Zuize 3 - ꞌRe Ihâimana Uꞌâsi Mono Zadawa Wasuꞌu

A'uwẽ norĩ, Cana'ã ãma 're isi'ubumroi mono zé wasu'u

¹ Tawamhã Uburé Danhib'apito, nima norĩ a'uwẽ ti'ai hawi te te sani za'ra õ di, Izaraéu nhihudu norĩ te te a'â pibu za'ra da, Cana'ã ãma dasi'wapé na zahadu dame ihâimana za'ra õ norĩ hã.

² Dasi'wapé na uburé Izaraéu nhihudu norĩ ma, nasi a'â ãma tãma sisanho za'ra da, ma tô ãne hã 'manha, zahadu dasi'wapé na ãma dame ihâimana za'ra õ norĩ ma.

³ Tawamhã a'uwẽ norĩ, ti'ai hawi da te isate mono õ norĩ hã, ãne: Filisteu norĩ te, 5 na 'ri nho'õmo ãma 're ihâimana za'ra mono norĩ hã, uburé cananeu norĩ hã, Sidõniu norĩ hã, duré heveu norĩ ẽtẽ nhisi Libanu ãmamhã, Baau-Hermona na ẽtẽ nhisi hawi, Hamati na romnhisi hâimo inomro u hã.

⁴ A'uwẽ mono bâ te tô ti'ai wa 're si'ubumroi u'âsi, Izaraéu nhihudu norĩ ma, niha na ipibu za'ra zé tãma hâimana za'ra da, Uburé Danhib'apito te te 'madâ'â za'ra da, Mozésihi ma tinhimiroti te te tãma isõmri hã te te 're wapari pese za'ra mono zô, niha wamhã mare zô.

⁵ Ãne ma tô Izaraéu nhihudu norĩ, cananeu norĩ wa'wamhã, hitita norĩ wa'wamhã, amoreu norĩ wa'wamhã, perizeu norĩ wa'wamhã, heveu norĩ wa'wamhã, duré zebuzeu norĩ wa'wamhã 're hâimana za'ra.

⁶ Tawamhã Izaraéu nhihudu norĩ, ã hã a'uwẽ norĩ na oto 're mro za'ra mono wamhã, ma tô ite za'ra ihâiba'õ ãma isiré oto ãma 're wata za'ra.

Otoniéhé wasu'u

⁷ Tawamhã Izaraéu nhihudu norĩ, ma tô Uburé Danhib'apito, tite 'Re ihâimana u'âsi mono na oto 're po're simrami pese za'ra. Duré tiwi 're wasété za'ra mono wamhã, ma tô cananeu norĩ te ihâiba'õ norĩ ãma dame ãma 're wata za'ra oto, Asera na ihâiba'õ nhisi ãma zama.

⁸ Tahawa, Uburé Danhib'apito, sada sahi za'ra wamhã, ma tô Mezopotãmia ãma apito Cuchã-Risata'ihi ma, hâiba za'ré za'ra, te te ãma ai'uté za'ra da. Tahawa Izaraéu nhihudu norĩ nhisiwip si, ma tô apito hã 're hâimana, 8 na wahub 'remhã.

⁹ Tawamhã Izaraéu nhihudu norĩ, ma tô Uburé Danhib'apito wi mreme 'rãihâ na te te 're rowaptẽrẽ za'ra. Tahawa, ma tô aibâ itẽme 'mazatõrĩ za'ra, te te sõ'reptu za'ra da hã. Aibâ Otonié, Quenazihi 'ra, Calebihi no sipodo hã.

¹⁰ Tawamhã Uburé Danhib'apito pẽ'ẽzani iwa sébré wa, ma tô Izaraéu nhihudu norĩ ma si'i'rãnho'u. Tawamhã Otonié, ma tô dasi'wapéi u watobro. Watobro wamhã, ma tô Uburé Danhib'apito hã pawapto, Mezopotãmia ãma apito na te te ai'uté da hã.

¹¹ Tawamhã 40 na wahub 're, ma tô rowẽ si ro hã daré nomro, Otonié Quenazihi 'ra idâ'âzéb u.

Eudihi wasu'u

¹² Tawamhã Otonié dâ'â parimhã, Izaraéu nhihudu norĩ hã ma tô duré apâ Uburé Danhib'apito wi tiwi 're wasété za'ra. Ãhã wa, ma tô Uburé Danhib'apito, Moabi ãma apito Égrõhõ ma, isiptetezé tãma tisõ, siptete uptabi na isipai u za'ra 're hâimana mono da.

¹³ Tawamhã Égrõ, ma tô amonita norĩ hã duré amalequita norĩ hã sima 'rã'õtõ. Ãhã wa, ma tô Izaraéu nhihudu norĩ hã 'wapé za'ra. Tahawa, ma tô Zerico hã siwi ti'â, 'rinho'u norõwede ré hã.

¹⁴ Tawamhã Izaraéu nhihudu norĩ, ma tô Égrõhõ nhib'ratamhã 're hâimana za'ra, 18 na wahub 're.

¹⁵ Tahawa Uburé Danhib'apito wi, Izaraéu nhihudu norĩ, mreme 'rãihâ na duré apâ te te tiwi rowaptẽrẽ na sahu za'ra wa, ma tô aimawi aibâ hã duré itẽmemhã 'mazatõrĩ za'ra, te te 're i'anho'reptui mono da hã. Aibâ, Eudi, Geraha 'ra, Bẽzamihĩ nhihudu hawi a'uwẽ hã. Eudi hã isimi'e. Tawamhã Izaraéu nhihudu norĩ, ma tô dapawa'âbâzé sipo'ore tãma 'ru za'ra, Moabi ãma apito Égrõhõ ma, te te âri da hã.

¹⁶ Tawamhã Eudi dasi'wapézé i'wa pa i'wa si'uiwa hã ma tô 'manha, 1 metru aiwa ãma isipo'o na i'wa pibuzém na. Tawamhã ta hã ma tô ti'uza 'rowi ti'awasisizém na ãma wasisi, ti'a're nhimire niwĩ.

¹⁷ Taha pari, ma tô rob'uiprazé dama i'rãnho'õmo ma, da te 're ipo'o za'ra mono hã tãma ti'â, apito Égrõ aibâ ihâipese ma.

¹⁸ Tawamhã te te tãma sõmri pari, ma tô Eudi, ro'wapéi'wa norĩ oto satõrĩ za'ra apâ.

¹⁹ Tane nherẽ, Eudi apâ ma tô sina siri ẽtẽ 'manharĩ na romhâiba Gilga na romnhisi 'rata 're isimasa mono zéb u. Tahawa, tame ma tô apito ma tinha ãne: — Apito, marĩ iwaihu'u'õ te aima iwasu'u da hã te ĩma tihâiba. Tawamhã apito ite 'ri're wa'wa hawi uburé dawairébé da hã, ma tô dama rob'ru. Tahawa isadawa para ma tô uburé pese tawairébé ni, rob u hã.

²⁰ Tawamhã apito rowa'ro wa, te 'ri zahâpâ 're isimasisi mono zéb ãma nhamra. Tawamhã Eudi 'râwi itẽme wisi wamhã, te ãne tãma tinha: — 'Re ihâimana u'âsi mono mreme te aima iwasu'u da hã te ĩma tihâiba. Tawamhã apito ma tô hâiwi za.

²¹ Tahawa, Eudi tinhimi'e niwĩ dasi'wab'ézé i'wa pa, ma tô ti'a're nhimire niwĩ tisi'awasisizém na te te ãma iwasi hã waze. Tawamhã taha na ma tô Égrõ hã ãma nomozapu'u. Ãhã wa, ma tô tãma 'wa'mazébré pese.

²² Tawamhã duré te te ãma wa'réi wamhã, ma tô sib'ézé 'wapa iséme u hã ãzé. Tahawa i'wa hã ma tô 'wa upsi, Eudi, apito di'i hawimhã te te 'wa wazere õ wa. Sib'ézé 'wapa, ma tô izai'u hã 'wa 'rãsutu watobro.

²³ Tawamhã õne haré, ma tô 'ridawa hã iré tété, Eudi hã. Taha pari zanela 'ri zadazâri na oto watobro wamhã,

²⁴ ma tô oto mo. Tawamhã romhuri'wa norĩ, morĩ za'u isihudu hã ma tô 'ridawa tété haré isam na siwi 'madâ. Tahawa apito tisai'rada te te sa'wari da, dasai'rata za'warizéb u isébré na ma tô ãma romnomri za'ra.

²⁵ Tahawa ma tô taré sô mapari hâ za'ra. Tane nherẽ, te te sô 'ridawa su'u za'ra õ wa, ma tô 'ridawazé hã siwi ti'â oto. Tawamhã ma tô taha na oto siwi 'ridawa. Ãhã wa, apito dâ'â siromo ti'ai u waptã'ã haré inomro na hã ma tô siwi 'madâ.

²⁶ Tawamhã Eudi, zahadu apito zô simipari za'ra ré, ma tô aimani. Tawamhã ẽtẽ 'manharĩ na romhâibarĩ wa'waibaba te te ro'razâri wamhã, ma tô mo, Seira na 'ri wa'õtõ nhisi u.

²⁷ Tawamhã Efraĩ ãma ẽne ihâimana za'ra u oto wisi wamhã, ma tô pone'ẽrebâire zéré mapure si'aibâ õmo na danhimnhihârâzé hã sô hârâ za'ra, Izaraéu nhihudu si'aibâ norĩ, te te ida'wapé za'ra da zô. Tahawa, ẽtẽ na te te ãma si'ra za'ra sina,

²⁸ ma tô ãne tãma nharĩ za'ra, Eudi hã: — We! We ĩzarina ai'aba'réi wa'aba. Uburé Danhib'apito hã ma tô aima sõmri za'ra wa'wa, asitob'ru moabita norĩ ãma i'ai'uté za'ra wa'aba zéb da hã. Tawamhã Izaraéu nhihudu norĩ ime isi'aba'ré hã ma tô moabita norĩ panho'u Zodã pa â na te te 're isaprĩ pese za'ra mono zé ro hã siwi ti'â. Tahawa da te ãma isaprĩ za'ra da hã mare di, te te dama sa'ré za'ra õ wa.

²⁹ Tawamhã dasi'wapéi wamhã, ma tô moabita norĩ dasi'wapéi 'manharĩ'wa hã dasiwi uprosi ni 10 miu na, uburé pese isiptete norĩ hã, duré isib'ru norĩ hã. Ãhã wa, ni'wa hã dawi simani waihu'u õ di.

³⁰ Ãne ma tô Izaraéu nhihudu norĩ hã moabita norĩ ãma taha bâtâ na hã ãma ai'uté za'ra. Ãhã pari, ma tô 80 wahum na Izaraéu nhihudu norĩ nhipti'ai 'remhã rowẽ si oto 're ropsa'wari.

Sãga dama i'rãnho'õmo wasu'u

³¹ Tawamhã Eudihi za'u ma tô Sãga dama i'rãnho'u Anatehe 'ra hã te te 're da'a'madâ'â. Ta hã ma tô filisteu norĩ 600 na uprosi, isi'uwazi 'manharĩ na powawẽ zusizém na. Ãne ma tô õhõ zama Izaraéu nhihudu norĩ hã te te 're anho'reptu.