Zuize 15 - ꞌRe Ihâimana Uꞌâsi Mono Zadawa Wasuꞌu

¹ Tawamhã wahu si'utõrĩ mono pari, Sãsã, amnho trigu, da te itehâri mono siré, ma tô timro te te sabu da hã mo. Tahawa, ma tô pone'ẽrebâ zéré uzé 'ra si'aibâ hã tãma ti'â. Tawamhã te imama ma tinha ãne: — Ĩmro nhimiwaptâ u ĩzébré da wa ĩsima wẽ. Tane nherẽ, imama hã te te tãma sa'ré õ di.

² Tahawa, ma te ãne ãma sada'â: — Wa tô aré ai'ãma rosa'rata zahi, ĩ'ra hã asiwi wẽ'õ pese newa. Duré tahawa, wa tô aré asiwaihu'u ma tãma tisõ, ãma mro da. Tane nherẽ, ino si isipai u hã iwe uptabi, duré i'madâ'â zei uptabi. Tahawa, õhõ si asima wẽ wamhã, tô aima hâimana isõwa're're.

³ Tawamhã Sãsã te asa tãma tinha ãne: — Ãhã na hã ni'wa niha na marĩ na te te ĩ'uptob da mare di, za filisteu norĩ nhimi'manharĩzé wa'rãmi i'uwaibaba na, wa hã te tãma i'manharĩ za'ra zém na hã.

⁴ Tahawa 300 na wapsã wawẽre zô, ma tô te te aba. Tawamhã te te awaibui mono wamhã, maparane si'uiwa na ma tô isamo mono bâ te te ãma awasisi. Taha pari ma tô duré 'rãsitõ tô ta isamo mono na hã te te ãma awasisi.

⁵ 'Rãsitõ na hã ma tô oto te te ãma azazu. Tahawa, ma tô wapsã wawẽre norĩ hã iré te te wano'õ oto, filisteu norĩ amnho trigu te te 're izuri mono u iré sisa'rei mono da. Tawamhã trigu te te itehâri za'ra mono na si te te ãma tiwi ro'o za'ra mono õ di. Zahadu daburu na hâiwi isimasa mono na zama ma tô te te ãma tiwi sazu za'ra. Tahawa, oriwera wede na rob're zama ma tô te te ãma tiwi ro'o za'ra.

⁶ Tawamhã filisteu norĩ te ãne ãma sisadanharĩ za'ra: — E 'wa, ma tô ãne hã 'manha. Tawamhã Sãsãhã wi, imaprewa, imro te te apâ tiwi i'âri, isiwaihu'u ma, te te tiwi tãma isõmri zarina, te te ãne i'manharĩzém na hã ma tô siwi waihu'u, filisteu norĩ hã. Tahawa ta norĩ hã ma tô Sãsãhã mro na aré tãma ihâiba hã imama me unhama na siwi ãma ro'o zahuré, hâiba ré.

⁷ Tawamhã Sãsã te tãma nharĩ za'ra ãne: — Ãne hã 'manharĩ za'ra wa'aba ze te bâ, ĩsima iwẽ na ĩzahâ na ĩwa'utu da hã mare di za, aihâiba za'ra wa'aba na te 'ruiwa'âbâ zahuré õ ré hã.

⁸ Tawamhã sahi sina ma tô a'wapé. Ãhã wa, ma tô ahâ uptabi na uprosi. Taha pari oto watobro wamhã, ma tô mo, ẽtẽ na ab're Etã na romnhisi ãma ihâimana u.

Sãsã, Filisteu norĩ ãma te te i'ai'uté za'ra zé wasu'u

⁹ Ãhã wa, filisteu norĩ ma tô ai'aba'ré, Zuda u, tame te te sima 'ri nhoré mono da. Tahawa, ma tô Lei na 'ri nho'õmo nhisi hã siwi rési.

¹⁰ Tawamhã aibâ Zuda ãma 're ihâimana za'ra mono, te filisteu norĩ hã sadanharĩ za'ra ãne: — E marĩ da, te wei wazô ai'aba'réi wa'wa, asiwi wawano'õ aba da hã. Tawamhã ma te ãma sada'âbâ za'ra ãne: — Wa we sô ai'aba'ré ni Sãsãhã zô, pawasisi ré, wa te wasiwi saprõni da, marĩ te te wama i'manharĩ za'ra zém ne, asa marĩ hã wa te tãma 'manharĩ za'ra da.

¹¹ Tawamhã aibâ Zuda ãma hã 3 miu na Sãsãhã ma, te te nharĩ za'ra da hã, ma tô itẽmemhã ai'aba'ré, Etã ãma ẽtẽ na ab're ihâimana u. Tahawa, te ãne tãma nharĩ za'ra: — E aima waihu'u ã bâ, filisteu norĩ te te wama 're irob'ru za'ra mono na hã. E marĩ wa, ma tô ãne hã wama i'manharĩ za'ra. Tawamhã Sãsã, ma te ãne ãma tãma wa'rãmi za'ra: — Õ norĩ hã marĩ te te ĩma i'manharĩ za'ra zéb zarina si, wa tô tãma 'manharĩ za'ra asa.

¹² — Taré, wa te tô wasiwi aipaihi wasisi da si, wa we ãwamhã asô ai'aba'ré ni, taha pari filisteu norĩ ma, wa te wasiwi asõmri da, isib'ratab za'ra. — Ãne te duré tãma nharĩ za'ra asa. Tawamhã Sãsã, ma te ãne duré ãma sada'âbâ za'ra: — Ma'ãpé a norĩ wa'wa asiwi ĩwĩrĩ aba tõ da hã ĩma ropisutu za'ra wa'aba.

¹³ — Wa za tô ropisutu za'ra ni aima! Ãne ma te duré ãma sada'âbâ za'ra. — Taré wa za tô wasiwi aipaihi wasisi ni, filisteu norĩ ma, wa te wasiwi asõmri da isib'ratab za'ra. Wa te wasiwi aiwĩrĩ õ di za tô. Tawamhã maparane wedenhorõ isõrõ tém na ma tô siwi pawasisi. Taha pari ẽtẽ na ab're hawimhã ma tô oto siwi waze.

¹⁴ Tawamhã Sãsã, Lei u oto te te siwi ãwisi wamhã, ma tô filisteu norĩ hârâ 'rãihâ sina itẽmemhã ai'aba'ré, te te siwi sõpẽtẽ da. Tane nherẽ, Uburé Danhib'apito pẽ'ẽzani, ma tô Sãsã siptete na hâimana da hã iwa tihâiba. Tahawa ma tô wedenhorõ tinhimizu wasisizé hã duré tinhib'rata waprezé hã sina sõrõ rĩ zahuré, unhama na abazi nhorõ 'rare zata ne tãma hã.

¹⁵ Tahawa, ma te duré tame awaru po'repore idâ'â 'wa'ratahi ité inomro hã tisã. Tawamhã taha 'wa'ratahi te te sada i'âri za'ra na ma tô miu na aibâ norĩ hã uprosi.

¹⁶ Taha pari te duré ãne tinha: “Awaru po'repore 'wa'ratahi na wa tô miu na aibâ norĩ hã uprosi. Duré tô awaru po'repore 'wa'ratahi na wa tô dahâiba isa'wari 'rãihâ pe hã 'manha.”

¹⁷ Tawamhã ãne te te nharĩ pari, ma tô oto awaru po're pore 'wa'ratahi hã time. Tahawa ta hã ro hã Ramate-Lei na ma tô dasiwi sisi ni.

¹⁸ Tawamhã Sãsãhã ma 'rubu uptabi di. Tahawa ma tô Uburé Danhib'apito ma mre ãne: — A hã ma tô ĩma isõ, te da'ãma i'ai'utézé iwẽ uptabi hã. E ãhã nherẽ, 'rubu te, ĩdâ'â da hã te za ĩrẽ, ã hã a'uwẽ isihâiwata nhihâri'õ norĩ nhib'rata duré ĩwaptã'ã da hã.

¹⁹ Tawamhã 'ri nho'u Lei na isisi ãma 'Re ihâimana u'âsi mono, ma tô ab're hã 'ridawa. Tawamhã ta hawi, ma tô â hã puru tãma. Tawamhã Sãsã, ta hã â te te zâ'rẽne wamhã, ma tô apâ tãma i'rem nomro. Duré siptete di apâ. Tawamhã ta â pu'uzém nhisi hã En-Hacoré na ma tô da te 're wamri za'ra. Ta hã te ãhã na zama zahadu 're pu'u u'âsi.

²⁰ Tawamhã Sãsã, Izaraéu nhihudu norĩ ma, 20 na ãma iwahum na i'rãnho'õmo na ma tô 're sa, ti'a filisteu norĩ nhimi'madâ'â na 're hâimana mono ré.