri zadazâri hawi ma tô sô rob'madâ. 'Ri zadazâri 'wawi wa'ra babarãi hawi taré te te sô rob'madâ'â baba wa, te tinha ãne: “E tihai wa, ma tô ite wedewara zapore zô tirowaptâ'â hâ upta, we ãwa iwisi da hã. E tihai wa, te duré ite awaru norĩ hã atãma hâire we ai'aba'ré.”

²⁹ Tawamhã ime ihâimana za'ra i'rãi waihu'u pese norĩ, nasi te te ãma sada'âbâ za'ra wamhã, ma tô nasi timreme na ãma sima sahu ãne, te te ãma iromnomrizém na hã:

³⁰ “Ãté tiha te te iwaibu za'ra na te ãma sima sipo'o zahadu ãhã na hã, dasi'wapéi 'manharĩ'wa si'aibâ norĩ ma misi pi'õ hã, niha wamhã maparane aibâ mono bâ hã, duré Siseraha ma zazahâ ihâi waipo na hã, duré ihâ siwamnarĩ na hã pi'õ dama i'rãnho'õmo butu ubuzéb da hã.”

³¹ Uburé Danhib'apito, uburé asitob'ru norĩ si'utõrĩ. Tane nherẽ, asiwaihu'u norĩ te te 're irowa'a pese za'ra mono da si iwẽ hã, bâdâ 're pusi mono wi ro'o nhiptete na te te 're irob'uiwẽ mono ne hã! Tawamhã ti'ai wa'õtõ nho'õmo 'remhã 40 na wahum na, rowẽ na si ma tô oto 're romhâimana.