Zuize 4 - ꞌRe Ihâimana Uꞌâsi Mono Zadawa Wasuꞌu

Débora norĩ wasu'u, Baraquihi me

¹ Tawamhã Eudi dâ'â parimhã, Izaraéu nhihudu norĩ, ma tô duré Uburé Danhib'apito wi apâ 're wasété za'ra.

² Tahawa Uburé Danhib'apito, Cana'ã ãma apito Zabĩhĩ ma, ma tô tãma hâiba za'ré za'ra, te te ãma ai'uté za'ra da hã, Izaraéu nhihudu norĩ ãma. Ta hã Hazo na 'ri nho'õmo nhisi ãma dama i'rãnho'u. Taha te dasi'wapéi 'manharĩ'wa norĩ nhib'ihâ'a Sisera na isisi, Harosete-Hagozĩ ãma 're ihâimana mono.

³ Tawamhã Zabĩhĩ te isi'uwazi tete 'manharĩ na wedewara zapore awaru te te 're isari za'ra mono 900 na te tãma tihâimana za'ra. Duré 20 wahum na, ma tô Izaraéu nhihudu norĩ ma, wasété uptabi na sada 're ihâimana za'ra mono zarina, te te tãma 're ab'manharĩ wasété, ãma 're siwamri za'ra mono ãna. Tahawa ma tô Izaraéu nhihudu norĩ, Uburé Danhib'apito wi mreme 'rãihâ na tiwi rowaptẽrẽ za'ra, te te 're pawaptob za'ra mono da hã.

⁴ Tawamhã Débora, Lapidotihi mro, 'Re ihâimana u'âsi mono zadawa 'mahârâ'wa na te 're hâimana. Ta hã ma tô duré Izaraéu nhihudu norĩ ma, rowairébé'wa sipi'õ hã te te 're a'madâ'â, we iromhâimana mono zém na hã.

⁵ Tawamhã Rama norĩ wa'wamhã, Bétéu me te norõsu ne hã iwa'wab zahuré 're sa, Efraĩ ãma ẽtẽ niwĩmhã. Tawamhã taha zahâpâ Débora 're simasisi mono wamhã, ma tô Izaraéu nhihudu norĩ itẽme 're nomro, marĩ na romreme te te itẽme 're i'wasari mono na te te tãma 're arowairébé mono da hã.

⁶ Tawamhã nimahã bâtâ na ma tô Baraqui, Abino'ãhã 'ra zô hâ, Naftalihi nhihudu norĩ nhipti'ai ãma 'rinho'u Quedesi na isisi ãma 're ihâimana mono zô. Sô hârâ wamhã, ma tô ãne tãma tinha: — Ãne ma tô Uburé Danhib'apito, Izaraéu nhihudu norĩ te 'Re ihâimana u'âsi mono we aima ti'ru: “Ma'ãpé, Naftalihi nhihudu si'aibâ norĩ duré Zébulõhõ nhihudu si'aibâ norĩ zama 10 miu na pisutu za'ra na. Taha parimhã, te za isimroi mo, Tabo na ẽtẽ nhisi u.

⁷ Tawamhã wa hã wa za we saprõ, Zabĩ te dasi'wapéi 'manharĩ'wa norĩ nhib'ihâ'a Sisera hã, õ pa Quisõ na isisi u te te ai'wapé da, a hã. Tawamhã ta hã te za wei mo tô, tite wedewara zapore isi'uwazi tete 'manharĩ norĩ na, tite dasi'wapéi 'manharĩ'wa norĩ me. Tane nherẽ, wa za wa hã asib'ratamhã aima hâiba nho, ãma ai'uté da.”

⁸ Tawamhã Baraqui te Déboraha ma tinha ãne: — Ĩme aimorĩ wapsi, wa za mo tô. Duré ĩme aimorĩ õ wamhã, ĩzama ĩmorĩ da hã mare di za.

⁹ Tawamhã Débora, ma te ãma sada'â ãne: — Wẽ di tô! Wa za tô ãma asiré mo. Tane nherẽ, za wa te da'ãma i'ai'utézé hã asiptete zarinai õ di za. E tihai wa. Uburé Danhib'apito, pi'õ nhib'rata za Sisera te te tãma sõmri wa. Tawamhã Débora, ma tô mo Baraquihi siré, Quedesi na 'ri wa'õtõ nhisi u.

¹⁰ Tawamhã Baraqui, Zébulõhõ nhihudu norĩ a'uwẽ, Naftalihi nhihudu norĩ a'uwẽ me Quedesi u da, te te pisutu za'ra wamhã, ma tô aibâ norĩ 10 miu na isiré ai'aba'ré. Tawamhã Débora ma tô duré ime mo.

¹¹ Tahawa, queneu Hébé, tisiré norĩ wi ma tô ãma aipo'o za'ra, Mozésihi ãrewa Hobabehe nhihudu norĩ na hã. Ta hã ma tô romhâ 'manharĩ na 'ri hã sima sõré, Za'anani na romnhisi ãma carvariu na wede nhisi 'rata, Quedesi 'rata 're ihâimana mono ãma.

¹² Tawamhã Sisera hã ma tô dasiwi po're pu'u ni, Abino'ãhã 'ra Baraqui, ẽne Tabo na isisi u imorĩ na hã.

¹³ Tawamhã Sisera, wedewara zapore 900 na itẽme ãma dasi'aba'ré da hã, duré uburé pese aibâ norĩ, itẽme si'aba'ré da hã, ma tô sô tihârâ za'ra. Tahawa, Harosete-Hagozĩ hawimhã, panho'u Quisõ na isisi u ma tô te te danhimro.

¹⁴ Tawamhã Débora, te Baraquihi ma tinha ãne: — Ãhã na awa'awi te za aimo. E tihai wa. Ãhã na te za Uburé Danhib'apito, asib'rata Sisera hã aima tisõ. Duré Uburé Danhib'apito te za asõwamhã tihâimana siro za! Tawamhã Baraqui, tite aibâ norĩ 10 miu na ihâiba norĩ ré ma tô Tabo ẽtẽ hawimhã oto si'ra.

¹⁵ Tawamhã Baraqui, tite da'wapéi 'manharĩ'wa norĩ ré te te oto susi za'ra wamhã, ma tô Uburé Danhib'apito, Siseraha te dasi'wapéi 'manharĩ'wa norĩ wa'wamhã duré wedewara zapore na isisa'rei mono norĩ wa'wamhã i'rãiwaihu'u'õ na tãma rob'manharĩ za'ra. Tahawa Sisera, tite wedewara zapore hawimhã ma tô si'aba'ré na si'ra. Te te si'rai wamhã, ma tô para na oto dawi wara, simani da.

¹⁶ Tane nherẽ, Baraqui wedewara na dasi'wapéi 'manharĩzéb zarina, duré dasi'wapéi 'manharĩ'wa norĩ zarina ma tô Harosete-Hagozĩ u te te 'rãza'õtõ pibu za'ra. Tahawa uburé Siseraha te dasi'wapéi 'manharĩ'wa norĩ hã ma tô dasiwi uprosi pese ni, sib'ézé 'wapa na. Tahawa 'masi'atarẽme õ di, ihâiba ré na hã.

¹⁷ Tane nherẽ, Sisera ma tô Zaéu, Hébé queneu mro nhorõwa u wara, Hazo ãma apito Zabĩ, Hébéhé nhib'a'uwẽ norĩ me rowẽ na siré 're hâimana za'ra mono we te.

¹⁸ Tawamhã Zaéu, Sisera te te sõpẽtẽ da, 'ri para hawi ma tô watobro. Watobro wamhã, ma tô ãne tãma tinha: — Ĩnhib'apito, ma'ãpé asébré 'ri para u. Aipahi tõ. Tahawa oto romhâ 'manharĩ na 'ri para u sébré wamhã, ma tô Zaéu hã, waptâzém na suwa, Sisera hã.

¹⁹ Tawamhã Sisera te tiwi rowaptẽ ãne: — Ma'ãpé ĩzawi na hã â suru na we ĩma a'âri. 'Rubu uptabi di. Tahawa romhâ 'manharĩ na ub'rẽ abazei hâi wa'ui ré hã te te 'ridawa wamhã, ma tô tãma tisõ, te te hâ'rẽne da. Taha pari ma tô apâ hã upsi.

²⁰ Tawamhã Sisera te duré 'ri tede'wa sadawa uwati ãne: — Ma'ãpé 'ridawa ãma asãmra, ni'wa we te te iro'razâri, 'ripara ida'maihâimana zô te te i'asadanharĩ ma, asimrami da, ni'wa ihâimana õ na hã.

²¹ Tawamhã Sisera wasutu uptabi wa, ma tô aptâ hã azâri pese. Taha ré, ma tô Zaéu hã matéru ti'â, duré romhâ 'manharĩ na 'ri nhana'rata tétézéb zama. Taha pari ma tô para nhisutu atãma hâire ãzé, 'ripara u. Tawamhã ma tô ãma u'rata nhiptâ'â. Tahawa, ma tô ti'ai u ãma u'rata tété. Tahawa, ma tô õne haré oto dârâ.

²² Tawamhã Baraqui, Sisera zarina 're iwara oto wisi wamhã, duré Zaéu te te sõpẽtẽ da, watobro wamhã, ma tô tãma tinha ãne: — We aimorĩ, aibâ zô we i'airĩtĩ mono hã te aima hâi'ré da. Tawamhã Baraqui, isiré oto morĩ wamhã, ma tô Sisera ti'ai wa dâ'â haré inomro hã sõpẽtẽ, wede 'rã'wa na u'rata nhiptâ'â haré.

²³ Tawamhã tô taha bâtâ na ma tô 'Re ihâimana u'âsi mono, Izaraéu nhihudu norĩ ma sõmri za'ra, Zabĩ, cananeu norĩ nhib'apito ãma te te ai'uté za'ra da.

²⁴ Tawamhã Izaraéu nhihudu norĩ, ma tô apito Zabĩhĩ ma, i'wapé na te te tãma 'rãpẽtẽ u'âsi za'ra, te te siwi i'uprosi pese zéb u.