Zuize 14 - ꞌRe Ihâimana Uꞌâsi Mono Zadawa Wasuꞌu

Sãsã imrozé wasu'u

¹ Tawamhã Sãsã, ma tô 'rinho'u Timna na isisi u tihâimanazém hawimhã si'ra. Te te si'rai wamhã, ma tô tame azarudu filisteu nhipi'õ hã 'mai'madâ.

² Tahawa 'ri u apâ te te sina siri wamhã, ma tô timama ma, duré tina ma wasu'u ãne: — Timna ãma wa tô filisteu nhipi'õ azarudu iprédupté hã 'madâ. Tahawa, ma'ãpé ĩma waptẽrẽ aba, ãma ĩmro da.

³ Tane nherẽ, imama norĩ, ina me hã ma tô ãne ãma sada'âbâ zahuré: — E marĩ da, ma tô filisteu nhipi'õ zô si asima i'aba mo, isihâiwata nhihâri'õ norĩ wa'wab zô. E bété wasiré a'uwẽ norĩ 'remhã wasiwadi norĩ nhipi'õ asima 'masãmri da hã asima 'maiwẽ õ di, ãma i'aimro da hã. Tawamhã Sãsã, te duré timama ma tinha ãne: — Õ hã azarudu wa tô ĩsima wẽ pese. Õhõ si ĩma iwẽ uptabi hã.

⁴ Tawamhã imama norĩ, ina me hã te te waihu'u zahuré õ di, Uburé Danhib'apito te te tãma iwaihu'uzéb zarina, Sãsã za ãne na marĩ te te i'manharĩzé hã. Tawamhã 'Re ihâimana u'âsi mono hã ma tô tãma rĩni, filisteu norĩ te te i'a'wapé da zô, tô taha bâtâ na Izaraéu nhihudu norĩ, nhib'rata 're hâimana za'ra mono wa.

⁵ Tawamhã Sãsã, timama me, duré tina me, Timna u hã ma tô mo. Tahawa Timna 'rata uwa 'ru rob're u te te sina rotété za'ra wamhã, ma tô hu'u zérépa iprédupté isõ'õmoi baba wairõ sina we sô tipraba.

⁶ Tane nherẽ, Uburé Danhib'apito pẽ'ẽzani, Sãsã siptete na hâimana da hã, ma tô tãma tisõ. Tahawa tinhib'rata na si nherẽ, ma tô Sãsã, hu'u zérépa hã te te sinarĩ, pone'ẽrebâ zéré uzé 'ra nhi, da te 're isinarĩ mono ne. Tane nherẽ, timama norĩ ma, tina me hã te te tãma wasu'u zahuré õ di, niha na tãma iromhâimana zarina te te i'manharĩzé hã.

⁷ Tawamhã azarutu ma, te te robzanhamri da, ma tô mo. Tahawa, ma tô sima wẽ pese.

⁸ Tawamhã duré suru na bâdâ ãma morĩ pari, ma tô apâ isõrõwa u mo, ãma mro da hã oto. Tawamhã hu'u zérépa te te iwĩrĩ te te 'madâ'â da, ma tô bâdâdi hawimhã apa. Tahawa, te te iwĩrĩ hâiba nhisiwi, mohõnire 're isisa'rei mono hã duré ipĩ ihâiba 're te te 'madâ'â wamhã, ma tô tãma a'rã.

⁹ Tawamhã tinhib'rata na ma tô ipĩ hã sima 'maiwaze. Taha pari ma tô oto duré mo, bâdâdi na te te upsõmri mono sina. Tawamhã imama norĩ, ina me ihâimana zahuré zéb u oto wisi wamhã, ma tô ipĩ hã suru na tãma sõmri zahuré. Tahawa, ma tô duré imama norĩ, ina me hã upsõmri zahuré si'u. Tane nherẽ, te te tãma wasu'u zahuré õ di, hu'u zérépa dâ'â hâiba hawi mohõnire pĩ te te iwazere na hã.

¹⁰ Tawamhã Sãsãhã mama, azarutu nhorõwa u ma tô mo. Tahawa, tame Sãsã dato isa'ẽne hã ma tô 'manha, ihâiba tém norĩ sina 're mro za'ra mono wa, dasa isa'ẽne te te sima 're i'manharĩ za'ra mono zéb zarina.

¹¹ Tawamhã filisteu norĩ ãne na te te 'madâ'â za'ra wamhã, ma tô ai'reputu norĩ 30 na itẽmemhã te te siwi simro, isiré dato isa'ẽtẽ na te te sima rowẽ za'ra da.

¹² Tawamhã ãne te Sãsã tãma nharĩ za'ra: — Marĩ sõ'awib'õ hã te ĩma tihâiba, te aima wasu'u za'ra wa'aba wa, pé ãma ĩwi uwaimrami za'ra wa'aba da, aimreme na hã. Tawamhã dato isa'ẽne dasina damrozém na bâdâ hã 7 na si'utõrĩ õ ré, i'uwaibaba na ãma ĩzada'âbâ za'ra wa'aba wamhã, wa hã wa za aima sõmri za'ra wa'wa za, 30 na da'uza ihâi wẽ hã, duré 30 na da'uza hâpa ihâi baihâire na hã, aihâiba mono bâ wa'aba.

¹³ Tawamhã ãma ĩzada'âbâ waihu'u za'ra wa'aba õ wamhã, te za ĩma isõmri za'ra wa'wa za, 30 na da'uza hã, duré 30 na da'uza hâpa ihâi baihâire na hã. Tawamhã asa ma te ãma sada'âbâ za'ra ãne: — Pé tô wama wasu'u za'ra na, asi'repsi marĩ isa'rese'õ aima ihâiba hã. Wa za ãma wasiwi aiwapari ni za, marĩ iwaihu'uzém na hã.

¹⁴ Tawamhã Sãsã te tãma nharĩ za'ra ãne: “Te te 're ida'masi mono hawimhã, ma tô dasa hã watobro. Duré isiptete hawimhã ma tô marĩ isei uptabi hã watobro.” Tane nherẽ, si'ubdatõ bâdâ imorĩ 'remhã te te zahadu siwi upsibi mei õ di, marĩ te te iwasu'uzé hã.

¹⁵ Tawamhã maparane si'uiwa na bâtâ ãma te Sãsãhã mro ma hã tãma nharĩ za'ra ãne: — Ma'ãpé aimro hã 'wapé na, te te aima wasu'u da, si'rep si isa'rese'õ ré ihâimanazé hã, te te aima hâi'ré da. Ãne hã marĩ tãma 'manharĩ õ wamhã, wa za aimama nhorõwa na airé ãma wasiwi sazu ni, ai'utõrĩ aba da. E taré bété wa'ãma asimisaihuri aba da si, ma tô wazô hã aihãsi 'wa.

¹⁶ Tawamhã Sãsãhã mro, te ãne wawa sina tãma tinha: — Aima ĩzawi õ di! Ma tô ĩzada hã asiti'ru! Duré a hã ĩsiwaihu'u norĩ ma, tiha sõ'awi ihâimana'õ isa'rese'õ na tãma nharĩ za'ra nherẽ, duré ĩma hâi'ré õ di, tiha te te iwasu'uzé hã. Tawamhã ma te ãma sada'â ãne: — Ta hã duré ĩmama norĩ ma, ĩna me te tãma wasu'u zahuré õ di! E marĩ wa, te bété ĩ'ãma irosa'ra, te aima wasu'u da hã.

¹⁷ Tawamhã 7 bâtâ 'remhã dato isa'ẽtẽ 'rãsutu u hã ma tô duré nasi aiwa'õ. Tahawa, 7 bâtâ ãma pi'õ te te nasi tãma 'ru zadawa za'réi õ wa, ma tô oto iwasu'uzé hã tãma hâi'ré. Ãhã wa, awa'awi ma tô imro, tisiwaihu'u norĩ ma oto tãma wasu'u za'ra.

¹⁸ Tawamhã 7 bâtâ ãma bâdâ sébré wana ré, 'ri nho'õmo ãma aibâ 're ihâimana za'ra mono norĩ hã ma tô Sãsãhã ma nharĩ za'ra ãne: “E marĩ merẽ isei uptabi, ropĩni nhipai u hã. E marĩ duré isiptete uptabi, hu'u zérépa nhipai u hã.” Tawamhã Sãsã, ma te ãma sada'âbâ za'ra ãne: — Ĩte powawẽ sipi'õ na ãma asiwi ti'ai hâipo'o za'ra wa'aba õ 'wa'âhã, aré asiwi upsibi mei waihu'u aba õ di, aima iwaihu'u za'ra wa'aba õ hã.

¹⁹ Tawamhã Uburé Danhib'apito pẽ'ẽzani, ma tô Sãsãhã nhiptetezé hã tãma tisõ, siptete na hâimana da. Taha pari, ma tô Asquerõ na 'ri wa'õtõ nhisi u hã si'ra. Tamomo te te si'rai wamhã, ma tô tame 30 na aibâ norĩ hã uprosi. Tawamhã da'uza ihâi baihâire na ãma 're isi'uza za'ra mono zé hã ma tô tiwi sani za'ra. Tahawa, ma tô ipréduptém norĩ marĩ isa'rese'õ na i'uwaibaba na te te ãma isada'âbâ za'ra ma hã tãma sõmri za'ra. Taha pari ma tô timama nhorõwa u hã oto mo, marĩ tãma ihâimana zarina sahi sina.

²⁰ Tawamhã Sãsã, mro da wa, isiré aibâ ihâimana u'âsi ma, ma tô imro hã tãma sõmri ni, taha ma.