Zuize 2 - ꞌRe Ihâimana Uꞌâsi Mono Zadawa Wasuꞌu

Uburé Danhib'apito ma hâiwa ãma romhuri'wa, Boqui na romnhisi u iwisizé wasu'u

¹ Tawamhã Uburé Danhib'apito ma hâiwa ãma romhuri'wa Gilga na 'ri nho'õmo nhisi hawi ma tô mo, Boqui na romnhisi u. Morĩ wamhã, ma tô Izaraéu nhihudu norĩ ma nharĩ za'ra ãne: — Wa hã wa tô Ezitu hawimhã asani za'ra wa'wa, aihi'rata norĩ wa'aba ma, ti'a na te tãma iropisutuzéb u, te asimroi wa'aba mono da hã. Tahawa, wa tô tinha ãne: “Niwamhã te aima iropisutu za'ra wa'aba zé hã te ĩsiwi sitob õ di za, 'ridawa haré.

² Ti'ai 're, a'uwẽ 're ihâimana siromo za'ra mono norĩ me marĩ na 're asisaze za'ra wa'aba mono õ di za. Te za ihâiba'õ norĩ ma, isimizama zatazéb za'ra hã tiwi 're iprub za'ra wa'aba mo.” Tane nherẽ, ãne na te aima inharĩ za'ra wa'aba zarina, marĩ asiwi 'manharĩ aba õ di. E marĩ wa bété, ãne na ĩmreme hã asiwi 'manharĩ aba õ di.

³ Tahawa wa za ãhã na aima nharĩ za'ra wa'wa. Ã hã a'uwẽ norĩ aihawi za'ra wa'aba te isani za'ra da hã, mare di za. Tahawa te za asitob'ru na aima 're hâimana za'ra wa'wa. Te za duré ite za'ra ihâiba'õ norĩ, abazei mramizém ne na te te 're i'aiwaibui wa'aba mono da hã asada 're hâimana za'ra wa'wa.

⁴ Tawamhã Uburé Danhib'apito ma, hâiwa ãma romhuri'wa ãne na te te tãma waihu'u za'ra parimhã, ma tô uburé Izaraéu nhihudu norĩ hã ti'ru'ru.

⁵ Tahawa romnhisi hã Boqui na. Tame ma tô Uburé Danhib'apito ma, danhimizama da te tãma 're izata za'ra mono zém na hã, duré tãma tinhoprub za'ra.

Zozué idâ'âzé wasu'u

⁶ Tawamhã Zozué, uburé Izaraéu nhihudu norĩ ma, oto si'aba'ré da, te te rob'rui wamhã, ma tô aibâ norĩ hã hâiba mono bâ misisi tite da ti'ai wa'õno hã te te sima waibu.

⁷ Tawamhã duré Izaraéu nhihudu norĩ, Zozué 're hâimana mono ré, ma tô Uburé Danhib'apito ãma si 're nomro. Duré oto dâ'â parim nherẽ, ma tô Uburé Danhib'apito ãma si 're inomro mono na ãma uzusi za'ra, dama i'rãnho'õmo norĩ zahadu 're hâimana za'ra mono ré hã, Izaraéu nhihudu norĩ ma, Uburé Danhib'apito nhimi'manharĩzé te te 're i'madâ'â za'ra mono norĩ hã.

⁸ Tawamhã Zozué, Nuhu 'ra, 'Re ihâimana u'âsi mono nhib'a'uwẽ ma tô oto dârâ, 110 na ãma iwahum na.

⁹ Tahawa, ma tô ãma ti'a ni, isipti'ai wa'õtõ wa, Timnate-Heré, Efraĩ na rowamri niwĩ ẽne 're ihâimana mono ãma, Ga'asi na ẽtẽ nhisi ãma hâiwa nhimi'e niwĩ.

¹⁰ Tawamhã a'uwẽ norĩ hã ma tô duré uburé pese we si'utõrĩ. Tahawa, a'uwẽ ité ma tô duré Uburé Danhib'apito ãma 're po're simrami za'ra, Izaraéu nhihudu norĩ ma, uburé marĩ te te 're i'ab'manharĩ mono zém na zama.

Izaraéu nhihudu norĩ, Uburé Danhib'apito wi isipizari za'ra zé wasu'u

¹¹ Tawamhã Izaraéu nhihudu norĩ, Uburé Danhib'apito wi, ma tô tiwasédé hã te te 're 'manharĩ za'ra. Ma tô duré cananeu norĩ te ihâiba'õ norĩ na ãma 're wata za'ra.

¹² Uburé Danhib'apito, tihi'rata norĩ te 'Re ihâimana u'âsi mono, Ezitu hawi te te isani za'ra na ãma 're iwata za'ra mono zém na hã, ma tô siwi tirẽ. Tahawa a'uwẽ iwaptoma ihâiba'õ norĩ ãma 're iwata za'ra mono zém na, ma tô oto dame ãma 're wata za'ra. Tawamhã ãne hã te te dame 're 'manharĩ za'ra mono wa, ma tô Uburé Danhib'apito sada 're siti'ru za'ra.

¹³ Tahawa, Uburé Danhib'apito ãma 're inomro mono zé hã ma tô misi haré siwi tirẽ. Ãhã wa, romhâibarĩ Baau ãma si, te oto 're wata za'ra, Asitaroti na isisi ãma zama.

¹⁴ Tawamhã Uburé Danhib'apito, Izaraéu nhihudu norĩ zada hã, ma tô tinhiti'rui pese. Tahawa, Izaraéu nhihudu norĩ waptoma 're ihâimana za'ra mono norĩ ma, ma tô sa'ré za'ra, te te nasi 'wapé za'ra da, duré te te nasi simi'uri za'ra da hã. Ma tô duré isitob'ru norĩ nhib'ratamhã tãma hâiba nhomri za'ra, a'uwẽ ibabarã na 're ihâimana za'ra mono norĩ ma. Tahawa tihâiba na hã te te oto dama ãma 're wa'rãmi waihu'u za'ra mono õ di.

¹⁵ Tawamhã 're si'wapé za'ra mono da, dazô 're wairébé mono sidâpâsi, ma tô Uburé Danhib'apito hã sada 're hâimana za'ra, te te ãma tãma iropisutu za'ra zéb zarina. Ãne wa, tãma 're ropire uptabi za'ra mono di.

¹⁶ Tahawa, Uburé Danhib'apito ma tô Izaraéu nhihudu norĩ ma, dama i'rãnho'u isiptede hã tãma sõmri za'ra, da'ãma rowairébé'wa na isisi norĩ hã, te te 're i'wapé za'ra mono norĩ wi, duré te te 're isimi'uri za'ra mono norĩ wi, te te 're isõ'reptu za'ra mono 'wa da hã.

¹⁷ Tane nherẽ, i'rãnho'õmo norĩ nhimiroti hã te te duré siwi 're wapari za'ra mono õ di. Tahawa 'Re ihâimana u'âsi mono te te siwi 're iwẽ'õ za'ra mono zém na hã ma tô te te ãma uzusi za'ra, romhâibarĩ ãma si 're wata u'âsi za'ra mono da. Imama za'ra mono si ma tô Uburé Danhib'apito mreme hã te te 're wapari pese za'ra aré. Tane nherẽ, te te oto siwi 're wapari pese za'ra mono õ di, isimiroti hã.

¹⁸ Tawamhã Uburé Danhib'apito, dama i'rãnho'u te te dama 're sõmri za'ra mono sidâpâsi, ma tô te te 're pawaptob za'ra. Duré dama i'rãnho'u we 're hâimana za'ra mono sidâpâsi, ma tô Uburé Danhib'apito, danhitob'ru norĩ wi hã te te 're da'anho'reptu. E marĩ wa, Izaraéu nhihudu norĩ ãma 're siwamri mono wa, te te 're irobzépata za'ra mono zém na hã, duré iwada'uri pese na da te 're iwati za'ra mono zém na.

¹⁹ Tane nherẽ, dama i'rãnho'u 're dâ'â za'ra mono sidâpâsi, ma tô we 're ihâimana 'rata za'ra mono zéb u apâ 're sipizari za'ra, timama norĩ hâimanazém nhipai u iwasété na. Tahawa ma tô romhâibarĩ ãma si 're nomro mono da hã te te sima 're wẽ za'ra. Ma tô duré ãma 're wata za'ra, ihâiba'õ norĩ ãma hã. Tahawa tipẽ'ẽ tete na 're ihâimana wasété za'ra mono zém na ma tô te te ãma 're uzusi za'ra.

²⁰ Tahawa Uburé Danhib'apito, Izaraéu nhihudu norĩ zada, sahi uptabi za'ra wa, te ãne tinha: — Ã hã a'uwẽ norĩ, ma tô ĩnhimiroti hã siwi upto, ihi'rata za'ra norĩ ma, te tãma i'ru za'ra hã te te siwi 're nomri pese mono da. Ã norĩ, ĩnhimiroti te te siwi 're wapari mono õ wa,

²¹ ã hã ti'ai hawimhã a'uwẽ mono bâ te tãma isani za'ra da hã mare di za, Zozué dâ'â wa, te te isate mono õ hã.

²² Ãhã u'âbâmhã wa za Izaraéu nhihudu norĩ hã a'â te 're 'madâ'â za'ra, sena na ĩte bâdâdi na ãma 're inomro mono zô, ihi'rata norĩ hã ãma 're inomro mono ne zô.

²³ Ãne ma tô Uburé Danhib'apito, a'uwẽ norĩ ma, waprosi za'ra, ti'ai 're a'â tô 're hâimana za'ra mono da. Tahawa õne haré awa'awi te te sani za'ra õ di, Zozuéhé ma, a'uwẽ mono bâ te te tãma isõmri za'ra õ ãma hã.