Zuize 20 - ꞌRe Ihâimana Uꞌâsi Mono Zadawa Wasuꞌu

Izaraéu nhihudu norĩ, Bẽzamihĩ nhihudu norĩ me isi'wapé za'ra zé wasu'u

¹ Tawamhã ãne wa, uburé Izaraéu nhihudu norĩ, hâiwa nhimi'e niwĩ Dãhã nhihudu 're ihâimana za'ra mono hawimhã, Beseba, hâiwa nhimire niwĩ 're ihâimana za'ra mono hawim norĩ me, duré Ziliadi, bâtâ pusizém niwĩ 're ihâimana za'ra mono hawim norĩ me, ma tô Mispa na 'ri wa'õtõ nhisi ãma si'rã'õtõ. Misi dahâiba ne ma tô Uburé Danhib'apito nho'remhã si'ubumro.

² Tawamhã uburé Izaraéu nhihudu nhib'ihâ'a norĩ hã ma tô 'Re ihâimana u'âsi mono nhib'a'uwẽ norĩ isi'rã'õtõzéb ãma dame tihâimana za'ra. Tame te duré 400 miu na aibâ norĩ hã dame tihâimana za'ra, sib'ézé 'wa pa ré.

³ (Tawamhã Bẽzamihĩ nhihudu norĩ, Izaraéu nhihudu hâiba amo norĩ, uburé Mispa u te te isai'uri za'ra zém na ma tô waihu'u za'ra.) Tawamhã Izaraéu nhihudu norĩ te anharĩ za'ra ãne: — E niha, ma tô dapãrĩ danhimi'manharĩ wasété uptabi hã watobro.

⁴ Tawamhã levita, imro pi'õ, da te tiwi iwĩrĩ, te ãne tãma ãma rowasu'u za'ra: — Zibea u, ĩmro prã me wa tô aimasisi ni, Bẽzamihĩ nhihudu norĩ nhipti'ai ãma a'â wanhotõ da.

⁵ Tawamhã Zibea ãma aibâ norĩ, ma tô bara na we ĩzô ai'aba'ré, te te siwi ĩrési da. Tahawa, ma tô 'ri hã siwi uirĩ, ĩré. Ta norĩ hã ma tô sima wẽ za'ra, te te duré siwi ĩwĩrĩ da. Tane nherẽ, ĩmro prã ĩma 're ihâimana mono da si, ma tô tinhiptede hã sada 'manharĩ za'ra. Ãne wa, ma tô taha si ĩ'upana sina rosõ'õtõ, dâ'â da hã.

⁶ Tawamhã wa hã wa tô ihâiba ti'â. Te âri wamhã, wa tô te hâiba wa'õtõ. Taha pari, wa tô duré 12 na ihâiba wa'õno hã Izaraéu nhihudu norĩ wamri mono bâ ãma te tãma ropé za'ra. Ã hã a'uwẽ norĩ ma tô wate a'uwẽ 'remhã iwasété uptabi hã siwi tãma 'manha.

⁷ A norĩ wa'wa hã te uburé ãme Izaraéu nhihudu norĩ si aihâimana za'ra wa'wa. Tahawa oto wa te wasima rowairébé za'ra wa'aba, marĩ wa te wasiwi i'manharĩ za'ra zéb da hã.

⁸ Tawamhã Izaraéu nhihudu norĩ, misi aibâ iwahutu ne ma tô aihĩni pese misi haré tiwahutu za'ra. Tahawa, te simisutu nharĩ za'ra ãne, aiwapsi: — 'Ri u apâ iwasi'aba'ré da hã mare di za. Duré ni'wam norĩ wanhorõwa u iwa'maimorĩ da hã mare di za.

⁹ Tahawa oto ni'wam norĩ aibâ wa te wasiwi pisutu za'ra wa'aba, Zibea te te siwi i'wapé da hã.

¹⁰ 100 na aibâ norĩ hã 10 na iwa'õtõ na, duré niha wamhã, miu na aibâ norĩ hã 100 na iwa'õtõ na, duré niha wamhã, 10 miu na aibâ norĩ hã miu na iwa'õtõ na wa za Izaraéu nhihudu norĩ hawimhã wasiwi pisutu za'ra ni, dasa norĩ hã te te siwi ubumro da, dasi'wapéi 'manharĩ'wa norĩ ma da hã. Tawamhã dasi'wapéi 'manharĩ'wa norĩ te za Zibea ãma 're ihâimana za'ra mono norĩ ma, niha hã tãma rob'manharĩ wasété za'ra za, marĩ Izaraéu nhihudu norĩ nhipti'ai 're, siséb ãna te te i'manharĩ wasété uptabi za'ra norĩ ma hã.

¹¹ Tawamhã uburé Izaraéu nhihudu norĩ, ma tô misi dahâiba ne si'rã'õtõ, 'rinho'u Zibea te te siwi 'wapé da hã.

¹² Tawamhã Izaraéu nhihudu norĩ, romreme 'wapéi'wa norĩ hã ma tô 'mazatõrĩ za'ra, Bẽzamihĩ nhihudu norĩ tẽme si'aba'ré da hã ti'ai mono bâ. Tawamhã ma tô tãma nharĩ za'ra, ãne: — E niha hã ma tô ai'reb za'ra wa'aba nima norĩ iwasété uptabi hã siwi 'manha.

¹³ Tahawa ãhã na aibâ iwasété norĩ hã te za wama ihâiba nhomri za'ra wa'wa, wa te wasiwi uprosi da. Ãne wamhã, Izaraéu nhihudu norĩ ma rob'manharĩ wasétézé hã wa za wasiwi wazere ni. Tane nherẽ, Bẽzamihĩ nhihudu norĩ hã, tisiré Izaraéu nhihudu norĩ mreme hã te te wapari za'ra õ di.

¹⁴ Tawamhã ta norĩ hã ma tô tite za'ra 'ri nho'õmo hawimhã uburé wairé. Ãhã wa, ma tô Zibea u sitẽme sito, Izaraéu nhihudu norĩ si'mairẽme hã te te siwi 'wapé da.

¹⁵ Tawamhã tô taha bâtâ na ma tô tite za'ra 'ri nho'õmo ãma 26 miu na ihâiba na dasi'wapéi 'manharĩ'wa norĩ hã siwi waibu, isi'wa i'wa pa ré hã. Taha pari Zibea ãma 're ihâimana za'ra mono norĩ hã ma tô duré 700 na ihâiba na da te ipisutu za'ra norĩ si si'rã'õtõ,

¹⁶ isimi'e norĩ si hã. Ta norĩ hã siwa'ru powawẽ hâ 'manharĩ 're ẽtẽ na te za õne u'â misi dazéré hã te te ãma 're uwaimrami za'ra, niwamhã te te ãma 're simini za'ra mono ãna.

¹⁷ Tawamhã Izaraéu nhihudu norĩ, Bẽzamihĩ nhihudu norĩ te te i'wapé za'ra da hã, ma tô duré 400 miu na dasi'wapéi 'manharĩ'wa norĩ, dasi'wapé tãma iwaihu'u pese norĩ hã si'rã'õtõ, si'wa ré.

¹⁸ Tawamhã Izaraéu nhihudu norĩ, Bétéu ãma Uburé Danhib'apito ãma 're iwata za'ra mono zéb u ma tô ai'aba'ré. Si'aba'réi wamhã, ma tô ãne 'Re ihâimana u'âsi mono hã siwi sadanha: — E ma hã te za wate a'uwẽ norĩ imorĩ'rata na, Bẽzamihĩ nhihudu norĩ hã siwi 'wapé. Tawamhã Uburé Danhib'apito, ma te ãma sada'âbâ za'ra ãne: — Zudaha nhihudu norĩ.

¹⁹ Tawamhã awẽm na Izaraéu nhihudu norĩ oto si'aba'réi wamhã, ma tô Zibea 'rata romhâ 'manharĩ na 'ri hã sima sõré.

²⁰ Tahawa Izaraéu nhihudu norĩ, Bẽzamihĩ nhihudu te te 'wapé za'ra da iwairébé norĩ hã, ma tô Zibea nho'remhã oto simasa, te te siwi isahui ma ropibu ma.

²¹ Tawamhã Bẽzamihĩ nhihudu norĩ dasi'wapéi 'manharĩ'wa 'ri nho'õmo hawimhã ma tô tãma watobro. Tahawa mara simei õ ré, ma tô ta norĩ hã, Izaraéu nhihudu norĩ te, dasi'wapéi 'manharĩ'wa norĩ hã 22 miu na siwi uprosi.

^22-23 Tawamhã Izaraéu nhihudu norĩ, Uburé Danhib'apito ãma 're idawata za'ra mono zéb u apâ si'aba'réi wamhã, ma tô isõ'remhã ti'ru'ru, ãma ihâiwahâ pese za'ra tẽme. Tahawa ma tô ãne Uburé Danhib'apito hã siwi sadanha: — E wa za duré apâ wasina siri za'ra ni, wasisãnawã Bẽzamihĩ nhihudu norĩ, wa te 'wapé za'ra da hã. — Ĩhe. — Ãne ma te 'Re ihâimana u'âsi mono hã ãma sada'âbâ za'ra. Tawamhã Izaraéu nhihudu norĩ dasi'wapéi 'manharĩ'wai ma hã, ma tô apâ tãma rowẽ wairé. Tahawa ite dasi'wapéi 'manharĩ'wa norĩ, ma tô apâ tizabzé mono bâ simasa, imorĩ'rata na si'wapé za'ra da, isimasa mono zéb ãma.

²⁴ Tawamhã Izaraéu nhihudu norĩ, Bẽzamihĩ nhihudu norĩ maparane ãma te te 'wapé zahu za'ra da hã, te te ropãrĩ za'ra mono sina, sisõré pese na ma tô tãma mo.

²⁵ Tawamhã dasi'wapéi 'manharĩ'wa Bẽzamihĩ nhihudu norĩ, Zibea hawimhã ma tô tiwairébé na sahu za'ra. Ãhã wa, dasi'wapéi 'manharĩ'wa norĩ dasi'wapé tãma iwaihu'u pese norĩ hã isi'wa ré hã ma tô 18 miu na siwi uprosi.

²⁶ Tahawa uburé Izaraéu nhihudu norĩ, ma tô Bétéu u apâ ai'aba'ré, 'ru'ru da hã. Tawamhã tame Uburé Danhib'apito nho're hâimana za'ra wamhã, saihuri ãna, ma tô tihâimana za'ra, ãma ihâiwahâ pese za'ra zéb u. Tawamhã tinhimizama zata na ma tô tãma tinhoprub za'ra, 'Re ihâimana u'âsi mono ma, danhoprubzé ãma irowẽ za'ẽtẽ na.

²⁷ Ãhã wa, Izaraéu nhihudu norĩ ma tô Uburé Danhib'apito hã siwi sadanha. (Taha ré, te Bétéu ãma wedehâ're hã za, 'Re ihâimana u'âsi mono ẽtẽpo'o na te te ãma irob'ui'éré ré hã.

²⁸ Tawamhã Finéa, Eriazaha 'ra, Arãhã nhihudu hã ma tô dasiwi pisutu ni wedehâ're te te 're i'madâ'â mono da hã.) Tawamhã ta norĩ te te siwi isadanharĩzé hã ãne: — E wa za duré wawairébé na sahu za'ra ni, wasisãnawã Bẽzamihĩ nhihudu norĩ wa te 'wapé za'ra da hã. Niha wamhã, e wa za oto mazahâri za'ra ni. Tawamhã Uburé Danhib'apito, ma te ãma sada'âbâ za'ra ãne: — Ma! Te za i'wapé za'ra wa'wa. E marĩ wa. Wa hã wa za oto asib'rata aima hâiba nhomri za'ra wa'wa.

²⁹ Tawamhã Izaraéu nhihudu norĩ, ma tô nima norĩ tite dasi'wapéi 'manharĩ'wa, 'rinho'u Zibea zada'réi baba sima'uri sina hâimana za'ra da hã, sõré za'ra.

³⁰ Tahawa si'ubdatõ bâtâ ãma ma tô Bẽzamihĩ nhihudu norĩ te, dasi'wapéi 'manharĩ'wa norĩ da hã te te ropãrĩ za'ra mono sina, sisõré pese na apâ tãma mo, te te 'wapé za'ra da. Tawamhã dasi'wapéi 'manharĩ'wa imorĩ'rata na si'wapé za'ra da isimasam ne, ma tô Zibea nho'remhã simasa.

³¹ Tawamhã Bẽzamihĩ nhihudu norĩ dasi'wapéi 'manharĩ'wa, ma tô oto dazô wairé, romhâ prã na 'ri ahâ nhiti si'wapé za'ra da. Duré imorĩ'rata na te te siwi i'manharĩ ne, ma tô Bétéu nho'õmo bâdâdi inomro na nima norĩ pãrĩ na ãma sãna'rata za'ra, duré Zibea nho'õmo bâdâdi inomro na duré sõ'awi itehudu 're isa'wari mono na. Ãhã wa, ma tô duré 30 na siwi uprosi Izaraéu nhihudu hã.

³² Tahawa te Bẽzamihĩ nhihudu norĩ nharĩ za'ra ãne: — Iwana wa te ãma i'ai'uté za'ra ne, wa tô duré ãhã na hã ãma ai'uté za'ra ni. Tane nherẽ, te Izaraéu nhihudu norĩ hã sima nharĩ za'ra ãne: — Oto sena ne hã taré wa'uni niwĩ tãma wasi'ré za'ra wa'aba mono, wei wazarina 'ri ahâ nhiti sina pahâ za'ra da, bâdâdi u.

³³ Tawamhã ta hawi dasi'wapéi 'manharĩ'wa Izaraéu nhihudu norĩ isõ'uma tãma si'ré za'ra mono wamhã, ma tô Baau-Tama ãma sitẽme ubumro. Tane nherẽ, aibâ norĩ 'rinho'u te te siwi i'uirĩ norĩ, ma tô taha ré Zibea 'rata romharé wa isima'uri za'ra zém hawimhã si'aba'ré na wairé.

³⁴ Tawamhã Izaraéu nhihudu norĩ dasi'wapéi 'manharĩ'wa isiptete si 10 miu na ihâiba na, ma tô Zibea hã siwi 'wapé, tete uptabi na. Tane nherẽ, Bẽzamihĩ nhihudu norĩ te te sina waihu'u za'ra õ di, za da te dasiwi i'uprosizém na hã.

³⁵ Tawamhã Uburé Danhib'apito, ma tô Izaraéu nhihudu norĩ hã pawaptob za'ra, Bẽzamihĩ nhihudu norĩ dasi'wapéi 'manharĩ'wai ãma te te ai'uté za'ra da hã. Tahawa tô taha bâtâ na ma tô Izaraéu nhihudu norĩ, tinhitob'ru norĩ hã 25.100 na siwi uprosi.

³⁶ Tawamhã Bẽzami nhihudu norĩ, ma tô oto sina waihu'u za'ra, da te ãma i'ai'uté za'ra zém na hã za. Izaraéu nhihudu norĩ hã ma tô tãma si'ré za'ra, Bẽzamihĩ nhihudu norĩ ma hã. E marĩ wa. Aibâ norĩ Zibea zada'réi baba isima'uri za'ra hã te te umnhasi za'ra wa. Izaraéu nhihudu norĩ ma tô tãma si'ré za'ra, Bẽzamihĩ nhihudu norĩ te te siwi i'wapé za'ra da hã. E marĩ wa. Aibâ norĩ Zibea zada'réi baba isima'uri za'ra hã te te umnhasi za'ra wa.

Izaraéu nhihudu norĩ te te da'ãma i'ai'uté za'ra zé wasu'u

³⁷ Tawamhã ta norĩ hã ma tô Zibea nho'õmoi baba sa'ẽtẽ sisa're. Ta norĩ te te sima ropéi wamhã, ma tô 'ri nho'õmo ãma 're idahâimana za'ra mono hã uburé siwi da'uprosi.

³⁸ Tawamhã Izaraéu nhihudu norĩ dasi'wapéi 'manhari'wa, aibâ norĩ isima'uri za'ra norĩ me, ma tô pibui pese na za marĩ iwatobrozé te te iwasu'uzém na hã ãma sima rowasu'u pese za'ra ãne: Romnhizé 'ri nho'õmo nhisiwi hâimo isi'réi mono te te 'madâ'â za'ra wamhã,

³⁹ Izaraéu nhihudu norĩ a'ubuni wi rom na ihâimana za'ra hã te za we apâ sina siri za'ra, si'wapé za'ra da. Taha siwaprã Bẽzamihĩ nhihudu norĩ, Izaraéu nhihudu norĩ 30 na te te siwi simroi wẽ te, te ãne nharĩ za'ra tô: — Ĩhe. Wa tô duré ãma ai'uté za'rare ni, imorĩ'rata na nimahã na wa te ãma i'ai'uté za'ra ne hã.

⁴⁰ Tawamhã za marĩ oto ihâimanazéb da iwasu'uzé hã, ma tô oto watobro. 'Ri nho'õmo hawimhã romnhizé ma tô 're isi'réi mono na hã oto tinhana'rata. Tawamhã Bẽzamihĩ nhihudu norĩ sibabarãi u te te 'madâ'â za'ra wamhã, ma tô tãma tipẽ'ẽwara pese za'ra, uburé 'ri nho'õmo 're, 'ri norĩ uzâ te te waibui mono wa.

⁴¹ Tawamhã Izaraéu nhihudu norĩ apâ te te sina siri za'ra wamhã, ma tô Bẽzamihĩ nhihudu norĩ hã tãma tipẽ'ẽwara pese za'ra, za ropire tãma ihâimana za'ra zé hã te te sina waihu'u siromo za'ra wa.

⁴² Tahawa, ma tô sisa're a'ubuni wi, rop si 're isa'wari mono nho'õmoi baba. Tane nherẽ, dawi simani waihu'u za'ra õ di. E marĩ wa. Izaraéu nhihudu norĩ sõ'uma tiwi sito wa, duré 'ri nho'õmo hawi we isi'aba'ré norĩ zama tiwi sito wa. Tahawa, ma tô siwi uprosi.

⁴³ Tawamhã Izaraéu nhihudu norĩ tinhitob'ru te te siwi uirĩ za'ra wa, ma tô duré isarina ai'aba'ré, simizahâri za'ra ãna. Tahawa tãma wapu na ma tô sasãmri za'ra, Zibea bâtâ pusizém niwĩ ro 're isa'wari mono ãma.

⁴⁴ Tawamhã dasi'wapéi 'manharĩ'wa Bẽzamihĩ nhihudu norĩ iwẽ isiptete norĩ hã ma tô ai'utõ, 18 miu na.

⁴⁵ Tawamhã isiré norĩ, ma tô sisa're, a'ubuni wi ropsi 're isa'wari mono wa'waibaba Rimo na ẽtẽ tõmo za'ẽtẽ nhisi u. Tane nherẽ, ma tô bâdâdi na hã 5 miu na ai'utõ. Tawamhã Izaraéu nhihudu norĩ ma tô isi'mairẽme zarina ai'aba'ré. Ãhã wa, 2 miu na ma tô siwi uprosi.

⁴⁶ Tawamhã Bẽzamihĩ nhihudu norĩ tô taha bâtâ na ma tô 25 miu na ai'utõ, uburé dasi'wapéi 'manharĩ'wa isib'ru si hã.

⁴⁷ Tane nherẽ, 600 na aibâ norĩ, a'ubuni wi ropsi 're isa'wari mono u ma tô aimani za'ra, ẽtẽ tõmo wawẽ Rimo na isisi u. Tahawa, maparane si'uiwa na a'amo na ma tô a'â tame tihâimana za'ra.

⁴⁸ Tawamhã Izaraéu nhihudu norĩ, ma tô Bẽzamihĩ nhihudu norĩ nhipti'ai u apâ sina siri za'ra. Tahawa, ma tô 'ri wa'õtõ mono bâ tinhi'wa na hã da'uprosi za'ra. Ãhã wa, ma tô duré abaze zama te te tiwi simro, uburé marĩ te te isõpẽtẽ za'ra mono norĩ hã. Tawamhã 'ri wa'õtõ na te te ro'rahâri za'ra mono sidâpâsi, ma tô uburé te te siwi ãma sazu za'ra mono.