Zuize 18 - ꞌRe Ihâimana Uꞌâsi Mono Zadawa Wasuꞌu

Dãhã nhihudu norĩ wasu'u, Micaha wasu'u me

¹ Taha wahub 'remhã Izaraéu nhihudu norĩ nhib'apito, 're 'maihâimana mono õ di. Tawamhã taha ré, te Dãhã nhihudu norĩ hã ti'a zô sima sõpré, tite uptabi da, te te sima 'masãmri za'ra wa, iwa 're hâimana za'ra mono da. E marĩ wa. Zahadu Izaraéu nhihudu hâiba amo norĩ siré, tite ti'a da hã te te sima dame 'mai'âri za'ra õ wa.

² Tahawa Dãhã nhihudu norĩ, ma tô uburé tite za'ra a'uwẽ 'remhã 5 na aibâ isi'wapé waihu'u pese norĩ hã siwi pisutu za'ra. Tawamhã ta norĩ hã ma tô 'rinho'u Zora hawi, duré 'rinho'u Esta'o hawi si'aba'ré da, satõrĩ za'ra, ti'a te te siwi waihu'u da, te te 'maiwapsãi'a za'ra da hã. Tawamhã ta norĩ, Efraĩ ti'ai ãma ẽne 're ihâimana mono u oto sihutu wamhã, ma tô Micaha nhorõwa u ai'aba'ré, tame ãma awẽ za'ra da.

³ Tawamhã si'ubumroi ré, ma tô aibâ iprédupté levita norĩ siré tame 're isãmra mono mreme te te iwapari za'ra hã, siwi mremei hu'u. Tahawa 'râwi itẽme te te sina rotété za'ra wamhã, ma tô ãne siwi sadanha: — E marĩ te ãmemhã i'manha. Duré e 'wa hã ma tô we ãwamhã asaprõ.

⁴ Tawamhã iprédupté, Mica te te tãma i'manharĩzé hã ma tô tãma wasu'u za'ra ãne: — Ta hã ma tô ĩnhe, ite sasedoti na tãma 're ĩhâimana mono da.

⁵ Tahawa, te iprédupté ma nharĩ za'ra ãne: — Ma'ãpé 'Re ihâimana u'âsi mono sadanharĩ, rowẽ na za iwasi'aba'réi wẽ zém na hã apâ bâdâdi na.

⁶ Tawamhã sasedoti, ma te ãma sada'âbâ za'ra ãne: — Asina aihâtâ'â za'ra wa'aba tõ. Uburé Danhib'apito, apâ i'ai'aba'réi wa'aba zé bâtâ na hã te za asiré tihâimana za'ra wa'wa.

⁷ Tawamhã ãne pari 5 na aibâ norĩ ta hawimhã ma tô oto wairé. Tahawa, ma tô ai'aba'ré, 'rinho'u Laisi na isisi u. Tawamhã tamomo oto sihutu wamhã, ma tô tame dasima iwẽ na 're idahâimana za'ra mono zém na hã 'madâ'â za'ra, sidõniu norĩ 're ihâimana za'ra mono sine hã. Ta norĩ hã te sima iwẽ na, atãma na, duré ni'wa te te 're 'wapé za'ra mono ãna 're hâimana za'ra. Ta norĩ ma te uburé marĩ tãma 're hâimana za'ra, marĩ zô tiwi 're rowaptâ'â za'ra mono ãna. Te duré sidõniu norĩ nhiti romhâ na 're hâimana za'ra. Duré tisiré a'uwẽ'õ norĩ nhiti, te romhâ na 're hâimana za'ra.

⁸ Tawamhã 5 na aibâ norĩ, Zora u, duré Esta'o u apâ te te sina siri za'ra wamhã, ma tô isiré a'uwẽ norĩ sadanharĩ za'ra, marĩ hã te te siwi i'upsibi me za'ra zém na hã.

⁹ Tahawa, ma te ãma sada'âbâ za'ra ãne: — Oto wa te wasiwi wano'õ wa'aba! Ti'a hã wa tô wasiwi 'madâ'â ni, iwẽ uptabi na! Pra! E niha! Asirési su'u za'ra wa'aba! Airési ãna ai'ubumroi wa'aba tõ! Sa'ẽtẽ waptu na ma'ãpé ai'aba'réi wa'aba, ti'a hã asiwi âri aba hâ!

¹⁰ Õmemhã te za a'uwẽ isimi'umnhasi wẽ hã i'madâ'â za'ra wa'wa. Ta norĩ nhipti'a hã sa'ẽtẽ uptabi di. Taha 'remhã marĩ zô rowaptâ'â waihu'u õ di. Ã hã ma tô 'Re ihâimana u'âsi mono hã asib'rata aima sõmri za'ra wa'wa.

¹¹ Tawamhã Dãhã nhihudu norĩ, Zora hawi duré Esta'o hawi, ma tô 600 na aibâ norĩ ihâiba na wairé, simnhi'ãsi ré si'wapé za'ra da.

¹² Oto si'aba'réi wamhã, ma tô 'ri nho'u Quiriate-Zearĩ bâtâ zasizém niwĩ sima 'ri nhoré za'ra, Zuda ti'ai 're ihâimana ãma. Tahawa ta hã romnhisi te zahadu ãhã na zama da te ãma 're rowamri za'ra, Ma'ane-Dã na.

¹³ Tawamhã ta hawi Efraĩ ti'ai 're ẽne ihâimana u si'aba'réi wamhã, ma tô oto Micaha nhorõwa u aihutu.

¹⁴ Tawamhã 5 na aibâ norĩ, Laisi ãma ti'a te te siwi sabu da, isi'aba'ré norĩ hã te ãne tisiré norĩ ma nharĩ za'ra: — E ma tô asiwi iwaihu'u 'wa, wede na romhâibarĩ ẽtẽ waipo prã prata na ihâiba upsibi ré, ã hã 'ri're 're isa mono na hã, duré ihâiba amo norĩ romhâibarĩ iwa 're isimasa mono na hã, sasedoti si'uzazé ihâ pa ihâimana na hã. E niha te bété ã norĩ na ãma irob'madâ'â za'ra wa'wa, za marĩ, wa te tãma i'manharĩ za'ra zéb da na hã.

¹⁵ Tawamhã Micaha nhorõwa u, levita norĩ siré iprédupté 're isãmra mono zéb u ma tô asisi. Sisisi wamhã, ma tô iprédupté hã siwi sawi.

¹⁶ Taha ré, Dãhã nhihudu norĩ 600 na dasi'wapéi 'manharĩ'wa norĩ 'ridawa za'ẽtẽ ãma ma tô simire sina mapari za'ra.

¹⁷ Tawamhã 5 na ihâiba na robzabui'wa norĩ hã ma tô 'ri para u asisi. Tahawa, wede na romhâibarĩ ẽtẽ waipo prã prata na ihâiba upsibi hã ma tô siwi ti'â. Tawamhã duré ihâiba amo romhâibarĩ norĩ hã ma tô siwi waibu, sasedoti si'uzazé me. Ãhã ré, ma tô 600 na dasi'wapéi 'manharĩ'wa norĩ simnhi'ãsi ré, sasedoti siré hã 'ridawa za'ẽtẽ ãma mapari za'ra.

¹⁸ Tawamhã aibâ norĩ, Micaha nhorõwa u sisisi wamhã, ma tô romhâibarĩ norĩ, tãma iwazéb zahi za'ra hã sasedoti si'uzazé me hã siwi waibu za'ra. Tahawa, te sasedoti sadanharĩ za'ra ãne: — E marĩ te asiwi i'manharĩ 'wa.

¹⁹ Tawamhã ma te asa ãma sada'âbâ za'ra ãne: — Ari'iwi asãmra. Nharĩ tõ. We wasiré aimorĩ za'ra na, sasedoti na duré wama roti'wa na wama 're aihâimana za'ra mono da. E aima hã wẽ õ di bété, nima norĩ Izaraéu nhihudu norĩ ma, misi haré sasedoti na 're i'aihâimana mono da hã, misi aibâ nhib'a'uwẽ ma si sasedoti na 're i'aihâimana mono zéb upana.

²⁰ Tawamhã ãne te te tãma waihu'u wa, sasedoti ma hã rowẽ di. Tahawa romhâibarĩ norĩ iwazéb zahi za'ra hã sasedoti si'ubuzé ihâ pa me ma tô waibu. Taha pari ma tô duré oto mo, dama wapsãi'a'wa norĩ siré, duré dasi'wapéi 'manharĩ'wa norĩ siré.

²¹ Tawamhã ta norĩ tirob u apâ si'ãsi za'ra da hã, ma tô ai'uté norĩ, powawẽ norĩ hã duré tinhimarĩ hã danhowamhã sõré za'ra. Taha pari ma tô oto ai'aba'ré.

²² Tawamhã oto Micaha nhorõwa ma sapri'i za'ra wi, ma tô Mica isõrõwa waptoma 're idasi'ubumroi mono norĩ hã sima ubumro, Dãhã nhihudu norĩ zada. Tahawa, isarina oto si'aba'réi wamhã ma tô siwi sasãmri za'ra.

²³ Tawamhã Dãhã nhihudu norĩ we isarina isi'aba'réi hârâ te te wapari za'ra wa, ma tô sô aipizari za'ra. Tahawa, ma tô Mica siwi sadanha ãne: — E niha romhâimana bâ. E marĩ da, ã hã ida'ahâ hã.

²⁴ Tawamhã Mica, ma te asa ãma sada'âbâ za'ra ãne: — E niha te romhâimanazéb zô asiwi ĩzadanharĩ 'wa. A norĩ wa'wa, ma tô romhâibarĩ, te i'manharĩ hã asiwi i'wasari 'wa. Duré sasedoti te te ĩma 're iromhuri mono hã ma tô asiwi isaprõni 'wa. Ã norĩ za'u hã e marĩ ma tô ĩma si'mairẽ.

²⁵ Tawamhã Dãhã nhihudu aibâ norĩ, te ãne tãma nharĩ za'ra: — Wẽ di, aimreme na wa'upi za'ra tõ da hã. Ãnei õ wamhã, te za aibâ i'rãiwa'ro su'u norĩ hã asada tizahi pese za'ra wa'wa. Tawamhã te za ta norĩ airési za'ra wa'wa za. Ãne wamhã, te za duré uburé asib'a'uwẽ norĩ me hã ai'utõrĩ 'wa.

²⁶ Tawamhã ãne te te tãma nharĩ za'ra pari, ma tô Dãhã nhihudu norĩ hã timorĩ na uzusi za'ra oto. Ãhã wa, Mica, siptete uptabi na te te 'madâ'â waihu'u za'ra wa, ma tô õne haré 'ri u hã aipi'ra.

²⁷ Tawamhã Dãhã nhihudu aibâ norĩ, ma tô Mica marĩ te te i'manharĩ za'ra hã siwi 'wasa. Sasedoti te te tãma 're iromhuri mono zama ma tô duré siwi saprõ. Tawamhã ma tô oto ai'aba'ré, Laisi u, tô õ hã 'ri nho'õmo ãma dasima iwẽ na, duré atãma 're idahâimana za'ra mono zéb u. Tahawa, ma tô iwa 're idarob za'ra mono norĩ hã siwi uprosi. Ma tô duré 'ri nho'õmo ãma hã siwi ro'o.

²⁸ Tahawa, ni'wa hâimana õ di, ã hã a'uwẽ norĩ te te isõ'reptu za'ra da hã. E marĩ wa. Laisi hã, Sidõ nhiti romhâ na 're hâimana mono wa. Duré ta norĩ, a'uwẽ aimawi me hã 're sisadawa pibu za'ra mono õ di. Taha 'rinho'u hã, Bete-Reobe na 'ri wa'õtõ 'rata ẽtẽ nhi'riti wa romharé wamhã, ma tô 're hâimana. Tawamhã Dãhã nhihudu norĩ, ma tô apâ Laisi na 'ri nho'õmo nhisi hã siwi 'ri, tame iwa 're hâimana za'ra mono da hã oto.

²⁹ Tahawa, ma tô 'rinho'u hã siwi sisi, Dã na. E marĩ wa. Ãne rob're pu'u'wa norĩ hi'rata nhisi 're hâimana mono wa, Zacoho 'ra hã.

³⁰ Tawamhã Dãhã nhihudu aibâ norĩ ma tô romhâibarĩ hã oto sima sãrĩ za'ra, hâiwi sab da, ãma 're iwata za'ra mono zéb da hã. Tawamhã duré Zonata, Gésõhõ 'ra, Mozésihi nhihudu ma tô sasedoti na Dãhã nhihudu norĩ ma tãma 're hâimana za'ra. Ta hã isihudu norĩ me ma tô Dãhã nhihudu norĩ ma sasedoti na hã te te tãma 're romhuri za'ra, ãma danhib'a'uwẽ za'ra da, da te waibui wa, isipti'a za'ra hawi da te isimroi mono zéb u.

³¹ Tawamhã duré Mica, romhâibarĩ te te i'manharĩ hã ma tô õ norĩ 'ratamhã 're sa, Silo ãma 'Re ihâimana u'âsi mono nhorõwa hã 're sa mono ré.