Zuize 17 - ꞌRe Ihâimana Uꞌâsi Mono Zadawa Wasuꞌu

Micaha te, romhâibarĩ wasu'u

¹ Tawamhã Mica na aibâ nhisi hã te 're hâimana, Efraĩ ti'ai ãma ẽne 're ihâimana mono ãma.

² Tawamhã ta hã te tina ma tinha ãne: — Nimahã na ate 1.100 na ẽtẽ waipo prã prata isapotore, da te aiwi simi'uri za'ra wamhã, ma tô a hã isimisaihuri ma, iwẽ'õ hã tãma ipisu. Ãne na wa hã wa tô wapa. Tane nherẽ, i'uptabi na hã te ẽtẽ waipo prã prata ĩ'ratamhã nomro. Wa hã wa tô ti'â. — Ĩ'ra, Uburé Danhib'apito iwẽ si te te tô aima 're ipisutu mono da si, ĩma wẽ di!

³ Tawamhã tina ma apâ 13 kilu na ipire pibuzém na prata isapotore te te tãma sõmri wamhã, te ãne ina tãma tinha: — Ĩ'ra, iwẽ'õ pisudu asisiwi hâimana tõ da hã, wa za ã hã prata na Uburé Danhib'apito ma ãma ĩnhopru. Tawamhã taha na te za wede na romhâibarĩ hã i'manha za. Duré ã hã ẽtẽ waipo prã prata na te za tô ãma ihâiba 'manharĩ upsibi mo, hâ su'u da. Tahawa wa za ãhã na apâ prata hã aima tisõ.

⁴ Tane nherẽ, i'ra ma te apâ prata tina ma hã tisõ. Tawamhã ina ma tô 200 na isapotore hã isi'uwazi na marĩ 'manharĩ'wai ma hã tisõ. Tawamhã ta hã wede na romhâibarĩ hã ma tô 'manha. Taha pari, ma tô duré tô ẽtẽ waipo prã prata na te te ãma hâiba 'manharĩ upsibi, hâ su'u da. Tawamhã ta hã Micaha nhorõwa ãma te oto za, romhâibarĩ hã.

⁵ Tawamhã Mica, 'ri marĩ na 're iwata mono zéb da hã ma tô 'manha. Tawamhã romhâibarĩ ihâiba amo norĩ ma tô duré 'manharĩ za'ra. Duré sasedoti si'uzazé ihâ pa zama ma tô 'manha. Tahawa, ti'ra ite sasedoti na tãma 're hâimana mono da hã, ma tô pisutu.

⁶ Tawamhã Izaraéu nhihudu norĩ nhib'apito hã 're 'maihâimana mono õ di. Tahawa, hâiba mono bâ marĩ, te te sima 're iwẽ za'ra mono zéb zarina si, ma tô te te sima 're 'manharĩ za'ra.

⁷ Tahawa, aibâ iprédupté te Belẽ ãma niha bâtâ na hã a'â tihâiba, Zuda ti'ai 'remhã. Ta hã levita.

⁸ Tawamhã ta hã ma tô oto ta hawimhã watobro, za 're isãmra mono zéb zô, sima 're rĩtĩ mono da. Tawamhã ta hawi oto morĩ wamhã, ma tô oto Micaha nhorõwa u hã wi, Efraĩ ti'ai ãma ẽne 're ihâimana mono u.

⁹ Tawamhã te Mica sadanha ãne: — E ma hawi te we aimo. Tawamhã aibâ iprédupté ma te ãne sada'â: — Wa hã levita norĩ siré hã, Belẽ hawimhã, Zuda na danhipti'a nho'õmo nhisi hawimhã, wa tô rob zô hã we ĩsima 're ĩrĩtĩ, iwa 're ĩhâimana mono zéb da hã.

¹⁰ Tawamhã Mica te tãma tinha ãne: — Ãme ĩ'rata 're asãmra mono, ĩma roti'wa na duré sasedoti na ĩma 're aihâimana mono da. Tawamhã 10 na ẽtẽ waipo prã prata, da'uza hã duré dasa hã wahup sidâpâsi wa za te aima 're anhomri.

¹¹ Tawamhã levita norĩ siré iprédupté, ma tô Mica hã sina saze, za isiré 're ihâimana mono zém na. Tawamhã i'ra ne ma tô oto tãma hã 're hâimana.

¹² Ãne Mica tite sasedoti da, te te pisutu wa, ma tô oto iprédupté isõrõwa ãma 're sãmra.

¹³ Tawamhã te ãne Mica hã tinha: — Ĩma waihu'u di awa'awi na hã, Uburé Danhib'apito za marĩ iwẽ te te ĩma 're i'manharĩ mono zéb na hã, ĩte sasedoti levita norĩ siré hã ĩma 're 'maihâimana mono wa oto.